Luk 19

Yeso mane Sakyɛ

1Yeso à nyii efwɔ abɛ Jeriko shi ma fɔɔfɔɔ gɛ̀rɛ̀ ma fɔɔ à ngɔɔ. 2Gho deʼ à na aŋu ekumu ngɔ ma Sakyɛ. Engɔ à na m̀fɔ̀ àshuru aŋwɛ gɛ̀rɛ̀ me le ekɛb. 3Engɔ à na ke é zɔ kpe ka Yeso à na wɛ? Bɛʼngɛ engɔ à ne tiimi gɛ̀rɛ̀ ne me né zɔ Yeso bo mbɔʼ enɔrɔ bɔ. 4Éngɛ, engɔ dɔrɔ ngɔɔ embè enɔrɔ bɔ gɛ̀rɛ̀ kwaʼ ekere azɔd deʼ ma ke é zɔ Yeso wɛ a ma ngo fɔɔ anji aŋu ngɛ. 5Èndzobo chɛ Yeso â bwɛn afwɔ yɛ ngɛ, è kɔʼ ekere gɛ̀rɛ̀ ga ebe Sakyɛ kpe, “Sakyɛ, zamma kla, mbɔʼnga mmɛ wa ngo tsɔmɔ a ndɔ mbyɛ ànchwɔ̀.” 6Sakyɛ à zamma kla gɛ̀rɛ̀ chɛdɛ engɔ ene egɛnɛ kɛ́. 7Bɔ gimkpaʼ byɛ â zɔ ngɛ klada sa kùmù kpe, “Egho wunɔ shi ngɔɔ ne ègɔ̀n nɔ efwɔ ndɔ gho abwa bɔɔbɔɔ.” 8Sakyɛ à tam ekere gɛ̀rɛ̀ ga ebe Masakɛ kpe, “Masa, zhuru! Mmɛ wa gɛ̀bbɛ̀ ela mbu ene agha fyee è ndɛʼ abɛɛ bi ebe bɔ ndzaŋa, mala mmɛ à gɛrɛ shi bidi gho deʼ, mmɛ wa tɛ̀ʼrɛ akyɛ kwɛ̀.” 9Yeso ga ebe engɔ kpe, “Etyê Ngwe shi zeʼe efwɔ ndɔ zɔnɔ ànchwɔ̀ mbɔʼnga egho wunɔ gɛrɛ na gho ekla Abraham. 10Ŋwɔ gho à zeʼe, é zɛʼɛ gɛ̀rɛ̀ pwèerè abɔ byɛ â shi nyimi ngɛ.”

Nklama timi mbɔʼ aklibi àfɔ̀n

(Mat 25:14-30)

