Luuga 8

8
La lina ligathajo Yasuuⓐuŋw uwa
1Ŋwujalo gwitiny, ŋwaji ŋwela ŋwen peth ŋwina ŋwipiŋwipa a ŋwitiŋwitiny, ŋwabiŋaijo lijo, ŋwulaŋajo Dhuŋuna dhina Dhiŋir dha gidhila ga Kalo; alela calmiz jai jina jiro die‐a‐ram. 2A la coŋ ila ko lina ligetuŋwulo momaŋ, dilaŋ luthi nyurinya a ŋirainy ŋiter. Maryam gwina gwan Majdaliiya, gwina gwiteyuŋwna nyurinya kworoŋo‐thiril. 3A Yuwanna, gwina gwiro kwa gwa H̱uuzi, gwina gwiro wakiil gwa Hiiruudus, a Suusanna, a liter loinyadho lina lathupijo Yasuuⓐŋaije ŋida ŋegen.
Odaije gwa kwiji gwina gwathauni
4A ma liji auradha liduŋw loinyadho alela dugun lina lidhi ŋwen peth, ŋwulabiŋaijo odaije gwai, ŋwulaici, 5Kwiji gweta gwiludhi dauni ŋwon ŋwai. Muŋw auni, a ŋwon ŋwitiny ide gi dhai alaŋ; al liji dota galo, i al nyira nya kabo eny. 6A ŋwitiny ide kol alaŋ; altu, anaiadhe ganu, ŋwati ŋwuthi ŋau no. 7A ŋwitiny ide gi cugi ganu; altuya ganu cugi jai, al cugi eny. 8A ŋwiter ide ŋiro ganu ŋina ŋiŋir, altu, alrire keleŋa dure‐thudhina, dure‐thudhina. A dina muŋwabiŋi dhuŋuna ibidhe peth, ŋwulabiŋaijo, ŋwulaici, Gwina gwuthi nyuni nya dhidiŋini, abricul ŋwudiŋini. 9A calmiz juŋun abiŋaijo, alothaije galo odaije gwai. 10Ŋwulabiŋaijo, ŋwulaici, Dagalo gwimadhedhini diliŋa dhuŋuna dhina dhigilibicinu dha gidhila ga Kalo; abi gi liji liter odaije gwai; dilaŋa athilbi aŋudhi no, a didiŋini athilbi liŋidhi no. 11Odaije gwiro minoŋ. Ŋwon ŋwiro dhuŋun dha Kalo. 12Ŋwina ŋwathije gi dhai alaŋ ŋwiro ŋinena liji lina lathidiŋini; abi maji ma Sheṯaan ila, ŋwapai dhuŋuna gi dugor ganu degen, ŋwari lati luminyi, algilaŋini no. 13A ŋwina ŋwathije kol alaŋ ŋwiro ŋinena liji lina lathidiŋini anmuthadha dhuŋuna ganu iŋir gwai dugore; athilbuthi duwa no, athiluminyi ŋwamun coŋ, abi maji mal ugejini gi dugor ganu degen, athilide. 14A ŋwina ŋwido gi cugi ganu, ŋwiro ŋinena liji lina lathidiŋini, athilelila, al dugor miri, aluminyi ŋida ŋina ŋathil dugor degen bupe ŋina ŋama ŋa gidhila ibiga, athil apa fruuta gwina gwiŋir no. 15Abi ŋwina ŋwathije ŋiro ganu ŋina ŋiŋir, ŋwiro ŋinena liji lina lathidiŋini, almuthedha dhuŋuna momaŋ, aluthi dugore dina diŋir, athil apa fruuta mutha gwai dugore.
Alimiye gwa lamba
16Kwiji gwate gwina gwathora shama, ŋwulgirba galo leny lai, i ŋwulgeta gi lagram ganu no. Jathuŋwululeje gi shamadan; ŋwari liji laŋa fure lina lathuni. 17Ŋidi ŋate ŋina ŋigilibicinu ŋina ŋati ŋaji ŋuŋini no; a dhuŋun dhate dhina dhigilibicinu dhina dhati dhaji dhaliŋini ŋwubai galo no. 18A minoŋ ethadhinul galo akwai nyadiŋini; gwina gwuthi ŋida, gwaji gwaldhedha ŋida; a gwina gwati gwuthi ŋida no, gwaji gwalapa ŋida ŋina ŋaruŋw ŋai nu ŋuŋwuluthi.
