যোহন 7
7
ভেইয়ুনোর্ অবিশ্বেজ্
1ইয়েন পরেদি যীশু গালীল রেজ্যগান ভিদিরে আঢাউদো গরা ধুরিলো। যিহূদী নেতাগুনে তারে মারে ফেলেবাত্তে চেইয়োন্ বিলি তে যিহূদিয়া রেজ্যগানত্ আঢাউদো বন্ধ গুরি দিলো।
2সেক্কে যিহূদীগুনোর্ তাম্বুল-ঘর পরবর্ অক্ত প্রায় ওইয়েগি। 3ইয়েনত্যে যীশুর ভেইয়ুনে তারে কলাক্, “এ জাগায়ান্ ছাড়িনে যিহূদিয়াত্ যাগোই, যেন তুই যেদক্কানি কাম্ গোজ্যস্ তঅ শিচ্চ্যগুনে সিয়েনি দেগন্। 4যুনি কেঅ চান্ মান্জ্যে তারে জানোদোক্ সালে তে ভিদিরে ভিদিরে কিচ্চু ন-গরে। তুই যেক্কে এই বেক্ কামানি গরর্ সেক্কে মানুচ্চুনো মুজুঙোত্ নিজোরে দেগা।” 5আজলে যীশুর্ ভেইয়ুনেয়ো যীশু উগুরে বিশ্বেজ্ ন-গুরিদাক্।
6সেক্কে যীশু তারারে কলঅ, “মর্ অক্ত এজঅ ন-অয়, মাত্তর্ তমার্ দঅ বে-অক্ত বিলি কিচ্চু নেই। 7জগদ মানুচ্চুনে তমারে ঈচ্ গুরি ন-পারন্ মাত্তর্ মরে ঈচ্ গরন্, কিয়া মুই তারা পৌইদেনে এ সাক্ষ্যগান্ দুয়োঙর্, তারার্ বেক্ কামানি ভান্ন্যেই। 8তুমি পরবত্ যঅ। মঅ সময়ান্ এজঅ ন-পুরোয় বিলি মুই ইক্কে ন-যেম্।” 9এ বেক্ কধানি কোইনে যীশু গালীলোত্ থেই গেলঅ।
10মাত্তর্ তা ভেইয়ুনে পরবত্ যানার্ পরেদি তেয়ো সিধু গেলঅ, মাত্তর্ খুলোমেলাগুরি ন-গেলঅ, হবর্ ন-পেইয়্যেগুরি গেলঅ। 11পরব সময়োত্ যিহূদী নেতাগুনে যীশুরে তগা ধুরিলাক্ আর কুয়ো ধুরিলাক্, “সে মানুচ্চো কুধু?”
12ঝাগ ভিদিরে মানুচ্চুনে যীশু পৌইদ্যেনে পুযু পুযু গুরি নিজো ভিদিরে ভালোক্কানি কধা কুয়ো ধুরিলাক্। কেঅ কেঅ কলাক্, “তে গম্ মানুচ্।” আরঅ কেঅ কেঅ কলাক্, “নয়, তে মানুচ্চুনোরে ভুল্ পধেদি নেযার্।” 13মাত্তর্ যিহূদী নেতাগুনোর্ দরে খুলোমেলা গুরি কনজনে তা পৌইদ্যেনে কিচ্চু ন-কলাক্।
তাম্বুল-ঘর পরব অক্তত্ প্রভু যীশুর উপদেচ্
14সে পরবর্ সংভাগত্ যীশু উবোসনা-ঘরত্ যেইনে শিক্ষ্যে দেনা আরাম্ভ গুরিলো। সেক্কে যিহূদী নেতাগুনে আমক্ ওইনে কলাক্, 15“এ মানুচ্চো কনঅ শিক্ষ্যে ন-পেইনে কিবাবোত্যেগুরি ইয়েনি পৌইদ্যেনে কোই পারে?” 16জোবত্ যীশু তারারে কলঅ, “মুই যে শিক্ষ্যেগান্ দুয়োং সিয়েন মর্ নিজোর্ নয়, মাত্তর্ যে মরে দিপাধেয়্যে, তার্। 17যুনি কেঅ তা আওজ্ পালেবাত্তে চায় সালে তে বুঝি পারিবো, এ শিক্ষ্যেগান্ গোজেনত্তুন্ এচ্চ্যে, না মুই নিজোত্তুন্ কঙর্। 18যে নিজোত্তুন্ কধা কয় তে তার্ নিজোর্ নাঙ্ ফুদেবার্ চেষ্টা গরে, মাত্তর্ যে দিপাধেয়্যে, কেঅ যুনি তার নাঙ্ ফুদেবার্ চেষ্টা গরে সালে তে সত্যবাদী আর তা মনত্ কনঅ ছলনা নেই। 19মোশি কি তমারে রীতি-সুদোম ন-দে? মাত্তর্ তমা ভিদিরে কেঅ সেই রীতি-সুদোমানি-পালঅ। সালে কিত্ত্যে তুমি মরে মারে ফেলেবার্ চেষ্টা গরর্?”
