लूका 8

ईसूरिकुःआ अइमी चेलाकू

1हना तयोमरे ईसू एटाः एटाः गाँवकूनरे अरू सहरकूनरेय सेनेडा। हाँय होड़कू एचेरे सेनेडखन, भगवानराः राइजराः नपाय सरवने परसारतेरा। अरू ईसू सुदा आँयगरिकुःआ बारहो मूक चेलाकू हों दोहोना। 2ईसू भूतकूय उडुंगतेरा अरू बेमारीतेय नपायतेडकुःआ, हँकुःआ अदोम अइमीकू हों ईसू सुदाकू सेनेडा। हँकू अते मी होड़ मगदलियायिन माःआनकू कतावाया हाँयग मरियम दोहोना। नाँयग मरियम अते, मड़ंग ईसू सातगोटोंग भूतकूय उडुंगोतेरा। 3अरू हरदोसराः ओड़ाः जिमेवारी होड़ कुजारीग एरात एवना, सूसना अरू एटाः एटाः अइमीकू हों ईसू सुदाकू सेना। हँकुःआ अइमीकू अँननकूराः आन-धानते ईसू अरू आँयगरिकुःआ मूक चेलाकूकू संघरावाःआ।

बिहानराः कहड़ी

(मती 13:1-23; मरकूस 4:1-20)

4दो मी दिन ईसू एचेरे एटाः एटाः सहरकून अते मुरुक बगरा होड़कू वेगनेना। हनमेला ईसू हँकू एचेरे मीटोंग अउल-तउल कहड़ीय उदुःगेःआ। 5“मी होड़ किसाड़ बिहान वेरगे लगाय उडुंगनेना। वेवेर मेला अदोम बिहान, दूररे लोजोरनेना। हना बिहान सेरमो होड़कू चोड पारनेना अरू अदोम बिहान तितीगकू हलंग जोमगोतेड। 6अरू अदोम बिहान दररी ओतरे लोजोरनेना। हना ओमोननेना मनदो दाः मेर दोहोगान अते हन असलावयान। 7अरू अदोम बिहान जनुम बुदारे लोजोरनेना अरू जनुम हना बिहान सुदा हरानेनखन तेनगोतेड। 8अरू अदोम बिहान नपाय ओतरे लोजोरनेना अरू हना नपाय ओमोननेन अरू सव मन वरी मुरुके बुता अदेरकेरा।”

नाःआ कतावाडखन ईसू हंडाकुःआ होड़कू एचेरे हुमइसकेय कतातेरा, “अयूम अवेयता हाँयग होड़, नपायतेय अयूम ठुड़ावागे।”

9तयोमरे ईसूरिकुःआ चेलाकूतेन हाँय एचेरे वेगकियानखनकू होंबोरतेड, “ने गुरुजी, नाःआ अउल-तउल कहड़ीराः मतलोब चिला हवे?”

10दो ईसू कतातेड, “भगवानराः राइजराः ओकोत कताकून सुदी लगा अपेके भगवान कनहूने एमेकेरा। मनदो एटाः होड़कू सुदा ईंग अउल-तउल कहड़ी उदुःगेतिंग, जेमहा

हँकुःआ होड़कू ञेनेल मेडतेकू ञेलता,

मनदो ओरोकू सुदीतेरा,

अरू लुनुतूर लुतूरतेकू अयूमता

मनदो ओरोकू बुझावनेना।”#एस 6:9,10

कहड़ीराः मतलोब

(मती 13:18-23; मरकूस 4:13-20)

11दो ईसू अरूय कताया, “हना कहड़ीराः मतलोब नाःआ हवे। बिहान भगवानराः सरवन हवे। 12दूररे लोजोरनेना हना बिहान नाःआ इया होड़कू हवे, हँकू सरवनकू अयूमता, मनदो बिसवासकेडखन सडाः अते मड़ंग, कलउ वेगवाडखन हँकू जीव अते हना सरवने गोःयाता। 13दररी ओतरे लोजोरनेना हना बिहान नाःआ इया होड़कू हवे। हँकू भगवानराः कता अयूमकेडखन बहालतेकू मनाःता। अरू हँकू तोनोंग दिन वरी बिसवासरेकू दोहोनता, मनदो जेर नपायते मेर साबगुःता, हनाते तोनोंग तोनोंग इयाःआ कटसिया मेला बिसवासकू अड़ाःगोडता। 14जनुम बुदारे लोजोरनेना हना बिहान नाःआ इया होड़कू हवे। हँकू सरवनकू अयुमेता, मनदो सेनेन सेन दूररे चउंदीसराः ओंगोल, आन-धानराः ओंगोल अरू तोनोंग तोनोंग ललचीरे तेन जुवाःता अरू जोःओ मेर बेलेःता। 15नपाय ओतरे लोजोरनेना हना बिहान नाःआ इया होड़कू हवे, हँकू सरवन अयूमवाडखन मुरुक नपायते अँकू जीवरेकू दोहोगोडता अरू सहाव घड़ीन नपायते जोःओ जोःता।”

