Yohani 6

O Pipakaen ni Yis to Lima a Patek a Tamdaw

(Matay 14.13-21; Maroko 6.30-44; Luka 9.10-17)

1Nanoya, tayra ci Yis i ti:raw no Kalili a fanaw (oya Tipiriyas hananay a fanaw). 2Mitoor i ci Yisan ko 'alomanay a finawlan, nawhani ma'araw nangra ko kafahka'an a dmak ni Yis a miadah to adadaay. 3Macokacok ca Yis i lotok, aro' sato ci Yis ato nisawawaan itira. 4Itiya i, mangatato ko Pita'lifan a Lisin no Yutaya a tamdaw. 5Ca'ngaaw sa ci Yis to nika tayni no 'alomanay a tamdamdaw a miraod i Cingraan. Saka, sowal sa ci Yis ci Filipan, <<I cowa kita a mi'aca to ^pang to malosapakaen tonini a 'alomanay a tamdamdaw saw?>> han Ningra. 6(O sakasaan ni Yis i, o sapilifetaw Ningra ci Filipan. Saka, haenen Ningra ko sowal. Nawhani mafana' ci Yis to malodadmaken Ningra.)

7Paca'of sa ci Filip a somowal, <<Ano alamamamamang cangra kahaccaccay a komaen i, caay ka deng to ni'acaan to tosa a so'ot a tinali a kakaenen!>> han ningra.

8Tala'ayaw sa i ci Yisan ko ccay a nisawawaan ci Antiri o salikaka ni Simon Pitiro, sowal sa, 9<<Ira i tini ko citafoay a wawa to limaay a 'aplad no ^pang to nisanga'an to kalo^mi ato tosa a foting. Nikawrira, hatini ko nika 'aloman no tamdaw i, ma^deng a mimaan saw?>> han ningra.

10Pasowal sa ci Yis i nisawawaan, <<Pakamaro'en ko tamdamdaw,>> han Ningra. (O cirngosay itira.) Saka, aro' sa ko tamdamdaw itira. Ma^deng lima a patek ko fa'inayan aca. 11Ta tatoy sa ci Yis toya ^pang. Kansiya sa Cingra to Kawas ta pakilac han Ningra koya maro'ay a tamdamdaw. Haenen Ningra koya foting a pakilac. Ano hakowaay ko kangalayan nangra i, pakilac han Ningra. 12Yo mafcolto cangra i, sowal sa ci Yis i nisawawaan Ningra, <<Sa'opoen ko kinapcih a 'osaw a ^pang to saka^caaw ka saloya no ccaccay aca,>> han Ningra. 13Saka, sa'opo han nangra i, matomes ko tosa ko safaw a fakar to kinapcih to nano 'osaw nangra a komaen toya limaay a 'aplad no ^pang.

14Paka'araw ko tamdamdaw to kafahka'an a dmak ni Yis i, sowal sa, <<So'linay, onini a tamdaw koya tatayni i hkal a pali'ayaway to sowal no Kawas#6.14 pali'ayaway to sowal no Kawas -- Nengnengen i Yohani 1.21. a tamdaw,>> saan. 15Itiya i, mafana' ci Yis to nika o tatayni cangra a miala a paci^ci i Cingraan a palahongti. Saka, liyas sato Cingra a ccay a talalotok.

Romakat ci Yis i Fanaw

(Matay 14.22-33; Maroko 6.45-52)

16Yo pisakalafianto i, maloklon ko nisawawaan ni Yis a tayra i fanaw. 17Ta dakaw sato cangra to tamina a milacal a tayra i Kapirnaum. Itiya i, to'manayto. Caayho ka tayra ci Yis i cangraan. 18Itiya i, fahal sa a mafaliyos. Saka, malodis ko fanaw. 19Yo ma^deng lima ^nem a kongli ko ni'iwasan nangra i, ma'araw nangra ko nika romakat ni Yis i fanaw a miraod to tamina. Saka, matalaw cangra. 20Pasowal sa ci Yis i cangraan, <<O Kako, Aka ka talaw!>> han Ningra. 21Salipahak sato cangra a mipadakaw i tamina ci Yisan. Ta tangsol sato cangra a tahira i katayraan nangra.

Mikilim ko Finawlan ci Yisan

22Cilasato a romi'ad i, iraho i ti:raw noya fanaw koya finawlan. Ma'araw nangra ko nika ccay aca ko tamina itira. Mahapinang nangra ko nika caay pikapot ci Yis to nisawawaan Ningra a midakaw to tamina nangra. Deng o nisawawaan a ccay ko tayraay, saan cangra. 23Ira ko nai Tipiriyasay a pinapina a pakataminaay a talahkal i ngata no kakomaenan no finawlan to ^pang, oya pikansiyaan no Tapang to Kawas. Siday han nangra ko tamina itira. 24Mafana' ko finawlan to nika awa ci Yis ato nisawawaan Ningra itira saka, dakaw sato cangra toya tamina a tayra i Kapirnaum a mikilim ci Yisan.

