लूका 22

ईसू एचे साबेय लगा जूदाराः बुइद

(मती 26:1-5; 26:14-16; मरकूस 14:1-2; 14:10-11; एहुना 11:45-53)

1पसहा परोब माःआनकू कतावाता एहूदाकूराः रुटीराः परोब निचकाःआ। 2मरंग पुजउरीकू अरू नियम चेडदार होड़कू होड़कूकू बोरोवाःआ। हनालगा हँकू तोनोंग इया ईसू साबकिरिगखन ञेड एंडाय लगा दावकू ञामा। 3हनते ईसूरिकुःआ बारहगोटोंग मूक चेलाकूतेन अते मी होड़ जूदा इसकरियोतीराः जीवरे कलउ समसावयान। 4दो जूदा सेनेवाडखन मरंग पुजउरीकू अरू भगवान ओड़ाःराः अगुरा होड़कूरिकुःआ हातपात होड़कू एचेरे ईसू करा इयाय एचे सबेयता हना बदीरेय बुतुड़ुःआ। 5हँकुःआ होड़कू बहालयान अरू जूदा इसकरियोती लगा ढिबुवा एमे लगाकू जबानतेरा। 6जूदा हँकूराः कताय मनावयान अरू बगरा होड़कू अलोकू दोहोन हना बेला ईसू एचे साबेय लगा दोंगे ञामा।

पसहा परोबराः सरबहा

(मती 26:17-25; मरकूस 14:12-26; एहुना 13:21-30; 1 कुरिंती 11:23-25)

7दो रुटीराः परोबराः दिन सोदोरयान। हना दिन एहूदाकू पसहा परोब लगा भेड़ा होन बलिदानगेय लगा जरूरी दोहोना। 8ईसू, पतरस अरू एहुना नाःआ इया कतावातेडखने वारतेडकिना, “अबा सेनेवाडखन पसहा परोबरे अबू जोम लगा सरबहा हतड़ेबा।”

9दो हँकिन होंबरेया, “गुरुजी, नाःआ अलिंग करा ततेररेलिंग सरबहागे?”

10हाँय हँकिन एचेरेय कताया, “अबा सहररेबा बोनोल मेला गगरीरे दाः गोःतो मी होड़बा ञेलेयता। हनाँयग होड़ तयोम तयोमबा सेन अरू हाँय बोलता हना ओड़ाःरेबा बोल। 11अरू हना ओड़ाःरीग मालिक एचेरेबा कताय, गुरुजी होंबोरकेरा, ईंग अरू ईंगरिकुःआ चेलाकू करा छिनारे पसहा रुटीले जोम, माःआन। 12हाँय ओड़ाः सेरमोराः मीटोंग नपाय टड़बड़तो मरंग छिनाय उदुःवाबाता। हनानाः छिनारे अबू जमाकू जोम लगाबा संजोड़का।” 13दो हँकिन सेनेड अरू ईसू कतातेरा हनन इयाकिन सेने ञामतेरा, अरू पसहाराः सरबाहाकिन संजोड़ हताड़तेरा।

परबू भोजराः बुँहड़ीन

(मती 26:26-30; मरकूस 14:22-26; 1 कुरिंती 11:23-25)

14पसहा जोमराः बेला होयानेन दो ईसू आँयगरिकुःआ चेलाकू सुदा जोम लगाय दुड़ुःयान। 15अरू हाँय हँकू एचेरेय कताया, “ईंग जीवरे गराह गिराह होयाः अते मड़ंग पसहारेकू सरबहाकेरा हना, अपे सुदा जोम लगा ईंगके हिछा दोहोना। 16पसहाराः सताय कता भगवानराः राइजरे अरीन पुराः वरी अरू ईंग पसहा ओरोयिंग जोपेडा।”

17हनते हाँय अंगूर रसराः डुबहा साबतेडखन हना रस लगा भगवाने धनियाबादतेरा अरू चेलाकू एचेरेय कताया, “नाःआ रस अपे हटिंगकेडखन ञूयपे। 18अपे ईंगपे अयूम! नुँहू वरीते भगवानराः राइज अरीन बुँहड़ीन वरी ईंग अंगूरराः रस ओरोयिंग ञूयतेरा।”

19हनते हाँय रुटीय साबतेरा अरू भगवान धनियाबादतेडखन रुटीय डुंडीगतेरा। हनते चेलाकू नाःआ इया कतावातेडकूखने हटिंगवातेडकुःआ, “नाःआ रुटी ईंगराः देह हवे, अरू हना अपे लगायिंग एमेयता। ईंग उहियार लगा नान इयापे एचेय।”#1 कुरि 11:23-26

