Jon 1

Inay zənə imi aghəy kwi ba jəg itəni

1Ki Nwiye sə ŋu tana isəg, wa ŋunə mbə́ mə́ tiya akə Inayn yə mə awu. Inayn wu mə́ nə Nwiye. Inayn wu mə Nwiye. 2Inayn wu mə nə Nwiye ki Nwiye sə tana isəg. 3Nwiye tana ughəy ujum anjim Inayn wu, anigə cha ghəy moʼ Nwiye tana nu yə ki chigə ma anjim ma. 4Itəni yə zaʼa akə Inayn. Itəni wu yə naʼa uzayn zayn abú ba. 5Uzayn zayn yə tey ungɨŋ isəg firi, anigə cha aghəy moʼ amə ghəy isəg firi niy uzayn zayn wu.

6 # Mat 3.1; Mak 1.4; Luk 3.1, 2 Nwiye tom wa moʼ nu ukum ma mə Jon. 7Jon zaʼa chomo ni uzənə ighayn anó da uzayn zayn wu. Yə mə ghayn nigə da ba jum mbənə uzəw ubeni. 8Cha uŋwən mə ma uzayn zayn wu, asɨmə yə zaʼa ighayn anó da uzayn zayn wu. 9Uzayn zayn wu amə uzayn zayn asiʼ nu yə zaʼa ungɨŋ isəg, nibi tey igun ba jum.

10Inayn zənə wu mə ungɨŋ isəg, anigə Nwiye chigə anjim ma tana isəg. Asɨmə cha ba ungɨŋ isəg kyay uma wa ŋunə amə uŋwən. 11Yə ŋu ungɨŋ ubey ma, asɨmə cha ba abey ma num uma uŋwən. 12Asɨmə umbi moʼ num uŋwən nibi beni unó mbənə yə́ mə ighayn, anigə yə naʼa ikay abú úŋwən uma jum kwi amə buŋ Nwiye. 13Cha úŋwən mə uma buŋ Nwiye akə inji zənə ba igun isəg ibə́ úŋwən, kə anji zənə wa inyoŋ atəw aghəy, kə mugə wa inyoŋ atəw kaba, Nwiye ma amboŋ mə mbaʼ uma.

14Inayn wu beŋe akə wa inyoŋ atəw, ichomo inja kaʼa. Mba zən iwumini ma nu amə iwumini zənə yə mə abú uŋwən numugə uŋwən mə aba Ŋwə̂ feyn ŋunə yə́ mə abú mbaʼ Yə́ mə aghəy ichuŋ nibə ghayn asiʼ da Nwiye abú ba.

15Jon ŋunə yə mə naʼa une ghayn anó da uŋwən. Yə mə ghayn akə ikay kwi, “Uŋu amə uŋwən ŋunə mə́ ghayn da uŋwən kwi, ‘Wa ŋunə umi zaʼa inyi injim chigə aŋu damugə uŋwən mə awu ki usə ibə́ aŋu.’” 16Ichuŋ swiʼiri igun ma, anigə yə́ ghəy kwi mba jəgə ichuŋ wu. Yə nibi naʼ aborobod ina, u yə naʼa akə ighari jum. 17Nwiye naʼ unoʼo anjim Mose, asɨmə ichuŋ nə asiʼ zaʼa anjim Yeso. 18Cha wa moʼ di si noʼo zən Nwiye. Aba Ŋwə̂ ma feyn yugə nu umə iyad fiŋ Nwiye, ughəy kwi ba kyay uŋwən.

Jon ŋunə yə́ mə́ naʼa une toʼoro inyo ma

(Mat 3.1-12; Mak 1.1-8; Luk 3.1-18)

19Ba mənə mbə́ mə́ tana unó ungɨŋ imbəŋ ba Jû cha ba ambəŋ Nwiye foro ba moʼ ungɨŋ unebey Levi a Yerusanem kwi u biri abú Jon kwi, “Ngwə mə ngwa?” 20Cha yə ton ma iywiri, anigə yə ton asaŋ asaŋ kwi, “Cha amə aŋu wa ŋunə Nwiye zoʼo.”

21Mbə biri abú uŋwən kwi, “Ngwə si mə ngwa? Ngwə waʼa mə Elayija.”

Yə ywiri kwi, “Indəʼ, cha amə aŋu Elayija.”

Mbə́ biri kwi, “Ngwə mə wa ukən ŋunə Nwiye kaʼa kwi iyi tomo?”

Yə ywiri kwi, “Indəʼ.”

22Mbə ghayn abú uŋwən kwi, “Anigə ngwə si mə ingiya? Naʼa iywiri inayn ina mba ŋuw naʼ abú ba mbənə mbə́ cha ngwa. Ngwə ghayn kwi imə ingiya?”

23Yə num inayn wa ukən Nwiye Azaya ywiri abú úŋwən kwi,

“Mə́ mə kyay ungɨŋ imbayn zomo ghayn kwi,

‘Mbən tana inji abú Asɨyisəg.’”

24Amə ba Farasay mbə́ tomo ba mbənə mbə biri inayn wu abú Jon. 25Mbə́ biri abú Jon kwi, “Aton zənə ngwə mə naʼa une nu cha ngwə mə ayə Wa ŋunə Nwiye zoʼo kə Elayija kə wa ukən Nwiye amə da ingiya?”

26Jon ywiri abú úŋwən kwi, “Ayə naʼa une, asɨmə wa moʼ tem akaʼa injən nu cha mbən kyay uŋwən. 27Uŋwən zaʼa inyi injim, asɨmə cha akoʼo aŋu iza iniʼ utabay ma.”

28Anó zəŋ aghəy a Batani, anjin ugwi Jodan, asin zənə Jon mə naʼa une.

