S. Juan 5
5
Jesús ku ch'ensik junturi' xi'ra a muj xima a ti' u winki Betesda
1Pachi ka mʌni mo' ne ya'p k'in, a judíos tu meto' u yo'cho' y Jesús ka sut ix Jerusalén. 2Y ix Jerusalén xok'o a tuku ya'ba ti u jor aj me', tiʌ jump'e u jor tuku k'ʌna' ti' u yichko' u k'aba' u t'ʌn a hebreo Betesda a to'o yʌn jumujk'ʌ' u jor ti' u yoko' tita. 3Tita tio' ne pim winik a mok mo' utso' charakbao' tita, lʌjio' a mok muj yirik u ber, a mok muj ximo', tʌn u ch'uktiko' u pek a ja'. 4Yʌn k'in tita ku yeme junturi' ángel ix a lay u jor a ja' tuku yichko' y ku pesik a ja', y a mok ku yʌj oko se'p' tuk'in tʌn u pesa' a ja' lʌji' ku ch'ene tak ba' tak ya'ji yʌnti'. 5Y tiʌ tita junturi' xi'ra yʌn treinta y ocho yaxk'in mo' uts. 6Ka tu yira Jesús a lay a xi'ra y tu yeta ne ya'p k'in bex tiʌ, tu k'ata ti':
—¿Poch a ch'ene?
7A xi'ra a mo' uts tu nuka:
—Ts'uri, mʌnʌ' mok ku yaksiken ix a ja' tuk'in tʌn u pek y tuk'in tʌn in bij oko, ch'iksʌn ok u jer.
8Jesús tu ya'ti':
—Lik'en y li'se a ch'ak y xen.
9Toj yayaj ka ch'eni a xi'ra y tu li'sa u ch'ak tu cha' ka'chik y chu'mpʌ u xima. Y lay u k'ini lʌji' u k'ini ku je'sik u bʌjo' a judíos. 10A judíos tu ya'ti' a xi'ra a to'o ch'ensa':
—Beje' u k'ini ku je'sik u bʌjo' a judíos, mo' chaʌ' a ch'eik kuchuknʌk a ch'ak.
11Ti' tu nuka tio':
—A mok tu ch'ensen u bʌji' tu ya'ten: “Li'se a ch'ak y xen.”
12Y tio' tu k'ato' ti' a xi'ra aj ch'eni:
—¿Moki a lay a tu ya'tech: “li'se a ch'ak y xen”?
13Chen a xi'ra mu' yeta mok ch'ensik u ya'ji, muj yira a Jesús tu ne pim a winik tiʌ tita, ben sa'ti ti'. 14Pachi a Jesús tu yira a xi'ra aj ch'eni ix u yaj yatoch K'uj y lʌji' ka tu ya'ti':
—Ch'exte a wue in wei'k tech, beje' ch'enech, chen ma' ka kʌxtik a si'pi, ti mu' tar ti tech más ne yaj ba'.
15A xi'ra bini ij mʌni u ya'e tia judíos, a mok ch'ensik lʌji' a Jesús. 16Lʌji' yok'o a judíos tu chuno' u t'u'rik a Jesús ti' u kinsiko'. Tu ku metik ba' u k'ini ku je'sik u bʌjo' a judíos. 17Chen Jesús tu nuka tio':
—In Tet tu woro k'in ku meaj y bexi' ten.
18Chen a judíos más ne poch u kinsiko' a Jesús a tu ku metik ba' u k'ini a ku je'sik u bʌjo' a judíos a mo' chaʌ' u meajo' a winik, y tu ku yei'k lʌji' u tet a K'uj y tu ku metik u bʌj p'is K'uj.
U Ti'a K'uj jach t'o'o
19Jesús tu ya'tio': «Jach taj kin to ki ei'k teche'x, mʌnʌ' u metik ba' u Ti'a K'uj wa muj u metik u Tet, jari ku metik wa ku metik u Tet, tu woro a ba' ku metik a u Tet bexi' ku metik u Ti'a. 20U Tet otsi u yirik u Ti'a y ku ye'sik tu woro a ba' ku metik y yʌnta más ba' ne tsoy ku bin u ye'se ti' u Ti'a y teche'x bin a pese'x a wore'x. 21Bex u Tet ku li'sik a mok kimen y ku ka ts'ek u kuxta, bexi' u Ti'a a mok poch u ts'ek ti', ku ts'ek ti'. 22A u Tet mo' lʌji' ku yei'k mok mʌnʌ' u si'pi o yʌn, a mok ku yei'k yʌn o mʌnʌ' u si'pi lʌji' tu ts'ati' u kuch ti' u Ti'a ti' u yei'k bik taba, 23ti' u k'ujinta' a u Ti'a K'uj a bex ku k'ujinta' u Tet, a mok muj k'ujintik u Ti'a K'uj bexi' muj k'ujintik u Tet a mok lʌji' tu tuchi'ta.