20हनन इया जोम तयोमरे ईसू अंगूर रसराः डुबहाय सेपेंग गोःतेरा अरू नाःआ इया कतातेडखने एमेतेरा, “ईंगराः बलंगी तूःतान अते नँवा कता-जमकावतोयिंग जबानगेता। अरू नाःआ डुबहारे इदा हना अंगूर रस हनाराः चिनहा हवे।#इर 22:20; इब 9:15 21मनदो ईंगे एचे साबिंगता हाँयग होड़ ईंग सुदा इदानिया अरू हाँय ईंग सुदाय जोमतना। 22मनुवारीग बेटात भगवान ओंगोल दोहोकेरा हनन इयाय गुजुःता। मनदो मनुवारीग बेटाते एचे साबेयता हाँयग होड़राः जीव नपाय ओरो दोहोनेना।” 23दो हँकू अँननकू कता होड़ेंगा, अबू अते इये ईसूय एचे साबगेयता, माःआन।

मरंग इये हवे?

24अबू तलारे मरंगीग इये हवे, हना बदीरे ईसूरिकुःआ चेलाकू अड़ा-चउकीःआ। 25दो ईसू हँकू एचेरेय कताया, “बेगर एहूदाकूरिकुःआ राजाकू हँकू एचेरेकू राइजगेता अरूकू हातपातगेता हँकुःआ होड़कू अँननकू बदीरेकू कतायता, अले होड़कूरिकुःआ संघरादारकू हवे, माःआन। 26मनदो अपे नाःआ इया अलोपे होयाः। अपे अते मरंग इदानिया, हाँय हुडिंग होड़ इया बड़ाँः इदा। अरू हातपात होड़, सेवकिया होड़ इया बड़ाँः लगा इदा। 27नँकिन बना होड़ते मरंगीग इये हवे, जोजोम लगाय दुड़ुःकिया हाँय जा जउःए पोरसातना, हाँय? जोम लगाय दुड़ुःकिया हनाँय हवे मरंगीग होड़। मनदो ईंग अपे एचेरे सेवकिया होड़ इया इदानिंगा।#मती 20:28; मर 10:45

28ईंगराः गराह कटसिया मेला अपे इनिंग सुदापे दोहोना। 29ईंग अपांग भगवान, राइजगे लगा ईंग हातपाते ओवाकिरिंगा हनन इया अपे होयिंग ओवाता, 30जेमहा ईंगराः राइजरे अपे हों ईंग सुदापे जोम ञूय अरू गदीरे दुडुःकियानखन इसराएलरिकुःआ बारहगोटोंग गोतोररिकुःआ होड़कूपे राइजकू।

चेलाकूराः अंदजाव

(मती 26:31-35; मरकूस 14:27-31; एहुना 13:36-38)

31ने सिमोन, अयुमेतनाम? मी होड़ गोहोमे गूमता हनन इया अंदजावपे लगा कलउ भगवान एचेरेय असेकेडपेःआ। 32मनदो सिमोन, आम बिसवास अहम अड़गे लगा, ईंग भगवान एचेरेयिंग अरजीकेरा। तयोमरे आम कुदा वेग मेला, बिसवासी वपगकूतामराः बिससवासमे बड़ियाड़गे।”

33दो हाँय ईसू एचेरेय कता कुदातेरा, “ने परबू, ईंग आम सुदा जेहेलरे सेन लगा अरू गुजुः लगा हों सपड़ावतो इदानिंगा।”

34दो ईसू कताया, “पतरस, ईंग आम एचेरेयिंग कतायतना। तिसिंग कुकुड़ा अरीन कुकूड़चुः अते मड़ंग आम पेय तुरहा ईंगमे आड-बेकारवाता, ईंग नाँय मेरिंग सुदीयतना, माःआन।”

चेलाकू लगा कटसियाराः बेला होयाःता

35हनते ईसू हँकू एचेरेय कताया, “उहियारगेपे, ईंग अपे बेगर बगली, झोला अरू चाटीतेयिंग वारतेडपेःआ, हनमेला अपे लगा तोनोंगाः हुडिंग बगरा होयानेना जा?”

