માથ્થી 5

ઈસુના ડોંગરવરલા વચન

(લુક. 6:20-23)

1પકા લોકસી ભીડ હેરીની ઈસુ ડોંગરવર ચડના અન તો તઠ બીસી ન સીકસન દેવલા લાગના, તેને માગુન તેના ચેલા તે પાસી આનાત. 2અન યી સાંગીની તેહાલા સીકસન દેવલા લાગના કા,

ધન્ય વચન

3મનમા જે આત્મિક રીતે ગરીબ આહાત, તે અસલ ધન્ય આહાત, કાહાકા સરગના રાજ તેહના આહા.

4જે દુઃખમા આહાત તે અસલ ધન્ય આહાત, કાહાકા દેવ તેહાલા દિલાસા દીલ.

5જે નમ્ર આહાત તે અસલ ધન્ય આહાત, કાહાકા તે ધરતીના વારીસ હુયતીલ.

6જેહાલા નેયી જીવન જગુની ખરી ઈચ્છા આહા તે અસલ ધન્ય આહાત, કાહાકા દેવ તેહની ભુક તીસ મીટવીલ.

7જે દયે કરતાહા તે અસલ ધન્ય આહાત, કાહાકા દેવ તેહાવર દયે કરીલ.

8ચોખે મનના આહાત તે અસલ ધન્ય આહાત, કાહાકા તે દેવલા હેરતીલ.

9શાંતિ બનવી રાખનાર તે અસલ ધન્ય આહાત, કાહાકા તે દેવના પોસા સાંગાયતીલ.

10દેવના ઈચાર પરમાને જીવન જગુલા સાટી દુઃખ ભોગવતાહા તે અસલ ધન્ય આહાત, કાહાકા સરગના રાજ તેહના જ આહા.

11જદવ લોકા તુમાલા માના ચેલા આહાસ ઈસા કરી ન નિંદા કરતીલ, અન તુમના સળ કરતીલ અન ખોટા બોલી બોલી ન તુમને ઈરુદમા અખે રીતને કાહી વેટ-વેટ ગોઠી સાંગતીલ, તાહા તુમાલા ધન્ય આહા. 12તાહા તુમી આનંદ અન પકા હાવુસમા મીચર હુયી જા, કાહાકા તુમને સાટી સરગમા મોઠા ઈનામ મીળુલા આહા, કાહાકા તેહી તે દેવ કડુન સીકવનાર સાહલા જે તુમને પુડ હતાત તેહનાહી ઈસા જ કરી સળ કરેલ.

દુનેની ગારા અન દુનેના ઉજેડ

(માર્ક 9:50; 4:21; લુક. 14:34-35; 8:16)

13તુમી દુનેના ગારા ઈસા લોકાસે સાટી આહાસ, પન જદવ ગારા સવાદ વગરને હુયી જાતેહે ત તેની ખારાસ કીસાક કરીની આજુ લયસેલ? તેલા બાહેર ટાકી દેતીલ અન તેવર ચાલી જાતીલ તેને સીવાય તેના કાહી કામ નીહી. 14તુમી દુનેને અખે સાહલા ઉજેડ ઈસા આહાસ, ડોંગરવરલા સાહાર બેસ કરી નદવાયજહ તી દપી નીહી રહહ. 15કોની દીવાલા પેટવીની ડાલખી ખાલી કા ત ખાટલા ખાલી રાખત નીહી, કા તેના લીદે દીવાના ઉજેડ દપી જાહા તીસા નીહી કરજોન! પન દીવાલા પેટવીની તેની ઠેવુને જાગાવર ઠેવી દીજહન. તાહા ઘરમાસલે અખે સાહલા ઉજેડ દીલ. 16તુમના ઉજેડ અખે લોકાસે પુડ ઈસે રીતી પડુ દીજા કા તે તુમના બેસ કામા સાહલા હેરીની સરગમા જો તુમના બાહાસ આહા તેલા તે વાનતીલ.