24»Jach toj tu jay kin wei'k teche'x: A mok ku yui'k in t'ʌn y ku ch'eik u t'ʌn a mok tu tuchi'ten, ts'abti' u kuxta a mʌnʌ' u yʌ kimi, y ya mʌnʌ' u bin u bo'te u si'pi, a ka'chik kimen chen beje' kuxʌ'. 25Jach toj tu jay kin toj ei'k teche'x: Binukaj tar u k'ini a lʌji' a beje', tuk'in a mok kimen, bi u yu'e u t'ʌn u Ti'a K'uj, y a mok ku yui'k, jeu kuxto'. 26U Tet yʌn u muk' ti' u ts'ek kuxta, bexi' u Ti'a K'uj ts'abti' u muk' ten u Tet ti u ts'ek u kuxta. 27Bexi' lʌji' meta u t'oji u yei'k mok mʌnʌ' u si'pi o yʌn, tu' lʌji' u Ti'a Xi'ra. 28Ma' ne pesik a wore'x yete a je' kin wei'k teche'x, binukaj tar u k'ini tuk'in tu woro a mok kimen a winik bi u yue u t'ʌn, 29y a mok tu meta tsoy ba', binukaj ka' kuxta ti' u ts'abati' u kuxta y mʌnʌ' u yʌ kimi, chen a mok tu meta ne mo' tsoy ba', binukaj ka' lik'i tu kuxta chen ti' u bo'tik u si'pi ti' K'uj.
A ba' tu ku jach e'sik jach t'o'o a Jesús
30»Ten mij metik a ba' a bex in k'at in bʌji', kin wei'k a bex in Tet ku li'sik u t'ʌn in wei'k, chen tu woro ba' kin wei'k u meta jach taj, mij tukrik in metik a bai in k'at ten, lʌji' ki metik a bex u k'at in Tet. 31Wa a ba' kin tsikbʌtik jari yok'o ten, a lay mo jach to jai' a tsikba. 32Chen yʌn juntu mok ku tsikbʌtik ba' tsoy ti ten, y in we a lay jach lʌji' ku bin ya'e jach taj a ba' kin metik a ten. 33A teche'x ta tuchi'te'x winik ti' u k'ata ti' a Juan, y ti tu ya'a u jach taji a ba'. 34Chen a ten toj mo' sik u yei'k tsoy ba' a winik ti ten, to jay a je' kin wei'k jari ti' a ch'eike'x u t'ʌn a K'uj y ti u tajke'x. 35A Juan bex ka'chik a bex tuk'in ku t'ʌba' jump'e kip' a ku saskintik a ba', chen teche'x che tsoyji a wore'x mo ne ya'p k'in yete u kip'. 36Chen a ten yʌnten más tsoy ba' ki tsikbʌtik y mo' bex a bex tu tsikbʌta a Juan. Tu woro a ba' kin metik, lʌji' ki metik a to'o bex tu ya'a in metik in Tet, lʌji' ku ye'sik jach lʌji' tu tuchi'ten in Tet. 37Bexi' in Tet a tu tuchi'ten, ku tsikbʌtiken tia winik tsoy ba' yok'o ten, a teche'x ma' wue'x u t'ʌn y mix a wire'x u bʌji', 38mix ka ch'eike'x u t'ʌn ix a pixʌne'x, tu maj ch'eik u t'ʌn a mok tu tuchi'ta. 39Teche'x ka ki xajke'x u t'ʌn K'uj tu ts'ibʌ', a tuke'x ti ka bin a wire'x a kuxte'x tu mʌnʌ' a yʌ kimi, chen maj wirke'x a tu' ts'ibʌ' lʌji' ku tsikbʌtiken, 40Y ma' k'ate'x a waksike'x ta wore'x ti ten ti' u ts'abate'x a kuxte'x.
41»A ten mo' lʌji' ki tukrik u yei'k tsoy ba' ti' ten a winik. 42A ten toj in k'omo'e'x a teche'x, toj mo' otsi a wike'x K'uj. 43A ten tu tuchi'ten in tet y lʌji' kin wei'k, chen a teche'x ma' ch'eike'x in t'ʌn, wa u jer ku tar y ku tsikbʌtik u bʌji' ti', a lay je'e a ch'eike'x u t'ʌn. 44¡Bij ka bin a ch'ae'x in t'ʌn, toj a teche'x jari a k'ate'x u yei'ko' a winik tsoy ba' ti teche'x y mo' ti K'uj a lʌji' jari junturi' K'uj u mʌnʌ' tu jer! 45Ma' tukrike'x wa ten ki bin in wae ti in Tet a ba' ka metke'x, a mok ku bin u ya'e lʌji' a Moisés a to'o lʌji' ka tukrike'x ku bin u yʌnte'x. 46Wa ka ch'eike'x u t'ʌn a Moisés au ts'ibtamʌ yok'o u juni' u t'ʌn K'uj, bexi' ja' ch'eike'x in t'ʌn a ten, toj ten tu ts'ibten. 47Chen maj ch'eike'x u t'ʌn a tu ts'ipta' a Moisés uchik, ¿bik ka bin a ch'ae in t'ʌn a ki wei'k teche'x?»
നിലവിൽ തിരഞ്ഞെടുത്തിരിക്കുന്നു:
S. Juan 5: PLacNaha
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Sociedad Biblica de México AC