20মানুচ্চুনে জোব্ দিলাক্, “তরে ভূদে পেয়্যে; কন্না তরে মারে ফেলেবার্ চেষ্টা গরের্?”
21যীশু তারারে কলঅ, “মুই এক্কান্ কাম্ গোজ্যং বিলি তুমি বেক্কুনে আমক্ অর্। 22মোশি তমারে চুনু মাঢা কাবিবার্ সুদোম্ দিয়্যে, আর সেই সুদোমান তুমি জিরেবার্ দিনোত্-অ গুরি থাগঅ। খালিক্ এ সুদোমান্ মোশিত্তুন্ ন-এজে, পূরোণি মানুচ্চুনোত্তুন্ এচ্চ্যে। 23ভারী গম্, মোশির সুদোমান্ ন-ভাঙিবাত্যে যুনি জিরেবার্ দিনোত্-অ পুয়োগুনোরে চুনু মাঢা কাবা যায়, সালে মুই জিরেবার্ দিনোত্ এক্কো মান্জ্যরে পুরোপুরি গম্ গোজ্যং বিলি তুমি মঅ উগুরে রাগ্ গরর্ কিত্ত্যে? 24বারেদি চেঙারা দেগিনে বিচের্ ন-গুরিনে বরং গমেডালে বিচের্ গরঅ।”
25সেক্কে যিরূশালেমর্ কয়েক্কো মান্জ্যে কলাক্, “যিবেরে নেতাগুনে মারে ফেলেবাত্তে চান্, ইবে কি সেই মানুচ্চো নয়? 26মাত্তর্ তে দঅ খুলোমেলা গুরি কধা কর্ অদচ নেতাগুনে কেঅ তারে কিচ্চু ন-কদন্। সালে ঘেচ্চ্যেক্গুরি কি তারা কোই পাজ্জ্যন্ যে, এ মানুচ্চোই মশীহ? 27মাত্তর্ আমি দঅ কোই পারিই ইবে কুত্তুন্ এচ্চ্যে। মাত্তর্ মশীহ যেক্কে এবঅ সেক্কে কনজনে কোই ন-পারিবাক্ তে কুত্তুন্ এচ্চ্যে।”
28সিয়েন পরেদি যীশু উবোসনা-ঘরত্ শিক্ষ্যে দিবার্ সময় রঅ ছাড়িনে কলঅ, “তুমি মরেয়ো হবর্ পঅ, আর মুই কুত্তুন্ এচ্চ্যং সিয়েন্-অ কোই পারঅ। তো মুই নিজোত্তুন্ ন-এজং, মাত্তর্ সত্য গোজেনে মরে পাধেয়্যে। 29তারে তুমি হবর্ ন-পঅ মাত্তর্ মুই হবর্ পাং, কিয়া মুই তাত্তুন্ এচ্চ্যং আর তে মরে পাধেয়্যে।”
30ইয়েন্দোই সেই মানুচ্চুনে যীশুরে ধুরিবাত্তে চেলাক্, মাত্তর্ সেক্কেয়ো তার সময় ন-অয় বিলি কনজনে তা কিয়্যেত্ আঢ্ ন-দিলাক্। 31মাত্তর্ মানুচ্চুনো ভিদিরে ভালোক্জনে যীশু উগুরে বিশ্বেজ্ গুরিনে কলাক্, “তে দঅ বোউত্ আমক্ কাম্ গোজ্যে। মশীহ এইনে কি তাত্তুন্-অ বেশ্ আমক্ অবার্ কাম্ গুরিবো?”
32মানুচ্চুনে যে যীশু পৌইদেনে এ বেক্কানি কুয়োকি গত্তন্ সিয়েনি ফরীশীগুনে শুনিলাক্। সেক্কে আজল্ ধর্মগুরুগুনে আর ফরীশীগুনে যীশুরে ধুরিবাত্যে কয়েক্কো চাগররে পাধেই দিলাক্। 33যীশু কলঅ, “মুই আর ভালোক্ দিন তমা ইধু ন-থেম্। সে পরেদি যে মরে পাধেয়্যে মুই তা ইধু যেম্। 34তুমি মরে তোগেবা মাত্তর্ ন-পেবা, আর মুই যিধু থেম্ তুমি সিধু এইয়ো ন-পারিবা।”
35যীশুর এ কধাগান্দোই যিহূদী নেতাগুনে নিজো ভিদিরে কুয়ো কি গরা ধুরিলাক্, “এ মানুচ্চো কুধু যেবঅ যে, আমি তারে তোগেই ন-পেবং? অযিহূদীগুনো ভিদিরে যে যিহূদীগুন্ ছিদি পোজ্যে আগন্, তে কি সিধু যেইনে অযিহূদীগুনোরে শিক্ষ্যে দিবো? 36তে যে কলঅ, ‘তুমি মরে তোগেবা মাত্তর্ ন-পেবা, আর মুই যিধু থেম্ তুমি সিধু এইয়ো ন-পারিবা,’ এ কধাগানর্ অত্তগান্ কি?”
