Mak 12
12
Inayn maʼa da wa ŋunə yə́ cha imbayn fayin ma isəg
(Mat 21.33-46; Luk 20.9-19)
1Yeso ti ni ghayn inayn maʼa abú utəw abú ba Jû kwi, anóm moʼ fiʼi imbayn fayin ma, kod ukam ighab, toŋ ubəg umi mə́ tana unoʼ fayin ungɨŋ, nibi chim na ni wa mi mə chomo ungɨŋ ni iney imbayn wu, yə aghəy nigə inaʼ imbayn wu abú ba moʼ kwi uni faʼa ungɨŋ. Wə naʼ nigə noʼ iŋú abey chini. 2Amaʼ kəʼ nu umə sono itɨŋ fayin wu, yə cha wa faʼa ma abú ba wu kwi u ŋuw num ama amə aba akə itɨŋ fayin wu. 3Umugə wa faʼa wu ŋu nigə, ba wu ibiya uŋwən, isom gha icha uŋwən ubugə ka. 4Wa wu cha wa faʼa chini abú úŋwən, mbə som uŋwən itoʼ atəw i nyə uŋwən akə inji zənə cha yə di kəʼ. 5Wa wu cha wa faʼa chini, u were uŋwən. Yə nibi cha ba afaʼa chini nanaʼ, mbə som umoʼ nibi zwere umoʼ. 6Wa ŋunə yə si buʼe icha amə ajoŋ ma yə wuʼi azəd yə si nwi cha uŋwən abú úŋwən ghayn kwi, Umbi wumini inyi ajoŋ. 7Asɨmə ba wu yimi ajoŋ wu ighayn uma uma kwi, “Amə ajəgə iku ma ŋunə mba zwere uŋwən da u ghəy mbəŋ yi mə umba!” 8Mbə ghayn nigə iyimi ajoŋ wu izwere imaʼ uŋwən anjim ukam fayin wu.
9Yeso ibiri abú úŋwən kwi “Wa ŋunə amə imbayn ma umi yini ngiya? U yi ŋu zwere ba mbənə yə naʼ imbayn wu abú úŋwən inaʼ imbayn wu abú ba chini. 10Cha mbən di si foŋ ngwen anó zənə amə ungɨŋ aŋwaʼanayn inayn Nwiye kwi,
‘Itey zənə mbə chimə na tono kwi cha idi iboŋ
Wə beŋe sə itey ijugi na.
11Ano zəŋ amə Asɨyisəg u aghəy
Amə ayere anó ina izən!’”
12Ba kyayn abú ba Jû zəw anó zəŋ ikaba inji ibiya Yeso damugə mbə kyayn kwi u yə ghayn inayn maʼa zəŋ da úŋwən, asɨmə mbə mə goro ikwiy ba zənə yə́ mə́ wu anigə mbə sayn uŋwən noʼ ŋu uma.
Ibiri da anó imə naʼa ukab tag
(Mat 22.15-22; Luk 20.20-26)
13Ba kyayn abú ba Jû cha ba Farasay moʼ foro ba mbənə mbə́ mə́ aba Herod moʼ kwi uŋuw abú Yeso boʼo izi atam abú uŋwən akə inayn ma. 14Mbə ŋu pey yi ghayn abú Yeso kwi, “Asɨyisəg mba kyayn kwi ngwə yə ghayn asiʼ cha ngwə goro yə ba, damugə cha ngwə mə aghəy ayə aghɨ asɨmə ngwə yə taʼa asiʼ akə inji zənə Nwiye mə kaba kwi ba chomo. Umba noʼo mə tey kwi mba ni naʼa ukab tag abú kayisa kə kwi ka mba mə naʼa ngwa?”
15Asɨmə Yeso kyayn kwi uŋwən mə ba ufigə anigə ughayn abú úŋwən kwi, “Mbən mə zeʼe aŋu kwi ngiya? Mbən num ukab atəne moʼ zaʼa naʼ iniŋ a ney.”