O Saka'orip a ^Pang ci Yis

25Yo matama nangra ci Yis i ti:raw no fanaw i, licay han nangra ci Yis, <<Singsiaw, i hacowa a tahini kiso?>> han nangra.

26Paca'of sa ci Yis, <<So'linen Ako a somowal kamo, o sakapikilim namo i Takowanan i, caay ko nano ninengnengan namo to kafahka'an a dmak Ako, o nano nikafcolan namo a komaen toya ^pang. 27Aka ka tayal kamo to sapialaaw to mamalahdaw a kakaenen. O nika pisa'icel a matayal to sakaci'orip to mida'ocay ko nga'ay. Onini a kakaenen ko sapafli no Wawa no Tamdaw i tamowanan, nawhani matopaayto no Wama a Kawas ko Wawa no Tamdaw konini a dmak,>> han Ningra.

28Pasowal sa cangra ci Yisan, <<Maanen niyam ko dmak ta o kakaolahan no Kawas ko tayal niyam?>> han nangra.

29Paca'of sa ci Yis, <<O nipipaso'lin namo a miti'er to niocoran no Kawas a Tamdaw ko kaolahan no Kawas a dmak namo,>> han Ningra.

30Pasowal sa cangra i ci Yisan, <<O maan a kafahka'an a dmak ko sapa'araw Iso i tamiyanan ta paso'lin kami i Tisowanan? O maan ko dadmaken Iso saw? 31Komaen ko tato'asan ita to mana i kohkohan, mato nika tilid i Fangcalay Cudad toya, <Tfaden Ningra nai kakarayan ko kakaenen nangra,> saan,>> han nangra.

32Pasowal sa ci Yis i cangraan, <<So'linen Ako a somowal kamo, caay ka ci Mosi ko pafliay i tamowanan toya nai kakarayanay a ^pang.#6.32 caay ka ci Mosi ko pafliay i tamowanan toya nai kakarayanay a ^pang -- ano ^ca i, o nipaflian ni Mosi i tamowanan i, caay ko nai kakarayanay a ^pang. O Wama Ako ko pafliay i tamowanan to nai kakarayanay a so'linay a ^pang. 33Nawhani o nai kakarayanay a ^pang hananay i, o pafliay to 'orip i tamdamdaw a niocoran no Kawas,>> han Ningra.

34Sowal sa cangra, <<Singsiaw, rariden a pafli kami tora ^pang,>> han nangra.

35Pasowal sa ci Yis i cangraan, <<O sakaci'orip a ^pang Kako. O tayniay i Takowanan a tamdaw i, caayto ko mamacahiw. O paso'linay a miti'er i Takowanan a tamdaw i, caayto ko mamaso'aw to da'oc. 36Mahrekto Kako a somowal i tamowanan. Talacowa manengneng namo Kako i, caay paso'lin kamo, han Ako kamo kyami. 37O nipaflian no Wama i Takowanan a tamdaw a ma^min i, o tatayni i Takowanan. O tayniay i Takowanan a tamdaw i, caay ko fafalahen Ako. 38Nawhani o sakatayni Ako nai kakarayan i, caay ko sapitooraw to nafaloco'an no tireng, o sapilahciaw to nafaloco'an no miocoray Takowanan. 39O nafaloco'an no miocoray Takowanan i, o saka^caaw ka tkop no ccaccay aca no nipaflian Ningra i Takowanan a tamdamdaw. O sapalowadaw Ako a pa'orip nai patay cangraan a ma^min i saikoray a romi'ad. 40Nawhani o nafaloco'an no Wama Ako i, o sakaci'oripaw to mida'ocay ko minengnengay, mipaso'linay i Takowanan o Wawa. Ta o papalowaden Ako cangra a pa'orip nai patay i saikoray a romi'ad,>> han Ningra.

41<<O ma^poday nai kakarayan a ^pang Kako,>> tona saan ko sowal ni Yis saka, sangaliwngiw sa ko kakrikridan no Yutaya a tamdaw to pakayniay i Cingraan. 42Sowal sa cangra, <<Caay ka ci Yis hananay a wawa ni Yosif konini saw? Mafana' kita to mama ato ina ningra. Nawiro o ma^poday kako nai kakarayan saan cingra saw?>> saan cangra.

