Luku 23

Iesua mutulu no laxunu Pailati

1Ioxe, tatiatila mukalusi ne mi'avuti la milaixu Iesua so itulusou no laxunu Pailati. 2La ane'i misoko'u so ito'omolu no anu vaikala lexe, “Nexi temaisou itema ano'o anu ulapune'i tamitemamexi ipolo va'axu. Mo anu u'apixa'a lexe isu'anu taxisi noxou Sisa uasi. Xe anu molu uvikalasou lexe anu ukingi xo anu ane so Kalaisiti.” 3La Pailati mutali'isou Iesua lexe, “Nini kingi noxi'a Taiuta, ne?” La Iesua mukolinu lexe, “A loxo nini mene nelemolu ne.” 4Sila Pailati muvikalane'i tatiatila noxi'a tapilisiti xe tamitema latala lexe, “Eni atongonu susu vile noxou itema ano'o uasi.” 5Ia ane'i miuolotete pakia'u lexe, “O anu ulavusou uxixao ne Iutea mukalusi, musoko'u ne Xalili xo mo mune'e avile no taoni noxinge 'o. Uxixao mo ulanu vaikala so u'unanu tanu noxi'a tamitema la u'avutinoxu opone'i to!”

Iesua mutulu no laxunu Eloti

6Xe Pailati mulomusou vaikala ne la mutali'i lexe, “Xo itema ano'o so Xalili, ne?” 7Ioxe Pailati mulavu lexe Iesua molu no xale lia e Eloti mu'uli laxunu ne laso mupalusou so ulai noxou Eloti. Xo no voxo anene Eloti a muxolu ne Ielusalemo kalumo.

8Ioxe, milaixu Iesua xo xe Eloti mumaisoui la mu'osa misevile xo tateimo anu umasaxau lexe umaisou. Anu mulomusou a'alosou iouiou laso oponu ututulu lexe umaisou u'oxonu sosovo so xavi vile. 9La Eloti mumaititi noxou maxuveni sevile ia Iesua ukolinu vile uasi. 10Xe ane'i tatiatila noxi'a tapilisiti xe tamitema so lavulavu no anu lavuloto a mitutulu ne mo mito'omolu no anu vaikala pakia'u manina.

11Xe Eloti oli'a ta'amiou milemolu vila'isou mo mimolo sukusou. Mukalu la misakinu lavalava tokolomosou laixe noxou ka mipalusou mulivu mulai noxou Pailati. 12Tatei la Eloti ilou Pailati mixolu tauluai'a ngato'o ia musoko'u no voxo ano'osi la opone'i mulu'e mo mi'osasi'a ngato'o.

Pailati mupilixinu Iesua so ivau usoli

13Ioxe, la Pailati mu'avali'a tatiatila noxi'a tapilisiti oli'a tatiatila noxi'a Taiuta xe tamitema latala mine'e mipita. 14La muvikalane'i lexe, “Ngingi ngetulusou itema ano'o no laxuleli mo ngeto'omolu lexe anu mu'unanu tanu noxi'a tamitema so u'avutinoxu opone'i. Ia ngalomu, eni etali'isou no iengi la eni etongonu lexe ususu no anu mi e ngeto'omoluxu ne uasi. 15Mo Eloti kalumo mutongonu axone xo mupalusou mulivu mune'e noxilo 'osi. Laso ngalomu, itema ano'o u'oxonu susu vile so apilixinu usolixu uasi. 16Eni avikala lexe ipuapuasou sika apilixinu ulaisi.”