11Aŋu bɔ â ma zhuru ebwa wunɔ ngɛ, Yeso fɔɔ embè è sɛ̀ɛrɛ̀ nklama timi ebe angɔ. Engɔ à sa zamma é bwɛn a Jerusalɛm abɔ byɛ zhuŋu kpe ebwa m̀fɔ̀ Ngwe a sa zamma é zeʼe. 12Éngɛ, engɔ ga kpe, “Gho kɛ̀ deʼ à na aŋu ma ke ngɔɔ efwɔ abɛ deʼ ezhin dɔɔdɔɔ é ngɔ̀ɔ mwɔ m̀fɔ̀, gɛ̀rɛ̀ ma wu zeʼe achim abɛ mɔ. 13Aŋu engɔ à sa nyɛn ngɛ, engɔ à zɔʼ bɔ afwɛʼ mɔ wum, è ndɛʼ ako wum ebe angɔ gɛ̀rɛ̀ ga ebe angɔ kpe ‘Mbɔn zhuŋu m̀pè ewu̧ yɛ mbɔn me né zhiri ene ekɛb wunɔ ngɛ bwɛn èndzobo chɛ mmɛ ma zeʼe achim ngɛ.’ 14Enjitsɔ bɔ ngɔ mɔmbwo â na gwe engɔ, éngɛ è tɔm ghontɔm ebe engɔ è ga kpe ‘Mbyɛɛ ke ke kpe gho wunɔ mwɔ m̀fɔ̀ endyɛɛ bo.’ 15Â zhwaʼa egho wunɔ ene m̀fɔ̀, engɔ gɛrɛ wu zeʼe achim ekyɛ ŋwaʼ. Engɔ ndɛʼ etsɛrɛ kpe bɔ afwɛʼ mbè zeʼe efàarà ndze nè ǹtsara yɛ angɔ à shi le ngɛ. 16Gho mbèmbè zeʼ ga kpe ‘Masakɛ mmɛ shi le ako wum edɔm eko ŋwaʼ wɛ ngwo à ndɛʼ ena ngɛ.’ 17Engɔ ga ebe engɔ kpe ‘Ebwa ǹchwɔ̀, gho afwɛʼ nchwɔnchwɔ ngu. Na aŋu ngwo fwɛʼ anchwɔnchwɔ ene éŋwaʼa ene abwa kparakpara ngɛ, mmɛ wa gè awɛ ngwo sa klini ashimabɛ wum.’ 18Gho afwɛʼ nùrù fyee zeʼ gɛ̀rɛ̀ ga kpe ‘Masakɛ mmɛ shi le ako tan edɔm eko ŋwaʼ wɛ ngwo à ndɛʼ ena ngɛ.’ 19Engɔ ga ebe ewùnɔ kpe, ‘Ngwo wa sa klini ashimakwa tan.’ 20Gho afwɛʼ tsɛrɛ zeʼ dù ga kpe, ‘Masakɛ, kede eko ngwɛ wu. Mmɛ à ne koro efwɔ aparandi nɛŋɛ. 21Mmɛ à na bumu awɛ mbɔʼnga eleabwa njɛ ye kama. Ngwo ma bwɛ ela byɛ e ne mwɔ àmbyɛ bo ngɛ, gɛ̀rɛ̀ ma dzà ela byɛ ngwo ne kɔrɔ bo ngɛ.’ 22Engɔ ga ebe engɔ kpe ‘Ngwo gho afwɛʼ bɔɔbɔɔ! Mmɛ wa ngo nu ega wɛ a gli eklo ngwɛ ngɛ é sɛʼ awɛ anyi! Ngwo we nɛɛ kpe eleabwa ndza ye kama, mmɛ ma nu ala yɛ ne mwɔ andza bo ngɛ, gɛ̀rɛ̀ ma dzà ela byɛ mmɛ ne kɔrɔ bo ngɛ. 23Mwɔ ngɛ ayɛ le ngwo mo ge ekɛb ngu efwɔ ndɔ kɛb tsɛ̀ʼ? Shi mmɛ à sa wu nu achim ne ǹtsara edɔm.’ 24Éngɛ engɔ ga ebe abɔ byɛ â me tamma aŋu ngɛ kpe; ‘Mbɔn nu eko wɛ ebe engɔ ngɛ ndɛ̀ʼ ebe gho afwɛʼ wɛ à me le ako wum ngɛ.’ 25Bɛʼngɛ angɔ ga ebe engɔ kpe ‘Masakɛ, engɔ a shi dye le ako wum.’ 26Engɔ gii kpe, ‘Mmɛ ga endɔn kpe ebe bɔ gimkpaʼ byɛ e me le ala deʼ ngɛ, e ba ngo ndɛʼ etsɛrɛ, bɛʼngɛ ebe abɔ ngɔ byɛ e ne le ala deʼ bo ngɛ, ka de mwɔ ampiʼ ngɔ wɛ angɔ me le ngɛ, e ba ngo nu ebe angɔ. 27Enjitsɔ mbɔn bwɛ abɔ m̀pɛ̀ʼ mbu byɛ â ne ma ke kpe mmɛ mwɔ m̀fɔ̀ bo ngɛ zeʼ anɔ gɛ̀rɛ̀ zhudu angɔ efàarà ndza.’ ”

Yeso nyii a Jerusalɛm na m̀fɔ̀ nɔ

(Mat 21:1-11; Mak 11:1-11; Eyɔ 12:12-19)

