San Lucas 18
18
A ch'upra a kimen u lak' y uj juesi tribunal
1Jesús bexi' tu ye'sa a kʌ'sa a yʌn u jer u nu'ku yok'o biken yʌnti' u t'ʌnko' K'uj tu woro k'in, y ti' mu' u yoyo u yoro'. 2Jesús tu ya'tio': «Ti' kʌjʌ' yok'o u kʌjta junturi' uj juesi tribunal, mix ku sʌjtik K'uj y mix ku tukrik u bojo'. 3Ti'ri u kʌjta, bexi' ti kʌjʌ' junturi' ch'upra a kimen u lak', a lay a ch'upra su'su' ku tar u ya'e ti' uj juesi tribunal: ¡K'ʌs ʌnten ti'a mok a ku p'aktiken! 4Chen u yʌjchuni uj juesi tribunal mu' k'at u yʌnte a ch'upra, chen pachi tu ya'a yok'o u tuku: “Tak mij sʌjtik K'uj, tak mij tukrik in bojo'. 5Tiu ts'oko u kʌxmetken a je' a ch'upra a kimen u lak', binika' in wʌnte, ti' u mu' u yoyo in wor ti', ti' u muj chojkintik in wor.”»
6Y ak Ts'uri tu ka a'a: «Ya ta wue'x a ba' tu ya'a uj juesi tribunal a mo' tsoy u tuku. 7Y kin k'atik teche'x ¿Chen K'uj muj bin u yʌnte a to' tu tejta, a ku jach t'ʌnik K'uj tu woro k'in, tu woro ak'bi? ¿Yʌn Jeu' xʌnta u nukik ti'o'? 8Ki wei'k teche'x, nej taki u tar u yʌnte. Chen ka' k'uchuk u k'ini u tar u Ti'a Xi'ra, ¿jeu' yirik winik a mok u ki yaksʌmʌ tu yoro' ti' K'uj?»
A xi'ra a ne ku yui'k u bʌj y a mok muj yui'k u bʌj
9Yʌn mok tus ku tukrik bʌjo' ne tsoy u tuko' a ti'o' y mix k'ʌs yʌn u si'pi y ben p'ekyik u jer u bojo', ben Jesús tu ya'a u jer a kʌ'sa a yʌn u jer u nu'ku:
10«Ka'to' xi'ra nʌ'ki ix u yaj yatoch K'uj u t'ʌno' K'uj: Junturi' lʌji' a u winik a judíos a ku ya'bati' fariseo, a juntu lʌji' a mok ku k'atik u bo'ri u ba' u bojo'. 11A u winik a judíos a ku ya'bati' fariseo ch'ijikba ku t'ʌnik K'uj y bex ku yei'k: “Baij tech K'uj, a ten mo bexen a bex a yʌno' a winiko', a bex a ku yakra bao', a bex mo taj ku metik ba', a bex ku tusik u lak' yete u jer a mo' lʌji' u lak', mix bexen a mok ku k'atik u bo'ri u ba' u bojo'; 12ki jach muk'tik in jʌnʌ jujump'e semana ka'p'e k'in a bex ku ya'ba ti' ayuno, tu woro in tak'in a ki kʌnʌnʌ ki laj ts'ek u diezmo.” 13Chen a mok ku k'atik u bo'ri u ba' u bojo', nʌch p'atij ch'ikta, mix u k'at u nʌ'sik u wich ix kʌ' ti' u t'ʌnik K'uj, chen jai' tʌn u jʌts'ik u tsem y tʌn u yei'k: “K'uj, k'ʌs ch'ae otsi ten, a ten ne yʌn in k'ebʌn.” 14Ki wei'k teche'x, a je' a ku k'atik u bo'ri u ba' u bojo' toj luk'sa' u si'pi ten K'uj ka sutpʌji tu yatoch, chen a juntu moj luk'sa' ti'; y tu woro a mok ne t'o'o ku yui'k u bʌj, K'uj ku bin u wayse ne mʌnʌ' y a mok ku yui'k u bʌj mo t'o'o, K'uj ku bin u mete ne t'o'o.»
Jesús ku yei'k ne tsoy ba' ti' a cho mejeno'
(Mt. 19.13-15; Mr. 10.13-16)
15Tasa' ti' Jesús a cho mejeno' ti' u mek'ik, jai' ka tu yiro' u kʌ'sa winiko' a Jesús baij ku metko', tu k'eyo' a mok tu taso' a cho mejeno'. 16Jesús tu pʌya a cho mejeno', y tu ya'a:
—Chae'x u tar a cho mejeno' tin wiknʌ, ma' wei'k tio' mu' taro', ki wei'k te'ex yok'o tu ku wesintik K'uj a tiʌ kʌ' lʌji' ku bin oko' a bex a cho mejeno'. 17Jach taj kin wei'k teche'x, a mok muj jach aksik tu yor ti tu ku wesintik K'uj a tiʌ kʌ' a bex a cho mejeno', mʌnʌ' u yoko yok'o tu ku wesintik K'uj a tiʌ kʌ'.
Junturi' xi'ra chijʌntʌ a ne yʌn u tak'in ku tar tu t'ʌn yete Jesús
(Mt. 19.16-30; Mr. 10.17-31)
18Junturi' xi'ra jak'ʌ u kuch ti' u winik a judíos, tu k'ata ti' a Jesús:
—Wʌjkʌ'si, a tech tsoy a tuku ¿A'e ten baiki in metik ti' u ts'ekten ix kuxta K'uj y mʌnʌ' yʌn kimi?
