Luku 8

Tasema se'i mimulimulinu Iesua

1Ioxe, Iesua muxolu xe maxuveni uasi la musoko'u so muxixao no taotaoni xe tuatuala so ulanu vaikala laixe so voxo ane Mosinge molu u'uli laxune'i tamitemaou. La tatisaipeliou 12 a oli'a mixixao mikei. 2Mo oli'a tasema se'i ane tei la mukusai'a ta'angelo tamasua mixolu noxi'a xe se'i ane mupaipoune'i no anu siki noxi'a. Vile ualasie lexe Malia e ilemele lexe Malia so Makatala. Sema ne tei la Iesua mukusai'a ta'angelo tamasua 7 noxie. 3Xe vile ane Tioana e Kusa semau. Anu Kusa ne anu itema tila vile no anu tasou Eloti. Xe vilela ualasie lexe Susana, mo tasema se'ila. Ane'i tasema ne milavusou ino'u mixamixa'a u'isalili so isu'uline'i Iesua oli'a tatisaipeliou.

Latilovosou itema mutapu'u uiti ngiaxu

4Xe mune'e la tamitema latala e latala me'a no taotaoni mine'ene'e mipitapita noxou Iesua mo a oli'a mixoxolu. La mu'oxonu latilovo vile noxi'a aloxo 'o, 5“Itema vile mulai mupeinu uiti ngiaxu no xai so utapu'u. Mupeipeinu xe ulalai la uiti ngiaxu se'i mulapau no vote'i so xai. Xe tamitema mimuamua'i la mimalomaloxo'u sila tangiala mine'e mitokinu so mi'ou. 6Xe uiti ngiaxu se'i mulapau no lavolavo'o taitainu ka muleme ia lexa no anu lialia to uasi, laso mupalea muxalosi. 7Xe uiti ngiaxu se'i mulapau no taitainu lamota ana'anaxu xolanu. La uiti muleme ia lamota ana'anaxu muleme kalumo sila mukuponu avile. 8Ia uiti ngiaxu se'i mulapau no lia lailaixe la muleme xe unene'a laixe mo ai'ainu vilevilesi muxalixu 100.” Iesua mutilovo axone mukalu laso mu'ava lexe, “Itema loxo sangalou la ulomuxu vaikala ano'o.”

9Ioxe, ili'i la tatisaipeliou mitali'isou no anu latilovo ne laxu. 10La anu muvikalane'i aloxo 'o, “Vaikala so voxo ane Mosinge molu u'uli laxune'i tamitemaou ne mutalume tatei. Ia vaimomo 'o Mosinge mupala'anixu noxingesi 'o. Mupala'anixu noxinge ia noxi'a leviani la eni avikalane'i no anu latilovosi. A'oxo axone so umulinu vaikalou polopeti mukaukavunu tatei lexe, 'Ane'i utotomu isaxisou mi vile laixe ia itongonu to uasi. Xe ane'i utotomu ilomusou kalumo ia ilamana no anu to uasi.”

11Muvikala axone xe mukalu la musolonu aloxo 'o. “Latilovo ne laxu aloxo 'o. Itema ane mutapu'u uiti ngiaxu ne anu loxo itema uvotovoto no anu Mosinge vaikalaou. 12Xe tamitema se'i la opone'i loxo lialia pakia'u no vote'isou xai ane uiti ngiaxu se'i mulapau no anu. Xo loxo ilomusou votovoto la vaikala uleme uasi xo Uluaou upalea une'e utokinu so uxexenu no opone'i mo so vote'i so ilopala mo ixalisou pamauli uasi. 13Xe tamitema se'i ne ane'i ilomusou vaikala ia anu ulapau no opone'i loxo uiti ngiaxu mulapau no lavolavo'o taitainu. Loxo ilomusou vaikala la i'osasou ia loxo uli'u ulu'elai so pumuxu uasi. Anu loxo ilopala se ia maxuveni uasi xe tovotovoto uxalisi'a sila isasalo mo ilapau ixexesi. 14Xe se'i la ilomusou votovoto kalumo ia anu loxo uiti ngiaxu ane mulapau no taitainu lamota ana'anaxu. Xo tamitema ane xo ne iuali no anu xoluxolu so vasime'a mo opone'i ututuluou lamoli xe vote'i so imomoxu masamasaxa no anu vasime'a. I'oxo axone laso maixene vaikala uleme no opone'i ka unene'a uasisi. 15Ia tamitema se'i ne opone'i ulapu mo laixe laso uloxu vaikalaou mo ikasou lexe manina. Anu loxo uiti ngiaxu ane mulapau no anu lialia laixe. Ikasou lexe manina laso ane'i ixolu pumuxa'a no anu lopala noxi'a mo uxalixu nene'axu.”

