Yuuẖanna 6
6
Eny gwa liji lina liro khamsa alaaf
1Dina ma dhuŋun ibidhe erna, a Yasuuⓐ mure baẖr alaŋ gwa Jaliil, gwina gwan Ṯabariiya. 2A liji loinyadho gwuje, ŋinena aŋadhilo ŋiro ŋipiŋipa ŋina ŋapuŋwulo degen lina luma. 3A Yasuuⓐŋa calmiz jai juŋun alo kamarigen, anijalo. 4A Ŋidwa ŋa dh’Abrico ŋa Yahuud je githo. 5Dina ma Yasuuⓐ daŋa galo, ŋwaŋa lijo loinyadho deladha dugun, ŋwabiŋaijo Fiilibbusuŋw, ŋwaici, Alelaŋ ŋida ŋa dheny na al liji ibila eny? 6Ŋwabiŋaijo minoŋ ŋwari gwuŋwidheje; ŋinena liŋidhi Yasuuⓐ darnu gwaji gwapaŋa. 7A Fiilibbus aicinu, Ⓐesh ya jinia kworoŋo‐thiril yati yabudhe dileny no, i di liji peth apai itiitiny. 8A gweta gwa calmiz juŋun, gwan Andaraawus, gwina gwiro megen gwa Simⓐaan Buṯrusŋa, aicinu, 9Ŋari ŋeta ŋo mina ŋuthi ⓐesh thudhina a ŋwum ram; abi aŋ gwo mina gwa liji ibila peth? 10A Yasuuⓐ aicinu, Abiŋaijo lijo aljalo. Karo gijo goinyadho kalo ibige, a liji jalo lar khamsa alaaf. 11A Yasuuⓐ apai ⓐesh; a dina muŋwaici Kaloŋa shukran, ŋwuguginijo calmiz juŋun, a calmiz dhedha lijo lina lijalo; allidhedha ŋwuma ko, aleny ŋina ŋibupilo. 12Dina malpa, ŋwabiŋaijo calmiz juŋun, ŋwulaici, Wurtajul gwudhibur liduŋw gwina gwidi galo, athuŋw dhigirii galo no. 13Alliwurateje liduŋw, aloinyaje nyuni die‐a‐ram gwudhibur gwadhi ⓐesh thudhina ina inyinu ŋwubidi galo. 14A dina ma liji ibile aŋa ŋiro ibiŋe ŋina ŋipiŋipa ŋina ŋapilo Yasuuⓐ, alarnu, Titiganu ibigwa gwiro nebi gwina gwai ila kidhila.
Yasuuⓐ gwidhi cucun, a ŋwelila ŋau alaŋ
15Dina ma Yasuuⓐ liŋa darnu lilari lila almutha ŋoma ŋai dilruje malik, ŋwalo gi len alaŋ cucun. 16A ma kalo ro keraga, a calmiz juŋun uladha baẖr. 17Aluni gi felluuka ganu, alela ŋau alaŋ liludhi Kafranaaẖuum. A kalo rimi ganu, athi nanaŋ Yasuuⓐ iladhi degen no. 18A ŋau alilo ganu, ŋinena aro karun gipa. 19A malela miil gwaro ŋinena thiril i kworoŋo, alaŋa Yasuuⓐuŋw dila ŋau alaŋ, ŋwuje githo gi felluuka; aldhenya. 20Ŋwulbaicinu, Nyi gwiro; athanya dhenyo no. 21Aluminyi ŋwuni gi felluuka ganu; an felluuka obanadhadha ganu kimumu gina giludhina.
Liji libupo ⓐalaama
22A lamun lina ligwodhaijo dina ma liji aŋa lina lidhunadhi kimumu giter, a felluuka gwati gwijo gweda mine no, gwiro gwetipo gwina gwudhina calmiz ganu, abi Yasuuⓐ gwati gwimal uni calmiz jai juŋun no, abi calmiz juŋun ela cucun. 23(Abi lifelluuka liter ila Ṯabariiya, githo kalo gina githina ⓐesh, alaici Kweleny shukran.) 24A dina ma liji aŋa derna mine, a calmiz juŋun ko, aluni ŋediŋa ko gi lifelluuka ganu, alela Kafranaaẖuum dibupe Yasuuⓐuŋw. 25A dina malbuje kimumu giter, alaici, Muⓐallim gwai, ŋa gwimila mina caun?