નેમ સાસતરના સીકસન

17તુમી ઈસા નોકો ઈચાર કરસેલ કા મા મૂસાના નેમ સાસતર અન દેવ કડુન સીકવનારસા લીખેલલા નાશ કરુલા આનાહાવ, પન તી પુરા કરુલા સાટી આનાહાવ. 18મા તુમાલા ખરા જ સાંગાહા કા, “ભલે આકાશ અન ધરતી જાતા રહીલ, પન જાવ પાવત મૂસાના નેમ સાસતરની અખે ભવિષ્યની ગોઠે પુરે હુયત નીહી જાત તાવ પાવત દેવને નેમ સાસતર માસુન કાહી પન, એક માત્રા કા એક વાય બારીક ટીપકા પન નીહી જાનાર.” 19જો કોની યે નેમ સાહલા માસલા એક જ બારીક નેમ તોડીલ અન દુસરે સાહલા પન તીસા કરતા સીકવીલ, તો સરગને રાજમા બારીક ગનાયજીલ પન જો કોની નેમલા માનીલ અન દુસરે સાહલા સીકવીલ તો સરગને રાજમા મોઠા ગનાયજીલ. 20કાહાકા મા તુમાલા સાંગાહા કા, જો તુમી સાસતરી લોકા અન ફરોસી લોકાસે કરતા બેસ કરી નેમલા નીહી પાળા, ત તુમી સરગને રાજમા કદી જાયી નીહી સકા.

રગને બારામા સીકસન

21યી તુમી આયકેલ આહાસ કા, આપલે વડીલ સાહલા દેવની ઈસા સાંગેલ કા, ખૂન નોકો કરસેલ, જો ખૂન કરીલ તેલા કચેરીમા સજા હુયીલ. 22પન મા તુમાલા સાંગાહા જો કોની તેને ભાવુસવર રગ કરીલ, તાહા દેવ તેના નેય કરીલ, જો કોની તેને ભાવુસલા હલકટ સાંગહ, તો યહૂદીસી મોઠી સભાને નેયના દંડને યોગ્ય હુયીલ, જો તેને ભાવુસલા અકલ વગરના સાંગહ તેલા નરકને ઈસતોમા ટાકી દેવામા યીલ. 23જદવ તુ દાન અરપન કરુલા સાટી મંદિરને વેદીવર જાસીલ, તદવ તુલા આઠવ યીલ કા તુને ભાવુસને મનમા તુને સાટી કાહી ફીરાદ આહા, 24ત તઠ જ મંદિરમા તુના દાન ઠેવી દીજોસ અન લેગજ જાયીની તુને ભાવુસ હારી સમજ કરી લીજોસ માગુન યીની તુના દાન તુ અરપન કરજોસ. 25જાવ સુદી તુ તુને દુશ્મનને હારી મારોગમા આહાસ તાવધર તેને હારી લેગજ સમજ કરી લીજોસ, નીહી ત તો તુલા કોરોટમા લી જાયીની નેયધીસલા સોપી દીલ અન નેયધીસ અમલદાર#5:25 અમલદાર સેંબર સિપાયસા અમલદાર સાહલા સોપી દીલ અન અમલદાર તુલા ઝેલમા કોંડી દેતીલ. 26મા તુમાલા સાંગાહા કા, જાવ પાવત તુ અખા દંડની પાયી-પાયી પુરા ભરી નીહી દેશ તાવ પાવત તુ ઝેલ માસુન નિંગાયનાર નીહી.

વેટકામને બારામા સીકસન

27તુમી યી આજ્ઞા આયકેલ આહાસ કા, સીનાળી નોકો કરસેલ. 28પન મા તુમાલા સાંગાહા કા, જો કોની બાયકોવર ખોટી નદર કર હવા તો તેને મનમા સીનાળી કરી ટાકના. 29જો તુમના જેવા ડોળા તુમને સાટી પાપના કારન બનહ, ત તે કન પાપ કરુલા બંદ કર, એક ડોળાને વગર દેવના રાજમા જાવલા કઠીન લાગહ, તરી પન દોની ડોળા રાખીની નરકમા ટાકાયસેલ તી વેટ આહા. 30જો તુના જેવા હાત તુને સાટી પાપના કારન બનહ, ત તેલા કાપી ટાકા, કાહાકા પદરને પુરા શરીરલા નરકમા લી જાવલા તેને કરતા તુમને શરીરને એક ભાગના નાશ હુયી જા તી તુમને સાટી બેસ.

સુટાસેડાના સીકસન

31જો કોની તેને બાયકોલા સુટાસેડા દીલ, ત તેલા સુટાસેડાના કાગદ લીખી દેવલા પડીલ ઈસા સાંગેલ આહા. 32પન મા તુમાલા સાંગાહા સીનાળીને કારન વગર દુસરા કાહી તરી કારન વરહુન જો કોની પદરને બાયકોલા સુટાસેડા દીલ, ત તો તીપાસી સીનાળકી કરવહ, અન જો કોની સુટાસેડાના કાગદ દીયેલ બાયકોલા રાખીલ તો તીને હારી સીનાળી કરહ ઈસા હુયીલ.