19Jesús tu nuka ti':
—¿Biken ka wei'kten a ten ne tsoy in tuku? Mʌnʌ' mok a ne tsoy u tuku, chen jari K'uj jach tsoy u tuku. 20A tech a wue a tu li'sa u t'ʌn K'uj a tu ts'ibta uch a Moisés a ku yei'k: “Ma' bin a tuse a lak' yete a jer; ma' kinsik winik, ma' wakrik ba', ma' paytik a bojo', yakunte y ue u t'ʌn a tet y a nʌ'.”
21Y ti' tu nuka:
—Tu woro a je' ka wei'k, toj ne mejenen ka tin toj chu'sa' in metik.
22Ka tu yua Jesús u yei'k, tu ya'ti':
—Yʌn u jer a ba' ma' a mete: Laj kane tu woro a ba' a yʌntech, y xen laj jʌtse ti' a mok mʌnʌ' u tak'in, ka' ts'o'kok a metik, ka tar tin pach y ki wei'k tech, jach ko'o a ba' ku bin u sijik tech K'uj ix kʌ'.
23Kaj ts'o'k u yui'k a ba' tu ya'a Jesús, tu ne tukra u bʌj, tu ne yʌn u tak'in. 24Jesús kaj u yiraj tʌn u tukrik u bʌj a xi'ra, tu ya'ti':
—¡Jach ku yue ne omo' ku bij oko a mok ne yʌn u tak'in ix tu ku wesintik K'uj a tiʌ kʌ'! 25Chen más mo' yaj u yoko junturi' camello ix u jor u yit puts', chen a mok ne yʌn u tak'in, ne omo' ku bin u yue u yoko ix tu ku wesintik K'uj a tiʌ kʌ'.
26A mok tu yuo' u t'ʌn a Jesús, tu yao':
—¿Y Moki ku bij k'uchu muk' ti' u bin ix kʌ'?
27Jesús tu ya'tio':
—A baiki mo' k'uchʌ' u muk' u metik a winiko', K'uj jeu u laj metik.
28Pedro tu ya'a:
—A teno' ti laj p'ʌta tu woro in bao', ij taren in t'u're a pach.
29Jesús tu ya'tio':
—Jach taj kin wei'k teche'x, tu woro a mok tu p'ʌta u yatoch, u suku' o u yits'in, u ch'upra u bojo', o u lak' o u tet o u nʌ' o u lu'm yok'o tu ku wesintik K'uj a tiʌ kʌ', 30ku bij ts'abati' más ne ya'p a bex tu p'ʌta, bexi' ku bin ts'abati' ka xu'ruk t'ʌn u kuxta yete K'uj tu woro k'in y ya mʌnʌ' u yʌn kimi.
Jesús ku ka tsikbʌtik u kimi
(Mt. 20.17-19; Mr. 10.32-34)
31Jesús tu pʌya a doce u apóstoles y tu ya'tio': «Beje' kak bin ix u kʌjta Jerusalén, binukaj metchʌ a ba' ts'ipta' uchik ten a profetas ti' u nupsik, a baij ku bij meta' ti' u Ti'a Xi'ra. 32Binukaj k'uba' ti' a moko' mo' judíos, binukaj p'asta', binukaj kʌxmeta', y binukaj u tup'a u wich. 33Pachi ka ts'o'kok u jʌts'a', binukaj kinsa' y ka mʌnʌk oxp'e k'in tuj kinsa', jeu' ka lik'i kuxta.»
34Ka tu yua u kʌ'sa winiko' u tsikba Jesús mix tu ki' uo' baij u nu'ku ku yei'k, y mix tu yeto' baiki u k'at u yei'k a Jesús.
Jesús ku ch'ensik a mok mu yirik u ber, xok'o u kʌjta Jericó
(Mt. 20.29-34; Mr. 10.46-52)
35Tuk'in xok'o u k'uchu Jesús yok'o u kʌjta Jericó, junturi' xi'ra a muj yirik u ber kurukba tu xur u beri, tʌn u k'atik tak'in ti' u sija' ti'; 36ka tu yua a xi'ra a muj yirik u ber tʌn u mʌn ne pim winik, tu k'ata baij ku metko'. 37Kaj a'bti': lʌji' tʌn u mʌn a Jesús u winki u kʌjta Nazaret.
38Y a xi'ra a muj yirik u ber abotnʌj:
—¡Jesús, u ti'a a David, k'ʌs ch'ae otsi ten!
39A mok pʌti ku bin, tu k'eya a xi'ra a muj yirik u ber ti' u mʌkik u chi', chen a xi'ra a muj yirik u ber, más k'ʌ'm tu t'ʌna a Jesús:
—¡Jesús, u ti'a David, k'ʌs ch'ae otsi ten!
40Jesús kaj xu'rij, tu ya'ti' a mok ku tar tu pach, u tase a lay a xi'ra a muj yik u ber tu yʌn Jesús. Kaj k'uchi tu yʌn Jesús, Jesús tu k'ata ti':
41—¿Baiki a k'at in metik tech? A xi'ra a muj yirik u ber tu ya'a:
—Ts'uri, in k'at ka je'chʌk in wich.
42Jesús tu ya'ti':
—Ka' je'chʌk a wich beje', a tu ta jach aksa ta wor ti' ten.
43To' se'p' je'chʌ u wich ka tu ka ira' u ber a xi'ra y pachi bini tu pach Jesús ka ya'a: ¡jach chich a muk' tech K'uj! Ka tu yiraj a winiko' a nen pim u ch'ensa u wich a xi'ra, tu yao':
¡Jach k'ux tsoyech K'uj!
നിലവിൽ തിരഞ്ഞെടുത്തിരിക്കുന്നു:
San Lucas 18: PLacNaha
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Sociedad Biblica de México AC
