यूहन्ना 18

येशूक गिरफ्तारी

(मत्ती २६:४७-५६; मर्कू. १४:४३-५०; लूक. २२:४७-५३)

1जब येशू प्राथना करके सेक्लाँ ते ऊ अपन चेलनके संग किद्रोनके सेहालीहे पार करके एकथो बगियामे गैलाँ। 2आब यहूदा जे येशूहे पक्रा देहक लग रहे, उ ठाउँ जानल रहे। काकरेकी येशू बहुतचो अपन चेलनके संग खास करके वहैँ जाँइत। 3तब् यहूदा रोमी सिपाहिनके एकथो दल मुख्य पुजारी और फरिसीनके पहरेदारिनके संग वहाँ आपुगल। ओइने लालटेन, मसाल और हँथियार लेके आइल रहिँत। 4तब् येशू अपन उप्पर हुई अइना बात जानके आघे आके ओइन्हे पुँछ्लाँ, “तुहुरे किहिहे खोजतो?” 5ओइने येशूहे जवाफ देलाँ, “नासरत गाउँक येशूहे।” येशू ओइन्हे कलाँ, “मै वहे हुइतुँ।” आब येशूहे पक्रा देहुइया यहूदा फेन ओइनेहेँन्के संग ठरह्याइल रहे। 6जब येशू ओइन्हे कलाँ कि “मै वहे हुइतुँ।” तब् ओइने पाछे हटगिलाँ, और हुँकार शक्तिक कारण ओइने भुइयाँमे गिरपरलाँ। 7तब येशू ओइन्हे फेनदोस्रे पुँछ्लाँ, “तुहुरे किहिहे खोजतो?” ओइने जवाफ देलाँ, “नासरत गाउँक येशूहे।” 8येशू ओइन्हे जवाफ देलाँ, “मै ते तुहुरिन्हे कहिसेक्नु कि मै वहे हुइतुँ। तबेकमारे यदि तुहुरे महिँएहे खोजतो कलेसे यी मनैनहे भर जाईदेऊ।” 9असिके यहे कारणसे हुइल ताकि येशू जोन पहिले कहल रहिँत उ पूरा होजाए, जसिके ऊ कले रहिँत: “तैँ जोन मनैनहे मोरिक हाँथेम देले, ओइन्मेसे मै एकथोहे फेन नै गुमैनु।” 10सिमोन पत्रुस अपन थेन रहल तरवाल म्यानमेसे निकारके प्रधान पुजारीक नोकरहे प्रहार करल, और ओकर दाहिन कान काटके छिङ्टा देहल। उ नोकरके नाउँ माल्खस रहिस। 11येशू पत्रुसहे कलाँ, “अपन तरवाल म्यानमे दारो। बाबक देहल दुःखके खोरिया महिन्हे पिना जरुरी बा।”

येशूहे हन्नासके थेन लैजागिलक

12ओकरपाछे सिपाहिनके समूह, ओइन्के कप्तान और यहूदिनके चौकिदर्वन येशूहे पकरके हुँकिन्हे बहानलेलाँ। 13आघे ओइने येशूहे हन्नासके थेन लैगिलाँ, जे उ सालके यहूदी प्रधान पुजारी कैयाफक राउत रहे। 14यी वहे कैयाफा रहे, जे यहूदी दलके नेतनहे सल्लाहा देहल रहे कि, “हमार मनैनके लग एकथो मनैया मुनामे भलाई बा।”

पत्रुसके सुरुक अस्वीकार

(मत्ती २६:६९-७०; मर्कू. १४:६६-६८; लूक. २२:५५-५७)

15सिमोन पत्रुस और येशूक दोसुर एकथो चेला फेन येशूक पाछेपाछे गैलाँ। उ दोसुर चेला भर प्रधान पुजारीक चिनजानके रहे, और ऊ येशूएके संग प्रधान पुजारीक अंगनामे पैँठ्गिल। 16पर पत्रुस बाहेर दवारमे ठरह्याइल रहे। तब उ दोसुर चेला जे प्रधान पुजारीक जानपहिचान वाला रहे, ऊ बाहेर गैल, और ऊ द्वारपाली लौँदीहे कहिके पत्रुसहे भित्तर लयानल। 17तब् उ द्वारपाली लौँदी पत्रुसहे कहल, “का तुँ फेन यी मनैयक चेलनमेसे एकथो हुइतो?” ऊ कहल, “मै नै हुइतुँ।” 18वहाँ नोकर और मन्दिरके चौकिदर्वन जारकमारे आगी बारके ठरह्याके आगी तापतिहिँत। और पत्रुस फेन ओइन्के संग ठरह्याके आगी तापे लागल।

येशूहे प्रधान पुजारीक प्रश्न

(मत्ती २६:५९-६६; मर्कू. १४:५५-६४; लूक. २२:६६-७१)

19आब यहूदी प्रधान पुजारी येशूहे हुँकार चेलनके बारेम और हुँकार देगिलक शिक्षाके बारेमे पुँछल। 20येशू उहिहे जवाफ देलाँ, “मै सक्कुहुन्से खुल्लमखुल्ला बात बत्वाइल बतुँ। मै रोट्दिन बैठक भवनमे और मन्दिरमे शिक्षा देनु, जहाँ सक्कु यहूदी मनै जमा हुइथाँ। मै गुप्तमे कुछु नै कहल हुइतुँ। 21अप्नि महिन्हे यी प्रश्न काकरे पुँछती? ओइन्हे पुँछी, जेने मोरिक शिक्षा सुनल बताँ, काकरेकी ओइने जन्थाँ कि मै का कले बतुँ।” 22जब येशू यी बात कलाँ, तब मन्दिरके पहरेदारीनमेसे एकथो जे येशूक लग्गे ठरह्याइल रहे। ऊ येशूहे झाँपर मारके कहल, “का तैँ प्रधान पुजारीहे असिके जवाफ देथे?” 23येशू उहिहे जवाफ देलाँ, “यदि मै गलत कनु कलेसे तैँ यहाँ सक्कुहुन्हे बता कि मै का कनु, पर यदि मै ठिक कनु कलेसे महिन्हे काकरे मारते?” 24तब् हन्नास येशूहे बाँधले अवस्थामे यहूदी प्रधान पुजारी कैयाफक थेन पठादेहल।