Latilovo so lalamo

16Ioxe, mo Iesua muvikalane'i no anu latilovo vile aloxo 'ola, “Loxo itema ulexexu lalamo la anu usu'asou no anu ti'a o ukalanu no laxu lu to uasi. Anu umulaxu no tanixu lalamo u'isalili mo so ane'i ane i'una la ie'i lamana no anu. 17Xo mimi ma'ia utalume la upala'asi. Xe mimi ma'ia tamitema isaxisou uasi la lamana uieisousi.”

18Mo muvikalane'i aloxo 'ola, “Vaikala ano'o ne ngalaxa'i laixe no anu, ngaxililiou uasi. Xo itema aneva ukasou vaikalaxeli la alosou nene'axu tavu'alo no latanu. Ia itema ane ukasou manina uasi, la axexenu sevile e muai noxou ne.”

Iesua nenu oli'a tavimovimou mine'e noxou

19Ioxe, mune'e xe no voxo vile la Iesua nenu oli'a tavimovimou mine'e so lexe isaxisou. Ia ane'i imomomo so ixali avile noxou uasi xo ane'i tamitema tavu'alo mixolu mixixaosou mo mivelisi. 20Laso tamitema se'i mivikalanu lexe, “Ai, nenine oli'a tavivine a itulutulu noale 'o. Ane'i imasaxa lexe imaisine.” 21Ia anu mukoline'i lexe, “Tamitema ta'ei ane ilomusou vaikalaou Mosinge kaio imulinu, la ane'i tavivilo mo tanenilo ane.”

Iesua mutalosou la'ave

22Ioxe, voxo vile ili'ila la Iesua oli'a tatisaipeliou mitelo no anu pouti vile. La muvikalane'i lexe, “Nenge'a talai xalevile no kupa.” Laso ane'i milutu. 23Ane'i miave no anu pouti mo a ilalai xe Iesua muai la muai avile. Milalai sila la'ave tatila mu'avuti la mukasou kupa mo xasi mupeipei mu'una no anu pouti mole ane'i so i'uo'uo. 24La ane'i milai mitulusou Iesua lexe, “Tilao, Tatila, nenge masi tamamulo ane!” Xe anu mu'avuti mutulu sika mulavixu sivo ilou xasi tatila loxo kisou ulu ne. Mulavixu sila alaxu vilesisi mutalo mo muai e muai se'isisi. 25La anu mutali'isi'a lexe, “Lopala noxinge uxolu ne'eio?” La ane'i mimama'u mo tane'ililiou manina mo mivikalane'i ngato'o lexe, “Ai, itema ano'o ena'ei a? Xo upalusou sivo ilou lexa la ulomuxu kenasi!”

