MARKUS 6
6
Akuni Nazaret mende nen, Yesus Ane waganu nina'ir yirugwa wene
(Mat. 13:53-58; Luk. 4:16-30)
1O etoma nen, Ar Yesus aworomi inom Ar ai edo paga arar lagugwa. 2Lagugwarik, ir o hari Sabat paga ma, o tamban erir tagama akla unggwi lagugwarik, ir akuni pakalok yomanogo komarek werek ma, Ar Yesus nen wene emeriragage. Nen Ar Yesus wene emeriragage mende inaruk kolalku lagugwarik, we yiluk, bi waku dogolir, “Ar yi ngga nen wene obogar yoma ilu aga? Wene inakla nggagalek etoma nenggerogo ilu aga? Ar elalin erukbuk mende nenggerogo erirtaga kogop? 3Ar yi ebe tukang kayu, kwe Maria agadak etnogogi, aworomiak Yakobus inom, Yoses inom, Yudas inom, Simon inom, nen Ar aworomi komagidak yoma agiyarik yomanogo dek a?” Etegerogo yugu lagugwarik, Ar Yesus ane waganu nina'ir yirugwa.
4 #
Yoh. 4:44
Yugu nanggugwa, ar Yesus nen ir yoraga dogolir, “Ar ap nabi#6:4: nabi; Eti Allah nen Ar ane akuni Israel mende yoragu dogu inayonggo begetek ma, endaga paga inaruk waku lagugwa mende inendaga yoragu lagugwa. Ir eti ap Musa inom, Elia inom, Yesaya inom, Amos inom, nen ambetak inom ar ya nda nen inane kolal diluk inapma tebe yitaga mende ogwe, inewe inawor inom, inai edo paga mende inom inakla dogolir Allah wene yoragwi enogo ebebar dirogon wagani tagodek o. mende eti, ar uma yomanogo nen inom, ar ogariyak inom, ar agwiyalak ombaelak inom, ir nen ar ane waganu ina'ir ogwe, ir akuni ye ai nde ai etoma nen, ir inalon ambigar palirtaga mende o,” yiluk yoragage. 5Ma, o etomala Ar Yesus nen, elalin erukbuk mende we ambi inom erudek mondok. Etegerogon ogwe, ir akuni ambetak u warek mende, Ar inggi inaluwak paga biluk pano ekbarige. 6aAr Yesus ir akuni iniliti oba ebebar andagwi dek il daga lagagerek, we yiluk, bi warinakige.
Yesus aworomi dua belas enogo wene wolok lakbarige wene
(Mat. 10:5-15; Luk. 9:1-6)
6bEtegerogo ekbiluk nen, Ar Yesus o kampung dombok eragalu nggwe etoma, ir ya unggigik wene yorar lagage. 7Tuguluk, ar Yesus aworomi dua belas enogo, wai yoraga lagagerek, ye kugwi nde kugwi mugogo wulinabuwak nen yiluk, Ar obatne wogoraga lagagerek, inebe mbere ndak dombok lambokigik pulogo lakbarige. 8#Luk. 10:4-11Ar Yesus nen, ir wene yoraga dogolir, “Ye mende nde mende tuan taga ake waganugup o, tegaduk adigar waganino o. naungge inom, uang inom, tu bugudak ndak yugu inom, waganugup ar o. 9Sepatu yiku dogolir, tu pakean mbere waganugup ar o.” 10Tuguluk ambi inom yoraga dogolir, “Kir o ambila lalok ma, wokinakwi kalok, o wedek ma auwan lagikdek dogolir, kinom o etoma mondok dogono o. 11#Mat. 10:14; Kis. 13:51Etegerogo ogwe, kir o adik wedekma nggwe lamo, ir akuni yomanogo nen, kir kinane kolalu dambe kalok, kinebe wokinakwi dek kalok, o etomala dambek dalok arar lano o. O etomala nen dambe kalok wundi lagu dogolir, inilu erogo ake nen, kiniok kola korogo biluk lano o!”
