लूका 11

अरजी लगा चेड

(मती 6:9-13; 7:7-11)

1मी दिन ईसू मी ततेररेय अरजीःआ। हाँय अरजी उरियावनेन दो आँयगरिकुःआ चेलाकूतेन अते मी होड़ हाँय एचेरेय कतातेरा, “ने परबू, एहुना आँयग चेलाकू अरजीगे लगाय चेडतेडकुःआ, हान उड़ी अले हों अरजीगे लगाम चेडले।”

2ईसू हँकू एचेरेय कताया, “अपे अरजी मेलापे कताय,

ने अपांग, आमराः ञाव सुद इदा, माःआनले मान मरजइत अवेय।

आम अले तलारे राइजगे लगाम बुँहड़ीगे।

3अलेराः सगर दिनाः जोम जिनिस मेमेड दिन अले लगाम एमेवाले।

4अले एटाः होड़कूराः कसूरले बराव एंडाकेरा,

हनन इया अलेराः कसूर होंम बराव एंडागोड।

अरू कसूरराः रेनहारे अलोम पराव ओवाले।”

5हनते ईसू हँकू एचेरेय कताया, “नाःआपे ओंगोल। अपेरीग मी होड़ सउंगता इदा अरू आम हाँय एचेरे हटिंग बरा रइतरे सेनेवाडखनमे कतायता, 6ईंगरीग मी होड़ सउंगता सेन दुनूररे ईंग ओड़ाःरेय वेगकिया। हाँय एमेवा लगा ईंग एचेरे तोनोंगाः कोवानेःआ। हाँय लगा पेयटोंग रुटी पइंचाम ओवायिंग। 7दो हाँय ओड़ाः पेंदातेय कतायता, ईंग रिमुः लगा अलोम कतावायिंग। ईंग दुवारिंग सींगकेरा अरू ईंगरिकुःआ लइंकू हों ईंग सुदाकू गेतेगकिया। हनालगा रेमकियानखन ओरोयिंग एमे अवेतेरा।”

8हनते ईसू कतातेड, “ईंग अपे एचेरेयिंग कतायतना, हाँय आँयग सउंगताय दोहोना हों रेमकियानखन मेरेय ओवाय दो, हाँय घड़ी घड़ी बेगर गियुःतेय असेय अते रेमवाडखन हाँयके जेमीने चहाःता, हनामिन हाँये एमेवायता।

9हनालगा ईंग अपे एचेरेयिंग कतायतना, अपे असेगोड ञवन दो भगवान अपे लगाय एमेयता, ञामगोड ञवन दो, अपेके पवाःता, दुवारपे टोकोःगोड ञवन दो भगवान अपे लगाय गीगगोडता। 10असेयता हँकुःआ होड़कू पवाःता, सपायता हँकूके पवाःता, अरू दुवारकू टोकोःगोड ञवनता हँकू लगा दुवार गीग जुवाःता।

11अपे तलारे नाःआ इया तोनोंगीगरीग अपांग इदानिया जा, बेटात रुटी जोम लगाय असेय दो दिरिय एमेयता, हकूय असे दो बींगे एमेवायता, 12अरू सिम बिलीय असेय दो चिडिंगे एमेवायता जा? ओरो! 13अपे कसूर होड़कू इदानपे हों अँनपे लइंकू लगा नपाय नपाय जिनिसकूनपे एमेयता। दो अपे अते अगम नपाय अपेरीग सेरमो देसरीग अपांग एचेरे सुद बिरुवापे असेय दो, अपे लगा चिला लगा मेरेय एमेकेःआ?”

भूतकू बदीराः चेड

(मती 12:22-30; 12:43-45; मरकूस 3:20-27)

14तोनोंग दिनरे, मी होड़ भूत एचे कोंदातिरिया हाँयग होड़ अते ईसू भूते उडुंगतेरा। भूत उडुंगनेन दो हाँयग होड़ बड़राःआ अरू हना ञेलवाडखन होड़कू बयावयानकू। 15मनदो अदोम होड़कू नाःआ इयाकू कताया, नाँय भूतकूरीग राजा दरहाराः जंगरते भूतकूय उडुंगता, माःआन। 16अरू एटाः होड़कू ईसू अंदजावगेय लगा, आम सेरमो देसराः मीटोंग चिनहाम उदुःवाले, माःआनकू कताया।