हँकू कताया, “तोनोंगाः जिनिस अले लगा हुडिंग बगरा मेर होयागान।”

36ईसू हँकू एचेरेय कतातेरा, “नुँहू अपे एचेरे झोला इदान दो हनापे गोः अरू बगली इदान होले हना होँपे गोः। अरू तलवइर कोवानेःआ हाँयग होड़ आँयगराः अंगा अकरिंगकेडखन मीटोंग तलवइरे किजा। 37भगवानराः कागदरे ईंग बदीरे ओजाःतो इदा,

कसूर होड़कू सुदाकू मेसाकिरिया#एस 53:12

अरू अयुमेपे, भगवानराः कागदरे ओजाःतो इदा हनन इया ईंगराः जीवरे होयाःतना।”

38हँकू कताया, “ने परबू, नंडा बारटोंग तलवइर इदा।”

दो ईसू कताया, “होया जुवाःता।”

जइतून पहाड़रे ईसूराः अरजी

(मती 26:36-46; मरकूस 14:32-42)

39मड़ंगे एचेया हनन इया ईसू एरुसलेम अते उडुंगवाडखन जइतून पहाड़ होर तोराय। दो चेलाकूतेन हों आँयग देह दूरकू ओतोंगयान। 40हंडा सोदोरकियानखन ईसू हँकू एचेरेय कताया, “अपे अरजीगेपे, जेमहा अंदजावरे अहापे पराः।” 41हनते ईसू हँकू अते गुनहोन तोरेरेय सेनेडा अरू हंडा उकुड़ोमवाडखन नाःआ इयाय अरजीःआ, 42“ने अपांग, आम चाहाःतान दो नाःआ कटसियाराः दूर अतेम बनसावगींग। मनदो ईंगराः हिछा इया कोवान, अनमराः हिछा इयाम एचेय।” 43हनते मीटोंग सेरमो देसरीग बराहील ईसू एचेरेय एचे ञेलयान अरू हाँये बड़ियाड़ा। 44ईसूराः जीव अगम सिकिसतारे परावनेना अरू हाँय कुहकाः घड़ीने अरजीःआ। अरू हाँयराः उगार दाः, बडे बडे बलंगी इया उडुंगगुः घड़ीन जोरोःआ।

45हाँय अरजीवाडखने रेमनेन अरू चेलाकूतेन एचेरेय सेनेडा दो हँकूय ञेला, हँकूराः जीव मुरुक हुडिंगनेनखनकू अपीगयान। 46ईसू हँकू एचेरेय कताया, “अपे चिला लगापे अपीगतना? रिमुःपे। अपे अरजीगेपे, जेमहा अंदजावरे अलोपे पराः।”

ईसूराः एचे साब

(मती 26:47-56; मरकूस 14:43-50; एहुना 18:2-11)

47ईसू चेलाकू सुदा बुनुतुड़ुःआय मेला मुरुक बगरा होड़कू हंडाकू जुमावयान। दो बारहगोटोंग चेलाकूतेनरे जूदा ञावीग चेला हँकुःआ होड़कू मड़ंग मड़ंगे वेगनेना। अरू हाँय ईसू अंजोडतिरिगखने सलामतिरिया।

48ईसू हाँय एचेरेय कताया, “ने जूदा, आम अंजोडकेडखन मनुवारीग बेटातमे एचे साबेयता जा?”

49नंडा चिला होयाःता माःआन ईसू सुदाकू दोहोना हँकुःआ एटाः चेलाकू सुदीगोतेड दो, हँकू ईसू एचेरेकू कताया, “परबू तलवइरते अले नँकुःआ होड़कूले ञेडकू जा?” 50कनाता कतारे मी होड़ चेला तलवइरते मूक पुजउरीरीग सेवकिया होड़राः खउना लुतूरे तपेगबाःगोतेड।

51हना ञेलवाडखन ईसू कताया, “इकाहायमे। अलोम ञेडेय।” अरू ईसू सेवकिया होड़राः लुतूर टोँवावकेडखने नपायगोतेड।

52हनते आँयग साब लगाकू वेगनेना हँकुःआ मरंग पुजउरीकू अरू भगवान ओड़ाःरिकुःआ होड़कूराः अगुरा हातपात होड़कू अरू मूक होड़कू एचेरे ईसू कतातेरा, “अपे चिला लगा ईंग साब लगा तलवइरकून अरू हापकून साबकेडखनपे वेगकिया? अपे ईंग इनिग होड़ ओंगोलकिरिंगखन साबगींग लगापे वेगकिया जा? 53भगवान ओड़ाःरे ईंग सगर दिन होड़कूयिंग चेडा। हनमेला अपे ईंग साब लगा मेरपे वेगगान। मनदो नुँहू अंदरारे कलउ अनँयगराः जंगरतेय बुतातना दो, अपेके दोंग होयायना।”