16Mbə ŋu naʼ ukab atəne moʼ abú uŋwən anigə u biri abú úŋwən kwi “Ifigi zəŋ nə ukum uŋu amə iyi ngwa?” Mbə́ ywiri kwi “Amə ifigi kayisa.”
17Yeso ghayn abú úŋwən kwi, “Mbən naʼa aghəy kayisa abú kayisa naʼa aghəy Nwiye abú Nwiye.” Mbə́ yere inji zənə yə ywiri inayn maʼa zəŋ.
Ibiri da anó ni izəmə iwu
(Mat 22.23-33; Luk 20.27-40)
18 #
Ifa 23.8
Ba Sadusi nu umə beni kwi cha ba mi zəmə iwu anigə umoʼ ŋú ibiri abú Yeso kwi, 19“Ataʼa ba mose ŋwaʼanayn ina kwi, ‘Anom moʼ bi iku iwaʼ uyey ma nu cha ubə̂ ma ŋwə̂ moʼ unya anóm wa wu yi num ayey wu ibə́ buŋ nə uŋwən nu ayə mə buŋ wa ŋunə yə́ ikuw.’ 20Unya anóm sambigə moʼ mə́ awu, uyi imbey nam uyey iku ni cha buŋ. 21Uŋunə niŋe akuŋ nam ayey uti wu nibi ku ni cha buŋ. Yə nibi məŋi aba ichin ichin iŋu pey akə unya anóm uta, 22unya anóm wu ujum sambigə nam ayey wu iku ni cha u bə́ ma ŋwə̂ moʼ. Ayey wu si nwi iku. 23Amaʼazənə ba mi zəmə iwu ayey wu mi mə uyey ngiya numugə unya anóm wu ujum sambigə nam uŋwən?” 24Yeso ywiri abú úŋwən kwi “Mbən kaŋa faba. Mbən kyay aton? Amə damugə cha mbən kyayn aŋwaʼanayn inayn Nwiye kə ikay ma. 25Amaʼ zənə ba mi zəmə iwu, cha umi gha nam, cha umi mə gha naʼa buŋ ana inəmi umbi chomo nə angəd mbənə umə aneŋ azobo. 26Amə anó da mugə uwu ba mi zəmə iwu, cha mbən di si foŋo ngwen ungɨŋ aŋwaʼanayn zənə mose aŋwaʼanayn ungɨŋ asin zənə amə ghayn da ichuʼiri yə fiy numugə Nwiye ghayn abú uŋwən kwi Amə Nwiye Abraham Nwiye Azik nə Nwiye Yakob? 27Cha uŋwən mə ma Nwiye uwu ba, uŋwən mə Nwiye abú ba mbənə umə ikay. Mbən faba!”
Ukɨy ŋunə u kwey chigə ikɨy ti
(Mat 22.34-40; Luk 10.25-28)
28Ataʼa ba akə unoʼo moʼ zəw umugə Yeso ni mbə Sadusi mə inayn. Wə nibi zən umugə Yeso ywiri inayn uma anji chuŋ. Anigə yə biri abú Yeso kwi, “Ukɨy ŋunə uchigə ikɨy ti ujum amə ngwen?”