17No anu tautau ie utotomu no anu voxo so lavilelu la Pailati ulavusou upilixinu vile noxi'a takalavusu so ula.#23.17 Tamitema so lavulavu se'i ixavutala lexe Luku molu ukaukavunu vaikala ane uxolu no anu 23:17 uasi, itema vilemo masi mukaukavunu. 18Laso tamitema mukalusi mikeinoxu mi'ava tatila lexe, “Navau itema ano'o usoli ia na'italonu Valavasi so ula noxixe.” 19Valavasi ne anu itema vile mu'avutinixi'a tamitema se'i so mi'otoxa'a taxamani no taoni ne la muve'ave'a se'i misoisoli. 20La Pailati muvikala noxi'ala lexe anu umasaxau upilixinu Iesua ulaisi. 21Ia ane'i mi'ava'ava tatila lexe, “Nalilinu no ovu valautu so usoli. Nalilinu no ovu valautu so usoli.” 22La alaxu tatalusou muvikalane'ila lexe, “Xo axova? Itema ano'o mu'oxo susu ma'ia? E atongonu susu vile noxou so apilixinu usolixu uasi 'o. Eni avikala lexe ipuapuasou sika apilixinu ulaisi.” 23Ia ane'i miuolotetesi mo mi'ava tatila noxou Pailati so lexe ulilinu Iesua no ovu valautu so usoli. La ava noxi'a musu'asou vaikalaou Pailati mo mipamuxanu xavutalaousi. 24Laso Pailati muvikala lamana lexe, “Ioxe, amulinu linga noxinge mo Iesua masi usoli.” 25Xe itema ane Talomu mikalavusunu xo mu'avutinoxu oto mo muve'ave'a se'i la Pailati mumulinu linga noxi'a so mu'italonu mula. Io noxou Iesua la anu mupilixinu no avo'a ta'ami so i'oxonu loxo tamitema miuloteteou.

Ane'i mililinu Iesua no ovu valautu

26Ioxe, ta'ami a ilalaixu Iesua la mixalisou itema vile a mumuamua'i so lexe u'una no taoni. Itema ne ualasou lexe Saimoni so tuala Sailini. Mixalisou la mitetelisou ka mi'italonu ovu valautu no laxasou xe muili'i noxou Iesua so anu molu mutavulenu.

27La tamitema latala e latala mumulimulinu xe tasema leviani mitatama mo mielielisi. 28Ia Iesua muxiu mo muvikalane'i lexe, “Ngingi tasema so Ielusalemo ngatatamasilo uasi. Laixe loxo ngingi menge ngatamasinge ngoli'a ta'ilinge. 29Xo ngalomu, voxo tu'umaxu uxali ili'i la ngalomusou vaikala lexe, 'Laixe noxi'a ane'i ane ipala mo ivo'one'i ta'ili'a uasi. Mo laixe noxi'a ane'i ane ta'ili'a so isusune'i uasi.' 30Mo no voxo anene ane'i ivikalanu la'ola'olu lexe, 'Nga'atasixe,' mo ivikalanu laxalaxa'ilu lexe, 'Ngasu'asixe 'o.' 31Xo loxo ane'i i'oxonu aloxo 'o no anu ovu mi ne umaulisio la masi i'oxo axova no anu ovu loxo uxalo mukalu?”

32La ta'ami mine'ene'i tamitema tamei kalumo. Ane'i ilou ne mikalavusu so susu se'i mi'oxonu laso Talomu mi'oxo lexe ive'a oli'a Iesua isoli. 33Milutu xo xe mixali no apu vile ilemolu lexe Kisou Xinu laso lai ne ane'i mililixu Iesua no ovu valautu. Xe tamitema so susu tamei ne la mililixa'a no pa'umolu, vile no avolu tema xe vile no avolu kaisi. 34Mililixu Iesua mukalu la muvikala lexe, “Papao, oponeni ulu'e so susu noxi'a tamitema 'o xo ane'i ilavusou mi ma'ia i'oxonu 'o uasi.” La ta'ami mitaxusou lavulutiou ka mi'oxonu ilixo so uala so lexe ena'ei uno'u aneva.

35Ioxe, tamitema latala a mitulu imalei ia tatiatila noxi'a mimolo vila'isou lexe, “Anu mupamauline'i tamitema mose'i. Laso loxo anu ane Mosinge muilounu mo musosovosou so Kalaisiti la anu molu upamaulinu.” 36La ane'i ta'ami kalumo mimolo sukusou. Xe mine'enu uaini sixula so lexe ilosou. 37Mo mivikala lexe, “Loxo nini kingi noxi'a Taiuta manina la nini mene napamaulinenisi.” 38La ane'i mikaukavu no anu mi vile mo miteinoxu no ovu valautu teitexi no kisou. Kaukavu ne aloxo 'o, “Ano'o kingi noxi'a Taiuta.”

