Mak 14

Mbə́ tə́ únaŋ izwere Yeso

(Mat 26.1-5; Luk 22.1, 2; Jon 11.45-53)

1A sí buʼe unəy bigə abú ba Jû ijəg fere izaʼara chigə igun nə ufere ingəŋ zənə cha aforo anigə ba kyay ambəŋ Nwiye nə ba mbənə mbə mə́ ataʼa ba akə unoʼo mə kaba nji moʼ iyimi Yeso anjimə anjim da izwere uŋwən. 2“Mbə ghayn kwi, Ka mba ibiya ngwa uŋwən akə maʼa ufere nji ba mbi aghəy indum.”

Ayey moʼ zoʼo Yeso á Betani

(Mat 26.6-13; Jon 12.1-8)

3 # Luk 7.37, 38 Yeso mə á Betani ana Sayimon wa nu yə si zəw ingəʼ akə akyuŋ, Amaʼazənə Yeso mə́ jəgə, ayey moʼ ŋu nə ungəd aka unun nu mbə mə́ nə ifuyi chuŋ ungɨŋ ichəŋ alabasta. Mbə tana ungəd wu aba akə nad. Wə pey yi səg atəw chəŋ wu i tu ungəd wu atəw Yeso.

4Ba moʼ akaʼa ba mbənə mbə mə́ awu mə isɨ itəm ighayn uma uma kwi “Aton zənə umə chiŋi ungəd mbəŋ amə da ngiya? 5Mbə mi fənə ungəd mbəŋ akə ukab nu umi chigə akɨ tosen ta anigə ina ukab wu abú ba ukwaŋ.” Mbə ghayn nigə inya abú ayey wu.

6Anigə Yeso ghayn kwi, “Mbən sayn uŋwən! Mbən mə naʼa ingəʼ abú uŋwən da ngiya? Wə aghəy anó chuŋ iniŋ. 7Ba kwaŋ mbə kaʼa injən ighari ujum, anigə mbən kyayn umugə ighəy ichuŋ abú úŋwən ama zənə mbən wuʼ ighəy asɨmə cha ami mə aŋu nə umbən ighari ujum. 8Wə aghəy anó zənə yə wuʼ ighəy, yə zoʼ inyi inyo da itana aŋu kə a si ku utwey. 9Ayə ghayn asiʼ inen kwi usin ujum mbənə umi ghayn ukən uchuŋ awu ungɨŋ isəg, umbi ghayn anó zənə ayey ŋu u aghəy anigə sə kono uŋwən.”

Judas beni kwi iyi fənə Yeso

(Mat 26.14-16; Luk 22.3-6)

10Judas Iskariyod nu amə wa feyn akaʼa mbə məŋə-anó Yeso ighum cho bigə ŋú abú ba kyay ambəŋ Nwiye da ifənə Yeso abú úŋwən. 11Amaʼ zənə mə zəw anó zəŋ, mbə wuʼ anigə ikaʼ kwi umbi naʼ ukab abú uŋwən iti amaʼa wu, yə mə kaba apan ighəy kwi u ibiya Yeso.

Yeso jəg Ufere Izaʼara Chigə Igun ni mbə məŋə-anó ma

(Mat 26.17-25; Luk 22.7-14, 21-23; Jon 13.21-30)

12Amə igun aney imbey zənə umə jəgə ufere ingəŋ cha aforo nə amə aney umə zwere injəg akə ufere izaʼara ichigə igun, mbə məŋə-anó Yeso biri abú uŋwən kwi, “Amə akayn ngwə mə kaba kwi mba ŋuw itana asin inigə ijəg Ufere Izaʼara Chigə Igun?” 13Amaʼazənə mbə biri nigə, yə tom mbə məŋə-anó bigə ghayn abú úŋwən kwi, “Mbən ŋuw ungɨŋ abey zi imbey inen anigə wa moʼ u beʼe ikɨy une yi kuw aŋwayn, mbən niŋe anjim ma. 14Mbən nyi ungɨŋ na zənə umi inyi anigə ighayn abú wa akə na wu kwi, ‘ataʼa ba biri kwi atəw na ba isoʼ a zənə ami jəg Ufere Izaʼara Chigə Igun nə umbəŋ aməŋə-anó a zayn?’ 15U yi tey atəw na kyayn moʼ inen nu u si tana nu ughəy ujum awu ungɨŋ. Mbən tana u ghəy ujum ina wu.”

16Mbə məŋə-anó wu ŋu ungɨŋ abey wu, pey yi zən u aghəy ujum aba anji zənə Yeso ghayn abú úŋwən anigə mbə́ tana u aghəy jəgi awu ungɨŋ.

