প্রেরিত্ 4
4
বড়্ তেম্মাঙত্ পিতর আর যোহনে
1পিতর আর যোহনে যেক্কে মানুচ্চুনো সমারে কধা কদন্ সেক্কে ধর্মগুরুগুনে, উবোসনা-ঘরর্ আজল্ কামগুরিয়্যেবো আর সদ্দূকীগুনে তারা ইধু এলাক্। 2ইগুনে অমকদ তোচ্চ্যে পেইয়োন, কিয়া পিতর আর যোহনে মানুচ্চুনোরে শিক্ষ্যে দেদন্ আর যীশুর মাধ্যমে মরাগুনোরে আরঅ জেদা ওই উদোনা পৌইদ্যেনে প্রচার গোজ্যন্। 3তারা পিতর আর যোহনরে ধুরিলাক্ আর সাজোন্যে ওই যেয়্যে বিলি তার্ কেল্ল্যে সং আজদত্ থলাক্। 4মাত্তর্ যিগুনে পিতর কধা শুন্ন্যন্ তারাত্তুন্ ভালোকজনে বিশ্বেজ্ গুরিলাক্; সেক্কে বিশ্বেজিগুন বাড়িনে কমেদি পাঁচ আজার্ অলাক্।
5তার্ কেল্যে যিহূদীগুনোর আজল্ ধর্মগুরু, বুড়ো নেতাগুন আর ধর্ম মাষ্টরুন একসমারে যিরূশালেমত্ থুবেলাক্। 6সিয়েনত্ দাঙর্ ধর্মগুরু হাননে এলঅ। সিগুন বাদে কাইয়াফা, যোহন, আলেক্সান্দর আর দাঙর্ ধর্মগুরুগুনোর্ পরিবারর্ অন্য মানুচ্চুনেয়ো এলাক্। 7তারা পিতর আর যোহনরে তারা সংমধ্যে থিয়্যেই রাগেইনে পুযোর্ গুরিলাক্, “তুমি কাহ্ বল্লোই বা কাহ্ নাঙে এ কামানি গোজ্য?” 8সেক্কে পিতরে পবিত্র আত্মালোই পুরেইনে তারারে কলঅ, “দাঙর্ ধর্মগুরুগুন আর বুড়ো নেতাগুন, 9এক্কো লেং মান্জ্যরে উপকার গুরিবাত্যে এচ্চ্যে তুমি ইয়েন্দোই আমারে পুযোর্ গরত্তে, মানুচ্চো কেধোক্ক্যেন গুরি গম্ অলঅ। 10সালে তুমি আর বেক্ ইস্রায়েলীগুন এ কধাগান ইদোত্ রাগঅ, নাসরতর সেই যীশু খ্রীষ্ট, যিবেরে তুমি ক্রুশোত্ দুয়ো আর যিবেরে গোজেনে মরণত্তুন্ জেদা গুরি তুল্ল্যে, তা বল্লোই এ মানুচ্চো পুরোপুরি গম্ ওইনে তমা মুজুঙোত্ থিয়্যেই আঘে। 11পবিত্র বোইয়োর্ কধা মজিম্ যীশু খ্রীষ্ট ‘সেই পাত্তর্বো, যিবেরে রাজ্ মিস্ত্রিগুনে, অত্তাৎ তুমি বাদ্ দুয়ো; আর সিবেয়ই বেক্কুনোত্তুন্ দরকারী পাত্তর্ ওই উদিলো।’ 12পাপত্তুন্ উদ্ধোর্ আর কারঅ ইধু পাহ্ ন-যায়, কিয়া গোদা পিত্থিমীত্ আর এমন্ কেঅ নেই যিবের্ নাঙে আমি পাপত্তুন্ উদ্ধোর্ পেই পারিই।”