Iesua mukusai'a ta'angelo tamasua tavu'alo noxou itema vile

26Ioxe, milutu miave no pouti xo la oli'a milai mixali xalevile no tumalou kupa Xalili no xale lia ne Xatala. 27Mixali la Iesua mulu'e no pouti so ulai noale la muxalisou itema vile so taoni no anu xale lia ne. Itema ne ta'angelo tamasua to a mixolu noxou mole usakinu lavalava uasi xe uxolu no tani uasi, muxoxolu no lamatimatisi. 28Itema ne musaxisou Iesua la mu'ava tatila xe mutangatuluou mo mu'unga noxou lexe, “Iesua, Mosinge anu Mu'uli'uli Olu, nini nene'e so na'oxo ma'i noxilo? Eni alinga pakia'u noxine lexe namasualeli mamu.” 29Mu'unga axone xo Iesua muvikala lumamo so upalusou angelo masua uxexesou itema ne. Angelo masua ulavusou ukasou axone la u'okinu manina xo alaxu tavu'alo tamitema misakinu no anu seniseni mo miloilokisou avolu no anu aini. Mitovonu so i'utululunu axone mo mituluxu laixe ia loxo ulapunu seni ilou aini no avolu la alaxu vilesisi upaxelelesi. Mukalu la angelo masua upatetenixu ulaixu avile no xale lia esi'esi.

30Ioxe, Iesua mutali'isou lexe, “Ualasine axova?” La anu mukolinu lexe, “Ualasilo lexe Tavu'alo.” Mulemolu ualasou axone xo ta'angelo tamasua tavu'alo a mixolu noxou. 31La ane'i milinga noxou Iesua pakia'u lexe upalusi'a ilai no taxa ane ulu'elai avile mamu.

32La tameme tavu'alo a mixoxolu mi'ani'ani no alaele vile se ne. Sila ta'angelo tamasua milinga noxou lexe u'italone'i so i'una noxi'a tameme ne. Laso Iesua mu'oxo lexe, “Io', ngalaisi.” 33Laso ane'i ta'angelo tamasua ne mixexesou itema la mi'una noxi'a tameme. Mi'una noxi'a sila alaxu vilesisi miiave mitalotaloxo no anu maiaxu kupa ka mi'uo'uo avilesi. 34Mi'uo'uo mukalu xe tamitema so isaxila'a mimaisou mi e muxali ne la ane'i mi'ume'ume mo mia'alo no taoni xe no xale lia no pa'upa'umolu.

35A'alosou mulailai xe tamitema mine'ene'e so lexe imalei. Mine'ene'e xe mixali noxou Iesua la mimaisou itema e ta'angelo tamasua tapiena mixexesou ne a muxoxolu no tava'u Iesua. Mimaisou la anu uxovulaulau loxo tei la uasi, xavutalaou mulamana mo anu a musakinu lavalava. Tamitema mimaisou aloxo ne la mimama'u manina. 36La ane'i tamitema ane mixolu mimaisou Iesua upaipounu itema e ta'angelo tamasua mikasou ne, la mia'aloi'a tamitema e milasi mine'e ne. 37Ane'i tatemanu xale lia ne Xatala milomusou a'alo so sosovo so xavi ne la mama'u mukasi'asi. Laso ane'i milinga noxou Iesua lexe anu uxexesi'a ulai. La Iesua mulomuxu linga noxi'a la mu'avuti mutelo no pouti so mulivu. 38Anu so ulutu la itema e ta'angelo tamasua mixexesou mukatu noxou Iesua lexe anu oli'a. Ia Iesua mu'apixu mo muvikalanu lexe, 39“Nini nalivu no tualasine mo naa'aloxu su'uli lailiaxe ane Mosinge mu'oxonu noxine 'o” Laso ane, itema ne mulutu mulai la anu muxixao no tatani mukalusi no taoni ne so ua'aloxu su'uli lailaixe ane Iesua mu'oxonu noxou.