29Yeso ywiri abú uŋwən kwi, “Ukɨy ŋunə uchigə ikɨy ujum amə kwi, mbən zəw umbən ba izreal! Asɨyisəg ŋunə amə ngwa Nwiye aba ufeyn. 30Anigə mbən wuʼ Asɨyisəg ungwən Nwiye ni itən fiŋ ujum, nə injən azugə ujum nə itən ikoni ujum foro nə injən ikay ujum. 31Ukɨy ŋunə u niŋe akuŋ amə kwi wuʼ ‘Ungwə wa ŋunə umə tinə ma inji iyad umugə ngwə wuʼ injə nyə̂ inyo.’ Cha ikɨy chini ni ikwey chigə itəŋ” 32Ataʼa ba akə unoʼo wu ghayn abú uŋwən kwi, “Ataʼa ba ngwə yə ghayn asiʼ kwi Nwiye aba feyn cha Nwiye chini ni uŋwən. 33Ano ni wuʼ uŋwən nə fiŋ ujum, akə iwe ujum, akə ikay ujum foro i wuʼ ungwə unya numugə ngwə wuʼ inji inyo chigə nyə̂ ujum tənə mba mə tuŋ abú Nwiye, yə nibi chigə u aghəy ifa ujum.” 34#Luk 10.25-28Amaʼ zənə Yeso zən kwi yə ywiri ni iwe, yə ghayn abú uŋwən kwi, “Ngwə si tinə iyad anó ufon Nwiye.” Iti ighari wu, cha wa moʼ di ni yimi ma fiŋ ibiri anó moʼ abú Yeso.
Ibiri da wa ŋunə Nwiye zoʼo
(Mat 22.41-46; Luk 20.41-44)
35Amaʼazənə Yeso mə ataʼa ba ambəŋ Nwiye, yə biri kwi, “Ba mbənə umə ataʼa ba akə unoʼo umbə ghayn kwi wa ŋunə Nwiye zoʼo u yi noʼ aghaŋ unebey Dafid da ngiya? 36Azugə zayn zayn aghəy Dafid ghayn kwi
‘Asɨyisəg ghayn abú uŋu Asɨyisəg kwi,
Chomo inyi aba bugə jəgi
Pey Amaʼazənə ami zi umbə ba bana iti inya ghəw.’
37Dafid ma ambəŋ yə tiya uŋwən kwi Asɨyisəg yə si ni chigə ngiya nu uŋwən mə aghaŋ unebey Dafid?” Ikwiy ba wu mə wuʼi ma imə zəw anó zənə yə mə ghayn.
Uchede da mbə ataʼa ba akə unoʼo
(Mat 23.1-36; Luk 20.45-47)
38Umugə Yeso mə ataʼa ba, yə ghayn abú úŋwən kwi, “Mbən num amaʼ ni ba mbənə umə ataʼa ba akə unoʼo. Mbə wuʼ kwi uzi ndwi sa ni gha yeŋ ni iŋwen. Mbə nibi wuʼ kwi ba ni chara úŋwən ni iwumini usin iyuŋ” 39Mbə wuʼ imə chomo utən imbey ungɨŋ na ibumi ba Jû, mbə nibi wuʼ imə chomo usin kyayn usin jəgə. 40Umbə iguw mbə ayey uti ibeʼe u aghəy mbənə umə unuʼ ma ubə aghəy nigə itama úŋwən nə chara Nwiye asa. Nwiye yi zi ingəʼ nu ukwey chigə abugə igun ma.
Uchemini Nwiye ayey uti
(Luk 21.1-4)
41Yeso chomo mə ney akubi zənə mbə mə zi uturu Nwiye wu ungɨŋ. Wə mə zən mugə ba mə zi ukab ungɨŋ akubi wu. Ba ukab nanaʼ zi ukab nu unaʼa 42injaŋ ayey uti moʼ pey yi zi utəni kapa ubigə nu amə ka ufina ighum 43Yeso zən nigə itiya mbə məŋə-anó ma ighayn abú úŋwən kwi “Ayə ghayn asiʼ inen kwi, injaŋ ayey uti ŋunə zi kab nanaʼ chigə ba ujum mbənə uzi ukab ungɨŋ akubi zəŋ. 44Damugənə úŋwən uma ujum mbə naʼa amə ŋwə̂ aba akə imbon nanaʼ ŋunə umə abú úŋwən asɨmə uŋwən amə ayey injaŋ anigə yə koro abam ma zaʼa naʼ aghəy ujum zənə yə mə abú uŋwən.”
നിലവിൽ തിരഞ്ഞെടുത്തിരിക്കുന്നു:
Mak 12: NGI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 CABTAL