Yeso mə Ŋwə̂ injəg Nwiye

29Aney zənə aniŋe akuŋ, Jon zən Yeso umə zaʼa abú uŋwən. Anigə yə ghayn kwi, “Mbə zən, uŋwən mə Ŋwə̂ injəg Nwiye ŋunə u aghəy kwi Nwiye waʼa unó iboŋ ba jum ungɨŋ isəg. 30Amə wa ŋunə mə́ mə ghayn da uŋwən kwi, ‘Wa ŋunə umə zaʼa inyi injim chigə aŋu damugə uŋwən mə awu ki usə ibə́ aŋu.’ 31Ka aba umugə cha adi kyay uŋwən, asɨmə mə zaʼa inaʼ une abú ba Izre boʼo u ikyay uŋwən.”

32Jon ghayn unó mbənə yə́ zən abú uŋwən kwi, “Mə zən Azugə Nwiye amaʼazənə yə mə swiʼi azobo chomo ni ibuŋ, pey yi chomo igun ma.” 33Ka ba umugə cha mə di kyay kwi uŋwən mə wa ŋunə Nwiye zoʼo, asɨmə Nwiye ŋunə yə cha aŋu kwi a naʼa une ghayn iniŋ kwi, “Wa ŋunə azugə swiʼi chomo igun ma yi mə naʼa amə Azugə zayn zayn abú ba. 34Mə si zən, anigə ayi nibi ghayn abú ba kwi uŋwən amə Ŋwə̂ Nwiye.”

Aməŋə-anó Yeso imbey

35Aney zənə yə niŋi akuŋ, Jon ŋunə umə naʼa unəy yə təm ni mbə məŋə-anó ma bigə. 36Yə zən Yeso amaʼazənə yə́ mə́ yeŋ, anigə yə ghayn kwi, “Mbə zən, uŋwən amə Ŋwə̂ injəg Nwiye!” 37Mbə məŋə-anó wu ubigə zəw anó zəŋ, anigə mbə mə ŋuw aboʼo Yeso. 38Yeso gha ma izən umugə umə ŋuw aboʼo uŋwən, anigə yə biri abú úŋwən kwi, “Mbən mə kaba ngwa?”

Mbə́ ywiri kwi, “Rabai” (amə kwi Ataʼa ba) “Ngwə mi chomo aŋwayn?” 39Yə ghayn kwi, “Mbən zaʼa zən.” Mbə ŋu zən asin zənə yə́ mə́ chomo akuŋ. Mbə́ ŋu nigə yi chomo afəb wu nə uŋwən damugə amə sə ŋu ka unyama kyugə anjaʼ.

40Wa moʼ akaʼa mbə məŋə-anó wu bigə zəw anó zənə Jon ghayn nigə iŋu aboʼo Yeso amə Andrew nə unya ma Sayimon Pita. 41Anó imbey zənə Andrew aghəy amə kwi, yə ŋu kaba unya ma Sayimon ghayn abú uŋwən kwi, “Mba si zən wa ŋunə Nwiye zoʼo.” (Ikum uŋu akə inayn Grik amə kwi Kristo). 42Yə ghayn ney inum Sayimon ŋu abú Yeso.

Yeso ney Sayimon ghayn kwi, “Ngwə mə Sayimon ŋwə̂ Jon. Ba mbi si tiya ayə kwi Sefas.” Ukum wu akə inayn Grik amə kwi Pita.

Yeso tiya Filip nə Nataniel

43Aney zənə yə niŋe akuŋ, Yeso num ungɨŋ fiŋ kwi u mbi ŋuw Galeli. Yə ŋu zən Filip ghayn abú uŋwən kwi, “Zaʼa aboʼo inyi.” 44Filip mə́ Betsaida nu amə asin zənə Andrew nə Pita nibi noʼo awu. 45Filip ŋu zən Nataniel gha abú uŋwən kwi, “Mba si zən wa ŋunə Mose nə ba ukən Nwiye ŋwaʼanayn da uŋwən. Uŋwən amə Yeso ŋwə̂ Josef, wa Nazared.”

46Nataniel biri abú uŋwən kwi, “Wa Nazared? Amə aghəy anó chuŋ moʼ du a Nazared?”

Filip ywiri abú uŋwən kwi, “Zaʼa, izən.”

47Yeso zən Nataniel nu yə mə yeŋ zaʼa abú uŋwən, anigə yə́ ghayn abú uŋwən kwi, “Mbən zəw uŋwən amə wa Izre asiʼ, cha unó ingob ungɨŋ ma!”

48Nataniel biri abú uŋwən kwi, “Ngwə si kyay aŋu ingiya?”

Yeso ywiri abú uŋwən kwi, “Mə zən ayə inyi azəd fig, ki Filip sə tiya ayə.”

49Nataniel ywiri abú uŋwən kwi, “Ataʼa ba, ngwə mə Ŋwə̂ Nwiye! Ngwə mə ufon ba Izre!”

50Yeso ywiri abú uŋwən kwi, “Ngwə beni damugə mə ghayn inigə kwi mə zən ayə aton azəd fig? Ngwə yi zən unó kyayn kyayn chigə umbəŋ!” 51Yeso nayn ney anigə ighayn abú úŋwən kwi, “Ayə ghayn asiʼ inen kwi mbən yi zən azobo fiʼi foro mbə angəd umə koʼo ŋuw azobo nibə swiʼi zaʼa igun ŋwə̂ Wa.”

നിലവിൽ തിരഞ്ഞെടുത്തിരിക്കുന്നു:

Jon 1: NGI

ഹൈലൈറ്റ് ചെയ്യുക

പങ്ക് വെക്കു

പകർത്തുക