સપત લેવને બારામા સીકસન

(માથ. 19:9; માર્ક 10:11-12; લુક. 16:18)

33યી તુમાલા માહીત આહા કા, આપલે વડીલ સાહલા દેવની ઈસા સાંગેલ કા, તુમી ખોટી રીતે કીરે નોકો ખાસે પન દેવલા તુમી જી વચન દીનલા તે પરમાને કરજા. 34પન મા તુમાલા સાંગાહા કા, તુમી કદી પન કીરે નોકો ખાસેલ, સરગની પન નીહી, કાહાકા સરગ દેવની રાજગાદી આહા. 35ધરતીની પન કીરે નોકો ખાસે કાહાકા ધરતી દેવની પાય થવુની જાગા આહા અન યરુસાલેમ સાહારની નીહી કાહાકા યરુસાલેમ સાહાર દેવ જો મોઠા રાજા આહા તેના સાહાર આહા. 36તુમને ડોકીની પન કીરે નોકો ખાસે કાહાકા તુ એક પન કેશલા ફૂલેલ કા કાળા નીહી કરી સકસ. 37પન તુમની ગોઠ તી હય ત હય અન નીહી ત નીહી, કાહાકા જી કાહી તેવાની ઈસા વદારે હુયહ, તી વેટ કામ મજે સૈતાન સહુન હુયહ.

બદલા વિશે સીકસન

(લુક. 6:29-30)

38યી તુમાલા માહીત આહા કા, નેમમા લીખેલ આહા, તુમને ડોળા સાહલા ફોડીલ ત ડોળા ફોડ અન દાંત પાડીલ ત દાંત પાડ. 39પન મા તુમાલા સાંગાહા કા, જે વેટ કામ તુમને હારી કરતાહા તેહને ઈરુદ તુમી જોર નોકો કરસેલ, પન જો કોની તુને જેવે ગાલવર થાપડીકન દીલ તાહા ડાવા ગાલહી તેને સવ ધરજોસ. 40જો કોની તુને ઈરુદ કચેરીમા ફીરાદ કરીની તુના આંગડા લી લેવલા કરહ, તેલા તુમના ફડકાહી દી દીજાસ. 41જર સિપાય તેના સામાન ઉખલીની એક કિલોમીટર જાવલા બળજબરી કરીલ, ત તેને હારી દોન કિલોમીટર પાવત જાયજોસ. 42જો કોની તુ પાસી માંગહ તેલા તુ દીજો અન જો ઉસના લેવલા માંગીલ તેલા જી માંગીલ તી દીજા ના નોકો પાડસી.

દુશ્મનવર માયા

(લુક. 6:27-28,32-36)

43યી તુમી આયકનાસ કા, નેમમા લીખેલ આહા, તુમી પડોશીવર માયા કરા અન ઈરુદવાળા વર ઈરુદ કરા. 44પન મા તુમાલા સાંગાહા કા જે તુમના ઈરુદ કરતાહા તેહાલા તુમી માયા કરા અન જે તુમાલા અડચન દેતાહા તેહાલા દેવ આસીરવાદ દે ઈસી પ્રાર્થના કરા. 45ઈસા કરસે તાહા તુમના સરગ માસલા બાહાસ, જો સરગમા આહા તેના પોસા ગનાયસેલ, કાહાકા તો ત વેટ અન બેસ લોકા યે અખેસે સાટી દિસ ઉંગવહ, અન તો બેસ કામ કરતાહા તેહાવર અન ખોટા કામ કરતાહા તેહાવર તો પાની વરસવહ. 46જે તુમાવર માયા કરતાહા તેહવર જ તુમી માયા કરસે તાહા દેવ તુમાલા ફળ નીહી દેનાર. કાહાકા કર લેનાર હી તીસાજ કરતાહા.

47જો તુમી તુમને ભાવુસ સાહલા જ સલામ કરતાહાસ, ત તે કના મોઠા કામ કરનાસ? કાહાકા યહૂદી નીહી આહાત, તે પન દેવને નેમલા માનત નીહી. તે પન ઈસા જ કરતાહા. 48તે સાટી સરગમા રહનાર જીસા તુમના બાહાસ ભરપુર આહા તીસા જ તુમાલાહી અખેમા ભરપુર હુયુલા પડીલ.

നിലവിൽ തിരഞ്ഞെടുത്തിരിക്കുന്നു:

માથ્થી 5: DHNNT

ഹൈലൈറ്റ് ചെയ്യുക

പങ്ക് വെക്കു

പകർത്തുക