Luku 12

Iesua muvikala lamana so lolo noxi'a Tapalisi

1Ioxe, mune'e la tamitema tavu'alo e tautauseni mipita mole tainu vile uasi, mimalomaloxo'asi. La Iesua muvikalane'i tatisaipeliou tei lexe, “Ngingi ngalaxa'i laixe no anu isiti noxi'a Tapalisi. A a'oxo latilovosou ilixo so lolo noxi'a to! 2Ia mimi ma'ia tamitema isilavunu la anu ulamanasi, xe mimi ma'ia italumeu la anu upala'asi. 3Laso vaikala mukalusi ane e ngelomolu no isivoxo la tamitema ilomusou lamana no asosi. Xe vaikala ane ngemunumunusou no anu ngiou mupaila nonano no tani la tamitema ilomusou avasou molu no laxa'u tatani.”

Laixe so tamama'u noxou Mosingesi

4La Iesua muvikala aloxo 'ola, “Ai tamaula, eni avikalangengi lexe mamu so nga'ume'a noxi'a tamitema so ivau vasimenge usoli. Xo loxo ivenge la i'oxo mi vilela noxinge axova? 5Ia avikalangengi lamana so ngamama'u noxou ena'ei. Ngamama'u noxou anu ane xaviou so uvenge ngasoli ka usu'angengi no navu so mamulo. Ani, avikalangengi lexe ngamama'u noxousi. 6Xo ngelavu, tamitema ilotone'i tangiala kitukitu ta'uve no anu toia tamei soxusi. Ia Mosinge iou si'isou soxu vile noxi'a uasisi. 7Ia tangiala ne mi loxo utiatila uasi, anu tanungenge uua'ulixa'a tangiala avile. Ai, anu ulavusinge laixe xo kisinge laxusou se ne anu mulavusou navasou ane. Laso nga'umolu mi vile uasi.”

Tapala'anixu lamana lexe nenge tamitemaou Kalaisiti mo tamaila uasi

8Xe muvikala aloxo 'ola, “Eni avikalangengi lexe ena'ei uvikala lamana no ie'i tamitema lexe anu vile noxilo la eni Itema ane melo noxou Mosinge avikala lamana no ie'i ta'angelou Mosinge lexe itema anene eni na'a xelimo. 9Ia loxo vile uvikala no ie'i tamitema lexe anu vile noxilo uasi la eni avikala no ie'i ta'angelou Mosinge lexe anu itemaxeli to uasi. 10Mo itema loxo uvikala masuaou Itema ane molu noxou Mosinge la vote'i uxolu so susu noxou ne uiasisio. Ia itema ane upupuiou Ulenu Laixe la vote'i so susu anene uiasi uasisi.

11Loxo itulusinge no anu vaikala no tatasou lavuloto o ikotingenge no laxune'i tatiatila xe taxamani la mamu so u'avuti mo nga'oxo lexe, 'Iu, masi takoline'i axovao?' Ngalalaxinu vaikala lumamo axone uasi. 12Xo no voxo anene u'isalili la Ulenu Laixe molu upela'ingexu vaikala ma'ia so ngalemolu.”

Latilovosou itema muxolu no anu mimi latanu ia muxovulaulausi

13Ioxe, mixolu la vile no taine'i tamitema latala muvikalanu Iesua lexe, “Tisao, mamilo musoli mukalu la vivilo mukaolinu mimiou toe! Nini navikalanu lexe ukalipalanu mo ulosilo pa'usou no anu.” 14Ia Iesua mukolinu lexe, “Xo axova, ena'ei mutulusilo atiasi so atilovosou mi ane uxolu no taingengi ne? Uasi, anene xaixai noxilo uasi.” 15La Iesua muvikalane'i tamitema ne aloxo 'o, “Ngalaxa'i laixe so ngamaxalexu isu'isu iouiou. Xo itema vile masi mimiou ulolotusi ia maulixu temanu uxali no anu anene uasi.”

16Ioxe, mukalu la Iesua mu'oxo latilovo aloxo 'o, “Itema vile lamoliou mo mimiou tavu'alo mo xaixu nene'axu mulolutu. 17La itema ne muxavutala lexe, 'Eni anavao? Tatasou la'ilali noxilo umomomo no anu xaixo nene'axu uasi. 18Laso eni amamulonu tatasou la'ilali ne mo atulusou se'i toxutoxoxu. Xe ukalu la apitanu la'ilalixo xe mimixeli no tatani ne. 19Mo so axone la axavutala no anu mi vilela uasi. Xo eni mixemixeli mo la'ilalixo a uai so tautau ie tapiena. Eni axolu vasimelo manamana'usi mo a'ani mo aie mo a'osa kaluxu uasi. 20Ia Mosinge muvikala lexe, 'Uo nini naxovulaulausi ane. Eni esosovosou lexe masi no olovoxo la nasoli. Xe loxo nasoli la ena'ei so uno'u mimi tapiena anu nelalaxinu to ne?'” 21Xe Iesua muvikalala lexe, “Mi anene uxali noxi'a tamitema ane ilolutuxu mimi so vasime'a ia no anu mimi noxou Mosinge la ixolu loxo ta'oloxolamo.”

