Luuga 5
5
Urniye gwa calmiz jina jiro kwerkwereny
1Gi ŋwamun ibiŋwe a liji ila dugun loinyadho alari ladiŋini dhuŋuna dha Kalo, ŋwudhuna kimumu ga baẖr gwina gwan Janniisaarat. 2Ŋwaŋa lifelluuka ram didhuna gi baẖr nono; abi liji lina lathuma limutu duye diba gwegen. 3Ŋwununi ganu gweta, gwina gwiro gwa Simⓐaan, ŋwothaije Simⓐaanuŋw galo ŋwari gwadhiŋa felluuka gwitiny. Ŋwujalo gi felluuka ganu, ŋwalimiye lijo. 4Dina muŋwulabiŋaijo, ŋwabiŋaijo Simⓐaanuŋw, ŋwaici, Dhiŋudhi felluuka ŋau ganu ŋina ŋolaŋ ganu, ŋuleje diba gwuŋa ŋa uma ŋwuma. 5A Simⓐaan abiŋaijo, ŋwaici, Kweleny gwai, anaŋa lapo ŋiro gigilo, athana bujo kwoiny gwetipo no. Abi ŋinena araŋana, nyi gwuleje diba. 6Dina maluleje, alwureja ŋwuma liduŋw ŋwoinyadho; a diba gwegen urtini. 7Alaici limedhigen ŋalam lina lijo gi felluuka gwiter, alari lila algathaje uwa. Alila, aloinyaje lifelluuka ram, a lifelluuka ari lule ŋau ganu. 8A dina ma Simⓐaan Buṯrus aŋa dhuŋuna ibidhe, ŋwide ŋwurko ganu di Yasuuⓐ, ŋwarnu, Gathaniny, Kweleny gwai; nyi gwiro kwiji gwina gwike. 9Gwulidhi galo dir, a liji peth lina lijilai, ŋwum ŋwina ŋwumilo. 10A Yaⓐguub ko, a Yuuẖanna alali galo dir, lina liro keleŋa ga Zabadi, lina lathapai ŋiro Simⓐaan ŋalai. A Yasuuⓐ abiŋaijo Simⓐaanuŋw, ŋwaici, Athaŋa dhenyo no; ŋinena ŋa gwaji gwuma lijo. 11A dina mal odhadha lifelluuka legen kimumu, algathani ŋida ŋegen peth, algwuje.
Iŋir nono gwa kwiji gwina gwithi ŋilaŋ
12A lamun liter dina juŋw gi len leta, a kwiji gweta je gwina gwithi ŋilaŋ gwuleny. Dina aŋadhuŋw Yasuuⓐuŋw, ŋwide kwiyaŋ, ŋwothaije Yasuuⓐuŋw galo gwuleny, ŋwaici, Kweleny gwai, ada ŋa gwimari gwinyigeta momaŋ, ŋa gwuthi ŋoma. 13A Yasuuⓐ wal dhoi ganu, ŋwumini, ŋwaici, Nyi gwara gwaŋageta momaŋ. Iŋirii nono. An ŋilaŋ ernadha ganu. 14Ŋwabiŋaijo, ŋwaici, Athaŋa abiŋaijo lijo liter dhuŋuna ibidha no; ŋabela ŋaŋajo gasiisuŋw aŋina yuŋa, ŋadhedha Kaloŋa ŋida ŋina ŋariŋai Muusa ŋa dhigeta momaŋ, duŋwuro shahaada degen. 15Abi dhuŋun dhuŋun bai galo kalo peth; a liji auradhe liduŋw loinyadho, alari ladiŋini, alari luŋwul geta momaŋ lina luma. 16Ŋwutu, ŋwela gi leba dabiŋaijo Kaloŋa.