Iesua mupamauline vuanga vile misoli xe mupaipoune sema vile sialuxe munixinixi

40Ioxe, Iesua mulivu xo xe muxali xalevile no kupa la tamitema latala mimaxa'u osa noxi'a noxou xo ane'i a mixoxomaiou. 41La tatila vile no anu tasou lavuloto ne ualasou lexe Tiailusi mune'e mulalusi no tava'u Iesua. Mulalusi no tava'u la mukatu noxou lexe une'e no tasou. 42Mukatu axone xo olu sema sevilesisi ane so isoli. Ane tau iexe 12 sesi.

Ioxe, Iesua mulutu so ulai no tasou ia tamitema latala ne miveli noxousi. 43Xe no taine'i tamitema latala ne la sema vile a oli'a. Sema ne sialu munixinixi noxie mumomomo no anu tau ie 12.#8.43 Tamitema so lavulavu se'i ixavutala lexe Luku mukaukavunu vaikala pa'usou sevilela no anu 8:43. Vaikala ne aloxo 'o, “Ane mipapunu lamoliie mukalusi noxi'a tatokota so lexe ixalisou su'uli noxi'a.” La mitovonu votevote'i so lexe ipaipoune ia evile umomomo so usu'uline uasi. 44Sema ne mine'e alai no tumalou Iesua la mikasou lasioti veveni noxou Iesua telexu sesi. Mikasou sila alaxu vilesisi sialuxe mumasasa. 45La Iesua mutali'i lexe, “Ena'ei mukasilo 'o?” La ane'i vilevilesi mi'oxo lexe, “Eni uasi!” Xe Pita muvikalanu lexe, “Tatilao, tamitema tavu'alo e tavu'alo mixalilixene mo a miveli noxine to ne.” 46Ia Iesua muvikala lexe, “Uasi. Evile mukasilo ane. Xo eni examulinu xavi se'i a mulutu noxilo.” 47Muvikala axone xe sema ne milavu lexe vote'i so italumela uasi. Laso ane mi'olo'olo mo mine'e milalusi no laxunu Iesua la no ie'i tamitema mukalusi ne mipala'anixu tava'u so mikasou. Mo mivikala lamana lexe mikasou axone la alaxu vilesisi laixenesi. 48Laso Iesua muvikalane lexe, “Alixeli, nini nelopalaleli laso laixeneni 'o. Nalai mo oponeni uai se'isisi.”

49Iesua a uvikalanesio la se'i so laili noxou tatila no anu tasou lavuloto a mixali. La mivikalanu itema ne lexe, “Iline ne misoli mukalu. Laso tava'u so na'au'ausou Tisamengela uasi. Vote'i so usu'ulinela uasi.” 50Iesua mulomu axone ia muvikalanu itema ne lexe, “Na'ume uasi. Nalopalasi, xo ane masi ipamauli ane.” 51Ioxe, Iesua mulutu xo xe muxali no tasou itema tila ne la tamitema latala ne mu'apixa'a lexe ixolu. Ia muvikalane'i Pita xe Tiemisi xe Tioni xe molomolo mamie mo nenie lexe ane'i oli'asi i'unalai. 52La tamitema tavu'alo mixoxolu ne mielieli no anu tama toxoxu. Ia anu muvikalane'i lexe, “Ngatalo, ngatama uasi. Xo ane isoli uasi, miaisi.” 53La ane'i mikekeu xo milavu lexe misoli mukalu. 54Ia Iesua mulai noxie mo mutila'e no avole mo muvikalane lexe, “Aliku seo, natulusi.” 55Sila ulene mulivu no vasimele la alaxu vilesisi mitulusi. Mukalu la Iesua muvikalane'i lexe ilosie la'ilali sevile. 56La mamie olie nenie mikisikula kena ia anu mupelototosi'a lexe ipala'anixu mi e muxali ne noxou itema vile uasi.

നിലവിൽ തിരഞ്ഞെടുത്തിരിക്കുന്നു:

Luku 8: ATA

ഹൈലൈറ്റ് ചെയ്യുക

പങ്ക് വെക്കു

പകർത്തുക