Yowani 3
3
Imoho hya Yisu na Nikodemo
1Hwaba na bahala limosi, ŋa hati li Bafarisi, nga nduhi a Nikodemo. Nde aba mumosi mu bakuutu ba Bayudaayo. 2Nde ayamono Yisu hutso butsuhu na aleeli nde bunuubu: «Rabi, bisu liyaabi ti we ni wu Nzambi hatsindaha mu ulongese bisu. Mu toni ati, muutu tso mumosi utwala usa biliimbu bya kimuhili bi we li mu usa, tso Nzambi a hali na nde ve.» 3Yisu afutili nde bunuubu: «Mu mbuli, mu mbuli me ndi mu undeele we, muutu utwala umono ipfumu hya Nzambi ve, hwavele ubwebuta nde.» 4Nikodemo akaali: «Buni mukuutu bahala mbii me, utwala ubwebutama hu unyatihi? Nde utwala ubwekoto mu monyi a ngu a nde na ubutama butama la yoole ve.» 5Yisu afutili nde bunuubu: «Mu mbuli, mu mbuli me ndi mu undeele we, hwavele ubuta muutu mu mamba na mu Livupu, nde utwala ukoto mu ipfumu hya Nzambi ve. 6Hi himiibutama mu musunya hili musunya, na hi himiibutama mu Livupu hili Livupu. 7A hakimuha ve bu me ndeeli we ti: “Hwafwana huli benu mu ubwebutama.” 8Livupu lili we ifula. Lo libanyingasa hu lo litondi. Muutu ubaayuha kele a lo, hwavele uyaaba huni lo lili mu umata, tso huni lo lili mu uyene. Hu li bumosi kaka mu pasi muutu wu miibutama mu Livupu.» 9Nikodemo aleeli nde: «Buni buuna buutwala uvangama?» 10Yisu afutili nde: «We li Mulongisi wu li mu ulongese Isereli, we a hayaabi mambu mo maana ve! 11Mu mbuli, mu mbuli me ndi mu undeele we, bisu ubaaleele ma bisu layaaba, na bisu ubaata imbangi mu ma bisu laamono, ka benu a lili mu uyaka imbangi hya bisu ve. 12Benu a laasiila me imiinu ŋa me toyili benu misamu mya toto ve. Buni benu luusa imiinu ŋa me utoyele benu misamu mi mayulu? 13A hu li na muutu wu avaata hu yulu ve, vengo Mwana a muutu, wu akulamana umata hu mayulu#Mak 30.4! 14Hu kumu, Moose abandihi na asyenuli taadi ŋa yulu muti#3.14 Aba taadi wu baavangi na baabandihi ŋa muti Mat 21.9.. Ni bumosi kaka, Mwana a Muutu bafwana ubandiha, 15mana boosi ba bali mu usiila nde imiinu, babaha monyi wu bilima na bilima. 16Ka mbi bu Nzambi hatondi tsi, nde atsindihi Mwana a nde wu livingu, mana pasi nde wu usiila nde imiinu, avele bungana, ka nde sa abaha monyi wu bilima na bilima. 17Nzambi a hatsindihi Mwana a nde mu utsuundasa baatu ve, ka mu toni ati baatu bayoboho mu nde. 18Woosi wu li mu usiila nde imiinu amiipala mu tsundusu. Ka woosi wu avelesiila nde imiinu, amiikoto mu tsundusu, mu toni ati nde a hasa imiinu mu nduhi a Mwana a Nzambi wu livingu ve.
19Mono buni tsundusu yuvangama: liyalala laayidi mu tsi, ka baatu baatondi hwa bo piipidi na baatiimbi liyalala, mu toni ati mavanga ma bo mali mamabi. 20Pasi muutu wu ubaavanga mamabi abelele liyalala, na nde ubaatahuha na lo. Nde ubaasa buuna, mana mavanga ma nde mamabi a mayabaana. 21Ka nde wuuna wu ubaasalila imbuli, nde li mu uya hu liyalala, mana bayaaba ti mavanga ma nde mali ma litondo la Nzambi.»
Imbangi hya tsyelele hya Yowani Mutondihi
22Humbisa a maana, Yisu ayeni na bayihi ba nde hu itanzi hya Yude. Huuna, nde avyosi na bo mwa bilumbu, na nde akatondehe baatu. 23Yowani kaka akatondehe hu bula bwa Enoni, hu pedu a bula bwa Salimi, mu toni ati huuna hwaba na mamba mamalahi. Na baatu baakaya huli Yowani mu uyaka tondihili. 24Mu tangu moyiina, Yowani aba kini a hakoti kondayi ve.
25Ka bayihi ba Yowani bakima, baabaandihi imoho na Muyudaayo mumosi mu toni bipfu bya tsyeemili a nyutu. 26Bo baayamono Yowani na baaleeli nde bunuubu: «Rabi, we li mu uyibwala monyi mu muutu wu aba na we hu simu lina la Yolodani, wu we atiili imbangi? Ka bunuubu nde aka mu utondehe, na baatu boosi bali mu uyene huli nde!»
27Yowani afutili bo: «Muutu utwala usa pasi isiha ve, tso Nzambi a haviidi nde muswa ve. 28Benu mwakulu lili mu uta imbangi ti me andeeli: “Me, me a handi Kristo ve, ka baatsindihi me ŋa busu bwa nde#Mal 3.1 .” 29Wu abaha mukadi na? Ni mulumi a nde! Ka mu mukungi makwele, mbaahi mulumi ni wu ubaatsahala ŋa pedu mulumi, na ubaayuhala nde. Nde ubaamono kinya yi ndahi mu uyuha ndaha mulumi. Kinya moyiina ni ya me, na yo yili yi yaakuha. 30Nde Kristo afwana usyenoho, na me apfwana ukulamana.
31Muutu wuuna wu amata hu yulu, afulala baatu boosi tsongo. Ka muutu wu li wa toto, li wa toto, na nde ubaatoyo mu bya toto. Buuna, muutu wu li mu umata hu yulu, [nde afulala baatu boosi tsongo]. 32Nde ubaata imbangi mu ma nde hamono na hayuha, ka muutu tso mumosi a hali mu usiinga imbangi hya nde ve. 33Muutu wu li mu usiinga imbangi hya nde, li mu usilasa ti Nzambi li imbuli. 34Muutu wu Nzambi hatsindaha, ubaaleele mambu ma Nzambi. Mu toni ati, Nzambi ubaava nde Livupu mu iteesi hi hyafulala. 35Taata ubaatondo Mwana, na amiiva bisiha byosi ŋa myoho mya nde. 36Muutu wu ubaasiila Mwana a Nzambi imiinu, li na monyi wu bilima na bilima. Ka wu uveleyuhala Mwana a Nzambi, a hubaha monyi mo ve. Na kesi a Nzambi sa yiba ŋa yulu a nde.»
നിലവിൽ തിരഞ്ഞെടുത്തിരിക്കുന്നു:
Yowani 3: TSA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© (Active), Wycliffe Bible Translators, Inc. All rights reserved.
