लूका 22

येशुहू माअलो योजना

(मत्ती 26.1-5,14-16; मरकुस 14.1-2,10-11; युहन्ना 11.45-53)

1बेखमीर रोटाहा तीवारे ज्याहा वल्हाडन तिवार कोतेहे जागे ओतु, 2अने मुख्य याजक अने शास्त्री आव गोठीइ होदित ओते का तियाहा केहलो माईत टाकिलो पोन तेए मांहोहो बिहता ओता.

यहूदा इस्कोरियोतीई विश्वासघात

3तेहलाम शैतान यहूदा मेहे आवयू ज्याहा इस्करियोती कोयु जाहो अने बारा शिक्षामेहे मोजीलो जात ओतु. 4तिये जात मुख्य याजक अने सिपायडाआ सरदाराआरी गोठी कोअयी का तियाहा कोडला प्रकारे तियाआ आथोमेहे तोईत आपलो. 5ते आनंदाम उवे अने तियाहा पोशा आपलो वचन आप्लु. 6तिये माजित लेधलो अने संधी होदहू लाग्यू का जांहा गोर्दी नेशेय तेहलाम तियाआ आथोमेहे तोईत आपलो.

फसहो तियारि

(मत्ती 26.17-25; मरकुस 14.12-21; युहन्ना 13.21-30)

7तेहलाम बेखमीर रोटाहा तीवारे आवयू ज्याम वल्हांडन च्या कोकऱ्याआ बलिदान कोईओलो आवश्यक ओते. 8येशु पेत्र अने योहानाआ ओ कोत मोकलित का जात आमा खाअलाकाजे वल्हांडन तीयार को. 9तिये तियाहा फ़ुस्ल्याआ, ताहु का लागेहे का ओ का तीयार कोहू? 10तिये तियाहा कोयु, पाला, नगरोत प्रवेश कोअताज एक माहुहू पाअयोओ वोटलू उसो कोअल्यु तुमामे जोडीत; ज्या कोअमे तो जानारू तुमु तियाआ फासाडी जायलो 11अने तिया कोओओ मालकोहू कोओलो स्वामी ताहु कोत्लू का ती खायलाकाजे जागू का होय जीमेहे आय आपाआ शिष्याआरी भाकर खाऊ? 12तो तुमामे एक होबाडीलो वोडी माळी देखाडनारू तीही तीयारी कोइलाआ. 13तिये जात जेहलो तियाहा कोयु ओते, तेहलूज पाल्लये, अने वल्हांडण तीयार कोल्यु.

प्रभुउ आखरी भोज

(मत्ती 26.16-30; मरकुस 14.22-26; 1 कुरिन्थि 11.23-25)

14जाहा खाअलो टाईम आविलो ताहा तो प्रेषिताआरी रोटू खाअहू कोअता बोहयु. 15अने तिये तियाहा कोयु, माहु वोडी आशा ओती का दुख सहन कोइलाआ आगाडी ओ तिवार तुमाआरी कोहू. 16जाहा आय तुमामे कोत्लू का जो पर्यंत परमेश्वरोओ राज्याम पुरो उवनारा नाहा तोपोरोत आय तियाहा खोरोज खाही नाहा. 17तेहलाम तिये पिदो घेऊन आभार महांआ अने कोयु, ओ ल्या अने आपसामेहे वाटीत ल्या. 18काहाके आय तुमामे कोत्लू का जोपोरोत परमेश्वरोओ राज्य आविलो नाहा तोपोरोत आय द्राक्षरस ओमोरोत पीही नाहा. 19फासाडी तिये भाकर लेदि अने आभार मानीत ती तोडीअते अने तियाहा ओ कोयु आप्लु ओ माआ डील होय जे तुमा कोअता आप्लु जात होय माआ ओर कोइला कोता ओ कोईत रो. 20याजहोस तिये रोटाफासाडी पिदो पण ओ कोयु आप्यू ओ पिदो तियाअ रक्ताम जो तुमा कोअता वोहाड्यू जात होय नवो करार होय. 21पोन पाला, माहु तोईत आपनाराआ आथे माआ मेज माय होय 22काहाके माअहा पोऱ्या ताहा जेहलो त्यांकोअता ठेरव्यो जाहो पण हाय तियाअ माहुंपो ज्यावाही तो तोईत आप्यू जात होय. 23तेहलाम ते आपसामेहे विसारपूस कोअहू लागाडीत का आमा माय कोडू होय तोओ कोअनारू.

कोडो वोडू ओवे?