पत्रुसके दोसर और तेसर अस्वीकार

(मत्ती २६:७१-७५; मर्कू. १४:६९-७२; लूक. २२:५८-६२)

25सिमोन पत्रुस ठरह्याके आगी तापतेहे। तब ओइने उहिहे कलाँ, “का तुँ हुँकार चेलनमेसे एकथो नै हुइतो?” ऊ अस्वीकार करके कहल, “मै नै हुइतुँ।” 26प्रधान पुजारीक नोकरहुँक्रिहिनमेसे एकथो, जे ओकर नातपाँत रहे, और जेकर कान पत्रुस काटल रहे, ऊ पुँछल, “का मै तुहिन्हे येशूक संग बगियामे नै देख्नु?” 27तब् फेनदोस्रे पत्रुस अस्वीकार करल। तब् जुरतेहेँ मुर्घा बोलगिल।

राजपाल पिलातसके आघे येशू

(मत्ती २७:१-२,११-१४; मर्कू. १५:१-५; लूक. २३:१-५)

28तब् ओइने येशूहे कैयाफक घरेमसे राजपाल पिलातसके महल ओहोँर लैगिलाँ। तब् धुसमुस्से बेहानिक समय रहे। पर ओइने अप्ने भर महलके भित्तर नै पैँठ्लाँ। यकर कारण यी रहे कि, यदि ओइन्मेसे केऊ फेन भित्तर जैताँ कलेसे ओइने छुटिह्या होजिताँ, और उहिहे निस्तार-तिहुवारके खाना खाई नै मिल्तिस। (राजपाल पिलातस गैर-यहूदी रहे।) 29तबेकमारे राजपाल पिलातस बाहेर आके ओइन्हे पुँछल, “तुहुरे यी मनैयकमे कोन बातके दोष लगाइतो?” 30ओइने उहिहे जवाफ देलाँ, “यदि यी मनैया अपराधी नै रहत कलेसे हम्रे यिहिहे अप्निक थेन नै नन्ती।” 31राजपाल पिलातस यहूदी दलके नेतनहे कहल, “तुहुरे यिहिहे लैजाऊ और तुहुरिन्के अपने मोशक नियम कानुन अनुसार यकर न्याय करो।” तब यहूदी दलके नेतन उहिहे कलाँ, “किहुहे मृत्युदण्ड देना हम्रिहिन्हे कौनो अधिकार नै हो।” 32असिके यहे कारणसे हुइल कि येशूक यी बात पूरा होए जोन बात येशू संकेत देती कहल रहिँत कि हुँकार मृत्यु कोन तरिकासे हुई। 33तब राजपाल पिलातस फेनदोस्रे महलके भित्तर पैँठ्गिल, और ऊ येशूहे महलके भित्तर बलाके पुँछल, “का तुँ यहूदिनके रज्वा हुइतो?” 34येशू जवाफ देलाँ, “का यी अप्निक अपन विचार हो कि या अप्निहे मोरिक बारेमे दोसुर मनै बतैलाँ?” 35राजपाल पिलातस जवाफ देहल, “तुँ जन्थो कि मै यहूदी नै हुइतुँ। तोहाँरे जातिक मनै और मुख्य पुजारीनके तुहिन्हे मोरिक हाँथेम दैदेलाँ। तुँ का करलो?” 36येशू जवाफ देलाँ, “मोरिक राज यी संसारके नै हो। यदि मोरिक राज यी संसारके रहत कलेसे मोरिक सेबकहुँक्रे महिन्हे यहूदी दलके नेतनके हाँथेम गिरफ्तार हुई नै देताँ। पर आब मोरिक राज यी संसारके नै हो।” 37राजपाल पिलातस येशूहे कहल, “का तुँ रज्वै हुइतो ते?” येशू जवाफ देलाँ, “अप्नि कहती कि मै रज्वा: मोरिक जल्मना कारण और संसारमे अइना कारण यहे हो कि मै सच्चाइक बारेम गवाही देहे सेकुँ। सच्चाइहे मनुइयन मोरिक कलक बात मन्थाँ।” 38राजपाल पिलातस येशूहे पुँछल, “सच्चाई का हो?” अतरा कहिके ऊ यहूदी दलके नेतनके थेन बाहेर निकरगिल, और ओइन्हे कहल, “मै ते ओकरमे कुछु गल्ती नै देख्नु। 39पर तुहुरिन्के असिन चलन बा कि निस्तार-तिहुवारके उपलक्ष्यमे मै तुहुरिन्के लग कौनो एक जहनहे छोरदिऊँ। तबेकमारे का तुहुरे चहथो कि मै तुहुरिन्के लग यहूदिनके रज्वाहे छोरदिऊँ?” 40पर ओइने फेनदोस्रे चिल्लाके कलाँ, “यिहिहे नै पर हमार लग बारब्बाहे छोरदी।” बारब्बा एकथो डाँका रहे।

നിലവിൽ തിരഞ്ഞെടുത്തിരിക്കുന്നു:

यूहन्ना 18: DVGNT

ഹൈലൈറ്റ് ചെയ്യുക

പങ്ക് വെക്കു

പകർത്തുക