युहन्ना 19

साप्का देअलो अने मजाक उड़ाडलोओ

1ऐ ओ कोईत पिलातुस येशुहु चापके देवाडले. 2शिपायाआ काटाआ मुकुट गुंथवून मुंडकापो मेक्या एने तियाहा जांबले कापडे पेआड्या, 3अने त्याजागे आविलो कोहू लागाडीत, “ऐ यहुद्याआ राजा नमस्कार,” अने तियाहा थापोड पण देदा. 4तेहलाम पिलातुसो वांही फासी बारथे निहित माहुंहु कोयु, “पाला, आय तियाहा तुमापोओ बारथे फासी लेत आवलू; म्हणजे तुमु होमजुत्लू का माहु यामे किबी दोष जोड्यू नाहा.”

क्रूस पोओ सोडवुहू होप्यु

5तेहलाम येशु काटाआ मुकुट अने जांबडे कापडे कालीत बारथे आवयू अने पिलातुसो वांही तियाहा कोयु, “पाला, ओ माहु” 6जाहा मुख्य याजक अने तियाआ शिपायाआ तियाहा पालील्यो तेहलाम आयडीत कोयु, याहा क्रूसपो सोडवा, क्रूसपो सोडवा पिलातुसो वांही तियाहा कोयु, तुमु च तियाहा घेऊन क्रूसपो सोडवा काहाके यामे माहु किबी दोष देखाईत नाहा. 7यहुदी इये उत्तर आप्लु, अने तियाअ नियमानुसार तो माईत टाकिलाआ योग्य होय काहाके तिये स्वतः ला परमेश्वरोओ पुत्र बनविल्यो. 8जाहा पिलातुसो वांही याआ गोठी होमल्याहा ताहा फासी जाखो भिईलो. 9अने राजवाडाम गोल्यो अने येशुहू कोयु, “तू कोडू कावालू होय?” पण येशु तियाहा किबी उत्तर आप्लु नाहा. 10यापो पिलातुसो वांही तियाहा कोयु, माआरी काहा गोगीत नाहा? कि ताहु मालुम नाहा का ताहु सोडीत आपलो अधिकार माहु क्रूस होय. 11येशु उत्तर आप्लु, जर वरून आप्लु कायना ओतो, ताहा ताआ मापो किबी अधिकार रोला नसते त्यापोत जीआ माहु ताआ आथोमेहे तोईत आप्लु होय तियाआ पाप जाखो होय. 12त्यापोरोत पिलातुसो वांही तियाहा सोडीत आपलो ठेरव्यो पण यहुद्यांनी आयडीत-आयडीत कोयु, जर तू याहा सोडीत आपी ताहा ताआ सेवा कैसराहि दोस्त नाहा जो कोडु स्वतः ला राजा बनवितो तो केसराआ विरूध जात्लू. 13याआ गोठी होमलित पिलात येशुहू बारथे घेऊन आवयू अने तियाअ जागापो चबुतरा ओतु जो इब्रानी भाषम गब्बाथा कोतेहे अने तीही न्यायासणापो बोहयु. 14ओ वल्हांडण तिवाराआ तियारीइ दीही ओतु अने सहावू तासा सुमारास ओतु तेहलाम तिये यहुद्याआ कोयु, “पाला, तुमाआ राजा” 15पण ते आअडीलो, “घेऊन जा घेऊन जा तियाहा क्रूसपो सोडवा” पिलातुसो वांही तियाहा कोयु, “नाहाकोत आय तुमाआ राजाहा क्रूसपो सोढवूहू?” मुख्य याजकाआ उत्तर आप्लु कैसरहा सोडीत आमाआ कोड्लूच दिहरू राजा नाहा. 16तेहलाम तिये तियाहा तियाआ आथोमेहे होफहोपिन आप्लु म्हणजे तो क्रूसपो सोडाव्यु जानारू.

क्रूस पोओ सडावलोओ

(मत्ती 27.32-44; मरकुस 15.21-32; लूका 23.26-43)

17तेहलाम ते येशुहू घेऊन गोये अने तो आपाआ क्रूस विसित तियाअ ठीकानोपो बारथे गोल्यो जी मुलकाआ ठिकाण कोत्ले अने इब्रानी माय “गुलगुथा” कोयु जाहो. 18तीइही तिये तियाहा अने त्याआरी बेन मांह्हू क्रूसपो चोढावीत एकाहा यीबाजुहू अने दिहीराहा तियाअ सेटे अने येशुहू माय. 19पिलातुसो वांही एक दोषपत्र लेखित क्रूस लागाडी आप्यू अने तीयाम ओ लेखिलो ओते, “नासरेथ चा येशु यहुद्याआ राजा” 20ओ दोषपत्र जास्तीज यहुद्यांनी वाचले, ते ठिकाण जीही येशुहू क्रूस चोढावीत ओते नगरा जागे ओते; अने पत्र इब्रानी, लातिनी, अने युनानी माय लेखिलो ओते. 21तेहलाम यहुद्याआ मुख्य याजकाने पिलातला कोयु याहुद्याचा राजा नाहा लिखेहू पण एहलो लेख का तियाहा कोयु आय याहुद्याचा राजा होय 22पिलातुसो वांही उत्तर आप्लु आय जे लेखित आप्लु म्हणजे लेखित आप्लु. 23जाहा शिपाई येशुहू क्रूसापोओ चोढावीन उवेताहा तियाआ कापडे घेऊन तियाआ चोर भाग कोल्यु हर एक सैनिका कोअता एक भाग अने झगा पण लेदो पण झगा हिवाळल्यू ने ओतू पण वरून निसेजा तीयार हिवल्यो ओतु. 24त्यापोत तिये आपसामेहे कोयु, आपु याहा फाडीला नाहा पण ह्यापो चिठी टाकुहू का ओ कोडाआ उवे ओ आव याकोअता उवे का पवित्र शास्त्रात जे लेखिलो ओते ते पुरो उवे, “तिये माआ कापडे आपसामेहे वाटीत लेधलो, अने माआ पोतडापो चिठी टाक्यी.”