Anu laixe so tamitema opone'i uauavutiou xoluxolu so vasime'a uasi

22La Iesua muvikalane'i tatisaipeliou aloxo 'o, “Laso maixene avikalangengi lexe mamu so opongengi uauavutiou xoluxolungenge so lexe nga'ou ma'ia o ngasakinu ma'ia. 23Xo temanu mauli so vasimenge a no anu la'ilali xe lavuluti uasi. 24Ngingi ngaxavutalane'i ta'ola. Axova, ane'i ilavusou itou la'ilali mo imolo? Xe ane'i tani so mimii'a o so iauvaxe. Uasi, xo Mosinge molu ua'a'ane'i. Ia ngingi to ne anu tanungenge muua'ulixa'a tangiala avile ane.

25Loxo ngingi vile oponeni uauavuti so naxavutala piena no anu xoluxoluxene, la xavutalameni usolonu lamakisou mauli noxine usuku aso iou vilela? Uasi to! 26Laso loxo ngamomomo no anu mi se axone uasi la axova so opongengi uauavutiou mimi levianila?

27Mo ngaxavutalanu xixi sesenu lexe uleme axova. Ane'i sasaie'i so isimenu i'a lavalava uasi. Ia avikalangengi lexe tatei kingi Solomoni mutokolomonu no anu lavulutiou lailaixe umomomo no anu tokolomosou xixi sesenu 'o uasi. 28Ia xixi sesenu e uleme vaimomo 'o ne, masi ne'iela la tamitema ine'e isilanu mo isexeteluxusi. Laso loxo Mosinge utokolomonu mi vitanisi axone la axova noxinge ane mi mutiatila no anu xavutalaou? Ai, ngingi tamitema so lopala uasisi, anu ulosinge lavuluti ane. 29Laso mamu so ngauali lexe ngaxalisou mi so nga'ani xe so ngaiexu ne'ei. Opongengi uauavuti uasi. 30Xo tatemanu xale lialia mukalusi opone'i uuali misevile no anu mimi axone so ixalisou. Ia ngingi Maminge mulavusou mi ma'ia laixe so xoluxolu noxinge ne. 31Laso laixe so ngingi opongengi u'oxoxu voxo ane Mosinge molu u'uli laxune'i tamitemaou. Xo loxo mimi so xoluxolungenge 'o ne anu a upipilixinu noxinge 'oe.”

Tamolo tanengeou mimi ane laixesi

32Iesua muvikalane'i tatisaipeliou aloxo 'ola, “Ngingi tasipisipi se 'o nga'ume uasi. Maminge oponu ututulu lexe no voxo loxo anu molu u'uli laxungengi tamitemaou la upilixinu mimiou noxinge. 33Laso ngasalimunu mimimengi xe lamolisou la ngaiti'a tamitema ta'oloxola. Xe ngaxalixu mengi ulu'ulu so lamoli ane umomomo so mamuxanu uasi. Ngataxusou mimi lailaixe noxinge ane tasiauxu uasi no tualasou Mosinge. Anene, talasikeli vote'isou ipakalinu uasi xe tamimi ixotosou uasi. 34Xo tanixu mimi lailaixe noxinge uai no anu ne'ei ne, la anene tanixu so opongengi ututuluousi.

Tauokuvoi laixe ixolu no anu lalaxisi

35Iesua muvikala aloxo 'ola, “Ngingi ngasakinu lavalava mo ngalaxexeu lalamo so lalaxi. 36Ngaxolu aloxo tauokuvoi ixolu iloxu tilasi'a so ulivu une'e no anu lavilelu so taula'i. Ixolu ilo laixe mo so loxo uxali xe upolopolo no aitenga la alaxu vilesisi ikisinu noxousi. 37Laixe manina noxi'a tamitema so xaixai ane ixolu ilo laixe no voxo loxo tilasi'a ulivu uxali. Xo avikalangengi manina lexe no voxo anene la anu usinixu lavalava laixe mo uvikalane'i tamitema so xaixai noxou lexe italupexa so i'ani no latevolo. Mukalu la anu molu uveluvelunuxa'a no anu mi ma'ia imasaxau. 38Xe loxo tilasi'a une'e no olovoxo lixinu o loxo koko'a u'ava tei mo umaisi'a tamitemaou ne i'ai uasi iloxusi, la uxali laixe manina noxi'a.

39Mo ngaxavutalanu ngiou vile aloxo 'o. Loxo mosou tani vile ulavu lexe lasikeli une'e mo ulavusou aso iou u'isalili la umomomo uasi so upilixinu tasou so upakali no anu. 40Laso ngingi kalumo ngalalaxi xo Itema ane molu noxou Mosinge une'e no anu voxo mo aso iou ane ngalavusou uasi.”

