Luuka 18

Sahu li mukwili na nzonzi wu baamiisumba

1Yisu atiidi bo sahu limosi, mu umwese bo ti bafwana ubaasambila tangu yoosi, na uveleba na ikolili. 2Nde aleeli: «Hwaba na nzonzi mu musyenge mumosi, wu akavelekinza Nzambi, na uvelekinza pasi muutu. 3Hwaba ka hutso musyenge mowuna, mukwili mumosi wu akayaleele nde tangu yoosi: “Biingasa me ŋa busu bu muboho a me.” 4Tangu yoosi nzonzi akabisa. Titswene, nde ni utsima: “Eye, me nzaabi ti me a mbakiinza Nzambi, na ukiinza pasi muutu ve. 5Ka bu mukwili mowunuwu ali mu uyakwamisa me, me apfwana ubiingasa nde mu musamu a nde, mana nde abweveleyakwamisa me.”» 6Pfumu abweleele: «Yuhani ma nzonzi wu baamiisumba wunuwu ali mu uleele. 7Nzambi ubiingisa ba nde hasoolo, mu toni ati, bali mu ufulaha huli nde butsuhu na nyangu. Nde a hudiinga mu uyakumbasa bo ve. 8Me ndeele benu, nde ubiingasa bo mu mawasa. Ka ŋa Mwana a muutu hu uya ŋa toto, nde uyabiisa baatu babali na hiitu mu Nzambi?»

Sahu li Mufarisi na mukambi limandu

9Yisu abweta sahu molinili, mu toni a baatu ba baakatsima ti, bo baasungama ŋa busu bwa Nzambi. Baatu mobaana baakarokolo bana. Yisu aleeli: 10«Babahala boole baakumi hu nzo a Nzambi mu usambila. Mumosi aba Mufarisi, na wuna mukambi limandu. 11Mufarisi akasambila mutele hutso mutima a nde bunuubu: “Nzambi a me, me ndi mu upfutala we matondo, bu me apele we baatu bakima: ba bali bayibi, bababi, na banga mayamba. Baatu mobaana bali we mukambi limandu mowunuwu. 12Me umbaandya ikandi ndya yole mu limiingu, me umbaapa ikuuku hya kuumi-kuumi mu byosi bi me umbaambaha.” 13Mukambi limandu atelimi ŋa lala, a hayehili tso usuula miisu hu yulu ve. Ka nde akabula tulu na uleele: “Nzambi a me, kwila me lingebe, me wu uli nga masumu.”» 14Yisu abweleele: «Me ndeele benu, bahala molinili afutihi hu nzo a nde, na Nzambi amoni nde wu akuha, ka a Mufarisi mowunuwu ve. Ka pasi nde wuuna wu ubaasyenoho sa bakulamasa; pasi nde wuuna wu ubaakulamana, sa basyenolo.»

Yisu asyemi bibabana

Mataayi 19.13-15; Malako 10.13-16

15Baatu baabehi ka bibabana huli Yisu mana nde asuusala byo myoho. Ka bayihi bamono buuna, bo basyembi ba baabehili nde bibabana. 16Ka Yisu avondi ti babehele nde bibabana na aleeli: «Nyahani bibabana biya huli me, na a liliha byove. Mu toni ati, Ipfumu hya Nzambi hili hya ba baafwanina na bo. 17Mu mbuli me ndi mu undeele benu, pasi nde wuuna wu uveleyaka Ipfumu hya Nzambi we imwa-mwana, a hukoto mu hyove.»