17दो ईसू हँकुःआ होड़कूराः ओंगोल सुदीतेडखन हँकू एचेरेय कताया, “मिनी देसरिकुःआ होड़कू अँननकू अँकू रेडेग होड़ेंग दो हना देस लाय जुवाःता। हनन उड़ी मिनी ओड़ाःरिकुःआ होड़कू अँननकू रेडेग होड़ेंग दो हँकू हों बेगराव जुवाःता। 18हाँयग कलउ अरू आँयगरिकुःआ सइनाकू अँननकू रेडेग होड़ेंग दो, हाँयराः राइज करा उड़ी सलाः? अपे ईंग बदीरेपे कतायतना, नाँय कलउराः जंगरते भूतकूय उडुंगता, माःआन। 19मनदो ईंग कलउराः जंगरते भूतकूयिंग उडुंगतान दो, अपेरिकुःआ चेलाकू इयेराः जंगरते भूतकूकू उडुंगता? हनालगा अपेरिकुःआ चेलाकू अँननपेरिकुःआ फड़ियावदारकू दोहोनता। 20ईंग भगवानराः जंगरते भूतकूयिंग उडुंगतान दो भगवान आँयगराः राइज अबू तलारेय बुँहड़ीकेरा।”

21ईसू अरूय कताया, “मी होड़ जंगरदार होड़, कड़ीगराः अवजारकून साबवाडखन अनँयग ओड़ाःए अगुराता दो, आँयगराः जमा जइतकूने बनसावगोडता। 22मनदो हाँय एचेरे आँयग अते बगरा जंगरदार होड़ वेगता दो, आँयग असरागेःआ हना कड़ीगराः अवजारकून बगरा जंगरदार होड़ लुड़ीगोःयाता अरू हाँय ओड़ाःराः जमा जइतकून गोःवाडखने हटिंगगोडता।

23ईंग सुदा कोवाया, हाँय ईंगरीग मुदइ होड़ हवे। अरू ईंग सुदा मेरेय सकलावगेता, हाँय सितिर-बितिरगोडता।”

24ईसू अरूय कतातेड, “मी होड़ अते मीटोंग भूत उडुंगगुःतान दो हाँयग भूत लोड़ोन लगा टयंगाब ततेरेय ञामगोड ञवनता। अरू हाँय तोनोंग ततेर मेरेय पवाःतान दो, अनँयग आँयगतेय बड़राता, ईंग उडुंगकिया हाँयग होड़ एचेरेयिंग कुदा सेनता। 25हाँय कुदा वेगतान दो, हाँयग होड़ मड़ी-मेलेंग ओड़ाः इयाय पवाःता। 26हनते हाँय सेनेवाडखन आँयग अते अरू बेलूर बेलूर सातटोंग भूतकूय अगूता अरू हाँयग होड़ एचेरेकू समसाव जुवाःता। हनते हाँयग होड़राः जीव मड़ंग अते बेलूर होया जुवाःता।”

इयेराः जीव नपाय दोहोनता?

27ईसू बड़रा मेला मी होड़ अइमी खिररीवाडखने कताया, “आमे जनमावकेरा अरू आम तुवाय एचे दुदुकेडमेःआ हाँयराः जीव भगवान नपायकेरा।”

28दो ईसू कताया, “नाःआ इया कोवानेःआ, भगवानराः सरवने अयुमेता अरूय मनाःता, हनाँयग होड़राः जीव-जहन भगवान भल-भलायवाता।”

चिनहा बदीरे

(मती 12:38-42)