39La vile noxi'a tamitema so susu tamei e milili ne anu kalumo mupupuiou Iesua lexe, “Nini ane so Kalaisiti, ne? Ioxe, nini mene napamaulineni mo nexi noxou 'o kalumo.” 40Ia anu ane vile mulomusou vaikalaou la mulavixu lexe, “Nini kalumo masi nasoli. Laso axova, namama'u noxou Mosinge uasi? 41Xo nenge nengei a so tasoli la anene nene'axu ulovou ilixo noxingesi ane. Ia itema ano'o u'oxo susu vile uasi.” 42La muvikala lexe, “Iesuao, no voxo loxo na'uli laxune'i tamitemameni la naxavutalaleli kalumo.” 43La Iesua mukolinu lexe, “A avikalaneni manina aloxo 'o. Masi 'osi nengei taxolu no tualasou Mosinge lailaixe.”

Iesua musoli

44Ioxe, anu a aso lixinu 'oe. Sila isivoxo toxoxu musu'asou lialia mukalusi xo mo aso iou tatalu no o'olovoxo. 45Anu isivoxo ne mutanuxu aso avile. La no voxo anene lavalava tatila e mulili no tasou Mosinge ne mutea avile, la muxali alelaxu tamei. 46Xe Iesua mu'ava tatila lexe, “Papao eni apilixinu uleleli no avone.” Sila tauxu mukalu so musoli.

47La tilasi'a ta'ami 100 a muxolu ne mo mumalei. Laso anu mu'itinu Mosinge ualasou mo muvikala lexe, “Manina misevile, susu vile noxou itema ano'o uasisi e uasisi.” 48Xe tamitema latala e mipita so mimalei lexe ma'ia muxali ne loxo mimaisou axone la mi'otu'otunu lutune'i xo opone'i tu'umaxu manina. La mipaxepaxele milivu no tatasi'asi.

49Xe tavaitamiou mo tasema e mimulinu Iesua so oli'a me'a ne Xalili mine'e la mitulu va'axu sevile so mimalei lexe mi ma'ia uxali ne.

Mimulaxu Iesua vasimolu no lulu

50Ioxe, vile noxi'a tatiatila noxi'a Taiuta ualasou lexe Iosepu. Anu itema laixe mo ilixo noxou mulapusi. 51Xe loxo tamenexu tatiatila milalaxinu opone'i mo mi'oxonu Iesua masua la anu umuline'i no anu uasi. Anu mulavusou uxomaiou voxo so Mosinge molu u'uli laxune'i tamitemaou. Anu so taoni vile noxi'a Taiuta e ilemolu lexe Alimatea. 52Itema ano'o mulai noxou Pailati mo mulinga noxou lexe upilixinu Iesua vasimolu noxou. La Pailati muvikala lexe, “Mi vile uasi, nano'usi.” 53Laso anu Iosepu muno'u Iesua vasimolu ka muisisinu no anu lavalava kea. Mukalu la mulaixu mumulaxu no lulu ane mi'asou mu'unalai no maia tava'u. Lulu ne alavuasi, imulaxu itema vasimolu no anu uao. 54Ioxe, voxo anene ilalaxixu Voxo so Ma'ila mo anu a so uxali.

55La ane'i tasema e oli'a Iesua me'a ne Xalili mine'e ne, mimulinu Iosepu so imaisou lulu. Mo imasaxau ilavu lexe Iosepu mumulaxu Iesua vasimolu axova. 56Milai xo xe mimaisou mukalui la milivu no tani so milalaxinu lamalasini xe ueli e tuma'u lailaixe so vasimolu. Ia no Voxo so Ma'ila la mimulinu lo so voxo ne mo mixolu se'isisi.

നിലവിൽ തിരഞ്ഞെടുത്തിരിക്കുന്നു:

Luku 23: ATA

ഹൈലൈറ്റ് ചെയ്യുക

പങ്ക് വെക്കു

പകർത്തുക