Limaguri titiganu
19A nana gwuŋun a limegen ila, athilbuthi ŋoma lela dugun no, ŋinena jo liji loinyadho. 20A liji coŋ abiŋaijo, alaici, Nana gwuŋa a limagalo lo por lara laŋaŋa. 21Ŋwulabiŋaijo, ŋwulaici, Nana gwiny a limaguri liro liji lina lathidiŋini dhuŋuna dha Kalo, aluthejo nyuni.
Yasuuⓐ gwidhunujo karuna
22A lamun leta aluni calmiz jai juŋun gi felluuka ganu, ŋwulabiŋaijo, ŋwulaici, Almure kimumu giter ga baẖr. Aldhiŋa felluuka, algwela. 23A dina idhilo ŋwudhire; a karun aji ŋware gipa, ŋwuluguje ŋau ganu; a ŋau oinyadhe felluuka, a felluuka ari gwiduthe. 24Alela dugun, albirtheye, alaici, Muⓐallim gwai, Muⓐallim gwai, anaŋa ladhirudhe. Ŋwubirthe, ŋwuŋeŋira karuna, ŋwuŋeŋira ŋau; aljalo jigwoiny, a kalo audhaiji galo. 25Ŋwulabiŋaijo, ŋwulaici, Imaan gwalo gwada? Aldhenya, alali galo dir, alabiŋaijiye degen ganu, alarnu, Kwiji ibigwa gwiro dhaŋ? Gwathabiŋaijo karuna a ŋau ko, aluthejo nyuni.
Iŋir nono gwa kwiji gwina gwuthi nyurinya gwa Jiriasi
26Alobani gi len la Jiriasiyiin lina lidhunu Jaliiluŋw ganu. 27A dina muŋw ela kimumu, albudhe kwiji ŋalai gweta gwa len, gwina gwuthi nyurinya ro dilaŋ, athuŋw gena ciraŋa no, athathuŋw jo dunu no, abi gwathije gi del ganu. 28Dina aŋadhuŋw Yasuuⓐuŋw, ŋwure gwula, ŋwide ŋwora ganu dugun, ŋwothaije galo gwuleny, ŋwaici, Yasuuⓐ gwai, gwina gwiro Ŋari ŋa Kalo gina ginaŋ, au gwibopaijiny aŋa? Nyi gwothaijaŋa galo, nyari ŋa gwati gwinyure ŋina no. 29(Gwabiŋaijo ŋurinya kwereny ŋwari ŋutu kwiji ganu. Ŋwamun ŋwamun dilaŋ athi ŋuriny mutha, athi liji gukeje galo jijir jai a ŋwuruŋw ŋwai; athuŋwulurtineye, athi ŋuriny odhadha gi leba.) 30A Yasuuⓐ othaije galo, ŋwaici, Au gwan ei? Ŋwarnu, Nyi gwan Nyoinyadho, ŋinena athi nyuriny nyoinyadho uni dugun. 31Alothaije Yasuuⓐuŋw galo, alari nyati nyuŋwuldhiŋa kalo gina golaŋ ganu no. 32A judhur je joinyadho len nono deny galo; a nyuriny othaije galo, alari nyuŋwul abrico aluni gi judhur ganu. Ŋwulabrico. 33A nyuriny tu kwiji ganu, aluni gi judhur ganu; a judhur abire gwuleny, aldhidhireje len nono, alule ŋau ganu, aldhirudhe, alai. 34Dina ma liji lina lathie judhura aŋa dhuŋuna dhina dhupinu, alabire, alela, albai galo dhuŋun dhai gi len ibile a ŋwen ŋwiter ko. 35A liji ela, alari laŋa darnu dhuŋun dhiro dhaŋ dhina dhupinu; alobani di Yasuuⓐ, albuje kwijo gwina gwiman nyuriny tu ganu, dijalo ŋwora ganu di Yasuuⓐ, gwigeno ciraŋa, ŋwaudhaiji galo; aldhenya. 36A liji lina laŋadhi nyurinya ditu allaŋajo dhuŋuna darnu dhiro akwai nyuriny nyimutu dugun minoŋ. 