Luk 24
24
1Gô ntyugu nônga yi wiki, ayenjiṉa, antô mè w’aṽyeṉi g’ôrôngiṉô, ni yom̃a yi nkangô y’agekizyô waô. 2N’ayeṉi waô idô tômbô pa avila g’ôrôngiṉô; 3n’ayingiṉi antô, ndô wi pa diṽiny’ôkuṽa wa Rerè Yesu. 4Arweṉi gw’avegagi waô ni mpaga g’ômwanja wi ndaga yiṉo, vôna, aṉôm̃e aṽaṉi w’awôm̃unyi n’ingoy injombwi pyèrè na waô. 5Aryeṉi waô, avur’azô maô mbè gô ntye; ndô aṉaga mè w’awulinyi waô inè: Ntiṉa nde yi buta ṉwè ôma wi re bo gôre mongi wi re juwa pa? 6E zele vèṉo, ndô atôngwi. Yônginyareṉi nt’agambi yè na ṉwè ayè p’are gô Galile, inè: 7Ômwaṉa w’ôma e ga vô gw’ago m’aṉag’aṽe, ko yè banyô gô krosi, arô tôngwa gô ntyugu yi ntyarô. 8N’ayônginyi waô agamba mi Yesu.
9Awinyi waô avila g’ôrôngiṉô, awuly’isam̃u yiṉo yôdu gôr’igôm̃i n’ôm̃ori, na gôre mongi mori waôdu. 10Waô w’awuly’isam̃u yiṉo gôre rôm̃i w’avegagi wa Marya yi Magdala, na wa Yôana, na wa Marya, yi ngwè yi Yakobu, n’antô am̃ori w’avegagi na waô. 11N’ayeṉi waô agambi maô g’ewulyanyambyè, ko w’aṽekely’antô wiṉo. 12Ndô Pyère agum̃aṉi, avale mangô g’ôrôngiṉô. N’alèmbi yè mbè, avôna ayeṉ’iṉamba y’ivèla dimbiṉô pa mbôra ni yaô; n’awinyi yè gô nagô yè, mamag’isam̃u y’arweṉi.
13Na vôna, ntyugu mèmô, iṉèngi mbaṉi y’agèndi gô nkala yi fweyô inè, Emaus, y’avegagi avila gô Yerusalèm ôgèndo w’agwèr’ararô; 14n’agambagi waô g’ômwanja w’isam̃u yiṉo yôdu y’arweṉi. 15N’arweṉi gw’agambagi waô alôṽaṉage mpaga, Yesu ayèmè azusi pyèrè, agènda na waô. 16Ndô antyo maô m’azimbyô inè, w’amyè. 17Awulinyi yè waô inè: Agamba nde miṉo mi kambô ṉwè, gô kènda ṉwè, ko ṉwè dwaṉa n’azô m’ekèṽa? 18Ôm̃ori gôre waô, ini nyè ne, Kleôpas, awiṉizi yè inè: Gôre waô wi dwaṉa gô Yerusalèm, awè dadyè awè re ô pa my’isam̃u yi re twa pa gôgô intyugu siṉo? 19Awiṉizi yè waô inè: Isam̃u nde? N’awulinyi waô yè inè: Isam̃u yi re twa pa g’ômwanja wi Yesu, ya mwô’Nazarèt, avegagi ôvogisi wi ngulu gw’ijanja na gw’igamba g’ôzô w’Anyambyè na gw’azô m’aṉaga waôdu, 20ni nt’avenyô yè ôgara wi juwa na gô banyô gô krosi ne imiṉisè impôlô n’ivangiṉi yi pangiṉa zwè. 21Azw’avegagi n’igum̃u nè, ayè ne yè yi be danduṉ’Israèl; ndô vyagaṉô n’isam̃u yiṉo yôdu, ṉèṉo wiṉo ne ntyugu yi ntyarô isam̃u yiṉo ga dwaṉe. 22N’antô awèwo wi nkumbi yazô w’am̃amiza zwè, konde gw’akènda waô ibanga sôdu g’ôrôngiṉô, 23ko w’alèng’ôkuṽi wè, w’abya, awulya inè, w’ajeṉ’iyenjèl s’abôm̃unya gôre waô, awulya inè, are bo. 24N’awèwo gôre waô w’apegaga na zwè, w’akènda g’ôrôngiṉô, aliṽiny’isam̃u ga nt’abulya antô; ndô ayè wi pa jeṉe yè. 25N’awulinyô waô ne Yesu inè: Èñ, aṉaga wi r’ikôtiza fo, n’irèm̃’iyoli gô bekely’isam̃u yôdu y’awulyô n’ivogisi! 