43Sowal sa ci Yis i cangraan, <<Aka ka ngaliwngiw kamo. 44Ano caay ko masolotay no miocoray i Takowanan a Wama ko tamdaw a papiraod i Takowanan i, awaay ko mama^deng a tayni i Takowanan. Oya tayniay i Takowanan a tamdaw i, o papalowaden Ako a pa'orip i saikoray a romi'ad. 45O sowal a matilid i cudad no pali'ayaway to sowal no Kawas i, <O mamapasifana' no Kawas ko tamdaw a ma^min,> saan. Saka, o mitngilay to sowal no Wama Ako a minanam i Cingraan i, tayni i Takowanan a ma^min. 46O paka'araway cangra to Kawas, caay ko sanay Ako. Deng Kako a ccay o nai Kawasay a tayni ko paka'araway to Wama. 47So'linen Ako a somowal kamo, o paso'linay i Takowanan a tamdaw i, ci'orip to mida'ocay. 48O sakaci'orip a ^pang Kako. 49Talacowa komaen ko tato'asan namo to mana i kohkohan i, mapatayayto cangra. 50Nikawrira, ano komaen ko tamdaw tonini a nai kakarayanay a ^pang i, caayto ko mamapatay cingra. 51Kako koya ma^poday nai kakarayan a ma'oripay a ^pang. Ano komaen ko cimacima tonini a ^pang i, o mamida'oc cingra a ma'orip. O sapafli Ako i cingraan a ^pang hananay i, o hci Ako, o sakaci'orip no tamdamdaw konini,>> han ni Yis.

52Laliyaliyang sato ko kakrikridan no Yutaya a tamdaw a somowal, <<Samaanen nonini a tamdaw ko nipipafli to hci ningra i titaanan a pakaen hakiya?>> saan cangra.

53Pasowal sa ci Yis i cangraan, <<So'linen Ako a somowal kamo, ano caay ka komaen kamo to hci no Wawa no Tamdaw ato rmes Ningra i, caay ko caci'orip kamo. 54O caci'orip to mida'ocay ko komaenay to hci ato rmes Ako. O romasato, o papalowaden Ako cingra a pa'orip nai patay i saikoray a romi'ad. 55Nawhani o so'linay a kakaenen ko hci ato rmes Ako. 56O komaenay to hci ato rmes Ako i, o malaccayay ato Kako koya tamdaw. 57Ocoren no ma'oripay a Wama Kako. Cingra ko tatapangan no 'orip Ako. Malcad tonini, o komaenay Takowanan i, Kako ko tatapangan no 'orip ningra. 58Kako koya ma^poday nai kakarayan a ^pang. O komaenay tonini i, mida'oc a ma'orip. Caay ka matiya o nikaenan no tato'asan namo a mana. O komaenay to mana i, mapatayayto,>> han ni Yis.

59O sowal ni Yis konini i kasa'opoan a loma' yo pasifana' Cingra i Kapirnaum.

O Sakaci'orip to Mida'ocay a Sowal

60Matngil no 'alomanay a nisawawaan konini. Sowal sa, <<O pakinaliay a sowal konini. Cima ko papakahadidi a mitngil saw?>> saan.

61Mafana' ci Yis to nika ngaliwngiw no nisawawaan Ningra i, sowal sa i cangraan, <<O sakatoled namo konini saw? 62Ano hatira i, ano ma'araw namo ko nika cakat noya Wawa no Tamdaw a patiko a tayra i kaitiraan Ningra i 'ayawto i, maan sato kamo saw? 63O Fangcalay 'Adingo ko pafliay to 'orip. Awaay ko ^poc to no tamdawan a dmak. O ni sowalan Ako i tamowanan i, o mipafliay to 'orip ko 'Adingo. 64Nikawrira, ira ko caay paso'lin namo to sowal Ako,>> han Ningra. (Mafana'to ci Yis to nika cima ko caay paso'lin ato cima ko papacakay Cingraan.) 65Pasowal sa ci Yis, <<Orasaka, mapasowalto Ako kamo toya Ano caay ko nipafaloco'an no Wama Ako koya tamdaw i, awaay ko ma^dengay a tayni i Takowanan, han Ako kamo kyami,>> han Ningra.

66Orasaka, 'aloman ko miliyasay a mitooray i Cingraan. Caayto pikapot Cingraan a talacowacowa. 67Pasowal sa ci Yis toya tosa ko safaw a tarokos, <<Halo amo a sapiliyasan saw?>> han Ningra.

68Paca'of sa ci Simon Pitiro, <<Tapangaw, i cimaanan kami a palawina saw? Deng Kiso a ccay ko pasowalay to sakaci'orip to mida'ocay. 69O paso'linay kami, o mafana'ay kami to nika o Fangcalay a niocoran no Kawas Kiso,>> han ningra.

70Pasowal sa ci Yis i cangraan, <<O nipili'anto Ako kamo kyami o tosa ko safaw a tamdaw. 'Arawhani, o palafoay ko ccay namo,>> han Ningra. 71Onini i, o nika somowal ni Yis to pakayniay ci Yutaan, o wawa ni Simon o Iskariyot a tamdaw. O ccay noya tosaay ko safaw a tarokos cingra. 'Arawhani, sapacakayan cingra ci Yisan.

നിലവിൽ തിരഞ്ഞെടുത്തിരിക്കുന്നു:

Yohani 6: AMIS2019

ഹൈലൈറ്റ് ചെയ്യുക

പങ്ക് വെക്കു

പകർത്തുക