लूका 23

ईसू पिलातूसराः मड़ंगरे

(मती 27:1-2,11-14; मरकूस 15:1-5; एहुना 18:28-38)

1हनते मरंग पंचाइतरिकुःआ जमा होड़कू रेमनेनखन रूमी सरकाररीग हातपात होड़ पिलातूस एचेरे ईसूकू गोःयाड। 2हँकू ईसू बदीरे पिलातूस एचेरेकू कताया, “नाँयग होड़ अलेरिकुःआ होड़कूय बहकावता। नाँय कतायता रूमी देसरीग राजा एचेरे मलगुजारी अलोपे एमेय अरू अनँयग बदीरेय कतायता, ईंग मसी अरू राजा हवे, माःआन।”

3दो पिलातूस ईसू एचेरेय होंबोरतेरा, “आम एहूदाकूरीग राजा हवे जा?”

ईसू हाँय एचेरेय कताया, “आम अनम नाःआ इयाम कतायतना।”

4हनते पिलातूस मरंग पुजउरीकू अरू एटाः होड़कू एचेरेय कताया, “नाँयग होड़ एचेरे ईंग तोनोंगाः गारबार मेरिंग ञाम अवेयतना।”

5मनदो हँकू अरूकू कताया, “नाँयग होड़ एहूदिया राइजरिकुःआ जमा होड़कू नाँयराः बड़रातेकू बहकाःतना। नाँय बहकाव बहकाव गलील छतर अते मरंग सहर एरुसलेम वरी होंय सोदोरयना।”

6नाःआ अयूमवाडखन पिलातूस हँकू एचेरेय होंबोरतेरा, “नाँयग होड़ गलील छतररीग होड़ हवे जा?”

7पिलातूस सुदीगोतेडे ईसू, हरदोसराः छतररेय दोहोनीग होड़ हवे, माःआन। अरू हनमेला हरदोस एरुसलेमरेय दोहोना। हनालगा ईसू हाँय एचेरेय वारतिरिया।

ईसू हरदोस राजाराः मड़ंगरे

8हरदोस मुरुक दिनते ईसू ञेल लगाय ओंगलेःआ। हनालगा ईसू ञेलतेडखन हाँय मुरुके बहालयान। हाँय ईसूराः बदीरेय अयूमतेरा अरू हाँय ओंगलेःआ, ईसू तोनोंगाः चिनहाय उदुःवायिंगता, माःआन। 9दो हरदोस ईसू एचेरे मुरुक सवालकूने होंबोरतेरा। मनदो ईसू तोनोंग माःआन मेरेय कता कुदागाड। 10हनते मरंग पुजउरीकू अरू नियम चेडदार होड़कू हंडा चड़ाँनेनखन ईसू बदीरे जबरइनकू बदीगेया। 11नाःआ अयूमतेडखन हरदोस आँयग सइनाकू सुदा ईसू बेग-हतावातिरिगखनकू लंदा एरंगवाया। हँकू ईसू राजाकू तुसिंगगेता हना इयाःआ नपाय सोनहे एचे तुसिंगवडीगखन पिलातूस एचेरेकू गोः कुदातिरिया। 12हना दिन पिलातूस अरू हरदोस सउंगताकिन होयानेना। हना अते मड़ंग हँकिन बना होड़ मुदइकिन दोहोना।

ईसू ञेड एंडाय लगा पिलातूसराः हुकुम

(मती 27:15-26; मरकूस 15:6-15; एहुना 18:39–19:6)

13हनते पिलातूस मरंग पुजउरीकू अरू हातपात होड़कू अरू एटाः होड़कू राः जुमावतेडखने कतातेरा, 14“नाँय होड़कूय एचे बलवादतना, माःआन बदीकिरिगखन अपे ईंग एचेरेपे अगूकिरिया। अरू अयुमेपे, ईंग नाँय अँननपे मड़ंगरेयिंग जासकिरिया, मनदो अपे बदीगेतना हना तोनोंग कता नाँय एचेरे ईंग मेरिंग ञामगडा। 15हरदोस हों नाँय एचेरे तोनोंगाः गारबार मेरेय ञेलगडा। हनलगा हाँय अबू एचेरे नाँयग होड़े वार कुदाकिरिया। अरू ञेड एंडागेय इयाःआ तोनोंगाः कसूर नाँयग होड़ मेरेय एचेगडा। 16हनालगा ईंग नाँय एचे ञेडकिडिगखनिंग अड़ाःगोडेयता।”

17[सगर बरिस पसहा परोब मेला जेहेलरे तोलतोकू दोहोनता हँकुःआ होड़कू अते मी होड़ पिलातूस अड़ाःगोडेयता।] 18हनालगा हँकू जमा होड़कू खिररी घड़ीनकू कताया, “नाँयग होड़ ञेड एंडागोडेयमे अरू बराबा अले लगा जेहेलतेम अड़ाःगोडेय।” 19(बराबा एरुसलेम सहररे बलवादनेनखन तोनोंग तोनोंग होड़कूकू ञेड एंडातेरा। हनलगा हाँय जेहेलरे सींगतोय दोहोना।)