13পিতর আর যোহনর সাহচ্ দেগিনে আর তারা যে অশিক্ষিত আহ্ সাধারণ মানুচ্ সিয়েন হবর্ পেইনে সেই নেতাগুনে আমক্ ওই গেলাক্, আর তারা যে যীশুর সমাজ্যে এলাক্ সিয়েন্অ বুঝিলাক্। 14যে মানুচ্চো গম্ ওইয়্যে তারে পিতর আর যোহন সমারে থিয়্যেই থাগদে দেগিনে তারার্ উল্লোমী গুরি কবার্ আর কিচ্চু ন-থেলঅ। 15ইয়েনত্যে তারা দাঙর্ সভাত্তুন্ তারারে বারেদি যেবার্ উগুম দিলাক্। সে পরেদি তারা এক সমারে মিলিনে সল্লা গরা ধুরিলাক্। 16তারা কলাক্, “এ মানুচ্চুনোরে লোইনে আমি কি গুরিবোং? যিগুনে যিরূশালেমত্ বজত্তি গরন্ সিগুনে বেক্কুনে কোই পারন্ যে, ইগুনে এক্কান বিশেষ আমক্ অবার্ কাম্ গোজ্যন্, আর আমি সিয়েন অস্বীগের্ অ গুরি ন-পারিই। 17মাত্তর্ মানুচ্চুনো ইধু যেন কধাগান আরঅ ছিদি ন-পরে সেনত্তে এ মানুচ্চুনোরে দর্ দেগা পুরিবো, যেন তারা কাররেয়ো যীশু পৌইদ্যেনে আর কনঅ কধা ন-কন্।”
18ইয়েন্অ পরেদি তারা পিতর আর যোহনরে আরঅ ভিদিরে ডাগি আনিলাক্ আর উগুম্ দিলাক্ যেন তারা যীশু পৌইদ্যেনে আর কনঅ কধা ন-কন্ বা শিক্ষ্যে ন-দুয়োন। 19জোবত্ পিতর আর যোহনে কলাক্, “তমা উগুমানি পালেবং, না গোজেনর্ উগুম্ পালেবং? গোজেন চোগেদি কুবোন্ ঠিগ্, তুমি সিয়েন বিচের্ গুরি চঅ। 20আমি যিয়েন দেক্ক্যেই আর শুন্ন্যেই সিয়েন ন-কোইনে দঅ থেই ন-পারির্।”
21সেক্কে তারা পিতর আর যোহনরে আরঅ দর্বুক্ লাগেইনে ইরি দিলাক্। মানুচ্চুনো দরে তারা ঠিগ্ গুরি ন-পাত্তন্ কেধোক্ক্যেন্ গুরি তারারে সাজা দিয়্যে যায়, কিয়া যিয়েন ঘোট্যে সিয়েনত্যে বেক্ মানুচ্চুনে গোজেনরে বাঈনী গুরিলাক্। 22যে মানুচ্চো আমক্ অইদ্যে ধোক্ক্যেন গুরি গম্ ওইয়্যে তা বয়স্চান এলঅ চল্লিশ বজরত্তুন্অ বেশ্।
বিশ্বেজিগুনোর তবনা
23সিয়েনত্তুন্ ছড়ান্ পেইনে পিতর আর যোহনে তারা নিজো মানুচ্চুনো ইধু গেলাক্ আর আজল্ ধর্মগুরুগুন আহ্ বুড়ো নেতাগুনে তারারে যিয়েনি যিয়েনি কোইয়োন বেক্কানি তারারে জানেলাক্। 24এ কধাগান শুনিনে তারা বেক্কুনে মিলিনে এগামনে গোজেন ইধু তবনা গুরিনে কলাক্, ও প্রভু, তুই আগাজ্ পিত্থিমী, সাগর আর সিয়েনি ভিদিরে যিয়েনি যিয়েনি আঘে বেক্কানি বানেয়োচ্। 25তুই পবিত্র আত্মালোই তঅ চাগর্ আমা পূরোণি মানুচ্ দায়ূদো মুয়োদি কোইয়োচ্,
কিত্ত্যেই থিদেবর্ নেইয়্যে গুরি কিজিগ্-কাজাগ্ গরর্ বেক্ মানুচ্চুন?