ढिबरीराः कहड़ी

(मरकूस 4:21-25)

16तोनोंगीग होड़ ढिबरी सलगावकेडखन टुकनूते ओरोय दाबतेरा, अरू खटी पेंदारे ओरोय मंडावतेरा। मनदो भीटरेय वकागोडता, जेमहा ओड़ाः पेंदारेकू बोल हँकुःआ होड़कू लगा मरसल एमेय। 17नुँहू मेर ञिलुःतना हना जमाकून, तयोमरे भगवान जमा होड़कू एचेरेय एचे उदुःगोडता। अरू नुँहू होड़कू मेरकू सुसुदीतना हना जमाकून भगवान एचे सुदीगोडकूताय। 18हनालगा अपे मुरुक तिंगीडवा घड़ीन ईंग बड़रापे अयूम। तोनोंगीग एचेरे कहिसाः इदान दो, हाँयके भगवान अरूय एमेवायता। मनदो तोनोंगीग एचेरे कहिसाः कोवानेःआ दो हाँय, ईंग एचेरे इदा, माःआने ओंगलेता हना हों हाँय अते भगवान गोःयाता।

ईसूराः सताय मइछुवा

(मती 12:46-50; मरकूस 3:31-35)

19ईसूरीग एंगात अरू बोपोहकूतेन हाँय एचेरेकू सेनेडा। दो ईसू दोहोना हना ओड़ाःरे मुरुक बगरा होड़कू होंकू वेजेडा। हनालगा हँकू ईसू सुदा मेरकू जुमाव अवेना। 20तोनोंगीग ईसू एचेरेय कताया, “आम एंगाम अरू बोपोहकूताम आम सुदा जुमाः लगा बहरीकू चड़ाँकिया।”

21दो ईसू कतातेड, “भगवानराः कताकू अयुमेता अरूकू मनाःता हँननकुःआ होड़कू ईंग एंगायिंग, वगायिंग अरू बोपोहकूतिंग इया इदानकुःआ।”

होय अरू लहराराः रोंकाः

(मती 8:23-27; मरकूस 4:35-41)

22मी दिन ईसू आँयग चेलाकू एचेरेय कताया, “दो अबू नाःआ हुडिंग समुंदर मार परोमबू सेने पारता।” हनते हँकू डोंगारे देगकियानखन मार परोम तोराकू। 23दो ईसू डोंगारेय अपीगयान। हनमेला हना समुंदररे मुरुक गड़रा घटा सलाःआ। अरू डोंगारे दाः पेरेगगुःआ। दो अँकूराः जीव मुरुक ससतारे दोहोना।

24हँकू ईसूकू बेरेडतेरा अरूकू कताया, “ने परबू, ने परबू अबू गुजुःतनाबू।” दो ईसू रेमकियानखन होय अरू लहरा रोंकाव लगाय कतातेड अरू हना गड़रा घटा रोंकावयान अरू होय ओहेन मधिमयान।

25हनते ईसू हँकू एचेरेय कताया, “अपे चिला लगा ईंग एचेरे मेरपे बिसवासगाड?”