20पिलातूस ईसू अड़ाःगेय लगाय ओंगलेया अरू नानलगा हँकुःआ होड़कू एचेरे अरूय कताया, “नाँयग होड़ तोनोंगाः मेरेय कसूरगडा।” 21मनदो हँकू अरू खिररीवाडखनकू कताया, “कुरूसरेम एचे ठोंकावगेय, कुरूसरेम एचे ठोंकावगेय।”

22दो पिलातूस पेय तुरहा हँकू एचेरेय कतातेरा, “नाँयग होड़ चिलाय कसूरकेरा? ञेड एंडागेय लगा नाँय एचेरे ईंग तोनोंगाः कसूर मेरिंग ञामगडा। हनलगा नाँय सइनाकूते एचे ञेडकिडिगखनिंग अड़ाःगोडेयता।”

23मनदो हँकू अरू खिररी घड़ीनकू कताया, “नाँय कुरूसरे ठोंकाव गोएगगेय लगा इदा।” दो टुटीगरे हँकूराः खिररी इया पिलातूस एचेतेरा। 24हँकुःआ होड़कू कतातेरा हनन इया एचेय लगा पिलातूस हुकुमतेरा। 25अरू हँकू असेतेरा हनन इया, होड़कूय बलवादा अरूय ञेड एंडातेडकुःआ अते जेहेलरे सींगतोय दोहोना हाँयग होड़ पिलातूस अड़ाःगोतेडीग। अरू हँकूराः हिछा इया सइनाकू एचेरे ईसूय जिमागोतेडीग।

ईसू कुरूसरे

(मती 27:33-44; मरकूस 15:21-32; एहुना 19:17-27)

26दो हँकू ईसू ठोंकाव गोएग एंडागेय लगाकू गोःयाडीग। हनमेला कुरेन सहररीग सिमोन एरुसलेम मरंग सहर अगीय वेगा। हँकू हाँयग सिमोन साबतिरिगखन ईसू गोगोःआ हना कुरूस हाँयकू एचे दोहेँतिरिया अरू हाँय ईसूराः तयोम तयोमे सेना। 27मुरुक बगरा होड़कू ईसूराः देह दूरकू ओतोंग सेना। हंडाकू दोहोना हँकुःआ अइमीकू कुड़ोम चपाड़ घड़ीनकू इयामा। 28ईसू हँकू अगी ञेलतेडखने कताया, “ने एरुसलेमरिकुःआ अइमीकू, ईंग लगा अलोपे इयाम। मनदो अपे लगा अरू अपेरिकुःआ लइंकू लगापे इयाम। 29ईंगपे अयूम, मी बेला सुदुरुःता अरू हना बेला बहिली अइमीकू अरू लँइग मेर होयागना हँकुःआ अइमीकू अरू तुवा मेरकू एचे दुदुवागाडकुःआ हँकुःआ अइमीकू बदीरेपे कतायता, हँकूराः जीव भगवान भलागेता, माःआन। 30हनमेला होड़कू पहाड़कू कतावाता, अले सेरमोम रुबुः अरू टुंगरीकू कतावाता, अलेम दाब रेड।#लूका 21:19-24 31हड़ियाड़ सींगते नाःआ इयाकू एचेयता दो टटकाःते चिला ओरोकू एचेतेरा?”

32बार होड़ कसूर होड़किन हों ईसू सुदा ञेड एंडाकिन लगाकू गोःयाडकिन। 33हँकुःआ होड़कू बोः खुरपी माःआनकू कतनता हना ततेररेकू सोदोरयान।#23:33 रूमी देसरिकुःआ होड़कू एटाः होड़कू ठोंकाव गोएगकू लगाकू गोःकूता हना ततेर एरुसलेम मरंग सहर अते बहरी दोहोना। दो हंडा ईसू अरू कसूर होड़किन कुरूसरेकू ठोंकावगोतेडकू। मी होड़ ईसूराः खउना गतर अरू मी होड़ ईसूराः डिरही गतरकू ठोंकावतेडकिन। 34दो हनमेला ईसू भगवान एचेरेय अरजीःआ, “ने अपांग, नँकुःआ होड़कू मेरकू सुदीयतना, नँकू चिलाकू एचेतना। हनालगा नँकूराः कसूरमे बराव एंडागोड।” हँकुःआ सइनाकू चीट-पोटतेडखन हाँयराः सोनहे अँननकू हटिंगयान।#सेरेंगकून 22:18

35होड़कू चड़ाँकियानखनकू ञेला। अरू हातपात होड़कू लंदा एरांगवाडिगखनकू कताया, “नाँय एटाः होड़कूय सडावतेडा। नाँय भगवान लुंबाड़किरिया हाँयग मसी हवे दो, चिला लगा अनँयग आँयग मेरेय सडावगुःतना?”