কিত্ত্যেই মানুচ্চুনে মিজে গুরিনে কুজুরোমি গত্তন্?
26প্রভু আহ্ মশীহর বিরুদ্ধে জগদর্ রাজাগুনে এক সমারে থিয়্যেদন্,
আর নেতাগুনে গত্তন্ গুমুরো বৈঠক্।
27“তর্ পবিত্র চাগর্ যীশু, যিবেরে তুই মশীহ ইজেবে বেঈ লোইয়োচ্, রাজা হেরোদ আর পন্তীয় পীলাতে এ শঅরত্ তা বিরুদ্ধে অযিহূদীগুনো সমারে আর ইস্রায়েলীগুনো সমারে ঘেচ্চ্যেক্ গুরি আঢ্ মিলেয়োন। 28তর্ খেমতালোই আর আওজ্সোই যিয়েনি ঘুদিবো বিলি তুই আগে ঠিগ্ গুরি থোইয়োচ্ তারা সিয়েনই গোজ্যন্। 29আর ইক্কিনে, ও প্রভু, ইগুনে আমারে কেধোক্ক্যেন গুরি দর্ দেগাদন্, সিয়েন তুই খিয়েল্ গর্। তঅ চাগরুনোরে এমন খেমতা দে যাতে খুব সাহস গুরিনে তারা তঅ কধানি কোই পারন্। 30তঅ আঢ্তানি বাবেই দে যেন তর্ পবিত্র চাগর্ যীশুর নাঙে তারা মানুচ্চুনোরে গম্ গুরি পারন্ আর আমক্ অইদ্যে কাম্ আহ্ চিহ্নো-কাম গুরি পারন্।”
31যে জাগানত্ তারা এগত্তর্ ওইয়োন, তবনা গরানার্ পরেদি সে জাগায়ান গির্গিরে উদিলো। আর তারা বেক্কুনে পবিত্র আত্মালোই পুরেইনে সাহচ্ গুরিনে গোজেনর কধা কুয়ো ধুরিলাক্।
বিশ্বেজিগুনে যিয়েন গুরিদাক্
32খ্রীষ্ট বিশ্বেজিগুন বেক্কুনে মনে-পরাণে এক্ এলাক্। কনঅ কিজু তারা নিজোর বিলিনে দাবি ন-গুরিদাক্ বরং বেক্কানি যার্ যার্ দরকার্ মজিম্ বেবহার গুরিদাক্। 33প্রচারক্কুনে দাঙর্ খেমতালোই সাক্ষি দিয়া ধুরিলাক্ যে, প্রভু যীশু মরণত্তুন্ জেদা ওই উঠ্যে। আর তারার্ বেক্কুনো উগুরে গোজেনর্ বোউত্ দোয়্যে এলঅ। 34-35তারা ভিদিরে কনঅ অভাবী মানুচ্ ন-এলাক্, কিয়া যিগুনোর ভূই বা ঘর্ এলঅ তারা সিয়েনি বেজিনে টেঙা-পোইজ্যে আনিনে প্রচারক্কুনো ঠেংঅ কুরে থদাক্। পরেদি যার্ যিদুক্কুন দরকার্ সে ধগে তারারে দিয়্যে অদঅ।
36যোষেফ নাঙে লেবি গুট্টির্ এক্কো মানুচ্ এলঅ। সাইপ্রাস দ্বিপোত্ তার্ ঘর্ এলঅ। তারে প্রচারক্কুনে বার্ণবা, অত্তাৎ উচ্চোমী তুলি দিয়্যেবো বিলিনে ডাগিদাক্। 37তার এক কট্টা ভূই এলঅ; তে সিয়েন বেজিনে টেঙা আনিনে প্রচারক্কুনো ঠেংঅ কুরে থলঅ।
നിലവിൽ തിരഞ്ഞെടുത്തിരിക്കുന്നു:
প্রেরিত্ 4: CBT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright © 2021 Bangladesh Bible Society