Ⓐesh yadhi midhe
26Al Yasuuⓐ abiŋaijo, ŋwulaici, Titiganu, titiganu, nyi gwa gwacaijinu, Nyaŋa libupiny, ŋinena athanya aŋadhi ŋiro ŋipiŋipa no, abi ŋinena ithanya ⓐesh, nya pa. 27Athanya apo ŋiro ŋidi ŋai ŋa dheny ŋina ŋaji ŋerna no, athanyal bapai ŋidi ŋai ŋa dheny ŋina ŋathije di midhe gwortal, ŋina ŋajil Ŋari ŋa liji dhedha; ŋinena ŋeda gwina ma Kalo gina giro Babo khathimiye. 28Alaicinu, Anaŋa lapaŋa, di manapai ŋiro ŋa Kalo? 29Al Yasuuⓐ abiŋaijo, ŋwulaici, Ŋiro ŋa Kalo ŋiro ibiŋa, danya uminyi gwina gwukejuŋw. 30Alaicinu, Ŋiro ŋirau ŋina ŋipiŋipa ŋina ŋapaŋalo dinalaŋa, anuminyi? Ŋa gwapaŋa? 31Ligwurnuri lithi manna gi leba; dhiro ŋinena ulinuŋwna, Lidhedhuŋwulo ⓐesh gi Sama dileny. 32Al Yasuuⓐ aicinu, Titiganu, titiganu, nyi gwa gwacaijinu, Muusa gwati gwidhedhaje ⓐesh gi Sama no; ŋajibi Babo gwiny dhedha ⓐesh ina iro titiganu gi Sama. 33Ŋinena ro ⓐesh ya Kalo iro ŋeda gwina gwula Sama, ŋwudhedha lijo la gidhila midhuŋw. 34Alaicinu, Kweleny gwai, athijidhedha ⓐesh ibiya gigina. 35Al Yasuuⓐ aicinu, Nyi gwiro ⓐesh yadhi midhe; gwina gwila diginy gwati gwa jamu eny ganu no; a gwina gwinyuminyi gwati gwa odha eny ganu gatur no. 36Abi nyi gwacaijinu, Nyaŋa liminyaŋa, nyilbidoinya. 37A peth lina lidhedhinyilo Babo laji lila diginy; a gwina gwila diginy gwati gwinyiteye por gatur no. 38Ŋinena uliny gi Sama, nyi gwati gwiludhi dapai bupuŋw gwiny no, ŋwubiro gwa ŋeda gwina gwukejiny. 39A bupe gwa Babo gwina gwukejiny gwiro ibigwa, peth lina lidhedhinyilo gwati gwinyidhudhiye gwetipo no, abi linyil direye gi lamun lina laji lamra. 40A bupe gwa ŋeda gwina gwukejiny gwiro ibigwa, peth lina laŋadhi Ŋare, aluminyi, luthi midhuŋw gwortal; a linyil direye gi lamun lina laji lamra.
41A Yahuud romaje diman galo, ŋinena aruŋwunu, Nyi gwiro ⓐesh ina yulo gi Sama. 42Alarnu, Yasuuⓐ gwati gwiro ibigwa, gwina gwiro ŋari ŋa Yuusuf na? Anaŋa lati liliŋidhi baboŋaije nana gwai luŋun na? Abi kworaŋ ŋwubarnu, Nyi gwulo gi Sama? 43Al Yasuuⓐ abiŋaijo, ŋwulaici, Athinyil romadhijo diman galo no. 44Ada gwati gwima Babo gwina gwukejiny odha no, kwiji gweda gwati gwuthi ŋoma gwila diginy no; a gwaji gwinyidireye gi lamun lina laji lamra. 45Dhulinu gi jitham ja nebiŋa, Peth laji lalimini di Kalo; a peth lina limadiŋini di Babo, alalimini, alila diginy. 46Kwiji gwati gweda gwina gwimaŋa Babuŋw no, abi gwina gwidhi di Kalo gwiro gweda gwina gwimaŋa Babuŋw. 47Titiganu, titiganu, nyi gwa gwacaijinu, Gwina gwinyuminyi gwuthi midhuŋw gwortal. 48Nyi gwiro ⓐesh yadhi midhe. 49Baboŋa lalo lithi manna gi leba, alai. 50A ⓐesh ibiya iro ina yulo gi Sama, a ma kwiji eny gwati gwai no. 51Nyi gwiro ⓐesh ina imidho ina yulo gi Sama; ada ima kwiji eny, gwamidhe gwortal; ye, a ⓐesh ina yaji inyidhedha yan midhe gwa gidhila iro aŋinu iny.
