Maatiusiup Aglangit 7

Asitsinnik Iqqaqtuiniarasi

Luukasi 6:37-38,41-42

1“Asitsinnik iqqaqtuiniarasi, iqqaqtuqtauqunasi. 2Iqqaqtuinisi maliglugu taimaalluaq iqqaqtuqtaujumaarivusi, pinasuarnisi maliglugu taimaalluaq pinasuarviujumaarivusi. 3Sungmat inuuqativit ijjisimautinga mikijukuluk takuviuk? Uvva nangminiq ijingniittuq napaaqtuvinialuk ikpiginagu? 4Uvvalu qanuq inuuqatingnut uqarunnaqpit ‘Ijjisimautiinuna mikijjukuluk piilaurlagu,’ uvva nangminiq napaaqtuvinialungmik ijingniittuqaqtillugu? 5Takkurmuuqtutit! Ijingniittuq napaaqtuvinialuk piiqqaalauruk, tavva takutsiarunnaqsiniaqputit inuuqativit ijjisimautinganik piiqsinasualiruvit mikijukulungmik.

6“Ijjurnaittumik tunisiniarasi qimminut; sapangaqutisilu akitujut iginniarnagit kuukkuusit sivuningannut, taakkunanngat tulliraqtautuinnarajarmata ilingnullu saallutik paajautuinnariaqaravit.”

Tuksiarniq, Qinirniq, Tiglukturniq

Luukasi 11:9-13

7“Tuksiarissi, tunisiviugajaqpusi tavva; qinirissi, nanisigajaqpusi tavva; tiglukturissi matuirujjaugajaqpusi tavva. 8Tuksiaqtut tamarmik tunisiviugajaqput; qiniqtullu nanisigajaqput; tigluktuqtullu matuirujjaugajaqput. 9Nalliat ataataujusi irnisinnut tuksirarviugussi niaquujamik, ujaqqamik aitturajaqpisiuk? 10Uvvalu qiturngasi iqalungmik tuksiraqtillugu, quglugiamik aitturajaqpisiuk? 11Piunngittuugaluaqtusi, piujunik tunisijariaksaq qiturngassinnut qaujimagassi; Ataatasili qilangmiittuq piujunik tunisijariaksaq qaujimatsiarniqsauvuq tuksiarvigijiminut.

12“Taimaimmat inuuqatissinnut pinasuarviujumanitsititut, taimaalluaq pinasuaqtuksauvusi: tamanna taimailiurniq Muusisiup piqujangita tukigingmagu, nalauttaijullu ajuriqtuijjutigilluniuk.”

Itirvik Nirukittuq

Luukasi 13:24

13“Itirvikittukkut itirissi, itirvik nirutungmat kappianaqtuvingmut turaangajuq, aqqutinga pijarniqtuulluni, amisut tamanna atuqpaat. 14Itirvik nirukittuuvuq inuusirmut nungusuittumut turaangajuq, aqqutinga pijarninngittuulluni, ununngittut tamanna nanivaat.”

Napaaqtut Piruqtunginnut Qaujimajaujunnaqput

Luukasi 6:43-44

15“Qaujisatsiarissi nalauttaijuujaaqtunik sulinngittunik; taikkua silatimiktigut siipiuqquujinasuarlutik ilissinnuarniarmata, ilumiktigulli paajumajutitut amaruqtitut taimaipput. 16Piniarningitigulli qaujimajunnarniaqpasi. Uqpigait kakinnaqtulit paurnganik pirurviusuungunngilat, uqpigaujaaqtullu kakillarnaqtulit aqpiujaaqtunik pirurviuvanginnivut. 17Napaaqtuq uummatsiaqtuq piujunik pirurviuvakpuq, napaaqturli piunngittuq piunngittunik pirurviuvakpuq. 18Napaaqtuq uummatsiaqtuq pirurnirlugviuvanngilaq, napaaqturlu piunngittuq piujunik pirurviuvannginnivuq. 19Napaaqtuq nalliat piujunik pirurviunngittuq, nakatauluni igitauniaqpuq ikumamut. 20Taimaaktauq, Guutimut nalauttaijuqutigijaujuujaaqtut sulinngittut, piniarninngitigut qaujimaniaqpasi.”

Qaujimalauqsimanngilassi

Luukasi 13:25-27

21“Uvannik Ataniqarniraqtulimaat Guutiup Ataniuvinganut itirnianngilat, Ataatamali qilangmiittuup pinasuaqtauqujanganik naalaktut kisimi. 22Iqqaqtuqtauviup ullungani, amisut uvannut uqarumaaqput, ‘Ataniq, Ataniq! Atirni Guutiup uqaqtauqujanganik uqallaqattalauqpugut, atirnilu anirnirluit amisut inungnit anitiqattalauqpavut, unuqtuniglu kamanaqtulinirnik saqqititsiqattalauqpugut!’ 23Tavva kiujumaaqpakka, ‘Qaujimalauqsimanngilassi; tamaaniinngilaurissi! Ajuqtulijualuujusi!’”

Igluliuqtiik Marruuk

Luukasi 6:47-49

24“Taimaimmat, nalliat uqausirijannik tusaqtuq, aturlugillu, taanna ajjiuvuq angummut silatujumut qaiqtumi igluliuqtumut; 25tavva silalummarilirmat, kuut qaamilirlutik, iglu anuraarviummarilirluni, urrunngilaq, qaiqtumut tunngagami.

26“Nallialli uqausirijannik tusaqtuq atuliranilu, taanna ajjiuvuq angummut silaittumut siurarmi igluliuqtumut. 27Tavva silalummarilirmat, kuut qaamilirlutik, iglu anuraarviummarilirluni, urruvuq; siqumimmarigluni!”

Jiisusiup Pijunnaqtitauninga Kamaniarijauvuq

28Jiisusiup tamakkua uqausit uqausirijariirmagit, inugiakturjuat kamaniaqput ajuriqtuilluni piusirijanganik. 29Ajuriqsuingmat pijunnarniqaqtutut piqujanik ilisaijitituunngittuq.

നിലവിൽ തിരഞ്ഞെടുത്തിരിക്കുന്നു:

Maatiusiup Aglangit 7: EAIBR

ഹൈലൈറ്റ് ചെയ്യുക

പങ്ക് വെക്കു

പകർത്തുക