Luka 15

O Tinako to Masidayay a Siri

(Matay 18.12-14)

1Yo ccay a romi'ad miraod ci Yisan ko 'alomanay a milisataay ato romaroma a ciraraway a tamdaw a mitngil to sowal Ningra. 2Itiya i, sangaliwngiw sa ko Farisay a tamdaw ato pasifana'ay to Rikec a somowal, <<O maolahay konini a tamdaw a mikapot to ciraraway a tamdaw a komaen,>> saan. 3Saka, patinako sato ci Yis a somowal i cangraan.

4<<Ano cima namo ko cisiriay to smo'otay i, ano masiday ko ccay i, maanen namo saw? Laliwen ningra i pala koya siwa a polo' ira ko siwa a siri, ta tayra cingra a mikilim toya ccay a masidayay a siri tangasa i kakraan#15.4 kakraan -- o roma i, katpaan (ka'amis). noya siri. 5Ano makra ningra i, salipahak sa cingra. Tamorongen ningra koya siri, 6a minokay. Ta tahidangen ningra ko widang ato fiyafiyaw ningra a misa'opo a somowal, <Kihatiyaen kako a lipahak, nawhani makrato ako koya masidayay a siri ako,> han ningra. 7Sowalen Ako kamo, malcad tonini ano pasasiyor ko faloco' no ccay a ciraraway a tamdaw a pasayni i Kawas i, ikaka ko lipahak ningra i kakarayan toya caay ko papasasiyor to faloco' a siwa a polo' ira ko siwa a mo^celay a tamdaw.

O Tinako to Masidayay a Payci

8<<O romasato, ira ko ccay a fafahiyan to cipayciay to mo^tep a rimood no ^kim. Ano masiday ningra ko ccay a rimood i, likaten ningra ko dawdaw, ta miasik to loma' a misongila' a mikilim tangasa i kakraan noya rimood no ^kim. 9Ano makra ningra i, tahidangen ningra ko widang ato fiyafiyaw ningra to fafahiyan a misa'opo a somowal, <Kihatiyaen kako a lipahak, nawhani makrato ako koya masidayay ako a rimood no ^kim,> han ningra. 10Sowalen Ako kamo, malcad tonini, ano pasasiyor ko faloco' no ccay a ciraraway a tamdaw a pasayni i Kawas i, tata'ang ko lipahak no coyoh no Kawas i cingraan,>> han ni Yis.

O Tinako to Sini'adaay a Wama

11Pasowal sa ci Yis to roma a tinako, <<Ira ko ccay a tamdaw. Tatosa ko wawa ningra to fa'inayan. 12Sowal sa koya safa i mama ningra, <Mamaaw, paflien kako i matini to malo no mako a todong a dafong,> han ningra. Saka, pakilac hanto noya mama koya tatosa a wawa ningra to dafong ningra. 13Nanoya, caho ka pina a romi'ad i, pacakayen noya safa ko dafong ningra a ma^min a palapayso, ta tayra cingra i maraayay a niyaro'. ^Minen ningra a mila'om ko payso ningra itira a patahtah a ma'orip. 14Yo ma^minto ningra a mila'om ko maamaan ningra i, ira ko tata'angay a kdal itira toya pala. Itiyato a macahiw cingra. 15Saka, palawina sato cingra to ccay a tamdaw noya pala. Ocoren noya tamdaw cingra a patayra i omah ningra a papipakaen to fafoy. 16O sto' ningra to cahiw saka, sakakomaenan sa cingra to kakaenen no fafoy a kakot#15.16 kakot -- o roma i, hahac (katimol).. Nikawrira, awaay ko pafliay i cingraan. 17Itiya i, talipa'lal sa ko faloco' ningra. Sowal sa, <Itira i cimamaan ako i, cirafas to kakaenen ko 'alomanay a koli ningra. Kako sa i, sakapatayan sa to cahiw i tini. 18Ano hatira i, o pinokay ako i cimamaan ako ko nga'ay. Ta sowal asa kako i cingraan, Wamaaw, ciraraw kako i ka'ayaw no Kawas, ciraraw kako i ka'ayaw iso. 19Caayto ka tatodong kako a malawawa iso. Palcad hanto kako ato koli iso, haenaw ako a somowal ko mama ako,> saan cingra. 20Saka, lowad sato cingra a minokay i cimamaan ningra.

<<Yo i ra:ayho no loma' cingra i, ma'araw no mama ningra cingra. Saka, sasini'ada sa koya mama a minengneng cingraan. Ta cikay sa koya mama a miraod i cingraan a mitakec a micocop. 21Sowal sa koya wawa i cingraan, <Mamaaw, ciraraw kako i ka'ayaw no Kawas. Ciraraw kako i ka'ayaw iso. Caayto ka tatodong kako a malawawa iso,> han ningra. 22Nikawrira, pasowal koya mama i koli ningra, <Kalamkamen a patayni ko sanga'ayay a riko' a pariko' cingraan. Ta pafatien ko tarodo' ningra. Pacokapen ko wa'ay ningra. 23Olili. Pacoken ko masoso^ay a tofor a kolong, o kakaenen ita a maacang. 24Nawhani nano mapatayay konini a wawa ako i, ma'orip haca. Nano malafelay i, minokayto,> han ningra. Saka, satapang sato cangra a maacang.

25<<Nikawrira, i omahho koya kaka a wawa ningra. Yo minokay cingra, mangata ko loma' i, matngil ningra ko radiw ato parekpek no kro. 26Saka, tahidangen ningra ko ccay a koli. <O maan konini a dmak saw?> han ningra a milicay. 27Sowal sa koya koli, <Ira a minokay ko safa iso. Caay ka maan ko tireng ningra a minokay saan ko mama iso a mihalhal saka, mipacok cingra to masoso^ay a tofor a kolong,> han ningra.

28<<Itiya i, makter koya kaka saka, caay ka sapicomodan i loma'. Sadak sa koya mama a mihima i cingraan. 29Nikawrira, pasowal sa koya kaka i mama ningra, <Haratengen. Halafinto kako a matayal to saki tisowanan. Caayho piliyang kako to limo'ot iso. Nikawrira, Pacoken ko ccay a tofor a siri to sakaacang iso ato widang iso, caho ka saan kiso i takowanan. 30'Arawhani, minokay konini a mikapotay to tasalamaan a fafahiyan a macilasay, mila'omay to dafong iso a wawa i, pacoken iso ko masoso^ay a tofor a kolong to sapalitmoh i cingraan,> han ningra. 31Sowal sa koya mama cingraan, <Wawaaw, mararid kiso a mikapot i takowanan. Saka, o dafong ako a ma^min i, o no miso a ma^min. 32Nikawrira, nano mapatayay konini a safa iso i, miliyaw a ma'orip. Nano malafelay cingra i, minokayto. Saka, o lalipahapahak aca kita a maacang han noya mama,> >> han ni Yis.

നിലവിൽ തിരഞ്ഞെടുത്തിരിക്കുന്നു:

Luka 15: AMIS2019

ഹൈലൈറ്റ് ചെയ്യുക

പങ്ക് വെക്കു

പകർത്തുക