36सइनाकू हाँय एचेरे वेगवाडखन अंबट रस ञूय लगाकू एमेतेरा अरू लंदा एरांगवाडिगखनकू कताया, 37“आम एहूदाकूरीग राजा हवे, दो आम अनमते बनसाःमे।”

38अरू ईसूराः बोःते सेरमो कठवाराः हुडिंग पटरारे नाःआ इया ओजाःतो दोहोना, नाँय एहूदाकूरीग राजा हवे, माःआन।

39ईसूराः बनर अगी ठोंकावतोकिन दोहोना हँकिनाः होड़किन अते मी होड़ ईसू लंदा एरांगवडीगखने कताया, “आम मसी ना लवे जा? दो अनम आम अरू अलिंग हों चिला लगा मेरेम बनसाबूता?”

40दो एटाः होड़ हाँय डंटावतिडिगखने कताया, “भगवान मेरेम बोरोवायता जा? आम हों नाँय सुदा डंडियावतो इदानमेःआ? 41अलंग बना होड़लंग कसूरकेरा अरू हनाराः डंडलंग पवावकिया। नाँयग होड़ दो तोनोंगाः मेरेय कसूरगरा। हनते हों नाँयकू डंडियावगोतेडा।”

42हनते हाँय कताया, “ने ईसू, आम राइजगेता हनमेला ईंग होंम उहियार।”

43दो ईसू हाँय एचेरेय कताया, “ईंग पकियायिंग कतायतना, तिनिसिंग आम ईंग सुदा सेरमो देसरेम दोहोनता।”

ईसूराः गुजुः

(मती 27:45-56; मरकूस 15:33-41; एहुना 19:28-30)

44हना दिन तिकिन बेला वरीते ढड़का बेला वरी जमा देस अंदरायान। 45अरू भगवान ओड़ाःरे दोहोना हना मरंग परदा तलारे सिरावयान।#एचे उडुंग 26:31-33; 2 कहड़ी 3:14; इब 9:3-5; 10:19-22 46अरू ईसू खिररीनेनखने कताया, “ने अपांग, ईंग बिरुवा आम एचेरेयिंग जिमायतना।” अरू नाःआ कतावाडखन हाँय मिनी तुरहाय सहेडतेरा।

47मी सव सइनाकूरीग हातपात होड़ हंडाय दोहोना। हाँय हंडा होयानेना हना जमा ञेलतेडखन भगवाने जागतेरा अरू ईसू बदीरेय कताया, “सनातायरे नाँयग होड़ बेगर कसूर होड़े दोहोना।” 48कुरूसरे ठोंकावतोय दोहोना हाँयग ईसू ञेल लगा मुरुक बगरा होड़कू हंडाकू जुमावनेना। हँकुःआ होड़कू हंडा होयानेना हना ञेलतेडखन ओड़ाः अगी कुड़ोम चपाड़ घड़ीनकू इयाम कुदायान। 49मनदो गलील छतर अतेकू वेगनेना हँकुःआ ईसूरिकुःआ सउंगताकू अरू एटाः अइमीकू गुनहोन तोरेरे चड़ाँवाडखन नाःआ जमाकू ञेञेला।

ईसूराः मुरदा लात पेंदारे

(मती 27:57-61; मरकूस 15:42-47; एहुना 19:38-42)

50उसूप ञावीग मी होड़ होड़ दोहोना। हाँय मरंग पंचाइतरीग होड़ अरू नपाय धरमिया होड़े दोहोना। 51मड़ंगरे मरंग पंचाइतरिकुःआ होड़कू ईसू ञेड एंडागेय लगाकू रायनेना। मनदो हनारे उसूप मेरेय रायगान। हाँय एहूदिया छतरराः अरमतिया सहररीग होड़े दोहोना। अरू हाँय भगवानराः राइजे ततंगीःआ। 52हाँय पिलातूस एचेरे सेनेकियानखन ईसूराः मुरदाय असेतेरा। 53हनते उसूप ईसूराः मुरदा कुरूस अते उतरावतेडखन नपाय लुदू सोनहेतेय मोड़हाव रेडतेरा अरू चटइनरे कोटेग कोटेगकू तुलातेरा हना लात पेंदारेय मंडावतेरा। हना लातरे तोनोंगाः मुरदा कहियो मेरकू अदेरगतेरा। 54हना दिन लोड़ोनराः दिन अते मड़ंग दिन दोहोना। अरू होड़कूके लोड़ोनराः दिन लगा सपड़ाः दोहोना। 55उसूप सुदा गलील अते तोनोंग तोनोंग अइमीकू वेगनेना अरू उसूपराः देह दूर ओतोंग वेगवाडखन हना मड़गट लातरे ईसूराः मुरदा करा इया मंडावतो इदा हनाकू ञेलतेरा। 56हनते हँकू ओड़ाः कुदा सेनेकियानखन नपाय महक सकमकून अरू सुनुमकू सपड़ाव दोहोतेरा। हनते हँकू नियम इया लोड़ोनराः दिनरेकू लोड़ोनेना।

നിലവിൽ തിരഞ്ഞെടുത്തിരിക്കുന്നു:

लूका 23: kfp

ഹൈലൈറ്റ് ചെയ്യുക

പങ്ക് വെക്കു

പകർത്തുക