37পরব শেজ্ দিন্নো এলঅ আজল্ দিন। সেদিন্ন্যে যীশু থিয়্যেইনে রঅ ছাড়িনে কলঅ, “কারর্ যুনি পানি তিরেচ্ পায় সালে তে মইধু এইনে পানি হেই যোক্। 38যে মঅ উগুরে বিশ্বেজ্ গরে, পবিত্র বোইবোর্ কধা মজিম্ তা মনত্তুন্ জেদা পানির গাঙ্ বেঈ যানাত্ থেবঅ।”
39যীশু উগুরে বিশ্বেজ্ গুরিনে যিগুনে পবিত্র আত্মাগানরে পেবাক্ সেই পবিত্র আত্মাগান পৌইদ্যেনে যীশু এ কধাগান কলঅ। পবিত্র আত্মাগানরে সেক্কেয়ো দিয়্যে ন-অয় কিয়া সেক্কেয়ো যীশু তা মহিমাগান্ ফিরি ন-পায়।
মানুচ্চুনো ইধু কধার্ অমিল
40এ বেক্ কধানি শুনিনে মানুচ্চুনোত্তুন্ কয়েকজনে কলাক্, “ঘেচ্চ্যেক্গুরি ইবেই সেই ভাববাদীবো।”
41অন্যগুনে কলাক্, “ইবেই মশীহ।”
মাত্তর্ কেঅ কেঅ কলাক্, “মশীহ কি গালীল রেজ্যত্তুন্ এবঅ? 42পবিত্র বোইবো কি ন-কয়, দায়ূদে যে আদামত্ থেদঅ সেই বৈৎলেহমত্ আর তা বংশত্ মশীহ জোর্মেব?”
43এবাবোত্যে গুরি যীশুরে লোইনে মানুচ্চুনো ভিদিরে এক্কান্ কধার্ অমিল্ দেগা দিলো। 44কয়েকজনে যীশুরে ধুরিবাত্তে চেলাক্ মাত্তর্ কনজনে তা কিয়্যেত্ আঢ্ ন-দিলাক্।
45যে চাগরুনোরে পাধা ওইয়্যে তারা আজল্ ধর্মগুরু আর ফরীশীগুনো ইধু ফিরি এলাক্। সেক্কে তারা সিগুনোরে পুযোর্ গুরিলাক্, “তারে ন-আন কিত্যে?”
46সেই চাগরুনে কলাক্, “মানুচ্চো যেবাবোত্যেগুরি কধা কয় সেবাবোত্যেগুরি আর কেঅ কনদিন্অ কধা ন-কয়।”
47ইয়েন্দোই ফরীশীগুনে সেই চাগর্বোরে কলাক্, “তুমিয়ো কি থুগিলা নাহি? 48নেতাগুনোত্তুন্ বা ফরীশীগুনোত্তুন্ কেঅ দঅ তা উগুরে বিশ্বেজ্ ন-গরন্? 49মাত্তর্ এই যে সাধারণ মানুচ্চুন্, ইগুনে দঅ মোশির রীতি-সুদোম ন-জানন্; ইগুনো উগুরে অভিশাব্ আঘে।”
50নীকদীম, যিবে আগেদি যীশু ইধু যেয়্যে, তে এলদে এই বেক্ ফরীশীগুনোত্তুন্ একজন। 51তে কলঅ, “কারঅ মুয়ো কধা ন-শুনিনে আর তে কি গোজ্যে সিয়েনি কোই ন-পারিনে কাররে সাজা দিবার্ বেবস্থা কি আমা রীতি-সুদোম আঘে?”
52-53ফরীশীগুনে নীকদীমরে জোব্ দিলাক্, “তুইয়ো কি গালীলো মানুচ্? পবিত্র বোইবোত্ তোগেই চাহ্, গালীলোত্ কনঅ ভাববাদীর জোর্মেবার্ কধা নেই।”
നിലവിൽ തിരഞ്ഞെടുത്തിരിക്കുന്നു:
যোহন 7: CBT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright © 2021 Bangladesh Bible Society
