Yohani 1

O Sakaci'orip a Sowal

1I 'ayaw no nika sanga' no hkal i, irato: ko Sowal. Malakapot ato Kawas ko Sowal. O Kawas ko Sowal. 2Nanisa'ayaw a o malakapotayto ato Kawas konini a Sowal. 3Pakayni i Cingraan ko sakaira no kalomaamaan. Onini a kalomaamaan i, awaay ko caay pakayni i Cingraan a masanga'. 4O tatapangan no 'orip Cingra. O pata^ngaday to tamdaw konini a 'orip. 5O pata^ngaday to to'man Cingra o likat. Caay pakapadeng to likat ko to'man.

6Ira ko ccay a niocoran no Kawas a tamdaw. Ci Yohani ko ngangan ningra. 7O pasowalay to pakayniay toya likat ko sakatayni ningra. Ta pakayni i pipasowal ningra ko sapaso'lin no tamdamdaw a ma^min. 8Caay koya likat cingra. O papasowal aca to pakayniay toya likat ko nika tayni ningra. 9O so'linay a likat konini a sowal. O tayniay Cingra i hkal a pata^ngad to polong no tamdamdaw.

10O iraayto i hkal Cingra o Sowal. Pakaynien no Kawas i Cingraan ko nipisanga' to hkal. Nikawrira, caay ka fana' ko tamdamdaw i cingraan. 11Tayni Cingra i kitakit no tireng i, caay pihamham ko finawlan Ningra i Cingraan. 12Nikawrira, o mihamhamay i Cingraan, oya paso'linay a miti'er i Cingraan a tamdamdaw i, mapafli Ningra cangra to sakacitodong a malawawa no Kawas. 13O sakanga'ay nangra a malawawa no Kawas i, caay ko nano pakatamdaway a nihofocan. Caay ka matiya o nika ciwawa no tamdaw. O nano Kawas a nihofocan cangra.

14Malatamdawto ko Sowal a mikapot i titaanan a maro', matomesay no mikomi#1.14 mikomi -- o no Ripon a sowal, tatodong nonini i, mahawop ko sini'ada, adayay, sapakalmed, nga'ayay a faloco', miahowiday, sadama, 'icel no Kawas. ato so'lin. Ma'araw no mita ko nika ci'dil Ningra, onini a 'dil o lalayapen no dengan a Wawa no Kawas.

15Mipawacay ci Yohani to saki Cingraan, lkal sa, <<Oya pakayniay Cingraan i, o nano nisowalanto ako i 'ayaw toya <O aira i ikor ako a tayni ko ikakaay ako ko nika tadamaan. Nawhani i 'ayaw no nika sofoc ako i, irato: Cingra,> >> saan.

16Nai laloma' no kadofah Ningra, milayapay to kita to mikomi, ta mapalmed a mapalmed haca kita. 17Pakaynien no Kawas ci Mosian ko nipipafli i titaanan to Rikec. Nikawrira, pakayni ci Yis Kristoan ko saka ira no mikomi ato so'lin. 18Awaayho ko paka'araway a tamdaw to Kawas. O i tatihiay no Wama a dengan a Wawa no Kawas ko pahapinangay i titaanan to Kawas.

O Pipasowal ni Yohani o Paino'ay

(Matay 3.1-12; Maroko 1.1-8; Luka 3.1-18)

19O Pipawacay ni Yohani o Paino'ay. Itiya i, ocoren no i Yirusalimay a kakrikridan no Yutaya a tamdaw ko citodongay to ta'ong ato Lifi a tamdaw a patayra i ci Yohanian a papilicay, <<Cima kiso?>> han a milicay, han nangra.

20Caay kilifen ni Yohani cangra. Patalahkal han ningra a somowal, <<Caay ko Kristo kako,>> han ningra.

21Licayen nangra cingra, <<Ano hatira i, o cima aca kiso? Ci Iliya haw?>> han nangra.

<<Caay,>> han ningra.

Licayen nangra cingra, <<Oya pali'ayaway to sowal no Kawas#1.21 pali'ayaway to sowal no Kawas -- Hinatala ko Israil to paparatoh to nika ira ni Kristo. kiso haw?>> han nangra.

<<Caay,>> han ningra.

22Licayen nangra cingra, <<Ano hatira i, o cima aca kiso? Paca'ofen kami, ta ira ko sapaca'of niyam toya miocoray i tamiyanan a tamdamdaw. O maan kako sa kiso to tireng iso saw?>> han nangra.

23Pasowal sa cingra, <<Kako koya nisowalan ni Isaya o pali'ayaway to sowal no Kawas toya,

<Ira ko ccay a milkalay i kohkohan a somowal,

Songila'en ko malolalan no Tapang,> sanay,>> han ningra.

24O Farisay a tamdaw ko miocoray i cangraan. 25Licayen nangra cingra, <<Ano caay ka o Kristo kiso, caay ka ci Iliya, caay koya pali'ayaway to sowal no Kawas kiso i, nawiro mipaino' kiso saw?>> han nangra.

26Paca'of sa ci Yohani, <<O nanom ko sapaino' ako. Nikawrira, ira i tamowanan ko ccay a kafokilan namo a tamdaw. 27O i ikoray ako aira Cingra. Ano o kaosto no cokap Ningra i, caay ka tatodong kako a mitdal,>> han ningra a somowal.

28I ti:raw no Yortan a 'alo i Pitani a ira konini a dmak. O pipaino'an ni Yohani konini.

