Mak 15
15
Mbə num Yeso iŋu abú Paled
(Mat 27.1, 2, 11-14; Luk 23.1-5; Jon 18.28-38)
1Amaʼazənə isəg kyiʼi, ba kyayn ambəŋ Nwiye ni ba kyayn ungɨŋ abey nə ba mbənə mbə́ mə́ ataʼa ba kə unoʼo foro ba mbənə mbə mə́ saʼa abey uma ujum yimə ufere. Anigə itana anó zənə umi aghəy abú Yeso. Mbə́ tana nigə ikod uŋwən num ŋu naʼ abú Paled 2Paled biri abú uŋwən kwi, “Ngwə mə ufon abú ba Jû?”
Yeso ywiri abú uŋwən kwi, “Amə ngwə ghayn nigə.”
3Ba kyayn ambəŋ Nwiye zi unó nanaʼ igun ma. 4Anigə Paled gha biri abú uŋwən kwi, “Cha ngwə mi ywiri ayə unó mbəŋ? Zən umugə u zi unó nanaʼ igun inigə.”
5Asɨmə cha Yeso ywiri ma anó moʼ. Wə chigə Paled.
Mbə́ sob kwi u zere Yeso
(Mat 27.1, 2, 11-14; Luk 23.1-5; Jon 18.28-38)
6Ighari ujum tənə umə jəgə Ufere Izaʼara Chigə Igun, Paled mə chiyə wa ndəŋ feyn sayn. Wə mə chiyə amə uŋunə ba Jû mə biri kwi uchiy naʼ abú úŋwən. 7Anom moʼ nu ukum ma mə Barabas mə́ andəŋ. Amə wa moʼ akaʼa ba mbənə mbə́ ghəy indum u zwere wa. 8Ikwiy ba wu ghayn abú Paled kwi u aghəy numugə umbə́ ighəy 9Paled biri abú úŋwən kwi, “Mbən waʼa kaba kwi a chiyə ufon abú ba Jû inaʼ inen?” 10Paled biri nigə damugə yə kyayn kwi amə da adey nu ba kyayn ambəŋ Nwiye ibiya Yeso zaʼa naʼ abú uŋwən.
11Asɨmə ba kyayn ambəŋ Nwiye beʼere ikwiy ba wu u ghayn kwi u chiyə amə Barabas inaʼ abú úŋwən 12Paled gha biri abú ikwiy ba wu kwi, “Mbən si mə kaba kwi a aghəy ngiya ni wa ŋunə mbən mə tiya kwi amə ufon abú ba Jû?”
13Mbə́ gha kyayn akə ikay ghayn kwi, “komo uŋwən azad abaʼara!” 14Paled biri abú úŋwən kwi, “Da ngiya? Amə anó ngiya u gow.” Amaʼazənə yə biri nigə, mbə́ mara kyayn akə ikay ghayn kwi “Komo uŋwən azad baʼara.”
15Paled mə kaba ighəy kwi ikwiy ba wu ni wuʼe uma anigə yi chi Barabas inaʼ abú úŋwən. Amaʼazənə yə si aghəy nigə, mbə swayn Yeso akə gwayn. Wə naʼ Yeso kwi iŋuw kom azad baʼara.
Usogwi abaʼaray Yeso
(Mat 27.27-31; Jon 19.2, 3)
16Usogwi wu num Yeso iŋu ungɨŋ asama itoʼ. Itoʼ wu mə iyi gobuna. Mbə́ pey yi tiya usogwi mbi ujum u ŋu fere. 17Mbə chi ndwi ma izi ndwi fon ibaŋa abú uŋwən. Mbə num uniʼ injəŋ ikad adam ufon wu izi atəw ma. 18Mbə́ mə chaʼara uŋwən ghayn kwi, “Mbee mba yə́ chaʼara yə, ufon ba Jû.” 19Mbə som atəw ma akə mbaŋ, chad amira inyo ma zum utəw nwi asey iwumini uŋwən. 20Amaʼazənə mbə́ si baʼaray uŋwən, mbə chi ndwi fon wu gha zi ndwi ma abú uŋwən. Mbə aghəy nigə inum uŋwən iŋu kom azad baʼara.