29ईसू एचेरे मुरुक बगरा होड़कू जुमावयान दो हाँय कताया, “नाःआ जूगरिकुःआ होड़कू मुरुक बेलूर इदानकुःआ अरू ईंग एचेरे चिनहा उदुःगे लगाकू असेयतना।#लूका 11:26 मनदो एवनाराः चिनहा अते अरू एटाः तोनोंगाः चिनहा ओरोकू पवावनेना। 30एवना निनवे सहररिकुःआ होड़कू लगा चिनहाय दोहोना हान इया, मनुवारीग बेटात हों नाःआ जूगरिकुःआ होड़कू लगा चिनहा इयाय दोहोनता।#एवना 3:1-10 31दखिन देसरीग रानी, मरंगीग राजा सुलइमानराः कनहून अयुमे लगा मुरुक लंकातेय वेगनेना।#2 कहड़ी 9:1-12; 1 राजा 10:1-10 नुँहू सुलइमान राजा अते मरंगीग ईंग नंडा इदानिंगा। हनालगा फड़ियावराः दिनरे दखिन देसरीग रानी नाःआ जूगरिकुःआ होड़कूराः बदीरे चड़ाँवाडखन हँकूय जाःता। 32निनवे सहररिकुःआ होड़कू एवनाराः परसार अयूमवाडखन कसूर अते जीवकू कुदातेरा। नुँहू एवना अते हों मरंगीग होड़ ईंग नंडा इदानिंगा। हनालगा निनवे सहररिकुःआ होड़कू फड़ियावराः दिनरे चड़ाँवाडखन नाःआ जूगरिकुःआ होड़कूकू जाःता।”

देहराः मरसल

(मती 5:15; 6:22,23)

33“तोनोंगीग होड़ ढिबरी सलगावकेडखन टुकुनूते ओरोय हरूब ओकोतेरा। मनदो ढिबरी भीट चोटरेय मंडवेता, जेमहा ओड़ाः पेंदाकू बोल हँकू मरसलकू पवाः। 34आमराः मेड देहराः ढिबरी इया इदा। आमराः मेड नपाय दोहोन दो जमा देह मरसलरे दोहोनता। आमराः मेड बेलूर दोहोन दो जमा देह अंदरारे दोहोनता। 35आम जीवरे मरसल इदा, हना मरसल अलो अंदरागुः लगा सवासितीम दोहोन। 36आमराः जमा देह मरसल दोहोन अरू तोनोंग अंदरा मेर दोहोन दो, ढिबरी मरसल एमेयता हनन इया आमराः जीव हों मरसलते पेरेग जुवाःता।”

फरीसी होड़कू बदीरे

(मती 23:1-36; मरकूस 12:38-40)

37ईसू बड़रा उरियावनेन दो मी होड़ फरीसी होड़ आँयग ओड़ाःरे जोम लगा ईसूय राःतिरिया। दो ईसू हाँय ओड़ाःरे सेनेवाडखन जोम लगाय दुड़ुःनेना। 38दो ईसू एहूदाकूराः रिती-बिधी इया तिःई मेरेय अचंगान। हना ञेलतेडखन फरीसी होड़ बयावयाने। 39दो परबू ईसू हाँय एचेरेय कताया, “अपे फरीसी होड़कू डुभा अरू छिपी सेरमो सेरमो एकलापे मंजवेता। मनदो अपेराः इंदरीरे मुरुक ललची अरू बेलूर ओंगोल इदा। 40ने बोको होड़कू, होड़कूराः देहे तुलाकेरा हनाँयग भगवान, हँकूराः जीव होंय तुलाकेरा। 41मड़ंग अपे एचेरे इदा हना जिनिसकून गरीब होड़कू लगापे एमेगोड। हनाते अपेराः जमा बरानाः सुद जुवाःता।

42मनदो अपे फरीसी होड़कू, अपे दोपे ठीकयना। अपे फुदेना अड़ाः अरू सुदाब अड़ाः अरू एटाः अड़ाःकूनराः दस बंटारे मी बंटा भगवान लगापे एएमेतना।#दो. नि. 14:22-29; 26:12-15; लेवी 27:30-33; मला 3:8-10 मनदो अपे सतायते मेरपे फड़ियावगेता अरू भगवान मेरपे दुलारगेयता। अपे सतायते फड़ियावकू लगा इदा अरू भगवान दुदुलार इदा अरू मड़ंगतेपे एमे अगूयतना हना हों एएमे इदा।

43ने फरीसी होड़कू, अपे दोपे ठीकयना। अपे अरजी ओड़ाःरे मरंग मरंग होड़कू दुड़ुःता हना ततेररे दुड़ुः लगापे ञामता। अरू बजाररे जमा होड़कू अलेकू सलामकेःआ, माःआनपे ओंगलेता।#मती 23:5-6 44अपे ओकोत मड़गट इया इदानपेःआ। होड़कू हना मेरकू सुदीयता अरू हना सेरमोकू सेने पारता। हनालगा अपे दोपे ठीकयना।”

