Luk 18

Nklama timi mbɔʼ eyeti mane àsɛʼasɛʼɛ àndɔɔ

1Éngɛ Yeso sɛɛrɛ nklama timi ebe bɔ bɛɛrɛ abwa mɔ é tee ebe angɔ kpe e sa tsàʼrà Ngwe akyɛ gimkpaʼ gɛ̀rɛ̀ ne bwad ekyɛ deʼ bo kpe, 2“Àsɛʼasɛʼɛ deʼ à ne efwɔ afwɔ deʼ à ne ma bumu Ngwe kà ma ndɛ̀ʼ eghɔ ebe bɔ bo ngɛ. 3Eyeti deʼ à gɛrɛ ne mwɔ efwɔ abɛ zɔnɔ, wɛ à ma bwò zeʼe ebe àsɛʼasɛʼɛ wunɔ ma ga kpe è sɛʼ angbe le shi mbè nde esɛʼ. 4Ene endzobo dɔɔdɔɔ, àsɛʼasɛʼɛ wunɔ à ke fwɛʼ ebwa deʼ bo. À shi anji deʼ, àsɛʼasɛʼɛ wɛ ga egha mɔ kpe ‘Ka mmɛ ne ma bumu Ngwe kà ndɛ̀ʼ eghɔ ebe bɔ bo ngɛ, 5mbɔʼ enyii yɛ eyeti wunɔ ma ndɛ̀ʼ ena ngɛ, mmɛ wa le kpe engɔ nde esɛʼ. Mala mmɛ ne le énde bo, shi engɔ wa fɔɔ embè ma zeʼe anɔ sa tsɔmɔ nyii angu.’ ” 6Masakɛ fɔɔ embè gà kpe, “Mbɔn zo ebwa wɛ àsɛʼasɛʼɛ àndɔɔ wɛ à ga ngɛ. 7Enjitsɔ Ngwe ke ma ngo sɛʼ bɔ mɔ byɛ e ma ku̧u ebe engɔ ǹklì mane nchi ngɛ ene éŋwaʼa bo? 8Mmɛ ga endɔn, engɔ wa ngo le mbɔn zamma nde esɛʼ ene éŋwaʼa. Bɛʼngɛ Ŋwɔ Gho yà zɔ bɔ byɛ e me le ebɛrɛtaa èndzobo chɛ engɔ ma yà zeʼe a chwâ ngɛ?”

Nklama timi mbɔʼ gho Farisii mane àshuru aŋwɛ

9Yeso à gɛrɛ sɛ̀ɛrɛ̀ nklama timi fɔnɔ ebe abɔ byɛ â ma ga kpe mbɔɔ be koʼro é sa sɛ̀ʼɛ abɔ abê ngɛ kpe, 10“Anji deʼ bɔ deʼ fyee â ngɔɔ efwɔ ndɔngwe kɛ̀ é tsàʼrà Ngwe. Gho bi à na gho Farisii, êwè ma àshuru aŋwɛ. 11Gho Farisii tam afwɔ mɔ gho zhiʼ, sa tsàʼrà Ngwe efwɔ etaa mɔ kpe ‘Ngwe, mmɛ è bɛ̀rɛ awɛ kpe mmɛ ke ma nde àngwa bo, mmɛ ke ma ga andɔɔ bo, kà ma nde ese bo. Mmɛ è bɛ̀rɛ awɛ kpe mmɛ ke mwɔ na àshuru aŋwɛ wénde abɛɛ ande nɔ bo. 12Mmɛ na tsɔmɔ ene chwɔ atsaʼra Ngwe akyɛ fyee efwɔ ǹkyɛ̀, ma gɛ̀bbɛ̀ ela mbu ene entiri wum è ndɛʼ aŋwaʼ engɛ̂.’ 13Bɛʼngɛ, àshuru aŋwɛ tam ezhin dɔɔdɔɔ, gɛ̀rɛ̀ ne beʼe efàarà mɔ ekere ezob bo, beʼ abwo mɔ tɛʼɛ a nyɛbid mɔ ga kpe ‘Ngwe, klasɔn ene mmɛ gho abwa bɔɔbɔɔ.’ ” 14Yeso ga kpe, “Mmɛ na ga endɔn àshuru aŋwɛ we tsɔmɔ ene ǹchwɔ̀ nè Ngwe, ke ma gho Farisii bo, aŋu angɔ à klo ngɔɔ abɛ ngɛ, mbɔʼnga abɔ byɛ e ma le kpe mbɔɔ na bɔ kɛ́ ngɛ, e ba ngo bwaara angɔ, angɔ byɛ e ma bwaara akwa amɔ ngɛ, e ba le angɔ shi ma bɔ kɛ́.”