Bisina na Ipfumu hya Nzambi

Mataayi 19.16-30; Malako 10.17-31

18Mumosi mu bakuutu ba Bayudaayo afuuli Yisu: «Mulongisi wu mubwe, hima me apfwana usa, mana Nzambi ava me monyi wu bilima na bilima?» 19Yisu afutili nde: «Mu hima we li mu uteele me “wu mubwe”? Wu uli wu mubwe ndulu Nzambi siha. 20We yabi mikele mya Nzambi: “A hasa mayamba ve, a haduba muutu ve, a hayiba ve, a hata imbangi hi upfuta mu mbaahi a we ve, kinza taata a we na ngu a we.”» 21Bahala laafutili: «Me akuhisi mikele momina myosi umata bufudu bwa me.» 22Bu Yisu hayuhi maana, nde aleeli: «Hyamiivele huli we isiha imosi: sumbasa byosi bi we li na byo, kaba kaluha a fwanda huli biyaha. Vanga buuna, we ubaha busina bwa hu yulu. Titswene yanga na duukala me.» 23Bu muutu mowunuwu hayuhi mambu momaana, nde akoti mu lingebe mu toni ati, nde aba isina hi inene. 24Yisu amono ti nde ka mu lingebe, nde aleeli: «Huli na pasi yindahi huli bisina mu ukoto mu Ipfumu hya Nzambi! 25Huli na pasi mu buuru mu uvyoho ŋa vulu la tsongi. Ka hwafula pasi huli isina mu ukoto mu Ipfumu hya Nzambi.» 26Ba baakayuha nde, baaleeli: «A li buni! Ka na utwala uyoboho?» 27Yisu akaali: «Mambu ma baatu bu ukondo, Nzambi ubaatwala.» 28Buuna Peetelo ni uleele: «Mono, bisu laatimbi byosi bi bisu labeedi na byo mu uduukala we.» 29Yisu ni uleele bo: «Me ndeele benu lo. Ni mbuli, muutu utimba nzo a nde, buve mukadi a nde, baana ba ngu a nde, ikuta hya nde, baana ba nde, mu toni Ipfumu hya Nzambi. 30Tso nde tiimbi bo, Nzambi uva nde bi byafulala mu tangu moyiniyi, na hubusu, nde ubaha monyi wu bilima na bilima.»

Yisu li mu uyabisa lipfu na tsuuhili a nde

Mataayi 20.17-19; Malako 10.32-34

31Yisu avoli bayihi kuumi boole, bo baayeni ŋa muvanga na aleeli bo: «Yuhani, likumasaani hu musyenge a Yeruselemi. Bu lutonwani huuna, moosi ma mimbihuli mya Nzambi myasonihi mu toni a Mwana a muutu, mu utswiha. 32Ka bu uyeholo nde ŋa myoho mi lituma la byenyi ba bukwede nde, ba butuha nde na ba bu utuulala nde maate. 33Humbisa utete bikooti, bu uduba nde. Mu ilumbu hi bitatu nde usuha mu lipfu.» 34Ka bayihi a baatsikihi dyambu tso limosi, mu ma nde haleeli bo ve. Mbindulili a maana yaba yasweme huli bo. Na bo a baakatsikaha ma Yisu hakayabisa bo ve.

Yisu abeelusi inzimana hu musyenge a Yeriko

Mataayi 20.29-34; Malako 10.46-52

35Bu Yisu haba bebele na musyenge a Yeriko, inzimana imosi hyaba hyatsahala ŋa muvanga a nzila, na hyakasa musohi. 36Bu inzimana hyayuhi konge a baatu mu uvyoho, hyo hyafuuli: «Lo lima?» 37Baaleeli nde: «Yisu musi Nazareti li mu uvyoho.» 38Na nde afulihi: «Yisu, Mwana a Davidi, kwila me lingebe!» 39Ba baaba hu busu baakapfubasa nde mu uveletoyo. Ka nde akabwesinzafulaha: «Mwana a Davidi, kwila me lingebe!» 40Yisu atsikimi na atumi baatu mu ubehele nde inzimana. Na bu nde hayasusaha ŋa pedu a nde, Yisu afuuli nde: 41«Hima we tondi ti me tsiila we?» Nde afutili: «Pfumu, sa ti me mbwemono.» 42Na Yisu aleeli nde: «Nyaha we bwemono! Hiitu hya we himiibeeloso we.» 43Mawasa-mawasa, miisu ma nde maadibumi, nde aduukili Yisu na ubaayusa Nzambi. Bu baatu boosi baamoni buuna, bo kaka baayusi Nzambi.

നിലവിൽ തിരഞ്ഞെടുത്തിരിക്കുന്നു:

Luuka 18: TSA

ഹൈലൈറ്റ് ചെയ്യുക

പങ്ക് വെക്കു

പകർത്തുക