37A liji peth la ŋwen ŋwa Jiriasiyiin ŋwina ŋwijo githigitho alothaije Yasuuⓐuŋw galo gwuleny, alari luŋwulgathani; lidhenyo gwuleny. Ŋwuni gi felluuka ganu, ŋwaura. 38A kwiji gwina gwiman nyuriny tu ganu ŋwothaije galo ŋwari gwalgwela, abi Yasuuⓐ dhiŋa, ŋwaici, 39Auro, ŋela dunu duguŋa, ŋaŋajo lijo luŋa dhuŋuna peth dhinaŋ dhina dhigitijaŋa Kalo. Ŋwela, ŋwubai galo dhuŋun dhai gi len peth dhina dhigitijo Yasuuⓐ.
Dire gwa ŋera ŋa Yaayirus dai, a iŋir nono gwa kwa gwina gwathurthi
40A dina ma Yasuuⓐ aura, a liji peth uminyi, aliŋir dugore; gwidhunijulo peth. 41A kwiji gweta ila gwina gwan Yaayirus, gwina gwiro kweleny gwa majmaⓐ. Ŋwide ŋwora ganu di Yasuuⓐ, ŋwothaije galo ŋwari gwalgwela dunu dugun. 42Gwuthi ŋera ŋetipo ŋar jidhileo die‐a‐ram ŋwudhire galo, ŋwari ŋai. Abi dina idhi Yasuuⓐ, a liji urejo galo.
43A kwa gweta ela gi dhuro ganu dugun gwina gwathurthi gwortal jidhileo die‐a‐ram, gwilaŋ gwidhedhi luma gwarush gwuŋun peth, athuŋwbi uro nono no. 44Ŋwumini luga luŋun; an ŋin ŋuŋun ernadha ganu, ŋwure nono. 45A Yasuuⓐ arnu, Eibi gwimininy? A liji peth doinya, a Buṯrusŋa liji lai lina lidhilai alaici, Muⓐallim gwai, liji loinyadho lurejaŋa galo, ŋalupe nono, ŋabarnu, Eibi gwimininy? 46Albi Yasuuⓐ aici, Kwiji gweta gwimininy. Nyi gwiliŋidhi darnu ŋoma ŋimutu diginy. 47A ma kwa liŋa darnu gwati gwagilbini no, ŋwila ŋwubigalo, ŋwide ŋwora ganu dugun, ŋwabiŋaijo gi liji ganu gwiminejuŋw aŋa, ŋwunbiŋiradha ganu. 48A Yasuuⓐ abiŋaijo, ŋwaici, Ŋera ŋai, iŋirii dhugore; imaan gwuŋa gwimaŋa iŋiriye nono. Idhi audhaijiye gwai galo.
49Dina abiŋaijuŋw kwaio, a kwiji gweta ila gwina gwidhi gi dunu gwa kweleny gwa majmaⓐ, ŋwabiŋaijo, ŋwaici, Ŋera ŋuŋa ŋimai. Abrico Muⓐallim. 50Abi dina ma Yasuuⓐ diŋini, ŋwabiŋaijo, ŋwaici, Athaŋa dhenyo no; ŋa buminyi dogo; a ŋera ŋiŋir nono. 51Alela, a dina malobani dunu, athuŋw abrico kwijo gwetipo gwuni no, albuni Buṯrus ŋalai, Yaⓐguubŋa, Yuuẖannaŋa a babo a nana la ŋeraŋa. 52A liji peth are, alruni; ŋwulbabiŋaijo, ŋwulaici, Athanya aro no, ŋati ŋaio no, ŋa ŋidhiro. 53Alakejuma, liliŋidhi darnu ŋaio. 54Ŋwulbiteye peth por, ŋwumutha ŋera gi dhoi, ŋwurnie, ŋwaici, Ŋera ŋai, diro. 55A dhigirim dhuŋun auradhadha ganu, an ŋera dira ganu; al Yasuuⓐ abiŋaijo ŋwari ŋaldhedha ŋida ŋa dheny. 56A babo gwuŋun a nana gwuŋun alali galo dir; ŋwulbabiŋaijo ŋwari lati labiŋaijo lijo liter dhuŋuna dhina dhupinu no.

നിലവിൽ തിരഞ്ഞെടുത്തിരിക്കുന്നു:

Luuga 8: HBN

ഹൈലൈറ്റ് ചെയ്യുക

പങ്ക് വെക്കു

പകർത്തുക

None

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക