Jon 7
7
Cha unya anóm Yeso di beni ma uŋwən
1Amaʼazənə anó wu si chigə, Yeso mə gha iyeŋ ungɨŋ usin mbənə umə á Galeli. Cha yə di kaba ŋúw ma Judiya damugə ba Jû mbənə bə́ mə́ awu mə kaba izwere uŋwən. 2Amaʼ mə́ sə́ tinə abú ba Jû ijəg ufere ŋunə mbə́ mə́ jəgə kono usɨgə,#7.2 Ufere ŋunə mbə mə́ jəgə kono usɨgə amə ufere moʼ akaʼa ifere ta tənə tə́ mə́ ikyayn abú ba Jû. Amaʼazənə mbə́ mə́ jəgə ufere uŋunə, mbə́ mə́ ka olive ni chomo ungɨŋ usɨgə nu ukəbərə akə uzaŋ imə kono umugə umbaʼ ma chomo ungɨŋ imbayn izomo akə atuʼ ighumi ikyugə. 3anigə unya anóm Yeso ghayn abú uŋwən kwi, “Noʼo akəŋ iŋu a Judiya da umbə məŋə-anó zən anó zənə ngwə mə ighəy, 4damugə cha wa moʼ mə aghəy ma unó anjimə anjim Amaʼazənə umə kaba kwi ba kyayn uŋwən. Umugə ngwə mə ighəy unó mbəŋ, yə boŋ kwi isəg jum kyayn ayə.” 5Ka aba unya anóm ma cha mbə di bene uma uŋwən.
6Yeso ghayn abú úŋwən kwi, “Cha Amaʼazənə akoʼo iniŋ, di si zaʼa ma. Anigə, umaʼ ujum koʼo ma inen. 7Cha aton moʼ abú ba mbənə umə ungɨŋ isəg ibana uŋwen anigə umbi bana aŋu damugə ayə bə ghayn abú úŋwən kwi umbə aghəy unó iboŋ. 8Mbən ŋúw akə ufere wu cha a mə zaʼa aŋu damugə cha inyi maʼ di si koʼo ma.” 9Yə ghayn ney tənə ma a Galeli.
Yeso ŋú akə ufere ŋunə mbə mə́ jəgə kono usɨgə
10Amaʼazənə unya anóm Yeso si ŋú akə ufere wu, Yeso nibi noʼ iŋú. Cha yə mə ŋuw ma asaŋ asaŋ yə́ mə iyeŋ akə inji zənə cha umi kyay ma uŋwən. 11Ba kyayn abú ba Jû mə yeŋ yə kaba uŋwən awu ufere ibiri abú ba kwi, “Mbən waʼa zən Yeso akəŋ?”
12Ba nanaʼ mə jumə da Yeso. Ba moʼ ni ghayn kwi, “Uŋwən mə wa chuŋ.” Anigə uchini ywere kwi, “Indəʼ u yə ghəy kwi ba faba.” 13Anigə cha wa moʼ ghayn ma anó da Yeso asaŋ asaŋ damugə mbə́ mə́ goro ba kyayn abú ba Jû.
14Amaʼazənə mbə si jəg ufere wu pey unɨŋ ugha, Yeso koʼ iŋú ambəŋ Nwiye pey ni tey unó. 15Anó wu chigə ba kyayn abú ba Jû úŋwən biri kwi, “Anom uŋu si kyayn unó ney ingiya nu cha udi si kweme ma aŋwaʼanayn?”
16Yeso ywiri abú úŋwən kwi, “Cha unó mbənə amə itey di zaʼa ma amə ineŋ mbə noʼ abú Nwiye ŋunə yə cha aŋu. 17Wa ŋunə u wuʼi ighəy anó zənə Nwiye mə kaba, u yi kyayn kwi unó mbənə amə itey mbə noʼ abú Nwiye kə kwi cha amə ghayn akə inyi ikay. 18Wa ŋunə umə aghəy unó aka ikay ma, u yə kaba kwi ba wumini uŋwən. Wa ŋunə umə kaba kwi ba wumini wa ŋunə ucha uŋwən yə ghayn asiʼ, cha umə figə ma unó. 19Mose ki naʼa ma ikɨy inen? Anigə cha wa moʼ aka injən siy ma ikɨy wu. Mbən mə kaba izwere aŋu da ngiya?”
20Unóŋ ba wu wyiri kwi, “Azugə iboŋ yə ungɨŋ inigə, amə ngwa mə kaba zwere ayə?”
21Yeso wyiri abú úŋwən kwi, “Mə aghəy anwini anó feyn anigə umbən ujum mbən yere.” 22Mose ghayn kwi mbən ney ikad umbən buŋ anóm. Akaʼa mose yə́ ghayn anó zəŋ amə umbən umbaʼ imbey mbə́ ghayn kwi mbən aghəy nigə. Anigə mbən yə ney ikad u mbən buŋ anóm anəy ku ba Jû nu aka ma anəy faʼa. 23#Jon 5.9Mbən bə mə ney ikad umbən buŋ anóm anəy ku ba Jû da ka mbən gow ŋwen ikɨy Mose anigə mbən si mə isɨy itəm ni umugə damugə mə aghəy anóm moʼ uboro uchuŋ uchuŋ anəy ku ba Jû da ngiya? 24Ka mbən mə saʼa ngwen wa akə unó mbənə mbən mə́ zən ə. Mbən saʼ uŋwən akə inji zənə ikoʼoro.
Yeso mə wa ŋunə Nwiye zoʼo
25Ba moʼ a Yerusanem ghayn kwi, “Aka wa ŋunə ba kyayn abú ba Jû umə kaba izwere? 26Anəy uŋwən ŋunə umə inay ma asaŋ asaŋ anigə cha umə ghay ma anó moʼ abú uŋwən. Ba kyayn abú ba Jû waʼa si zən asiʼ asiʼ kwi uŋwən mə wa ŋunə Nwiye zoʼo? 27Anó zənə amə awu amə kwi Amaʼazənə wa ŋunə Nwiye zoʼo mi zaʼa, cha wa moʼ mi kyayn ma asin zənə umi noʼ awu, anigə mba kyayn asin zənə anom ŋunə noʼo awu.”
28Amaʼazənə Yeso mə tey unó ungɨŋ imbəŋ Nwiye yə́ kyayn akə ikay ghayn kwi, “Mbən kyayn aŋu nibi kyayn asin zənə a noʼo awu? Cha adi zaʼa aŋu ungɨŋ isəg akə inyi ikay. Wa ŋunə u tom aŋu amə wa ŋunə umə inay asiʼ. Cha mbən kyayn ngwen uŋwən, 29asɨmə mə kyayn uŋwən damugə mə noʼ aboʼo uŋwən. Amə uŋwən tom aŋu.”
30Amaʼazənə yə ghayn nigə, mbə kab inji kwi ubiya uŋwən, asɨmə cha wa moʼ di yimə ma uŋwən damugə cha ama zənə mbə mi ibiya uŋwən di si koʼo ma. 31Anigə ba nanaʼ akə ikwiy ba wu beni anó zənə yə́ mə́ ghay. Mbə ghayn kwi, “Amaʼazənə wa ŋunə Nwiye zoʼo mi zaʼa, umi aghəy unwini unó chigə akə u mbənə wa uŋu si ighəy?”
Mbə́ tom ba mbənə mbə́ mə́ nəmə imbəŋ Nwiye kwi uŋuw ibiya Yeso
32Ba Farasay zəw umugə ikwiy ba wu mə jumə anó da Yeso, anigə uŋwən nə ba kyayn ambəŋ Nwiye tom ba mbənə mbə́ mə́ nəmə imbəŋ Nwiye kwi uŋuw ibiya Yeso. 33Yeso ghayn abú úŋwən kwi, “A yi chomo nə umbən aba akə amaʼ moʼ. Amaʼa wu yi bə si chigə, ayi wene iŋu abú uŋwən ŋunə yə tom aŋu. 34Mbən yi kab aŋu, anigə cha mbən mi zən ngwən aŋu damugə cha amə ghəy mben zaʼa asin zənə ami mə awu.”
35Ba kyayn abú ba Jû ghayn akaʼa uma kwi, “Anom uŋu mə kaba iŋu awayn ni mba mi kab uŋwən cha ba mi zən ə? U waʼa kaba iŋu abú umba ba mbənə u saŋa ungɨŋ ubey chini imə taʼa úŋwən? 36Yə mə ghayn kwi ingiya amaʼazənə yə ghayn kwi, ‘Mba yi kab uŋwən anigə cha mba mi zən’ fori kwi, ‘Cha amə ghəy mba zaʼa asin zənə amə awu?’”
