Kejadian 2
2
1Ukuprap ketekepra sengpepkopda, im cap, tuai mutu yuma cap, aneitamai kure keca yala-yala yuma, men nukmanto kuretopu, Allahdi akeca-keca yuma ketekepra deipudi, gawal daku. 2Ue tenpu ton yoneitam bari tuminge konum kupupa, Allahdi tenepu pel yuma konum gawal dakua tep, yoneitam bari tumi deikida, er pel yuma taprapudi, bepe peiku.
3Tonda, Allahdi, ‘Atumida pio teleppu kunkamre’ tenen, telep upu pepra deipkadi, yoneitam tumi tep, “Pio telep,” peprapudi, pio mambul tumi tep bokra deipu. Ada, Allahdi akeca-keca yuma, yala-yala weik ketekepra kunmauanen, konum gawal daku dingeda, yoneitam bari tumi deiki di beipye peipka tep, atumida ila mambul tumi kepra deipudi, bokra deipu. 4Aupu pepra sekeipmaseu upu yumada, Allah er si Yahwehdi#2:4 Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ‘YHWH’ sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda, lap pen upu nomor 49 dirume. im neitamai yuma cap, tuai mutu ban-ban yuma cap, ‘Ukupra ketekepra deipke,’ tenena tep sekeipsene.
Adam cap, Hawa cap ketekepra deipu upu
5Akeca-keca yuma talepra, Ila Deiyo Ngebo Allahdi im neitamai cap, tuai mutu cap, ketekepra derinmau taru neitamaida, nimi ton ketekepu. Ada, ware yala keca do, tu neitamai di tali paramre keca cap, wai dam paramre keca yala yuma cap, kapul men paku. Deiyoda, akeca-keca yuma, Ila Deiyo Ngebo Allah, er si Yahwehdi kapul men peipka cadi, moda kapul men cemamu. Tonda, ataruda, nimi kapul men ketekepra deipka tep, wa pena cap, tu palipra yal keca kouna cap, pel dopmanto ngebo men kupu. 6Nimi kapul men ketekepra deipmau dinin, tu pumbon di me bungna weik pakrapudi, me dana-dana tara yuma embeua deiki di, tu boun kupudi, telep kupu. 7Ataru neitamai di, Ila Deiyo Ngebo Allah er si Yahwehdi, tuai kalkal pemu tu dopropudi, tu teleprapudi, nimi nong tenpu ketekepra deipudi, er u bon neitamai kum pupupa, isin kupu. Ukupka deiki di, angebo gam kuna deiyo keca karepupa, isine kupudi, gam buku.
8Uda, ataru neitamaida, Allah er si Yahwehdi keteng yakan tara neitamaida, pio telep wa konum pepra yal keca koupra, ketenepmauai ukupu ketekepra deipmau ngebo dopra, awa neitamai deipu. Amutu si cap, awa tu si capda Eden ban kwamu.#2:8 Eden – Aupu deiyoda, ‘Pio telep ban mutu’ tenen, amutu sida ‘Eden ban’ pepi. 9Uda, Allah er si Yahwehdi peipupa, co palpal yala-yala yuma teku. Aco yumada, urasin pio telep co kwamu. Tonda, aco mouramu co du yumada, jena telep co du kwamu. Allahdi ketenepra deipu wa neitamaida, mambul co butene tekrei. Tenpu coda, Gam Kuna Deiyo Co teku. Butene ngeda, Mali Kuna cap, Telep Kuna cap, Kael Kemna Deiyo Co teku.
10Uda, Eden mutu di tenpu ila me yakanmaupa, Allahdi keteneipu wa neitamai ton embeu. Eden ban mutu neitamaida, ame bokrapudi, me yuk-yuk dumbari wiliprapudi, embeu. 11Menmena meda, er si Pison. Pison meda, Hawila mutu neitamai yuma kwanepdanen embeu. Hawila mutu neitamaida, emas kupudi, ton tupa akurure. 12(Amutu emasda pio telepnge kurure. Tonda kunumna weik keca, nintong telep co pe cap, kunumna weik mirin gel, oktu urasin utopunge cap kupudi, tupa akurure).