17Amaʼazənə injaʼ chigə, Yeso ŋu ungɨŋ abey wu ni mbə məŋə-anó ma ighum cho bigə. 18Amaʼazənə mbə́ mə́ jəgə, Yeso ghayn kwi “Ayə ghayn asiʼ inen kwi wa moʼ akaʼa ijən yi fənə aŋu. Wa wu yə akəŋ jəgə nə umugə.”

19Mbə́ zəw nigə ikənə. Mbə ti ni biri ufeyn feyn kwi “Awaʼa umugə?”

20Wə ghayn abú úŋwən kwi “Amə wa moʼ injən kaʼa umbən ghum cho bigə, wa ŋunə mba mi bomo abugə ungɨŋ akaŋ ni uŋwən.” 21Ŋwə̂ Wa yi ku numugə mbə si ŋwaʼanayn da uŋwən, asɨmə ingəʼ yi inyi igun wa ŋunə ufənə uŋwən! Adi mə kwi cha mbə di si ibə́ uŋwən yə mi buŋ.

Inji zənə ijəg Asɨyisəg ti

(Mat 26.26-30; Luk 22.14-20; 1Ko 11.23-25)

22Amaʼazənə Yeso nə mbə məŋə-anó ma mə́ jəgə, yə num ingəŋ naʼ yə beni ayə abú Nwiye, bɨʼiri naʼ abú mbə məŋə-anó ma ighayn abú úŋwən kwi, “Mbən num, zəŋ amə inyi nyə̂ inyo.”

23Wə nibi num itoʼ unoʼ naʼ yə beni ayə abú Nwiye i naʼ abú úŋwən. Úŋwen uma ujum num inugə. 24Wə ghayn abú uŋwən kwi, “Zəŋ amə inyi nəm nu Nwiye numi isəŋ usəw fiy nə umbən, anəm zənə mə tu da utəw ba nanaʼ. 25Ayə ghayn asiʼ inen kwi cha ami gha nugə aŋu unoʼ pey Amaʼazənə ami nugə unoʼ fiy ungɨŋ anó ufon Nwiye” 26Amaʼazənə mbə si kyugway ukyi, mbə du iŋu igun Ugum Olif.

Yeso ghayn kwi Pita yi ton ayi

(Mat 26.31-35; Luk 22.31-34; Jon 13.36-38)

27Amaʼazənə Yeso ni mbə məŋə-anó ma pey igun Ugum Olif wu, yə ghayn abú úŋwən kwi, “Umbən ujum yə nod sayn aŋu. Mbə ŋwaʼanayn ungɨŋ Aŋwaʼanayn Nwiye kwi,

Ayi zwere anəmə injəg

Anigə injəg wu ti saŋa.”

28 # Mat 28.16 Asɨmə Amaʼazənə Nwiye mi zəmə aŋu iwu, ayi iŋu imbey inen á Galeli. 29Pita ghayn abú uŋwən kwi, “Kanə mbə məŋə-anó mbi ujum di nod sayn ayə, cha ami noʼo sayn aŋu ayə.”

30Yeso ghayn abú Pita kwi, “Ayə ghayn asiʼ inigə kwi ki unóŋ ighɨ sə ŋu toŋ ighari bigə akə afəb ngwə yi ghayn ighari ta kwi cha ngwə di kyayn aŋu.”

31Anigə Pita ghayn kwaʼa akə ikay kwi, “Kanə amə anó kwi umbi zwere aŋu nə ungwə cha ami ton ayə. Mbə aməŋə-anó mbi ujum nibi ghayn nigə.”

Yeso chaʼara Nwiye á Getsemane

(Mat 26.36-46; Luk 22.39-46)

32Yeso ni mbə məŋə-anó ma ŋu asin moʼ umə tiya akə Getsemane. Amaʼazənə mbə pey awu, Yeso ghayn abú mbə məŋə-anó ma kwi “Mbən chomo akəŋ a ŋuw chaʼara Nwiye” 33yə num Pita nə Jems foro nə Jon iŋu nə úŋwən. Inyo ma bo fiŋ ma ni toboro uŋwən 34anigə ughayn abú úŋwən kwi, “Akənə sugi ungɨŋ inyi fiŋ kaba izwere aŋu. Mbən chomo akəŋ ni nəmə usin.”