24तीयाम ओ वादविवाद पण ओवयू का तीयाम कोडू वोडू होमाज्या जात्लू. 25येशु तियाहा कोयु, अन्यजाति राजा तियापो राज कोअत्लू; अने जे तियापो अधिकार मेकात्ले तियाहा उपकार विहरीनारू कोतेहे. 26पोन तुमु एहलो ओवुहू नाहा; पण जो तुमामे वोडू होय तो हनाहोस अने जो मुख्य होय तो सेवको होस बोना. 27काहाके वोडू कोडू होय? तो खाअलाकाजे बोहयु होय किंवा जो सेवा कोईत होय? नाहाकोत तो नाहा जो खाअलाकाजे बोहयु होय? पण आय तुमामे सेवको होस होय. 28तुमु ते होय जे माआ परीक्षेमेहे निरंतर माआरी रोल्या, 29अने जेहलो माआ बाह्हू माकोअता एक राज्य ठेरव्यो होय तेहलूज आय पण तुमा कोअता ठरवीही, 30म्हणजे तुमु माआ राज्याम माआ मेजापरे बोहित इस्रायल, पिणारे अने एवडोज नाहा ताहा सिहासनापो बोहित बारा वन्शाआ न्याय कोअनारू.

पतरसो ईन्कारोओ भविष्यवाणी

(मत्ती 26.31-35; मरकुस 14.27-31; युहन्ना 13.36-38)

31शिमोन, ओ शिमोन, पाला, शैतान तुमाहा मांह्हू मागित लेधलो होय का तुमामे गवोओहोस फटके, 32पोन आय ता कोअता विनंती कोअयी का ताआ विश्वास जाहू नाहा; अने जांहा फिरीही ताहा आपाआ पायहोहो स्थिर कोईओलो. 33तिये तियाहा कोयु, ऐ प्रभू, आय ताआरी बंदिकोअमे जाहू एवडोज नाहा ताहा मोहुहू पण तीयार होय 34तिये कोयु, ओ पेत्रा, आय ताहु कोत्लू का आज कुकडू वाहे नाहा तोपोरोत तू माआ तीन टायमोआ नकार कोअनारू तू माहु उलखित्लू नाहा.

यातना सहन कोअहू तियार रोवा

35इहिजा तिये तियाहा कोयु, जांहा आय तुमामे खोतली अने खोली अने बिनखाडाआ मोकल्ये ओते ताहा नाहाकोत? तुमामे किबी वस्तूअ कोम उवी ओती? कोडलाज वस्तूअ नाहा. 36येशु तियाहा कोयु पण ओमे ज्याआ जागे खोतली होय तो तीही घेऊन ले, अने तेहलीज खोली पण अने ज्यापो नाहा तो आपाआ कापडे वेसेत एक वेसातो घेऊन आप. 37काहाके आय तुमामे कोत्लू का ओ जे लेखिलो होय तो अपराधी आरी मोजीलो गोल्यो ह्याआ मामेह पुरो उवे आवश्यक होय काहाके माआ विषयाम लेखल्यी गोठी पुरो उवे होय. 38तिये कोयु, ऐ प्रभू इही बेन तलवार होय तिये तियाहा कोयु, “जाखो होय.”

जेयतुनो टेंबा पोओ येशुउ प्रार्थना

(मत्ती 26.36-46; मरकुस 14.32-42)

39तेह्लाम तो बारथे निहित आपाआ रीतीवाही जैतुनाआ डोगोपो गोयु एने शिष्य तियाआ फासाडी चालीलो लागाडीत. 40तिया जागापो पुगित कोईत तिये तियाहा कोयु, “प्रार्थना को का तुमु परीक्षेमेहे पोडहू कायना” 41अने तो स्वतः त्यापोरोत दोनोओ टप्पाएतो सेटू गोल्यो अने मांडे टेक्यू प्रार्थना कोहू लाग्यू, 42“ओ ओबा, जर ताहु लागेहे ओ प्यालाहा मापोरोत काढीत ले, तेबी पण माआ नाहा ताहा ताआज इच्छा पुरो ओवुहू आप” 43तेहलाम होर्गामेऱ्ये एक दूत आवयू तो तियाहा सामर्थ्य आपित ओतु. 44तो अत्यंत संकटामे खिन्न ओतगोयु फासी पण दुखेहे प्रार्थना कोहू लाग्यू; अने याआ गोजारे जेहेकाय रक्ताआ वोडो-वोडो ठीबकाहोस धरतीपो पोडीत ओते. 45तेहलाम तो प्रार्थनामेरोत उठ्यू अने आपाआ शिष्याआरी आविलो तियाहा खेदामुळे तियाहा हुविलो पालील्यो. 46अने तियाहा कोयु, “काहा हुवीत होय? उठा, अने प्रार्थना को का परीक्षेमेहे पोडहू कायना.”