पतरस ईसूय आड-बेकारवातेरा

(मती 26:69-74; मरकूस 14:66-72; एहुना 18:15-18,25-27)

54हनते हँकू ईसू साबवाडखन गोःयाडीगकू अरू मूक पुजउरीराः ओड़ाःरेकू अगूतिरिया। अरू पतरस ईसूराः तयोम तयोमे तजाः सेनेडा। 55हंडा तोनोंग तोनोंग होड़कू राचरे सेंगेल जगारतेडखन मीरेकू दुड़ुःकुःआ। दो पतरस हों हँकू तलारेय दुड़ुःयान। 56दो मी होड़ सेवकीन सेंगेल मरसलरे पतरस हंडा दुडुःतोय ञेलतेरा अरू सिनहातिडीगखने कताया, “नाँयग होड़ हों ईसू सुदाय दोहोना।”

57मनदो पतरस कताया, “ने दिदी, ईंग मेरिंग सुदीयतना नाँय इये हवे।”

58गुनहोन तयोमरे एटाः होड़ पतरस ञेलतेडखने कताया, “आम हों हँकू अते मी होड़ हवे।”

दो पतरस कताया, “ईंग ना लवे।”

59मी घंटा तयोमरे अरू मी होड़ पका-निकाय कताया, “सतायरे, नाँय हों गलील छतररीग होड़ हवे। हनालगा नाँय हों ईसू सुदाय दोनोहोना।”

60दो पतरस कताया, “ने दादा, आम चिलाम कतातना हना ईंग मेरिंग सुसुदीतना।” नाःआ इया पतरस कनकता मेला कुकुड़ा कुकूड़चुःनेना। 61परबू ईसू उलटावनेनखन पतरस अगीय ञेलतेरा। दो ईसू मड़ंगरेय कतातेरा हना बड़रा हाँय उहियार अगूतेरा, तिसिंग कुकुड़ा अरीन कुकूड़चुःते मड़ंग आम पेय तुरहाम आड-बेकारवायिंगता, माःआन। 62हनते पतरस बहरीय उडुंगनेनखन गोंघाड़ोमे इयामा।

ईसूकू लंदावाय घड़ीनकू ञेंडेया

(मती 26:67-68; मरकूस 14:65)

63ईसूकू साबकाःआ हँकुःआ होड़कू हाँय लंदावाय घड़ीनकू ञेंडेया। 64अरू हाँयराः मेड तोल रेडतेडखनकू होंबरेया, “आम भगवानराः बड़रा कतायीग होड़ हवे दो आम कतायमे, इये आमे ञेडकेरा?” 65हनन इया हँकू ईसू बदीरे अरू मुरुक ओपता बड़राकू कताःआ।

एहूदाकूराः मरंग पंचाइतरे ईसू

(मती 26:59-66; मरकूस 14:55-64; एहुना 18:19-24)

66एटाः दिन अंगुः मेला मूक होड़कू, मरंग पुजउरीकू, अरू नियम चेडदार होड़कू एहूदाकूराः मरंग पंचाइतरे ईसू अगुकेडखनकू होंबरेया, 67“आम सडावदार मसी हवे दो, अले एचेरेम कताय।”

दो ईसू कताया, “ईंग अपे एचेरेयिंग कताय दो, अपे ईंगराः कता ओरोपे बिसवासतेरा।#लूका 4:16-30 68अरू ईंग होंबोरपे दो, ओरोपे कता कुदा अवेतेरा। 69नुँहू वरीते मनुवारीग बेटात अगम जंगरदार भगवानराः खउना तिःई अगीय दुडुःकुःता।”

70दो हँकू होंबरेया, “दो आम भगवानरीग बेटा हवे, जा?”

दो ईसू कता कुदातेड, “अँननपे कतायता, ईंग हवे।”

71हनते हँकू कताया, “नाँयराः कता नुँहू अँननबू अबू अयूमकेरा। दो अबूके तोनोंगीग हिदइतदारराः जरूरी कोवानेःआ।”

നിലവിൽ തിരഞ്ഞെടുത്തിരിക്കുന്നു:

लूका 22: kfp

ഹൈലൈറ്റ് ചെയ്യുക

പങ്ക് വെക്കു

പകർത്തുക