O Tofor a Siri no Kawas

29Cilasato a romi'ad i, ma'araw ni Yohani ko nipiraod ni Yis i cingraan. Sowal sa, <<Nengnengen, onini koya mamihpol to raraw no tamdamdaw a Tofor a Siri no Kawas. 30Onini koya na masowalayto ako, toya <O aira i ikor ako a tayni ko ikakaay ako ko nika tadamaan. Nawhani i 'ayaw no nika sofoc ako i, irato: Cingra,> 31Caayho ka 'araw ako Cingra. Nikawrira, o sapahapinangaw ako a pakafana' i finawlan no Israil to pakayniay i Cingraan. Saka, tayni kako a paino' cangraan,>> saan.

32Pawacay haca ci Yohani, <<Ma'araw ako ko Fangcalay 'Adingo, matiya o topi ko nika ^pod nai kakarayan a patfo i Cingraan. 33Caayho ka fana' kako tonini a tamdaw itiya. Nikawrira, oya miocoray takowanan a papipaino' a Kawas ko pasowalay i takowanan, <Ano ma'araw iso ko nika ^pod no Fangcalay 'Adingo a maro' i cimaanan i, orira a tamdaw ko mamipaino' i tamowanan to Fangcalay 'Adingo,> saan. 34Ma'arawto ako konini a dmak. Saka, o pasowalay kako i tamowanan to nika o Wawa no Kawas Cingra,>> saan.

O Sa'ayaway a Nisawawaan ni Yis

35Cilasato a romi'ad yo ira haca ci Yohani ato tatosa a nisawawaan ningra itira i, 36Ma'araw ningra ko nika romakat ni Yis a mita'lif. Saka, sowal sa ci Yohani, <<Nengnengen, onini koya Tofor a Siri no Kawas,>> han ningra.

37Mitngil koya tatosaay a nisawawaan to sowal ni Yohani i, toor sato ci Yisan. 38Siikor sa ci Yis a minengneng to nipitoor nangra. Ta pasowal sa i cangraan, <<O maan ko nilongocan namo?>> han Ningra.

Pasowal sa cangra, <<Rapi, (o tatodong no Rapi i, Singsi sanay), i cowa a milafin Kiso?>> han nangra.

39Pasowal sa ci Yis i cangraan, <<Katayni a minengneng,>> han Ningra. Saka, lahaklong sato cangra aci Yis a tayra a minengneng to pilafinan ni Yis. Ta, itira sato cangra toya romi'ad a mikapot ci Yisan. (Itiya i, ma^deng spat ko toki to hrek no lahok.)

40O ccay noya tatosaay a mitooray ci Yisan tona mitngil to sowal ni Yohani i, ci Antiri, o safa ni Simon Pitiro. 41Tangsol sa cingra a mikilim to kaka ningra ci Simon. <<Malitmoh niyam ko Misiya,>> han ningra a pasowal. (O tatodong no <<Misiya>> i, o <<Kristo>> sanay). 42Kriden ningra ci Simon a patayra i ci Yisan.

Pamotek han ni Yis cingra a minengneng. Sowal sa, <<O wawa ni Yohani ci Simon kiso. Ci Kifas wa hanto kiso,>> han Ningra. (O tatodong no Kifas i, ci Pitiro o 'ongcoy sanay.)

O Pitahidang ci Filipan aci Natanailan

43Cilasato a romi'ad i, yo tatayra ci Yis i Kalili i, malitmoh Ningra ci Filip. <<Pitoor i Takowanan,>> han Ningra. (44O Pitsayta a tamdaw ci Filip. O niyaro' na Antiri aci Pitiro ko niyaro' ningra.) 45Malitmoh ni Filip ci Natanail. Sowal sa, <<Malitmoh niyam ko ccay a tamdaw, oya nisowalan ni Mosi i nitilidan a Rikec ato nisowalan no pali'ayaway to sowal no Kawas i cudad nangra. Ci Yis o Nacali a tamdaw o wawa ni Yosif cingra,>> han ningra.

46Pasowal sa ci Natanail i cingraan, <<Ira ko maan to nga'ayay a dmak i Nacali a niyaro' saw?>> han ningra.

Pasowal sa ci Filip, <<Katayni a minengneng,>> han ningra.

47Ma'araw ni Yis ko nipiraod ni Natanail i Cingraan saka, sowal sa ci Yis to pakayniay i cingraan, <<Onini ko tadaso'linay a Israil a tamdaw. Awaay ko mangah i faloco' ningra,>> saan.

48Pasowal sa ci Natanail i ci Yisan, <<Nawiro mafana' kiso i takowanan saw?>> han ningra.

Paca'of sa ci Yis, <<I 'ayaw no nipitahidang ni Filip i tisowanan i, ma'arawto Ako kiso itira i kala^no no sokon a kilang,>> han Ningra.

49Paca'of sa ci Natanail, <<Singsiaw, o Wawa no Kawas Kiso. O hongti no Israil Kiso,>> han ningra.

50Pasowal sa ci Yis, <<Ma'araw Ako kiso i kala^no no sokon a kilang, han Ako kiso saka, paso'lin kiso saw? O mama'araw iso ko ikakaay nonini a dmak,>> han Ningra. 51Pasowal sa ci Yis i cangraan, <<So'linen Ako a somowal kamo, o mama'araw namo ko nika fawah no kakarayan ato nika cokacok ato nika loklon no coyoh no Kawas itira toya nai kakarayanay a Wawa no Tamdaw,>> han Ningra.

നിലവിൽ തിരഞ്ഞെടുത്തിരിക്കുന്നു:

Yohani 1: AMIS2019

ഹൈലൈറ്റ് ചെയ്യുക

പങ്ക് വെക്കു

പകർത്തുക