येशु तिया याह्ही कोअता प्रावधान

25कोईत शिपायाआ तेहलूज कोल्यु येशुउ क्रूस तियाआ याह्ही अने तीआ बोईही अने क्लोपाची लाडी मरिया अने मरिया मग्दलिनी उबे कोयु. 26जाहा तिया याह्ही अने तियाअ शिष्यांआ ज्यापोओ तो प्रेम कोअला जागे उभे होयतो पालील्यो तेहलाम आपाआ याह्हीही कोयु, “ओ बाय, पाला, ओ ताआ पोऱ्या होय” 27तेहलाम तिये शिष्यामे कोयु, “ए ताआ याह्ही होय,” अने तियाअ टायमोपो रोत शिष्य तीही आपाआ कोआ घेऊन गोल्यो.

कार्य पुरो ओवयो

(मत्ती 27.45-56; मरकुस 15.33-41; लूका 23.44-49)

28इयाफासाडी येशु होमज्ये का ओमे आखे पुरो उवे होय त्यापोत पवित्र शास्त्रात जे कोयु होय, ते पुरो उवूंहू जोवे कोईत कोयु, “आय तोर्ह्यु होय” 29तीइही आंब पोईत मेकीत्तरोल्यू एक बासणा ओते कोईत तिये स्पंज आंब्यात बुडालीत ते स्पंज जुफावर मेकीत तियाआ सुबीप लागाडले. 30जाहा येशु तो आंब लेदो, तेहलाम कोयु, “पुरो उवे, अने मुंडको निसे कोईत जीव सोड्यू.”

येशुहू भालू गुप्या

31यामुळे का तो तियारीइ दीही ओतु यहुद्यांनी पिलातला विनंती कोअयी तियाआ गुडू तोडीदे अने निसे उतरविला होय म्हणजे ते शब्बाथाआ तेदीही क्रूस रोही नाहा काहाके तो शब्बाथाचा दीही वोडू दीही ओतु. 32कोईत शिपायाआ आविलो तियाअ माहामोरोत पाललेआ गुडू तोडये; अने फासाडी दिहराआ पण जो तियाआ आरी क्रूसपो सोडवियू ओतु 33पोन जाहा आविलो पालील्यो का तो माईत गोल्यो होय कोईत तियाआ गुडू तोडये नाहा. 34पोन शिपायमरोत एकाने तियाहा डाफावांहि तियाआ खुशीम जाअयें अने तियाआ मायरोत लागेज रक्त अने पाई निकलीलू. 35जीआ ओ पालील्यो तिये ओ साक्ष आप्यी होय अने तियाआ साक्ष खोरी होय अने तियाहा मालुम होय का तो खोरोज कोत्लू का तुमु पण विश्वास मेकिलो. 36याआ गोठी यामुळे ओवल्यु का पवित्र शास्त्रात जे कोयु होय ते पुरो उवे, “तियाआ कोडलो आड तोडये जानारू नाहा” 37फासी होमला जागापो एहलो लेखिलो होय तियाहा जिये छेदले तियापो तो नजर कोअनारू.

यूसुफो कब्र मेहे येशुहू गाड्या

(मत्ती 27.57-61; मरकुस 15.42-47; लूका 23.50-56)

38आवा गोठीफासाडी अरिमतियाआ योसेफाने जो येशुउ शिष्य ओतु पण यहुद्यांआ पिकेवाही तियाअ गोठीकोता निकाडीत मेकीत ओतु पिलाताहा विनंती कोअयी का नाहाकोत तो येशुउ डीला घेऊन जात शकतो पिलातुसो वांही तियाआ विनंती कोअयु, अने तो आविलो तियाआ डील घेऊन गोल्यो. 39नीकुदेमुस पोन जो पेल्लु येशुआरी राती गोल्यो होये गन्धरस अने अगरु याआ सुमारे होव रत्तल मिश्रण घेऊन आवयू. 40तेहलाम तिये येशुउ डीला लेधलो अने यहुद्यांआ गाडीलो कोइलाआ रीतीवाही तियाहा सुगन्धित सामानाआरी गाडीत्वाआ फडकाम, 41तिया जाग्तली जीही येशुहू क्रूसपो चोढावीत ओते तीइही एक मोलू ओती तीयीय एक कबर ओती तीयीय खोरोज कोडाआ मेक्ल्ये निमिले. 42त्यापोत यहुद्यांआ तीयारीई दीही होयकोत तिये येशुहू तीयाम मेक्ल्ये; काहाके ती कबर जागे ओती.

നിലവിൽ തിരഞ്ഞെടുത്തിരിക്കുന്നു:

युहन्ना 19: NOINT

ഹൈലൈറ്റ് ചെയ്യുക

പങ്ക് വെക്കു

പകർത്തുക