35Wə ghayn nigə yeŋ ŋu imbey pipi pey yi zum ifigi asey ni chaʼara Nwiye ghayn kwi, inji bə mə́ awu, ngwə ghəy kwi amaʼ ingəʼ zənə achigə igun iniŋ. 36Yə aghəy nigə ighayn kwi, “Mbaʼ uŋu mbaʼ! Cha anó moʼ mə chigə yə, chi ingəʼ zəŋ igun iniŋ anigə aghəy anó zənə ngwə kaba akama a zənə a kaba.” 37Yeso wene ŋu pey yi zən mbə məŋə-anó wu umə bunə. Anigə yə biri abú Pita kwi, “Sayimon mbən mə bunə ngiya? Cha mbə kyayn ichomo ikyiʼi akə awa ufeyn?” 38“Mbən chomo ikyiʼi ni chaʼara Nwiye da ka aghəy moʼ kwaʼara ma ngwen. Fiŋ yə kaba kwi mbən ighəy anó ni akəʼərə asɨmə nyə̂ inyo yə ibo.”

39Wə ghayn nigə igha ŋu chaʼara Nwiye ighayn aba anó zənə yə dey ighayn. 40Wə gha wene ŋu pey yi kuw úŋwən umə bunə damugə ibuni sugi aghɨ ma. Cha mbə di kyayn uma anó ni iywiri abú uŋwən.

41Amaʼazənə yə wene ŋu, iŋu pey akə ighari ta, yə pey yi ghayn abú úŋwən kwi, “Mbən mə bugə bunə izwere ngwen? Wə kə nigə. Amaʼ si kəʼ mbə si fənə Ŋwə̂ Wa abú ba unó iboŋ.” 42Mbən noʼo atey mba ŋuw, mbən zən! Wa ŋunə u fənə aŋu yə akəŋ.

Mbə ibiya Yeso

(Mat 26.47-56; Luk 22.47-53; Jon 18.3-12)

43Amaʼazənə Yeso mə inayn, Judas nu amə wa feyn akaʼa mbə́ məŋə-anó wu ighum cho bigə, pey, yə mə yeŋ nə ikwiy ba nu u yimi ibey foro utin mbaŋ nu amə ba kyayn ambəŋ Nwiye, ba mbənə umə ataʼa ba akə unoʼo foro nə ba kyayn mbənə umə ungɨŋ abey mbə́ cha úŋwən. 44Wa ŋunə yə fənə Yeso si naʼa anwini abú úŋwən kwi, “Wa ŋunə ami bəŋe uŋwən mbən kyayn kwi amə wa ŋunə mbən mə kaba. Mbən ibiya uŋwən inum ŋu ni nəmə anji chuŋ” 45Amaʼazənə Judas pey, yə chigə ŋu abú Yeso pey yi ghayn kwi, “Ataʼa ba.” Wə ghayn nigə imbəŋe uŋwən. 46Ba wu ibiya Yeso yimi uŋwən akə ikay. 47Wa moʼ akaʼa ba mbənə mə təm iyad kuŋ, mey ma ufigə atoŋ abú wa faʼa atəw kyayn ambəŋ Nwiye ichi. 48Yeso ghayn abú úŋwən kwi, “Mbən mə zaʼa ibiya aŋu izaʼa nə ibey nə utin uzad ni kwi amə uji moʼ? 49#Luk 19.47; 21.37Mə́ mə ni umbən ni ataʼa ba ambəŋ Nwiye unəy ujum cha mbən ibiya aŋu. Asɨmə yə boŋ kwi anó zənə uŋwaʼanayn ungɨŋ aŋwaʼanayn inayn Nwiye a du akə asiʼ.”

50Amaʼazənə yə ghayn nigə, mbə məŋə-anó ma sayn uŋwən inod bugə. 51Ajoŋ moʼ yə mə ŋuw aboʼo Yeso tiŋe abugə ndwi inyo ma mbə nibi ibiya uŋwən, 52anigə yə sayn abugə ndwi wu inod bugə itin ika.

Mbə num Yeso iŋu ifigi mbə saʼa abey

(Mat 26.57-68; Luk 22.54, 55, 63-71; Jon 18.13, 14, 19-24)

53Mbə́ num Yeso iŋu aku atəw kyayn abú ba mbənə umə faʼa ambəŋ Nwiye. Ba kyayn ambəŋ Nwiye ujum, nə ba kyayn mbənə umə ungɨŋ abey foro mbə ataʼa ba akə unoʼo fere awu. 54Pita mə nyaʼa iyeŋ anjim Yeso akə agha sa yə pey yi inyi ŋu asama atəw kyayn abú ba mbənə umə faʼa ambəŋ Nwiye wu. Anigə yə chomo aboʼo mbə nəmə imbəŋ Nwiye ni zó uwəd. 55Ba kyayn ambəŋ Nwiye ni mbə saʼa abey ujum mə kaba wa moʼ kwi u zi usaʼa igun Yeso da u zwere uŋwən. Mbə kab nigə cha u zən ma wa moʼ. 56Ba nanaʼ figə unó da Yeso asɨmə unó mbənə mbə ghayn cha mbə mə uma ichin.