Yeso kaʼa une mbənə umə naʼa itəni
37Anəy zənə mbə́ mə́ sə ŋu maray ufere ŋunə mbə́ mə́ kono usɨgə, nu amə anəy kyayn nu mbə mə jəgə ufere wu, Yeso noʼ item atey ighayn akə igəg kaka kwi, “Adoʼ mbə zom abú wa moʼ u zaʼa ineŋ ayi naʼ une abú uŋwən u nugə. 38Wa ŋunə u beni anó zənə amə ghayn u zaʼa num i nugə. Ayə ungɨŋ Aŋwaʼanayn Nwiye kwi ugwi ŋunə umə naʼa itəni u yi koŋ ungɨŋ fiŋ ma.” 39Yeso ghayn anó zəŋ da Azugə zayn zayn zənə ami inyi igun ba mbənə u beni uŋwən. Ipey akə amaʼ awu cha Nwiye di si cha Azugə ma igun ba damugə cha Nwiye di si naʼa ma iwumini zənə amə i yi Yeso abú uŋwən.
Ba ghaba da Yeso
40Amaʼazənə ikwiy ba wu zəw inay zəŋ, ba moʼ akaʼa úŋwən ghayn kwi, “Anom ŋu amə kwaʼa wa ukən ŋunə Nwiye kaʼ kwi i yi tom.”
41U chini ghayn kwi, “Uŋwen mə wa ŋunə Nwiye zoʼo” Anigə umoʼ biri kwi, “Wa ŋunə Nwiye zoʼo u mi du a Galeli? 42Ayə ungɨŋ Aŋwaʼanayn Nwiye kwi wa ŋunə Nwiye zoʼo amə wa akə aghaŋ ufon Dafid, fori kwi umbi ibə́ uŋwən a Batereyə́m asin zənə ufon Dafid mə́ chomo awu.” 43Anigə aghaba du akaʼa ikwiy ba wu da Yeso. 44Umoʼ akaʼa úŋwən kaba ibiya Yeso, anigə cha wa ma yimə uŋwən.
Cha ba kyayn abú ba Jû beni uma Yeso
45Amaʼazənə ba mbənə mbə́ mə́ nəmə imbəŋ Nwiye nu ba Kyayn ambəŋ Nwiye nə ba Farasay cha kwi ŋuw ibiya Yeso wene zaʼa, ba kyayn ambəŋ Nwiye nə ba Farasay biri abú úŋwən kwi, “Mbən ki zaʼa gwen nə uŋwən da ngiya?”
46Mbə nəmə imbəŋ Nwiye ywiri kwi, “Cha mba di si zəw ngwa wa moʼ u kwaʼa inayn nu anom uŋu.”
47Ba Farasay wu biri abú úŋwən kwi, “Yə waʼa nibi aghəy mbən faba? 48Wa moʼ akaʼa ba kyayn abú ba Jû kə wa Farasay moʼ si beni uŋwən e? 49Anigə Nwiye si zi indon igun ikwiy ba wu damugə cha mbə di kyay uma ikɨy Mose.”
50 #
Jon 3.1, 2 Nikodemus mə wa moʼ akaʼa ba Farasay wu nu yə si nóʼó ŋu zən Yeso anigə u biri abú uŋwən kwi, 51“Aka ngwa noʼo mə tey kwi ka ba sob ngwa usaʼa igun wa nu cha mba zəw ngwa abú uŋwən kə kyayn anó zənə uŋwən aghəy e?”
52Mbə ywiri kwi, “Ngwə waʼa nibi wa a Galeli? Ngwə bi iney ungɨŋ Aŋwaʼanayn Nwiye anji chuŋ, ngwə yi zən kwi cha wa ukən Nwiye moʼ umi du a Galeli.” 53Anigə ba ujum saŋa wa feyn feyn noʼ ŋú aku ma.
നിലവിൽ തിരഞ്ഞെടുത്തിരിക്കുന്നു:
Jon 7: NGI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 CABTAL