26E re pegeg’isolo inè, Krist e ga zindiṉ’isam̃u yiṉo, ko yè jingiṉa gw’ivendi nyè? 27N’avakilyi yè ni Môsès n’ivogisi yôdu, aṽènguṉa waô gw’Irèndo yôdu isam̃u yi re g’ômwanja w’ôkuṽi wèmè. 28Gw’arweṉi waô pyèrè ni nkala y’akèndyô waô, alendi mpaṉi ga e bele pyagaṉa. 29Ndô w’azimbyi yè, awulya inè: Lwaṉa na zwè, konde nkôlô y’atweṉi pyèrè, n’ôwenja w’akèndi pôlô. N’ayingiṉi yè gô dwaṉa na waô. 30N’arweṉi gw’avegagi yè baru na waô gw’inya, awongi mpèmba, n’ayè pa p’akeṽa, amoguṉi yô, ava yô gôre waô. 31Vovo aṉungwi antyo maô n’amyeṉi waô yè; ndô aṉiṉi avila gw’antyo maô. 32N’awulyaṉi waô inè: Irèm̃i yazô yi pa pya gô gare ntye yazô, gw’akambègè na zwè gô mpoṉo aṽènguṉa zwè Irèndo? 33Agum̃aṉi waô igwèra mè, awinya gô Yerusalèm, n’aliṽinyi waô igôm̃i n’ôm̃ori, na waô w’avegagi na waô dataṉa pa, n’awulyi waô inè: 34Rèti, Rerè are tôngwa pa, abôm̃unyi gôre Simôn. 35N’arakilyi waô isam̃u y’arweṉi gôre waô gô mpoṉo, ni nt’amyeṉi waô yè gw’egômbe z’am̃oguṉi yè mpèmba.
36Gw’agambagi waô isam̃u yiṉo, Yesu ayèmè awôm̃unyi gô garegare yaô, awulinya waô inè: Am̃ènjè gôre ṉwè! 37Ndô w’agôtyô n’ererya, arya, avikilya nè, w’ajeṉ’ibambô. 38Ndô awulinyi waô inè: Ntiṉa nde yi sugyazugya ṉwè, ni ntiṉa nde yi bya ipikilya ôṉongo mè gw’irèm̃i yaṉi? 39Vônaṉi ago mam̃ n’intyôzô sam̃, inè, ne myè rèti; ko kôtareṉi myè ayeṉa: konde ibambô nyi zele n’izôṉe ni pa, ga nte jeṉa ṉwè yô na myè. 40Gw’awulyagi yè yeṉo, arum̃inyi waô ago mè n’intyôzô sè. 41Na gw’arweṉi waô wi pa bekelya, gô mbya y’ayenyô waô, am̃amaga, Yesu aṽambyi waô inè: aṉw’are vèṉo n’ezom̃a zi nya? 42Aveṉi waô yè ntyuè yi njangaga n’ekulu z’ôṉèmbè. 43N’awongi yè yô, anya gw’azô maô.
44N’awulinyi yè waô inè: Miṉo n’agamba m’awulinyi myè ṉwè gw’avegagi myè na ṉwè, inè, isam̃u yôdu yi re tèndô pa gw’ivanga nyi Môsès, na gw’ivogisi, na gw’ijembô g’ômwanji wam̃ yi ga rwe rèti. 45Vovo aṉunguṉi yè waô wônjô yaô, inè, wi ga gôtiz’Irèndo y’Anyambyè. 46N’awulinyi yè waô inè: Yeṉo re tèndô pa inè, Krist e ga zindiṉ’ijuwa, ko yè tôngwa avila gw’ijuwa gô ntyugu yi ntyarô, 47na inè, iniga si nkôndi n’inyeza s’ibe kambiṉô gw’ini nyam̃ gw’aṉongo môdu, mpakilyaga gô Yerusalèm. 48Aṉwè ne iyeṉi y’isam̃u yiṉo. 49Na vônaṉi, mi be tôm̃a gôre ṉwè ômpangaṉô w’avangaṉô ne Reri yam̃; ndô aṉwè, lwaṉaṉi gô nkala yiṉo, kaô aṉwè aboryô ni ngulu avila gw’igôṉô.
50N’agèndi waô kwanga gô Betani, n’arômbiṉi yè ago mè, azaviṉa waô. 51N’arweṉi gw’azaviṉagi yè waô, aṽangwaṉi na waô, awongô g’ôrôṽa. 52Waô saviṉè pa, w’awinyi gô Yerusalèm ni mbya mpôlô; 53n’alwaṉagi waô egômbe zôdu gô nagô y’Anyambyè, nsum̃inyaga ni nsaviṉag’Anyambyè.
നിലവിൽ തിരഞ്ഞെടുത്തിരിക്കുന്നു:
Luk 24: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.