45दो इसराएल होड़कूरीग मी होड़ नियम चेडदार होड़ ईसू एचेरेय कताया, “आम नाःआ इयाम कतायतना दो अले होंम ओपतालेतना।”

46दो ईसू हाँय एचेरेय कताया, ने नियम चेडदार होड़कू, अपे होँपे ठीकयान। होड़कू मेरकू रेम अवेयता हना बोझा हँकू चोटरेपे मंडावगोडता। अरू अपे निःईमिन हों हँकू मेरपे संघरावाकूता। 47“अपे दोपे ठीकयना। अपेरिकुःआ खुटिपरिया होड़कू ञेड एंडातेडकुःआ हँकुःआ भगवानराः बड़रा कता होड़कू लगा मड़गटपे तुलाता।#11:47 फरीसी होड़कू मड़ंग जूगरिकुःआ भगवानराः बड़रा कता होड़कूराः मड़गट अरूकू तुलातेरा अरूकू सिंगारतेरा। 48हँकुःआ खुटिपरिया होड़कू भगवानराः बड़रा कता होड़कूकू ञेड एंडातेरा अरू अपे भगवानराः बड़रा कता होड़कू लगा मड़गटपे तुलातेरा। हनालगा हँकुःआ होड़कूरिकुःआ हिदइतदारकू इदानपेःआ अरू हँकूराः बुतारेपे मेसायना। 49हनालगा भगवान आँयगराः कनहूनतेय कताकेरा, ईंग हँकू एचेरे ईंगराः बड़रा कता होड़कू अरू मूक चेलाकूयिंग वारता। अदोमकूकू ञेड एंडाकूता अरू अदोमकूकू संतावकूता। 50हनालगा चउंदीसराः बुँहड़ी वरीतेकू ञेड एंडाकेडकुःआ हँकुःआ जमा भगवानराः बड़रा कता होड़कूराः बलंगी बदीरे नाःआ जूगरिकुःआ होड़कूके आभा एएमे पराःता। 51हाबील अते बेदी अरू मुनुरुक सुद ततेर तलारेकू ञेड गोएगतिरिया हाँयग जकरिया वरी जमा ञेड एंडात होड़कूराः बलंगी बदीरे नाःआ जूगरिकुःआ होड़कूके आभा एएमे पराःता।#11:51 एहूदाकू बछाःआ भगवानराः कागदरे जुना नियम एकला दोहोना। हना कागदकूनरे 2 कहड़ीकून टुटीग कागद दोहोना। रेःएत कागदरे हाबीलराः गुजुः बदीरे ओजाःतो इदा अरू 2 कहड़ीकूनरे जकरियाराः गुजुः बदीरे ओजाःतो इदा। हनालगा ञेड एंडात होड़कू अते हाबील मड़ंगीग अरू जकरिया टुटीगीग दोहोना।

52ने नियम चेडदार होड़कू, अपे दोपे ठीकयान। होड़कू भगवान सुदीगेराः कनहूनकू पवाः अते हँकूपे रोंकावतेडकुःआ अरू अँननपे भगवान मेरपे सुदीगेयतना। अपे अँननपे सेरमो देसरे मेरपे बोलता अरू एटाः होड़कू हों सेरमो देसरे बोलो अतेपे रोंकावकूता।”

53हनते ईसू हना ओड़ाः अते तोराय दो हना दिन वरीते फरीसी होड़कू अरू नियम चेडदार होड़कू हाँय तयोमकू परावनेना अरूकू धिकि-मिकिगेया। 54अरू हँकू ईसू एचेरे झुरा-झार सवालकून होंबोर घड़ीन हाँय अनँयग बड़रारे बझावगेय लगा दोंगकू ञामा।

നിലവിൽ തിരഞ്ഞെടുത്തിരിക്കുന്നു:

लूका 11: kfp

ഹൈലൈറ്റ് ചെയ്യുക

പങ്ക് വെക്കു

പകർത്തുക