Latilovo so uokuvoi ane laixe xe ane masua

41La Pita mutali'isou Iesua lexe, “Tatilao, axova? Ne'oxonu latilovo ano'o so sixesi o so si'a tamitema mukalusi 'o?” 42La Tatananenge muvikala lexe, “Xo itema tila utulusi'a tauokuvoi kaini axova no taine'i tamenexi'a so isaxila'a mo ivelunu xa'a la'ilali no anu voxosou u'isalili? Anu utulusi'a ane'i ane ulopalane'i lexe i'oxonu xaixai noxou laixe mo lavulavui'a. 43Laso loxo tila ulivu uxali xe umaisou uokuvoi ena'ei e mutulusou ne a uxaxai axonesio la uxali laixe manina noxou. 44Xo avikalangengi manina lexe tila ne utulusou uokuvoi ne so usaxila'u mimiou mukalusi.

45Ia loxo uokuvoi vile ane u'uli laxune'i tamenexu axone uxavutala no oponu lexe, 'Ai, tilasilo ulivu une'e palea uasi ane.' Xe loxo usoko'u so uve'ave'a tamitema so xaixai tamulu oli'a tasema mo u'ani'ani mo uie xe usipaki la masi axova noxou? 46Aloxo 'o. Voxo vile masi uxolu ulo laixe uasi sila tilasou uxali no aso iou vile ka ukulukenusi. Uxali xe umaisou ilixo noxou axone la ukiaenu ka umulaxu uveisa'ine'i ane'i ane ilavusou ilomuxu tilasi'a uasi.

47Ioxe, uokuvoi ane mulavu mukalu no anu masaxa noxou tilasou ia ulalaxi mo umulinu masaxa anene uasi, la tilasou ukiakiaenu e lapilai uasisi. 48Ia anu ane ulavusou masaxa noxou tilasou uasi xe upolu va'axu la tilasou upuasouxu kalumo, ia malaxo uasi, alaxu vilevilesi. Xo ena'ei uxalisou mimi tavu'alo la ukolinu no anu tavu'alo kalumo. Xe anu ane ulopalanu so upilixinu mi mutiatila no avolu so usaxila'u la ilingasouxu mulolutusi.”

Iesua mune'e la anene uxalixu kalikalipala

49Ioxe, la Iesua musolonu vaikalaou lexe, “Eni ene'e so apilixinu navu no lialia, mo amasaxau lexe u'ani a alala'e 'osi. 50Ia eni so axalisou ilixo so kelele kaini vilemo tei laso opoleli u'avuti mo ututulusi lexe mi ne uxalisi. 51Xo nge'oxo lexe eni ene'e so asolixu oto'oto no lialia? E uasi, avikalangengi lexe ane'e aloxo 'o mo so kalikalipala uxali. 52La usoko'u vaimomo mo ulai avile ili'i la kalipala uxali aloxo 'o. Loxo tani vile tatemanu ixolu la ikalipala sila tatalu ixililiie'i tamei xe tamei ixililiie'i tatalu olele. 53Ikalipala laso itema uxililiou olu xe molomolo uxililiou momu. Mo sema ixililie ilie xe molomolo ixililie nenie. Mo sema tila ixililie ua'ane xe sema itaula'i ixililie ua'ane.”

Tamitema itongonu sosovosou mimi uxali uasi

54La Iesua muvikalane'i tamitema latala aloxo 'o, “Ngingi ngamaisou sauma su'inu molu no anu uesiti une'e sila alaxu vilesisi ngavikala lexe, 'Ai, la'iua masi une'e.' La manina, anu uxali axone. 55Xe loxo ngaxamulinu sivo molu loxo no anu sauti sila alaxu vilesi nga'oxo lexe, “Anu aso masi ialuxu,” la uxali axone. 56Ia ngingi tamitema so kalavoi to, xo ngingi ngatongo laixe no anu mimi ane uxali no loxotolo xe no lialia. Ia mi ane muxali no taingengi vaimomo 'o ne ngatongonu to uasi.”

Loxo evile so ukotinenge la talovonixu mi ne palea

57La Iesua muvikala aloxo 'ola, “Axova so ngingi menge ngaxavutala laixe mo ngatilovsou ilixo ane ulapusi ua'? 58Laso loxo itema ukotixene mo ngingi a so ngalai ngakoti la nakamulinu vote'i so ngalovonixu mi ne. Xo loxo 'o io ulapuneni natulu no laxunu tiasi la masi tiasi upilixineni no avo'a tapolisi ka ikalavusunenisi. 59Avikalaneni manina lexe loxo axone la nini naxolu nakalavusu xo mo nalotonu lamoli umomomo u'isalili loxo misosovosousi ane.”

നിലവിൽ തിരഞ്ഞെടുത്തിരിക്കുന്നു:

Luku 12: ATA

ഹൈലൈറ്റ് ചെയ്യുക

പങ്ക് വെക്കു

പകർത്തുക