Génesis 4
4
Kaíni ka Abeli
1Adani mítespti Ébani, imeri témpa jémpani, ka sóntku charhakuni erokorhexapti ka Kaínini kánkorhespti ka uantaspti: Acharini tatakani ma kóntesti. 2Tátsekua máteru charhakuni kánkorhespti ka Abeli jakankurhitaspti enka Kaíniri erachi jempempka. Abeli karichi erankutispti ka Kaíni tsíri jatsiri.
3Sáni ióni jimpo, Kaíni ACHAni kéts'ïtakuspti, imani ampe enka xáni p'ikuntapka. 4Abelit'u kéts'ïtakuspti urheti ka sánteru sési jarhati ka amparhati karichichani ka ACHA jaiapanhentaspti Abeliri kéts'ïtakua. 5Kóru no mák'ueni exespti Kaínini ka imeri kéts'ïtakuani, imani jimpo Kaíni kánekua no sési nínharhintaspti ikiani. 6ACHA arhispti Kaínini: ¿Antirisï ikiani jaki? ¿Antirisï xáni no sési nínharhini jaki? 7Ekari sési ampe úpirinka, sésiri ninharini japirinka, ka nóri úsïnka jimpokakini k'amanharhintskua no jurak'untaxaka. K'óru ásï jurak'utakorhe eskakini antaaka.
8Kaíni arhispti erachi jempa Abelini: Ju juátarhu. Ka enkaksï na juátarhu jápkia, Kaíni jima ataspti uántikuni erachi jempa Abelini. 9ACHA arhispti Kaínini: ¿Nani jarhaski chéti erachi Abeli? Ka ima arhispti: No míteska ¿Anti ji imani erankuni jarhasïnki?
10ACHA arhispti: ¿Amperisï úia? Iurhiri enka xáni chéti erachi tsïtaka íni echerirhu, kurhachexatirini eskani maiampetarantaaka imani enka ataka.
11Echerikini ikimchaati, imani jimpo enka chéti eracheri iurhirini tapokaka enka t'u tsïtakuka. 12Enkari tarheaka, nóteru ampe ma antaraati ka ískuri jámaka ma parhakpeni.
13Kaíni arhispti ACHAni: Ji no úaka xáni kánekua ampe maiampentani.
14Iásïrini chuxaka ixu uératini, ka nóteruni t'unkeni jinkuni jauakia, ískuni jamani jauaka iápuru ísï íni parhakpeni ka ne uék'i enkarini exentaaka uántikuatirini.
15ACHA arhintaspti: Ne enka uantikuaka Kaínini, iúmu tsimani xanhari maiampentaati, ka ACHA mitetarantskua ma jatsikuspti Kaínini, ne enka exepirinka eska no uántikupirinka.
16Kaíni uéakuspti jima enka ACHA jápka, ka Nodi echerirhu niraspti irekani, jima enka Edeni jurhiata antarakuarhu isï jaka.
Kainiri sïrukua
17Kaíni nanakani ma mítespti ka tempa úspti, ka Henokiniksï kámaspti. K'éri ma ireta uaxastaspti ka iretani Henoki jakankurhitaspti, mák'ueni eska imeri uáp'a. 18Ka Iradini, Eenoki uáp'espti, ka Iradi, Mehujaeli uáp'espti, ka Mehujaeli, Metusaeli uáp'espti, ka Lameki, Metusaeli uáp'esti. 19Lámeki tsimani uarhitichani kaaspti: Ma Ada arhinhaspti ka máteru Silá. 20Ada, Jabalini kánkorhespti, Jabali uénaspti uákasï erankutini ka imeri uáp'echaksï kuákuecharhu irekapti ka uákasï erankutisptiksï. 21Jubali erachi jempespti, ka Jubalini uénaspti kustatini, ka imeri uáp'echaksï sétimu ka píruli kústatispti. 22Silá, Túbali-kaíni kánkorhespti ka ima tiámu úrispti, ka Túbali-kaíniri pirenchi jempa Naama arhinhaspti.
23Ka Lámeki arhiaspti imeri uarhiti jempechani: Adá ka Siláni, k'urhach'atsïni je, ne enkarini ampe ma no sési úcheska órini uékani atani, tsíuerati ma o tumpi ma, ji uántikuaka. 24Enka Kaíni jimpo iúmu tsimani xanhari maiampetaranhantaaka, ka Lámekini jimpo tanimu ekuatse ka témpeni iumu tsimani (70) maiampetaranhantaati.
Adani ka Ebari tanimu úni jamani uáp'a
25Adáni, ménteru tempani jinkuni k'uispti, ka charhakuni ma kámaspti ka Seti jakankurhitaspti, ka tempa uantaspti: Diósïrini k'uanhaskuchentasti tatakani ma, jimpo Kaíni, Abelini uántikuska.
26Seti imat'u sapini ma kámaspti, ka Enósi jakankurhitaspti, jiáni uénanhaspti ACHAeri jakankurhikua kómu arhinhani.
നിലവിൽ തിരഞ്ഞെടുത്തിരിക്കുന്നു:
Génesis 4: BI-PURHE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblia en P´urhépecha, Michoacán, México © Sociedad Bíblica de México, A.C.