52A Yahuud kajiye gi je, alarnu, Kwiji ibigwa gwara gwijidhedha aŋina yuŋun, aleny, akwai? 53Al Yasuuⓐ aicinu, Titiganu, titiganu, nyi gwa gwacaijinu, Ada nyaŋa lati limeny aŋina ya Ŋari ŋa liji, i nyeye ŋina ŋuŋun no, nyaŋa lati luthi midhuŋw no. 54Gwina gweny aŋina iny, a ŋwiye ŋina ŋiny, gwuthi midhuŋw gwortal; a gwaji gwinyi direye gi lamun lina laji lamra. 55Aŋinu iny iro ŋidi ŋa dheny titiganu, a ŋin ŋiny ŋiro ŋidi ŋa dhiye titiganu. 56Gwina gwithi aŋina iny, a ŋwiye ŋina ŋiny, gwaje diginy, a nyi gwaje dugun. 57Gwiro ŋinena ukejinyina Babo gwina gwimidho, a nyi gwamidhe Babo gwai; a gwina gwinyeny, a ŋeda gwamidhe nyi gwai. 58Ⓐesh iro ibiye ina yulo gi Sama; baboŋa lalo lithi manna, alai; abi gwina gweny ⓐesh ibiya gwamidhe gwortal.
Calmiz jina jati juminyu no
59Gwabiŋu dhuŋuna ibidha gi majmaⓐ, dina alimiyuŋw gi Kafranaaẖuum. 60A calmiz juŋun joinyadho dina maldiŋini dhuŋuna ibidha, alarnu, Dhuŋun ibidha dhibur; ei gwuthi ŋoma gwadiŋini? 61Dina ma Yasuuⓐ liŋini darnu calmiz juŋun jiromajo diman galo gi dhuŋun ibidha, ŋwulaicinu, Dhuŋun ibidha dhidakajaje a? 62Abi nya larakwai ada nyaŋa limaji limaŋa Ŋare ŋa liji dalo kalo gina gijuŋwuna kwereny? 63Dhigirim dhiro dhina dhathimidhiye; a aŋinu yati yuthi je ganu no. Dhuŋun dhiny dhina dhabiŋaijaje dhiro dhigirim, ŋwuro midhe. 64Abi lo coŋ dagalo lina lati luminyu no. Ŋinena liŋidhi Yasuuⓐ ro kwereny lina lati luminyu no, a gwina gwaji gwuŋwunugejiye. 65Ŋwarnu, Nyi gwabiŋaijaje minoŋ, ŋajaici, Kwiji gwati gwuthi ŋoma gwila diginy, ada gwati gwimathi dhedhini ŋoma ŋa Babo gwiny no. 66A kaija ibige a calmiz juŋun joinyadho aurai, athil ligwudhiyo manaŋ no.
Buṯrus gwitejo Yasuuⓐuŋw galo darnu gwiro al Masiiẖ
67Al Yasuuⓐ abiŋaijo lina liro die‐a‐ram, ŋwulaici, Nyaŋa lela ko a? 68A Simⓐaan Buṯrus aicinu, Kweleny gwai, anaŋa lela dei? Ŋa gwuthi dhuŋuna dhadhi midhe gwortal. 69A anaŋa limuminyi, analiŋa momaŋ darnu ŋa gwiro al Masiiẖ, gwina gwiro Ŋari ŋa Kalo gina gimidho. 70Al Yasuuⓐ aicinu, Nyi gwati gwuthinaje ganu ŋajago die‐a‐ram na? a gweta dagalo gwimaro gwa Sheṯaan. 71Gwabiŋadhi di Yahuudha al Iskharyuuṯi, gwina gwiro ŋari ŋa Simⓐaan; gwiro gwina gwaji gwanugejiye; gwiro gweta degen lina liro die‐a‐ram.
നിലവിൽ തിരഞ്ഞെടുത്തിരിക്കുന്നു:
Yuuẖanna 6: HBN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1966.