Yeso ndɛʼ m̀bɔ̀nɔ ebe adɔ̀kpara

(Mat 19:13-15; Mak 10:13-16)

15Enjitsɔ bɔ deʼ â bwɛ bwɔ amɔ zeʼe ebe Yeso kpe engɔ tɛʼ ebwo mɔ ene angɔ é ndɛʼ m̀bɔ̀nɔ ebe angɔ. Bɔ bɛɛrɛ abwa â zɔ gɛ̀rɛ̀ bwe ebe abɔ byɛ aŋu â ma le éngɛ ngɛ. 16Bɛʼngɛ Yeso zɔ̂ʼ adɔ̀kpara è ga kpe, “Mbɔn saa adɔ̀kpara zeʼe ena, mbɔn ke kɔn angɔ bo mbɔʼnga ebwa m̀fɔ̀ Ngwe ne me ebe m̀pèrè tsɔnɔ. 17Mmɛ na ga endɔn me éŋwaʼa, egho wɛ ne ma nu ebwa m̀fɔ̀ Ngwe na adɔ̀kpara nɔ bo yà ne efwɔ nyii.”

Gho àfɔ̀n

(Mat 19:16-30; Mak 10:17-31)

18Gho wɛ à ma ato ebe bɔ Juu ngɛ biiri ebe Yeso kpe, “Àtee abwa nchwɔnchwɔ, mmɛ shi le ene é yà nyii efwɔ etyê kengudu wɛ me tye ekyɛ ŋwaʼ ngɛ?” 19Yeso biiri ebe engɔ kpe, “Ngwo na zɔʼrɔ angu kpe gho nchwɔnchwɔ kpe ayɛ? Tsɛ̀ʼ gho deʼ me nara bo, a tye ma Ngwe gho zhiʼ. 20Ngwo we nɛɛ atsɛrɛ yɛ a me ga kpe ke sa nde ese bo, ke sa zhudu bo, ka ji, ke bɛrɛ antsɛ andɔɔ ato gho deʼ bo, sa ghɔ àtɛ ngwɛ mane áʼɔ̧̀ ngwɛ ngɛ.” 21Egho wɛ gii kpe, “Enyɛrɛ èndzobo chɛ mmɛ à bli eghobo ngɛ, mmɛ à shi shi atsɛrɛ zɔnɔ gimkpaʼ.” 22Èndzobo chɛ Yeso à zo ebwa wɛ engɔ à ga ngɛ, engɔ ga ebe egho wunɔ kpe, “Ebwa deʼ we tye eŋwàʼ wɛ ngwo me koʼro é fwɛʼ ngɛ, fɛnnɛ ela byɛ ngwo me le ngɛ gimkpaʼ, è ndɛʼ ekɛb mɔmbwo ebe bɔ ndzaŋa, shi ngwo wa ngo le àfɔ̀n ekere, shi zeʼe kiri angu.” 23Bɛʼngɛ, èndzobo chɛ gho wunɔ à zo ngɛ, è ju ghɛʼ, mbɔʼnga engɔ à ne le àfɔ̀n ghɛʼ. 24Èndzobo chɛ Yeso à zɔ kpe engɔ à ju ghɛʼ ngɛ, è ga kpe, “E we kɔrɔ ebe gho ekɛb é nyii efwɔ ebwa m̀fɔ̀ Ngwe. 25E we kɔrɔ ghɛʼ ebe gho ekɛb é nyii efwɔ ebwa m̀fɔ̀ Ngwe fɔɔ na aŋu m̀pwɔ̀ bèʼebɔ me né fɔɔ ene aghɔɔ ǹtsɛʼ ghɔ ǹdiri ngɛ.” 26Abɔ byɛ â zo aŋu engɔ à ga éngɛ ngɛ biiri kpe, “Abɔ byɛ e me né pwèerè angɔ e chidi ngɛ ne ewɛ?” 27Yeso gíì kpe, “Ebwa wɛ e me kɔrɔ ebe gho é fwɛʼ ngɛ we zamma ebe Ngwe.” 28Éngɛ Petoro ga kpe, “Kɔʼɔ! Mbyɛɛ shi waʼa ebɛ mbyɛɛ é kìrì awɛ!” 29Yeso gâ ebe angɔ kpe, “Mmɛ na ga endɔn me éŋwaʼa kpe gho deʼ wɛ me nyɛrɛ shi ndɔ mɔ kà eye mɔ, kà bwɔngwa mɔ, kà èngwa, kà bwɔ mbɔʼ ebwa m̀fɔ̀ Ngwe ngɛ, 30wa le ela bɔnɔ etsɛrɛ akɛkɛ enjitsɔ gɛ̀rɛ̀ nde etyê kengudu ene endzobo e ma yà zeʼe ngɛ.”