हँकू बोरोयान अरूकू बयावयान। हनतेकू कता होड़ेंगा, “ओहरे! नाँय करा इयायीग होड़ हवे? होय अरू लहरा हों नाँयराः हुकुम मनाव जुवाःता।”

भूत समसावतो होड़राः नपायगुः

(मती 8:28-34; मरकूस 5:1-20)

26होय अरू लहराय रोंकावतेरा, हना तयोमरे ईसू अरू आँयगरिकुःआ चेलाकू गलील छतर अते सेनेन सेन हुडिंग समुंदर धरीराः गिरासेन छतररेकू सोदोरनेन। 27हँकू डोंगातेकू उतरावनेन दो, हना सहररीग मी होड़ भूत समसावतो होड़ हँकू एचेरेय वेजेडा। हाँय मुरुक बरिसते आँयग ओड़ाःरे मेरेय दोहोगान, मनदो मड़गटरे एकेतेय दोहोना। 28दो भूत समसावनेना हाँयग होड़ खिररी घड़ीन ईसू काट कुटीरे तबेरकियानखने कताया, “ईसू भाबी भगवानरीग बेटा! आम ईंग चिला लगाम हलकइनगींगतना?” 29हाँयग होड़ एचेरेय दोहोना हाँयग भूत हाँय घड़ी घड़ी एचे जकलावगेया। होड़कू हाँय सिकिड़ी अरू बेरातेकू तोलेया। हनारे हों हाँय हना सिकिड़ी सीडगोडाय अरू भूत हाँय टयंगाब ततेररेय गोःयाया। दो ईसू हाँये ञेलतेड अरू भूत उडुंगगुः लगाय हुकुमतेरा।

30दो ईसू हाँय एचेरेय होंबोरतेरा, “आमराः ञाव चेले माःआन इदा?”

हाँय एचेरे मुरुक बगरा भूतकू दोहोना। हनालगा हाँय कताया, सइना, माःआन। 31अरू हँकू ईसू एचेरेकू असेःआ, पतालपूररे#8:31 एहूदाकूराः बिसवास इया गोएगतो होड़कूराः हनसा ओत पेंदारे तोनोंग अगी सेनता। नानाः ततेररे भगवान भूतकू, मसाड़कू, चुरीलकू अरू एटाःकू टुटीग दिनराः डंडियावकू लगाय दोहोकेडकुःआ (2 पत 2:4-10)। अले अलोम वारले, माःआन।

32दो हंडा मी खुड़हा सुकरीकू बुरचूड चोटरेकू ससरावा। भूतकू ईसू एचेरेकू असेःआ, “अले मँकूदेराः सुकरीकू एचेरेम वारगोडले।” अरू ईसू हँकूय वारगोतेडकू। 33दो हँकुःआ भूतकू हाँयग होड़ अते उडुंगकियानखन सुकरीकू एचेरेकू बोलोयान। दो सुकरीकू दरा अते बतकाव उतरावनेनखन समुंदररेकू बोलो बुडावयान।

34हनते सुकरीकूरिकुःआ सरवाहाकू हना ञेलवाडखनकू ञीरयान अरू एटाः एटाः गाँवरे होड़कू एचेरेकू कता उदुःतेरा। 35दो जमा होड़कू हंडा ञेञेल लगाकू सेनेडा। हँकू ईसू एचेरेकू वेजेडा अरू भूतकू दोहोना हाँयग होड़ सुरतानेनखन नपायते सोनहे तुसिंगवाडखन ईसू काट अगीय दुड़ुःकुःआ। अरू हना ञेलकेडखनकू बोरोयान। 36ईसू एचेतेरा हनाकू ञेलतेरा हँकुःआ होड़कू, एटाः होड़कू एचेरे भूत समसावतो दोहोना हाँयग होड़ करा इयाय नपाययना हनाकू कता उदुःतेरा। 37हँकू मुरुककू बोरोयान अरू गरासीन छतररिकुःआ होड़कू ईसू एचेरेकू कतातेड, “आम अले सिमान अते सलाव जुवाःमे।” दो ईसू अरू आँयगरिकुःआ चेलाकू सेन लगा डोंगारेकू देगनेना।

38दो हनमेला मड़ंगरे भूत समसावनेना हाँयग होड़ ईसू एचेरेय कताया, “ईंग आम सुदा सेने ओवायिंगमे।” मनदो ईसू हाँय एचेरेय कताया, 39“आम ओड़ाःमे कुदा जुवाः अरू भगवान आमराः जीव करा इयाय नपायकेरा हना होड़कू एचेरेम कता उदगे।” दो हाँयग होड़ कुदायाने अरू सहररिकुःआ जमा होड़कू एचेरे ईसूराः बदीरेय परसारतेरा।

अइमीराः नपायगुः अरू लँइगराः जियाव रिमुः

(मती 9:18-26; मरकूस 5:21-43)