Usogwi kom Yeso azad abaʼaray
(Mat 27.32-44; Luk 23.26-43; Jon 19.17-27)
21 #
Rom 16.13
Usogwi wu pey anji yi bomo anóm sirin moʼ ni ukum ma mə́ Sayimon. Mbaʼ abú Alezanda foro Rufus. Amon wu mə chigə ichigə. Wə noʼo abey mə ŋuw Yerusanem. Anigə mbə yimi uŋwən kwi u num azad baʼara wu abú Yeso ibeʼe. 22Usogwi wu num Yeso iŋu asin zənə umə́ tiya akə Golgota. (Aton akə golgota amə kwi asin ukaba utəw) 23Mbə́ naʼ unoʼ abú uŋwən nu ubɨgɨrɨ akə myrrh asɨmə cha yə di nugə ma. 24Mbə kom uŋwən azad abaʼaray. Mbə maʼa ibid anigə ighaba ndwi ma izən kwi ngwa mi num aba zayn. 25Mbə́ kom uŋwən akə unyama abəw afəfəb. 26Ano zənə mbə́ ŋwaʼanayn kom atəw azad abaʼaray ma i tey anó zənə yə gow amə kwi “Ufon ba Jû.” 27Mbə́ nibi kom iji bigə nə uŋwən. Ufeyn aba abugə jəgi ufeyn aba abugə ikyabay. 28[Ano zəŋ du aba ichin numugə inayn Nwiye mə ghayn kwi, “Mbə́ bomi uŋwən nə ba unó iboŋ”]#15.28 Cha asin zəŋ ungɨŋ uŋwaʼanayn ujum. 29#Mak 14.58; Jon 2.19Ba mbənə mbə́ mə́ chigə iyad asin wu baʼaray uŋwən. Mbə́ ŋiʼiri utəw ma ghayn kwi, “Zeʼe ngwə ŋunə ngwə mə kaba isaʼ imbəŋ Nwiye igha chim akə unəy ta.” 30Chiyə inji inyo angəʼ iswiʼi akaʼa azad baʼara. 31Ba kyayn ambəŋ Nwiye nə ba mbənə umə ataʼa ba akə unoʼo mə baʼaray uŋwən akaʼa uma ighayn kwi yə́ mə́ chiyə ba chini angəʼ anigə cha inji abú uŋwən idu angəʼ 32wa ŋunə Nwiye zoʼo nu amə ufon mbi izreal swiʼi azad baʼara mba zən da mba mi beni ayə. Anom mbənə mbə́ komo úŋwən nə uŋwən nibi jim uŋwən.
Inji zənə Yeso kuw
(Mat 27.45-56; Luk 23.44-49; Jon 19.28-30)
33Amaʼazənə unyama ighum cho bigə koʼo, usin ujum fid, mbə́ fid nigə iŋu pey akə unyama ta. 34Amaʼazənə unyama ta koʼo, Yeso kyayn akə igəg kaka ghayn kwi, “Eloi Eloi lama saba tani?” (Aton mə kwi uŋu Nwiye uŋu Nwiye ngwə waʼa aŋu ney da ngiya).
35Ba moʼ akaʼa ba mbənə mbə́ təm awu iyad zəw ney ighayn kwi “Mbən zwaray, u yə tiya Elayija kwi u zaʼa ywere uŋwən.” 36Anom moʼ akaʼa ba mbənə mbə́ təm awu noro ŋu num juʼ zi ungɨŋ anya unoʼ ikod atəw atin mbaŋ cha abú uŋwən kwi usóró. Amaʼazənə yə aghəy nigə, yə mə ghayn kwi, “Mbən təm mba zən kwi Elayija waʼa zaʼa swiʼiri uŋwən.”
37Yeso kyayn akə ikay mene.
38Aba ndwi kyayn zənə mbə́ tiŋi ungɨŋ imbəŋ Nwiye səŋe akə uba ubigə iti atəw iŋu pey nyi. 39Amaʼazənə atəw abú usogwi wu nu yə təm amə ney uŋwən zən inji zənə yə mene, yə ghayn kwi, “Amə asiʼ kwi anóm ŋu amə Ŋwə̂ Nwiye.”
40 #
Luk 8.2, 3 Mbə ayey moʼ mə nibi awu nu mbə təm akə agha sa ni ney. Umoʼ akaʼa úŋwən mə Mari Magdalen, Mari ingwo mbi Jems ukuŋ kuŋ ni Yesep foro Salome. 41Ayey mbəŋ niŋe anjim Yeso iti á Galeli yeŋ yə ywere uŋwən. Mbə ayey chini nanaʼ mə́ awu ni mbə́ ŋuw Yerusanem nə Yeso.
Inji zənə mbə́ itwayn Yeso
(Mat 27.57-61; Luk 23.50-56; Jon 19.38-42)
42Injaʼ si chig aney zənə mbə́ mə́ tana inyo inyi akə aney ku ba Jû. 43Yesep wa Arimatiya. Yə́ mə́ wa ni mbə́ mə́ wumine akaʼa ba mbənə mbə́ mə́ saʼa abey. Wə mə nibi nəmə anó ufon Nwiye. Wə yimə fiŋ ŋu abú Paled pey yi ghayn abú uŋwən kwi u naʼa awu Yeso abú uŋwən u ŋuw itwayn. 44Paled məŋərə ma i zəw kwi Yeso si ku. Anigə yə tiya atəw abú usogwi ibiri abú uŋwən kwi Yeso si kuw? 45Amaʼazənə atəw abú usogwi wu ghayn abú uŋwən kwi yə si ku, yə beni kwi Yesep ŋuw swiʼiri awu wu num ŋu itwayn. 46Yesep ŋu zon aba ndwi linen ŋu swiʼiri awu Yeso ifid ungɨŋ aba ndwi wu ŋu zi ungɨŋ isəy nu mbə́ toŋo ungɨŋ ukob. Wə biy itey kyayn ikəbərə uchəw isəy wu awu. 47Mari Magdalen nə Mari ingo mbi Josef zən asin zənə mbə zi awu Yeso akuŋ.
നിലവിൽ തിരഞ്ഞെടുത്തിരിക്കുന്നു:
Mak 15: NGI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 CABTAL
