Maatiusiup Aglangit 2

Ullurianik Ilisimajut Takujaqturningat Jiisusimik

1Jiisusi irniangungmat Pitliami Juutiamiittumi, Iruutasi angajuqqaarjuangutillugu, takugit, angutiit ullurianik ilisimajut siqiniup nuiviata nalaanit pijut, Jiruusalimmut tikipput. 2Apirillutiglu, “Juutit angajuqqaarjuaksangat irniangusimajuq naniippaa? Taassuma ullurianga saqqilaurmat siqiniup nuiviata nalaanit, tikippugut upigijaqturlugu.”

3Iruutasi tamatuminga tusarami, quaqsaaqpuq, Jiruusalimmiullu tamarmik; 4Iruutasiulli tunirrusiqtitsijit angajuqqaalimaangit piqujaniglu ilisaijit qaiqullugit apiqsuqpait, “Nani Christuusi irnianguniarniraqtausimava?”

5Taakkua kiuvaat, “Pitliami Juutiamiittumi; imaak nalauttaijuq titiraqsimangmat:

6‘Ivvit Pitliam, nunami Juutamiittutit,

Mikinniqpaunngilatit iglugasagjuanit anginiqpaujunit Juutami;

Ilingnit aulatsijiksaq pijumaarmat

Taassuma inuqutikka Isarialimiut tasiurumaarmagit.’”

7Tavva Iruutasiup ullurianik ilisimajut ijiraqturluni katimaqatigillugit, tukisivigivait qangallarik ulluriaq saqqilaurmangaat. 8Kinguningagut Pitliamut tilivait, uqautillugit, “Nutaraq naniimmangaat qinitsiaqsiuk, nanigussiuglu, qaujitinniaqpassinnga, uvangattauq upigijaqturumagakku.”

9Angajuqqaarjuaq taimaak uqariirmat, taakkua tavvanngat aullaqput, ingirraliqtillugit ulluriaq takulauqtatik takugivaat. 10Takugamijjuk quviasummarikput, ulluriaq sivulirivaat, nutarakuluup najuqtangata qulaanuarami nuqqaqpuq. 11Iglumut itiramik, nutarakuluk anaanangalu Miari takugamijjuk, saanganut siiqqurlutik tuksiarvigivaat. Tunirrutimingnik saqqititsillutik tunisivigivaat, guulumik, tipitsiariksaumiglu vurangkinsinsimik, tipitsiariksaummiglu murmik.

12Kinguningagut nunamingnut utiqput aqqutigilauqtami asiagut, Guutiup sinnaktuumakkut iniqtilaurmagit Iruutasimut utiqunagit.

Jiisusiup Qimaujjauninga Iijjiptimut

13Aullarmata, takugit, Ataniup aingilingata Juusipi saqqivvigivaa sinnaktuumakkut, uqarluni, “Iruutasi nutarakulungmik qinirnialirmat tuqutsijumaluni. Taimaimmat makilirit, nutarakuluk anaanangalu naksarlugik qimaalirit Iijjiptimut, taikaniinniaqputit uvannut nuuqujaulilaunnginnirni.”

14Juusipi makinnami, nutarakuluk anaanangalu naksarlugik, unnuangutillugu aullaqput, Iijjiptimut qimaallutik, 15tavvaniilauqput Iruutasi tuqulaunnginningani; tamanna piniarniulauqpuq Ataniup uqausirisimajangit nalauttaijuqut nalautsiqullugit, imailijut: “Irnira kaiqulauqpara Iijjiptimit.”

Nutarait Tuquraqtauningit

16Iruutasi qaujilirami ullurianik ilisimajunut sagluqitaunirminik, ninngavigjuaqpuq, piqujiliqpuq nutarait nukappiangukpata Pitliamiittut qanigijaaniittullu tamarmik tuquraqtauqullugit, marruungnik arraagulit nukaqtlillu, taimailiulauqpuq taakkua ullurianganik takulauqtut tukisivigitsialauramigit qangautillugu saqqilaurmangaat.

17Taimailiuqtillugit nalauttaijuup Jirimaiaup uqausingit nalautsilauqput imailijut:

18“Raamami nipi tusaqsauvuq,

Qianiq ugguavigjuarnirlu,

Raigiliup qiturngani qiajjutigivait;

Saimmaqsaqtaujumanngilaq qiturngangit nungutaungmata.”

Juusipikkut Naasariitimut Utirningat Iijjiptimit

19Iruutasi tuqungmat, takugit, Ataniup aingilingata Juusipi saqqivvigivaa sinnaktuumakkut Iijjiptimiitillugu suli, uqautillugu, 20“Makillutit, nutarakuluk anaanangalu naksarlugik, utilirissi Isarialiup nunanganut, nutarakulungmik tuqutsinasulauqtut tuqungmata.” 21Juusipi makinnami, nutarakuluk anaanangalu naksarlugik, Isarialiup nunanganut utiqput.

22Juusipi tusarami Aakilausiup angajuqqaarjuangulirninganik Juutiami, ataataminik Iruutasimik inangiilluni, tavvunngariaksaq sivuuraliqpuq, sinnaktuumakkulli Guutiup uqautingmingmagu, nunamut Galiliamut sanguvuq, 23iglugasangnut Naasariitimik atilingnut tikinnami, tavvani nunaqaliqpuq, nalauttaijuut uqausirisimajangit nalautsiliqput imailijut: “Naasariitimiutarmik taijaujumaaqpuq.”

നിലവിൽ തിരഞ്ഞെടുത്തിരിക്കുന്നു:

Maatiusiup Aglangit 2: EAIBR

ഹൈലൈറ്റ് ചെയ്യുക

പങ്ക് വെക്കു

പകർത്തുക