40ईसू गलील छतररेय कुदा वेगा दो मुरुक बगरा होड़कू हाँयकू ततंगीःआ अरू हाँयकू नेत-नेवारतिरिया। 41-42आईर ञावीग मी होड़ होड़ दोहोना। हाँय अरजी ओड़ाःरीग हातपात होड़े दोहोना। हाँयरीग मी होड़ बारह बरिसीग बिटीत दोहोना। हाँय गुजुः इयाय दोहोना दो आईर ईसू एचेरेय सेनेडा। हाँय ईसू मड़ंगरे उकुड़ोमवाडखन आँयग ओड़ाःरे सेन लगाय असेःआ।

दो ईसू हाँय ओड़ाः सेन मेला, दूररे मुरुक होड़कू हाँय सुदा रेहेड-तेपेडकू सेनेडा। 43हंडा होड़कू तलारे मी होड़ अइमी दोहोना। हाँयके बारह बरिस वरीते नहावन साबतिरिया। हाँय तोनोंगीग जिड़ीदार मेरकू नपाय अवेगडीग। 44हाँयग अइमी ईसू देह दूर सेनेवाडखन हाँयराः सोनहेराः असराय टोँवावतेरा अरू हाँय ओहेने नपाययान।

45दो ईसू कताया, “इये ईंगे टोँवावकेरा?”

जमा होड़कू कताया, अले मेरले टोँवावगाडमेःआ, माःआन। दो पतरस कताया, “परबू, नंडा मुरुक बगरा होड़कू इदा अरू आम एचेरेकू रेहेड-तेपेडतना।”

46हनते ईसू कताया, “अपे अते तोनोंगीग होड़ ईंग टोनोवाँवकिरिंगापे। ईंग सुदीगोतेडिंग ईंग अते जंगर उडुंगकिया।”

47हाँयग अइमी सुदीगोतेडे, ईंग ओरोयिंग ओको अवेनेना, माःआन। दो हाँय बोतोरतेय कलपाःआ अरू ईसू मड़ंगरे तबेरवाडखने कताया, “ईंग बारह बरिस वरी नहावनरेयिंग दोहोना। दो ईंग नुँहू आमराः सोनहे असरायिंग टोँवावतेरा। हननमेला ईंग नपाययना।”

48दो ईसू हाँयग अइमी एचेरेय कतातेरा, “दिदी, आम ईंग एचेरेम बिसवासतेरा, हनालगा आम नपाययनाम। सलसतेम सलाव जुवाः।”

49हनमेला आईरराः ओड़ाः अते तोनोंगीग होड़ वेगनेनखन आईर एचेरेय कताया, “आम बिटी गोएगयनाय। गुरुजी अलोम हलकइनगेय।”

50दो ईसू नाःआ अयूमवाडखने कताया, “अलोम बोर। आम ईंग एचेरेम बिसवासगे दो आम बिटी बनसाव जुवाःताय।”

51दो आईरराः ओड़ाः सोदोरनेनखन ईसू, पतरस अरू एहुना अरू एकूब अरू हाँयग लँइगरिकिनाः एंगात अपात अड़ाःवाडखन तोनोंगीग आँयग सुदा ओड़ाः पेंदा मेरेय बोलो ओवागाडकू। 52हंडा जमा होड़कू हाँयग लँइग लगाकू इयामा अरू ईसू हँकू एचेरेय कताया, “अहापे इयाम। नाँय मेरेय गोएगगना। नाँय दो अपीगतनाय।”

53जमाकू सुसुदीःआ नाँय गोएगतो इदानिया, माःआन। हनालगा हँकू जमा होड़कू लंदावाया। 54मनदो ईसू हाँयग लँइगराः तिःई साबतेडखने कताया, “ने लँइग, रिमुःमे।” 55हननमेला हाँय जियाव रेमनेनखने दुड़ुःयान। ईसू कतातेरा, “कहिसाः नाँय जोम लगापे ओवाय।” 56दो हाँयरिकिनाः एंगात अपात मुरुककिन बयावयान। मनदो ईसू हँकू एचेरेय कतातेरा, “नाःआ कता तोनोंगीग होड़कू एचेरे अहापे उदुःगे।”

നിലവിൽ തിരഞ്ഞെടുത്തിരിക്കുന്നു:

लूका 8: kfp

ഹൈലൈറ്റ് ചെയ്യുക

പങ്ക് വെക്കു

പകർത്തുക