13Eden ban mutu neitamai dinin bokrapudi, abutene embeu me, er sida Gihon me embeu. Ameda, Kus mutu neitamai yuma kwanepdanen embeu. 14Me weneri ngeda, er sida Tigris me. Ada Asyur mutu dinin, keteng yakan tarapu embaramu me kwamu. Dumbari bokra embaramu me sida, Efrat me embeu.
15Ila Deiyo Ngebo Allah, er si Yahwehdi, ‘Eden ban mutu neitamai peramsi wada, talepra pel donkamre’ tenen, erdi ketekeipu ngebo dopra, awa neitamai deipu. 16Dopra deipudi angebo tep, Allah er si Yahwehdi pepu. “Awa neitamai kure co yumada, co du dakra jena telepe. 17Dinino, tenpu coda, aco du dakra men jenkamrume. Aco du jenada meme. Ada, Mali Kuna cap, Telep Kuna cap, Kael Kemna Deiyo Co du dakra jepmemnyopda, tek sisi depkamrem ja. Aco du tenpupuda pio men jenkamrume. Meme, pepkene,” Allahdi pepu.
18Amendada, Ila Deiyo Ngebo Allah, er si Yahwehdi utenepudi, pepu. “Gume. Tuai ngebo ketekepra deipsi ngebo, er yuk kururada, telepe gume. Ange tep nengeda, er melimna tep, er cap pio telep kupra kikiman kupmanto ngeda, ketekepra deipkune,” pepu. 19Uda, Allah er si Yahwehdi, tu doprapudi, tuai mutu deiki embaramre keca yala-yala yuma cap, im neitamai lakra embaramre ma yala-yala yuma cap, konum ketekepra deipmaua cadi, erdi peipupa, agam kure keca yuma tuai ngebo damai benmai. Allahdi ukupka deiyoda, ‘Angebodi agam kure keca yuma tep, ware si sipepra karepkur do?’ tenen, angebo damai dokotepu. Angebodi, “Akeca er si aca,” pepra deiputopu, akecada asipu tupa penupe.
20Agam kuramu keca yuma, Adam damai embanmaipa, erdi akeca yala-yala yuma tep, si sipepra karepu. Ada nimidi peirameng keca cap, im neitamai lakra embaramre ma yala yuma cap, tali bura tara kure keca yuma cap, si sipepra deipu. Adamdi, si sipepra karenmaupane, konum gawal daku dinin, er pe tep, telep kupra kikiman kupmantonge, er melipmanto keca tep, men kwamupa, men epu.
21Er pe tep melipmantonge gum tep, Allah er si Yahwehdi, er puto deiki di, Adam tep mapra deipupa, pio kange douna gum di mapmau. Mapmaupane, Allahdi angebo, er ik yo tenpu dopropudi, ik yo dopropmauai kange di dukdongopra, tu antipdongopu. 22Allah er si Yahwehdi, Adam er ik yo tenpu dopropmaua di, ner tenpu ketekepra deipu. Ner ketekeipudi, angebo damai yana karepu. 23Karepupa, Adamdi upepu. “Gume. Aner er yoda, ne yo pua. Er tuda, ne tu pua. Nimi nong neitamai di dopra ketekeipmar keca cadi, er sida, “Ner,” pepra deipne.” Adamdi pepu. 24Ange tep nengeda, ware ngebo do yuma, er nai sisa cap, er nin sisa cap, sun ati tapra, er dopre ner dipru dukdongopra, sunpu kikiman kunkamrenge. Sun nong tenpu utopu kunkamrenge. 25Uda aneng butene ketekeipu taruda, animi pe, er ner peda, sun tali banangapu kunmarei dinin, ange tenena gum dipapu, ali dangna gum dipapu, tali kange doupra kunmarei.
നിലവിൽ തിരഞ്ഞെടുത്തിരിക്കുന്നു:
Kejadian 2: KNTOT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
©2022 Wycliffe Bible Translators, Inc