28Aŋu Yeso à ga abwa zɔnɔ ngɛ, engɔ ngɔɔ embè angɔ a Jerusalɛm. 29Aŋu engɔ à bwɛn ebara Bɛtfagɛ mane Bɛtani edɔm egu Olifs ngɛ, engɔ saa bɔ bɛɛrɛ abwa mɔ fyee embè 30nè etsɛrɛ zɔnɔ, “Mbɔn ngɔɔ efwɔ abɛ yɛ ngɛ embè ndzɔn nɔ, aŋu mbɔn ma nyii efwɔ ngɛ, mbɔn ba zɔ aŋwɔ m̀pwɔ̀ bèʼebɔ deʼ wɛ e ne shi kwaʼ ekyɛ deʼ bo ngɛ. Mbɔn zɛɛ nu zeʼ anɔ 31Mala gho deʼ biiri endɔn kpe mbɔn na zɛɛ kpe ayɛ, mbɔn ga kpe ebe engɔ Masakɛ wa ke.” 32Angɔ nyɛrɛ ngɔɔ gɛ̀rɛ̀ dù zɔ abwa gimkpaʼ nkirinkin aŋu Yeso a shi ga ebe angɔ ngɛ. 33Aŋu angɔ à sa zɛɛ aŋwɔ m̀pwɔ̀ bèʼebɔ wɛ ngɛ, egho m̀pwɔ̀ ngɛ ga kpe ebe angɔ, “Mbɔn na zɛɛ aŋwɔ m̀pwɔ̀ bèʼebɔ wɛ ngɛ kpe ayɛ?” 34Angɔ gii kpe, “Masakɛ wa ke!” 35Angɔ à nu aŋwɔ m̀pwɔ̀ bèʼebɔ wɛ ngɔɔ ndɛʼ ebe Yeso. Éngɛ angɔ zèe ǹdiri amɔ edɔm akɔb m̀pwɔ̀ bèʼebɔ wɛ gɛ̀rɛ̀ kpèdè le Yeso kwaʼ edɔm. 36Aŋu engɔ à ma zhiri à ngɔɔ ngɛ, bɔ zèe ǹdiri amɔ enɔrɔ ǹjìkɛ̀. 37Èndzobo chɛ angɔ à bwɛn ebara Jerusalɛm mane afwɔ yɛ aghɛʼ à ma kla ngɔɔ egu Olifs ngɛ, ebaŋabɔ bɛɛrɛ abwa ngɔ klada sa ndɛʼ ebɛrɛ ebe Ngwe, sa flaba zodo engɔ ene abwa zodo zodo gimkpaʼ yɛ angɔ à shi zɔ ngɛ sa ga kpe; 38“Ngwe ge m̀bɔ̀nɔ ene m̀fɔ̀ yɛ è me zeʼ ene ekumu Masakɛ ngɛ! M̀bwarambwad ekere àkɛ mane eghɔ ebe Ngwe ekere àkɛ!” 39Éngɛ bɔ Farisii deʼ efwɔ ebaŋabɔ ga ebe Yeso kpe, “Àtee abwa bwe ebe bɔ bɛɛrɛ abwa mbyɛ shi e ba!” 40Yeso gíì kpe, “Mmɛ na tòʼrò endɔn, mala angɔ ba, shi atye zɔnɔ ya klada sa flàbà akwâ!”

Yeso ku̧u mbɔʼ Jerusalɛm

41Engɔ à sa zamma bwɛn efwɔ abɛ, aŋu engɔ a gɛrɛ zɔ abɛ yɛ ngɛ, engɔ ku̧u 42sa ga kpe, “Kede, mala ngwo a me nɛɛ ala yɛ e ma ke ene m̀bwarambwad ànchwɔ̀ ngɛ, bɛʼngɛ mbɔn ke né zɔ bo! 43Endzobo ya zeʼ yɛ bɔ m̀pɛ̀ʼ mbɔn ma ngo kɛɛrɛ angɔn sɔ̀, ndò angɔn shi efwɔ ǹkɛmɛ, kɔ̀ɔ angɔn ene eghɛʼnji gimkpaʼ! 44Angɔ ba ngo tsɔŋɔ bɔ gimkpaʼ, mbɔn mane bwɔ mbɔn byɛ e mwɔ efwɔ ndɔrɔ ntsɔn ngɛ, angɔ ke ma ngo shi ke me etye ŋwaʼ nɔ ene afwɔ yɛ e mwɔ ngɛ bo, mbɔʼnga mbɔn à ke nɛɛ èndzobo chɛ Ngwe à zeʼ é pwèerè angɔn ngɛ bo.”

Yeso ngɔɔ efwɔ ndɔngwe kɛ̀

(Mat 21:12-17; Mak 11:15-19; Eyɔ 2:13-22)

45Éngɛ Yeso nyii efwɔ ndɔngwe kɛ̀ gɛ̀rɛ̀ klada sa fli abɔ byɛ â ma fɛ̀nnɛ̀ gɛ̀rɛ̀ ma zɔnɔ ela ngɛ, 46sa ga ebe angɔ kpe; “E be ŋwɛʼrɛ efwɔ aŋwɛʼrɛ kpe ‘Ndɔngwe kɛ̀ ndza yà mwɔ afwɔ tsàʼrà Ngwe!’ Bɛʼngɛ mbɔn shi ghɛɛbɛ le a shi ma afwɔ namma ebe àjii!” 47Yeso à na tee abwa efwɔ ndɔngwe kɛ̀ enji gimkpaʼ, m̀fɔ̀rɔ̀ zhiri, bàtee atsɛrɛ mane eto ebe bɔ ma ke é zhudu engɔ. 48Bɛʼngɛ angɔ à ke zɔ aghɛʼ é le éngɛ bo mbɔʼnga bɔ gimkpaʼ â na tsɔmɔ ma zhuru ebe engɔ ne ke kpe ebwa deʼ ŋwaʼ fɔɔ mbɔɔ tɔn ke zo bo.

നിലവിൽ തിരഞ്ഞെടുത്തിരിക്കുന്നു:

Luk 19: nbt

ഹൈലൈറ്റ് ചെയ്യുക

പങ്ക് വെക്കു

പകർത്തുക