Iŋir nono gwa kwiji gwina gwaio aŋina nono
17A lamun leta dina alimiyuŋw lijo, a Farriisiyiin a muⓐallimiin gwa naamuus aljaijo galo lina lidhi ŋwen peth ŋwa Jaliil, a ŋwa Yahuudiiya, a ŋwa Urushaliim; a ŋoma ŋa Kweleny je ŋadhuŋwul geta momaŋ. 18A liji apa kwijo gweta lagram lai gwina gwaio aŋina nono; alidheje dunije, alari gwalgitijo Yasuuⓐuŋw galo. 19A dina mathil bujo kaloŋa ga dhunije no, ŋinena jo liji loinyadho, alalo gi dunu alaŋ, aluluja gi dhoda lagram lai keligeny ganu kalo gina gijina Yasuuⓐ. 20A dina muŋw aŋa imaan gwegen, ŋwabiŋaijo, ŋwaici, Kwiji gwai, nyi gwimadhudhani ganu ŋidi ŋuŋa ŋina ŋike. 21A jathib a Farriisiyiin alabiŋaijiye, alarnu, Ei gwiro ibigwa gwina gwilui Kaloŋa? Ei gwuthi ŋoma gwadhudhani ganu ŋidi ŋina ŋike? Kalo getipo guthi ŋoma. 22A ma Yasuuⓐ liŋa darnu lire je galo gi dugor ganu degen minoŋ, ŋwulabiŋaijo, ŋwulaici, Kworaŋ nyabi ire je galo gi dugor ganu dalo? 23Aŋ gwijanu galo edeny, diny abiŋaijo kwijo, nyaici, Nyi gwimadhudhani ganu ŋidi ŋuŋa ŋina ŋike; i dinyabiŋaijo, nyaici, Diro, ŋelila? 24Abi danya liŋa darnu Ŋari ŋa liji ŋuthi ŋoma mina kidhila ŋa dhudhani ganu ŋidi ŋina ŋike, (ŋwabiŋaijo kwijo gwina gwaio aŋina nono, ŋwaici,) Nyi gwa gwabiŋaijaŋa, ŋaici, Diro, ŋapai lagram luŋa, ŋela dagalo. 25Ŋwundira ganu gi je ganu degen, ŋwapai kwoiny gwina gwidhiruŋwna, ŋwela dunu dugun, ŋwumajidhe Kaloŋa. 26A liji peth ali galo dir, almajidhe Kaloŋa, albidhenya gwuleny, alarnu, Anaŋa laŋadhi ŋida ŋinenaŋina ŋina ŋalijije galo dir.
Urnini gwa Laawi
27Ma dhuŋun ibidhe erna, ŋwutu por, ŋwaŋa kwijo gweta gwina gwan Laawi, gwina gwathimeje, dijalo kalo ga dhimeje; ŋwabiŋaijo, ŋwaici, Gwujiny. 28Ŋwugathani ŋida peth, ŋwudire, ŋwugwuje. 29A Laawi gitijo gimure gipa dunu dugun; a liji je loinyadho lina lathimeje a liter, allijaijo tharabeza galo. 30Abi jathib jegen a Farriisiyiin aldhagirini gi calmiz juŋun, alarnu, Kworaŋ athanyabeny, nyeye liji lai lina lathimeje a lina like? 31Albi Yasuuⓐ abiŋaijo, ŋwulaici, Liji lina liŋir nono lati lathibupe ẖakiim no; abi lina luma lathibupe. 32Nyi gwati gwiludhi durnie lijo lina liŋir no, nyibeladha dinyilurnie lina like dilurle dugore galo ŋidi ŋegen ŋina ŋike.
Othaije galo gwan dijalo jamu
33Alabiŋaijo, alaici, Kworaŋ athibi calmiz ja Yuuẖanna jalo jamu ŋwamun ŋwoinyadho, alje dabiŋaijo Kaloŋa, a calmiz ja Farriisiyiin ko; athibi calmiz juŋa eny, aliye gigina. 34Ŋwulabiŋaijo, ŋwulaici, Nyaŋa luthi ŋoma ladhiŋa lijo la kwoma gwa dhago lajalo jamu, ŋinena jilo kwoma ŋalai gwa dhago a? 35Abi ŋwamun ŋwaji ŋwila ŋwina ŋwadhuŋw ŋwai kwoma gwa dhago upini degen, a liji lajalo jamu gi ŋwamun ibiŋwe. 36Ŋwulabiŋaijo odaije gwai, ŋwulaici, Kwiji gwate gwina gwathogira albatha ina iyaŋ gi luga lina lurun no; i albatha ina yugirudhinu yaji yaŋirithiye kiraŋa, a albatha yati yau gi luga lina lurun no. 37A kwiji gwate gwina gwathibuluje ŋau ŋa dugur ŋina ŋiyaŋ gi nyilgu nyina nyurun no; ada dhuŋun ibidhe dhimaje, a ŋau ŋa dugur ŋina ŋiyaŋ ŋakie nyilgu a ŋabuludhe galo, a nyilgu erna. 38Abi ŋau ŋa dugur ŋina ŋiyaŋ aram algitini gi nyilgu nyina nyiyaŋ; aljalo momaŋ ram. 39A kwiji gwate gwina gwathibupe ŋau ŋa dugur ŋina ŋiyaŋ dina muŋwuliye ŋina ŋurun no; athuŋwbarnu ŋina ŋurun ŋiŋiranu.
നിലവിൽ തിരഞ്ഞെടുത്തിരിക്കുന്നു:
Luuga 5: HBN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1966.