Yeso ga ekyɛ nùrù tɛd mbɔʼ ewu mɔ

(Mat 20:17-19; Mak 10:32-34)

31Yeso bwɛ bɔ bɛɛrɛ abwa wum ǹchwɔ̀ fyee tini ngɔɔ gɛ̀rɛ̀ ga ebe angɔ kpe, “Ntsɔ kwaʼ è ngɔɔ a Jerusalɛm aŋu abwa gimkpaʼ bàmɛnɛkɔn Ngwe â ŋwɛʼrɛ mbɔʼ Ŋwɔ Gho a ma ngo gli éŋwaʼa ngɛ. 32E ba ngo ge engɔ ebwo ebɛbɔ byɛ e ma ngo sèrè engɔ, e ndɛʼ eju ebe engɔ, gɛ̀rɛ̀ tu emɛn ekwa engɔ ngɛ. 33Angɔ ba ngo wuru engɔ, gɛ̀rɛ̀ zhudu engɔ, bɛʼngɛ enji ba sa fɔɔ tɛd engɔ wu zhwɛm ene ewu.” 34Bɛʼngɛ, bɔ bɛɛrɛ abwa â ke nɛɛ ǹji ene abwa zɔnɔ adeʼ bo. Â ne nɛŋɛ ǹji ene abwa zɔnɔ ebe angɔ gɛrɛ ne nɛɛ ǹji ene ebwa wɛ Yeso à ma ga mbɔʼ anji ngɛ bo.

Yeso glì gho deʼ wɛ à ma bii ebara abɛ Jeriko ngɛ

(Mat 20:29-34; Mak 10:46-52)

35Aŋu Yeso à sa bwɛn ebara Jeriko ngɛ, àfò aghɔɔ deʼ à ne tsɔmɔ eba ǹjìkɛ̀ ma bii. 36Èndzobo chɛ engɔ à zo enɔrɔ bɔ sa fɔɔ ngɛ, engɔ biiri kpe, “Ne ebwa yɛ?” 37E ga ebe engɔ kpe, “Yeso gho Nazarɛd wa fɔɔ.” 38Engɔ ku̧u! Flaba kpe, “Yeso! Ŋwɔ Devid, klasɔn ene mmɛ.” 39Abɔ byɛ â me tse embè ngɛ bwe ebe engɔ gɛ̀rɛ̀ ga ebe engɔ kpe ba. Bɛʼngɛ engɔ wu flaba akwâ eghɛʼ kpe, “Ŋwɔ Devid, klasɔn ene mmɛ.” 40Éngɛ Yeso tam gɛ̀rɛ̀ ga kpe e nu àfò aghɔɔ wɛ zeʼe ebe engɔ. Endzobo engɔ à bwɛn ebara ngɛ, Yeso biiri ebe engɔ kpe. 41“Ngwo na ke kpe mmɛ fwɛʼ ebwa yɛ engɛ̂?” Engɔ gii kpe, “Masakɛ, mmɛ wa ke wu zɔ akwâ ekyɛ tsɛrɛ.” 42Yeso ga ebe engɔ kpe, “Éngɛ zɔ! Ebɛrɛtaa njɛ shi le ngwo bwada.” 43Ekyɛ ŋwaʼ engɔ klada sa zɔ akwâ gɛ̀rɛ̀ kìrì Yeso sa ndɛʼ ebɛrɛ ebe Ngwe. Èndzobo chɛ enɔrɔ bɔ â zɔ ebwa wɛ ngɛ, angɔ bɔ gimkpaʼ zodo Ngwe.

നിലവിൽ തിരഞ്ഞെടുത്തിരിക്കുന്നു:

Luk 18: nbt

ഹൈലൈറ്റ് ചെയ്യുക

പങ്ക് വെക്കു

പകർത്തുക