Kejadian 4
4
1Adam cap, er ner Hawa cap, kikiman kuramreiyanen, nyakdareipa, Hawa mundu douamnganen, amendada er mi deipudi, “Allah er si Yahwehdi, meliamneua deiki di, ami deipmana tep, er sida Kain,” pepu. 2Sun dakuramyane, amenda yuk taruda, ami er weit bo ton deipudi, er si tep Habel, pepra deipu. Nepbaramrei panenda, Habeldi nimi pein keca, domba bisam talepra peiramu dinin, Kainda tali wa pena cap, kouna cap pel doramu. Gam kure keca peina gume. 3Sun yuma dakuramipane, Kaindi, ‘Allah er si Yahweh, er gispal dona tep, ne kouamsi keca neitamai di dopra karepkune,’ tenepudi, er wa kouamu keca kipra kareryau.
4Dinino, Habel erda, tali keca gum dinin, er peiramu domba bisamdi deipunge, weni domba nyapu popra galepudi, pio telep tu cap, meta cap, weiknge dopra kareryau. Kareryaupa, Allah er si Yahwehdi Habel er duyanmau keca tep dipetepudi, Habel cap, akeca cap tep, kange deipu. 5Dinino, Kaindi duyanmau keca cap, Kain er nong cap tep, Allah dipetepudi, kange men deipu. Kange men deipka cadi, Kain kael kepudi, yu weik kupupa, er urasin genepdongonmau.
6Ukupupa, Allah er si Yahwehdi, Kain tep upepu. “Kanda ware keca deiyo tep, tulum kupmakerpa, kan urasin genedongopmarem do? 7Tek sisi telepngepu kupmemnyopda, nedi kange deipra, ‘Telepe,’ men tenepkamken do? Dinino, telepngepu men kupmemnyopda, kange moupkurume. Mali kuna deiyo keca mening dam kupkere. Isokdi tenpu ati pum bukmenge nesala tep, ‘Uo, anesala mali kupra deipkune’ tenen, pio putarepa, buplan dam bukra, pio kalekra dinapu kuretopu, mali kweipdanmanto konum kupkere. Dinino kan adipapu bisbisa kapra, amali kunada tapkurume.” Allahdi pepu.
8Upepu dipunen amendada, Kaindi er weit bo Habel tep, mawa di pepu. “Weito, kan cap nun bura tali benkaneme,” pepupa, banmareiyanen, bura mutu neitamai kunmarei taruda, Kaindi er weit bo sisa Habel tep, bongoprapudi, poptapupa, Habel depu. 9Ukupupa, Allah er si Yahwehdi, Kain tep asipetepu. “Kan weit bo Habelda, dan cei kunmar do?” pepra asipetepmaupa, Kaindi, “Jo, ne walwale. Neda ne weit bo Habel, er kalekra dina deiyo ngebo kunmana tep, aupu pepnerem do?” pepra iniptapu.
10Upepu pangeda, Allah er si Yahwehdi upepu. “Uo, kanda ware kupmaumum do? Geketerepo! Kan weit bo, er yapi tu deiki sakmaua di, ngolongmarpa gekepne. 11Ukutaruda, ne peipkenepa, ikin keca weik, kan nong deiki kunkamkere. Kan tep wipkene. Kan buru di kan weit bo poptapmaumpa, er yapi tu deiki sakmauaida, kange di ton cap men benkamrume.
12Tonda, dan mutu do yuma, tuai mutu yuma wa pepra koupetepkamrum dinin, bongopredi, er nong pio men kupkamkere. Akeca-keca yuma men pakamrepa, tali mesumpu pel donkamrume. Ukutaru di dipra, doryankamre taru yumada, ‘Amutu benkun do, ormutu benkun do?’ tenen, tenimtonapu kukerepa, tuai mutu ban-ban yuma neitamai di, pio embanapu kunkamreme,” pepra wenepu.
13Upepupa, Kaindi tamupra Allah er si Yahweh#4:13 Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume. tep pepu. “Uo, ne wenemna tep, ikin keca weik ne nong deiki deipnerem ngeda, ne ikin weik kupnere. Angeda, men kuptene.