57Anigə anóm moʼ noʼ təm atey figə unoʼ da Yeso kwi 58#Jon 2.19“Mba zəw uŋwən mə ghayn kwi, ayi saʼ imbəŋ Nwiye zənə ba chimi akə ubugə anigə igha num unəy ta chim ichini nu cha umi chin akə ubugə.” 59Ka aba nigə, cha unó mbənə mbə́ mə́ ghayn mə uma ichini ichin.

60Amaʼazənə atəw abú ba mbənə umə faʼa ambəŋ Nwiye zəw unó mbəŋ, yə noʼ atey ifigi uma ibiri abú Yeso kwi, “Cha anó moʼ inigə iywiri? Unó mbənə umə izi injə atəw amə achuŋ a?”

61Asɨmə Yeso chuʼ ma izi cha yə ghayn ma anó moʼ. Anigə atəw kyayn abú ba mbənə umə faʼa ambəŋ Nwiye gha biri abú Yeso kwi, “Ngwə mə wa ŋunə Nwiye zoʼo ŋunə umi zaʼa, Ŋwə̂ Nwiye ŋunə ba mə wumine?” 62Yeso ywiri kwi, “Amə uŋwən anigə mbən yi zən Ŋwə̂ Wa u chomo aba abugə jəgi Nwiye ŋunə umə ni ikay ujum nibi zən umugə umə swiʼe ungɨŋ ipaʼ azobo!” 63Amaʼazənə yə ghayn nigə, atəw abú ba mbənə umə faʼa ambəŋ Nwiye wu yimi ndwi ma pəŋi ghayn kwi “Aton zənə mba mə kaba uzənə chini amə kwi ngiya?” 64Mbən zəw umugə umə jimə Nwiye, mbən si sob kwi ngiya? Úŋwen uma ujum ghayn kwi yə kəʼ kwi mba zwere uŋwən.

65Ba moʼ ti ni chad amira inyo ma, mbə kod aghɨ ma, som uŋwən, ghayn abú uŋwən kwi “ghayn wa ŋunə u som yə.” Mbə nəmə imbəŋ Nwiye nibi num uŋwən isom.

Pita ton Yeso

(Mat 26.69-75; Luk 22.56-62; Jon 18.15-18, 25-27)

66Pita chomo asama zənə yə mə aba chuŋ, anigə ŋwə̂ ayey moʼ akaʼa ba faʼa atəw abú ba mbənə umə faʼa ambəŋ Nwiye ŋu awu. 67Amaʼazənə yə zən Pita umə zó uwəd, yə toŋ ighɨ inyo ma ighayn kwi, “Ngwə mə nibə aboʼo Yeso wa Nazared” 68Asɨmə Pita ton ighayn kwi “Cha adi kyayn aŋu uŋwən, cha inyi atəw di zayn ma akə anó zənə ngwə mə ghayn.” Amaʼazənə yə ghayn nigə, yə noʼ iŋu uchəw ukam. [Aba ighari wu, unóŋ ingɨ toŋ]#14.68 Cha asin zəŋ ungɨŋ uŋwaʼanayn moʼ kwi aba ighara wu unóŋ ingɨ toŋ..

69Ŋwə̂ ayey afaʼa wu zən uŋwən awu anigə yə ghayn abú ba mbənə mbə́ təm iyad akuŋ kwi, “Anom ŋu amə wa moʼ akaʼa mbə məŋə-anó Yeso.” 70Pita gha ton ma. Asin nyaʼa naʼa anigə ba mbənə mə təm iyad iyad ghayn abú Pita kwi, “Amə asiʼ kwi ngwə mə wa moʼ akaʼa mbə məŋə wu damugə ngwə mə wa Galeli.”

71Pita zəw nigə ni zomo ma iməʼe ma ghayn kwi, “Cha a di kyayn aŋu wa ŋunə mbən mə inayn da uŋwən.”

72Aba ighari wu unóŋ ingɨ toŋ iŋu pey akə ighari bigə anigə Pita gha kono anó zənə Yeso ghayn abú uŋwən kwi, “Ki unóŋ ingɨ yə sə ŋu toŋ ighari bigə akə fəb ngwə yi ton aŋu ighari ta.” Wə kono nigə, amə cha inji abú uŋwən igha yimi fiŋ anigə yə ti ni ichew isiy.

നിലവിൽ തിരഞ്ഞെടുത്തിരിക്കുന്നു:

Mak 14: NGI

ഹൈലൈറ്റ് ചെയ്യുക

പങ്ക് വെക്കു

പകർത്തുക