येशुहू बंदी कोअया

(मत्ती 26.47-56; मरकुस 14.43-50; युहन्ना 18.3-11)

47तोओ कोयु ओतु अने एक गोर्दी आवयी ओती अने तियाअ बारा मायरोत एक जोओ ज्याचेव नाव यहुदा ओते तियाआ आगाडी-आगाडी आवीत ओतु तो येशुआरी आवयू तो तियाआ चुंबन लेही. 48येशु तियाहा कोयु ऐ यहूदा नाहाकोत तू चुंबन घेऊन माअहा पोऱ्याहा तोईत आपी होय? 49तियाआ हेगातीही ओ पालील्यो का नाहाकोत उवे होय, ताहा कोयु, “ओ प्रभू नाहाकोत आमाहा तलवार सालाडहू?” 50अने त्यामोऱ्यो एकाने महायाजकाआ सेवकापो तलवार लाडीत हुदु कान उडाडीत आप्यू. 51तियापो येशु कोयु, “ओमे बंद को”, अने तिया कान स्पर्श कोईत तियाहा हाजो कोल्यु. 52तेहलाम येशु मुख्य याजक अने मंदिराआ रखणाराआ सरदार अने बाह्हाहा जे तियापो चोडिलो कोईत आव्ये ओते, कोयु, नाहाकोत तुमु माहु बांड होमजीत तलवार अने डेगाऱ्या घेऊन निकलीलू होय? 53जांहा आय मंदिरोम दाडीअ तुमाआरी ओतु, ताहा तुमु मापो आथे टाक्यू नाहा; पण ए तुमाआ वेल होय, अने आंदाराआ अधिकार होय.

पतरसो इन्कार

(मत्ती 26.57-58,69-75; मरकुस 14.53-54,66-72; युहन्ना 18.12-18,25-27)

54फाशो ते तियाहा तोईत घेऊन जातले, अने महायाजकाआ कोओ आव्ये, पेत्र सेटेजरोत तियाआ फासाडी-फासाडी जात ओतु, 55अने जांहा खोलीम आगी पेटाडीत एकठे बोह्ये, तेहलाम पेत्र पण तीयाम बोहित गोल्यो. 56तेहलाम एक दासि आगीई उजवोळोमे बोहीतरोल्यु पालीत अने तियाआ जागे पालीत कोहू लागीई “ओ पण त्याआरी ओतु” 57पोन तिये ओ कोत नकार कोअयु, “ओ बाय, आय तियाहा उलखित्लू नाहा” 58थोडो टायमोमे कोडूबी पालहु कोयु, “तू पण ताहा त्यामेथुं होय, पेत्राई, कोयु,” “ओ मांहे, आय नाहा होय तो” 59केतो तेबी तासावाही फासी एक माहुहू खातरीकोईत कोहू लाग्यू, “खोरोज ओ पण त्याआरी ओतु, काहाके ओ गलाली होय” 60पेत्राई कोयु, “ओ मांहे, आय होमजाडीत नाहा का तू नाहाकोत कोतलु” तो कोताच ओतु एवडाम कुकडू वाहयू. 61तेहलाम प्रभूऊ पेत्राई पालील्यो, अने पेत्राहा प्रभूऊ ती गोठी ओर आवयी जे तिये कोयु ओते आज कुकडू वाहलो आगाडी, तू तीन टायमोआ माआ नकार कोअनारू. 62अने बारथे निहित मोठ-मोठयाने रोड्यू.

येशुउ उपहास

(मत्ती 26.67-68; मरकुस 14.65)

63जिया माहुंऊ येशुहू तोईत तोअये ओते ते तियाआ थट्टा कोहू लागीई, 64अने त्याआं डोआं टापीत तियाहा फुसिलो लागाडीत, “भविष्यवाणी कोईत कोअलो आमाहा का ताहु कोडु माअये” 65अने तिये जास्तीज यापोरोत जाखा निंदा गोठी तियाआ विरोधाम कोयु.

डाये अने येशु महासभा सामने

(मत्ती 26.59-66; मरकुस 14.55-64; युहन्ना 18.19-24)

66जाहा दीही उगीतकोईत डाये, मुख्य याजक अने शास्त्री एकठे उवे अने तियाहा आपाआ महासभामे हादीत फ़ुस्ल्याआ, 67“जर तू ख्रिस्त होय, ताहा आमाहा कोत आप,” तिये तियाहा कोयु, “जर आय तुमामे कोअही, ताहा विश्वास कोअनारू नाहा” 68अने फुसनारू ताहा उत्तर आपी नाहा. 69पण ओमोरोत माअहा पोऱ्या परात्पर परमेश्वरोओ हुदिवोल बोहीतरोल्यु रोही 70योपो आखाहा कोयु, “नाहाकोत तू परमेश्वरोओ पोऱ्या होय?” तिये तियाहा कोयु, “तुमु स्वतः च कों ओतु, काहाके आय होय” 71तेहलाम तिये कोयु, “ओमे आमाहा साक्ष आपलो नाहाकोत गोरोज होय काहाके आमाहा खुद तियाआ सोबिमरोत होमलित लेधलो होय.”

നിലവിൽ തിരഞ്ഞെടുത്തിരിക്കുന്നു:

लूका 22: NOINT

ഹൈലൈറ്റ് ചെയ്യുക

പങ്ക് വെക്കു

പകർത്തുക