14Atumi di, ‘Amutu neitamaida, men kunkamreme,’ pepra, tali bura mutu neitamai dokotepmanerempa, kan kumemyaida kikiman men kunkamne. Kan cap men antamkamneme. Kange tenimtonapu kunerepa, tuai mutu ban-ban yuma, tali embanapu kuramnepane, ware nesala do yuma, epnengopda, tali lupra poptapkamnenge,” pepu.
15Upepupa, Allah er si Yahwehdi Kain tep tamupra pepu. “Gume. Apepmaremtopu men kupkamkere. Ware ngebo do, kanda Kain tep popre ngeboda, nedi peipnepa, angebo tep kwangdakra ponapu kupkamenge. Ada tenpu taru teppu gume. Yoneitam bari nukra, kwang dangdankamenge,” pepu. Allah upepudi, ‘Ware nesala do yuma, Kain epmengedi, popnung’ tenen, upu sengdongona tep, Kain er nong deikida, peten kemne keca deipu. 16Ukupu pangeda, Kaindi Allah er si Yahweh, er kuramngai tapra, bura tara mutu, er sida Nod mutu bena kuramu. Nod mutuda, ada Eden ban mutu dinin, ortara keteng yakan tara kuramu.
17Kain dakuramnganen, er ner cap, sun kikiman dakuramreianen, nyakdareipa, er nerdi sun mi, er sida Henok pepra deipu. Ami deipu taruda, Kaindi ila ati arum donmaua tep, akati arum mutu si tep, Henok mutu pepra deipu. 18Dakuramipane, Henok konum nepkopda, erdi deipu mida, er si Irad. Amenda taruda, Iraddi er mi Mehuyael deipu. Mehuyaeldi er mi Metusyael deipu. Metusyaeldi er mi Lamek deipu.
19Lamek konum nepu dingeda, ner butene dopu. Ton ner er sida Adah. Ton ner, er sida Sila kuramu. 20Lamek er ner Adahdi, sun mi er sida Jabal deipu. Jabal nepudi, mi deipra dadeipdanen baramyane, derirameng nesala peda, sundi tenda ati dopbaramenganen kungedi, nimi peinung keca yala-yala yuma domba do, kambing do, sapi do, peinunge. Akeca yuma peinung nesalada, sun co puna ngeboda, Jabal kuramu.
21Jabal er weit bo sida, Yubal kuramu. Sun bung-bung pena kecapi cap, suling cap, talepra penge nesalada, sun co puna ngeboda, Yubal kuramu. 22Tonda, Lamek er ner Siladi mi ton deipu. Erdi deipu mi sida, Tubal-Kain kuramu. Erda gat keca er sida, tembaga cap, besi cap dopra, pel dona keca alat-alat yala weik, ketenepra deriramu. Tubal-Kain er weit ner sida, Namah kuramu.
23Tenpu taruda, Lamekdi er nerapu butene tep upepu. “Adah cap, Sila cap sun gekepnereso. Yuk ngebodi ne popmaneua tep, angebo konum poptapsi. Ada kaber ngebodi popmaneupa, nedi er tep konum poptapsipa depu. 24Allahdi, ‘Ware nesala do, Kain tep popmengopda, nedi peipnepa, ue yoneitam bari deiki di kwang dangdankamenge,’ pepu. Atep, popnengopda ne kangeda, denge weik tujuh puluh tujuh kali deiki di kwang dangna telepe,” pepu.
25Amenda taru Adam cap, Hawa cap kikiman kuramreipa, Hawadi sal mi ton deipudi, er si tep Set pepra deipu. Asi pepka deiyoda, ‘Kaindi ne mi Habel poptapneupane, er yo pununa tep, Allahdi melipneupa, ami konum karepmanere’ tenepudi, er mi sida, Set pepu. 26Set nepu dingeda, er mi ton deipudi, er sida Enos pepra deipu. Ataru neitamaida, ton tuai nesaladi gonga kepra, ‘Allah er si Yahwehdi melipsetu’ tenen, er si Yahweh erepra moronmai. Allah morona gonga kemna taruda, ataru di gonga kepidi, Allah er si Yahweh tep mororami.
നിലവിൽ തിരഞ്ഞെടുത്തിരിക്കുന്നു:
Kejadian 4: KNTOT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2022 Wycliffe Bible Translators, Inc