12Etegerogo yoragage mo, ir Ar aworomi dua belas enogo arar lagu lagugwarik. Kir maduk erir tagwi mende ernogo, kiniliti kol diluk, kinomaduk mbo bini o, yiluk yorar lagugwa. 13#Yak. 5:14Yorar lagu dogolir, ir nen ye kugi nde kugi maduk mende, pakalogar mugogo wuldagwi, ir akuni u warek mende minyak Zaitun amburu todek inoba kidirogo wakbagetek ma, u enogo dek ertatuk, iniluk erogo bagwi, etegerogo erir lagugwa.
Yohanes pembaptis wakugwa abok mbililik.
(Mat. 4:1-12; Luk. 9:7-9)
14 #
Mat. 16:14; Mrk. 8:28; Luk. 9:19 Erinabir lagu-lagugwa enogo paga, Ar Yesus abok ye ai nde ai obogar inaruk kolal kugwa o. Nen ar raja Herodes endaga mbogor enogo inom aruk kolalkige ar o. Nen ir ap ambetak nen yugu dogolir, “Yohanes ima wukbar taga mende enogo akuni kambi taga ma nen, obok iyok taga iluk aga o! Ar iluk atuk menaga enogo paga, elalin erukbuk mende erir laga kogo o,” yiluk yirugwa.
15Yirugwarik ogwe, ir ambetak nen yugu dogolir, “Dek o, ar eti Elia arar o,” yiluk yirugwa.
Nen ir ambetak nen yugu dogolir, “Ar eti Allah wene akuni yorar taga mende nabi arar o,” yiluk yirugwa.
16Yugwi enogo ar Herodes aruk kolalka lagagerek, “Wene yi ebebar o, An nen ar Yohanes Pembaptis alebagik enggadobak mbaluwak nen yiluk, yoragagi mo anggodobak mbalkugwa ernogo arar o. Nen ar yogondak obok arar iyok taga iluk aga o!”
17 #
Mat. 14:3-4; Luk. 3:19-20 Etegerogo yirige enogo eti, ar Herodes nen kwe Herodias ar awor Filipus agwe kigik waganggi nanggige, ar Yohanes nen Herodes yoga dogolir, Kar kawor agwe waganurak ndak dek ogwe, waganggendik mo, kimbirak dogorak mondok maga o, yiluk wenemuk yorige o. 18Wene eti, ar Yohanes nen, Herodes ninggi nanggi yoga dogolir, “Kar kawor agwe eti waganurak mondok maga o!” yiluk yoga lagage o.
19Eti paga nen, ar Yohanes penjara onggol dirugama, ar kwe Herodias eti, wenemuk yorarige enogo paga, akla anini tebelek dogolir, warik nen yiluk eketek ogwe, Herodes nen non mbalka lagage o. 20Ar Herodes nen, Yohanes enogo maduk ekikdek, iliti mondok pano kigi o, yiluk ar Yohanes nen wene yoga enogo aruk kolalka dogolir, iliti anggin etaga kigik, ane kolalurak iliti wadok andega lagagerek ma, obade andega dogolir, ar Yohanes wakwi kau o yiluk, idi erogo aruwam waruwak nen yiluk eka lagage.
21Nen ar Herodes endak tagagemo arar etari wagagemo, ar aworomi nggok ndak mendarige mende inom, ir tentara inewai inom, ir ap Galilea paga inewai ap nggok ndak inom, kuwak eri wagugwama, Herodias nen nanonggal yiluk andarige. 22Nggedak mbalkunem yomanogo, kwe Herodias agadak kodak tadirik enogo onggega lagagerek, uwak danggik uwak danggok ndai tarian wakige paga, Herodes iliti inom, nen ir ap nggok ndak inayonggo birige wagugwa mende yomanogo inom, iniliti adeknggen erogo barigemo, ar Herodes nen kodak enogo yoga dogolir, “Kar wadok mende nena, nggino yega keyalok, an nen wokirigin arar o!” yiluk yorige. 23Tuguluk Ar Herodes nen, ar ane kumbuk mbalogo kodak enogo yoga dogolir, “Kar nena mende wokirurak kakla wadok andar tagan, o an napma werek yoma, o agum penak nggwe agorogo banin o, yiluk yonega keyalok, munggulogo bagagin ar o, yiluk ane kumbuk mbalkige!”
24Etegerogo yorige mo kodak enogo wulka lagagerek, agwiya kinok yoga dogolir, “Kwe yi, panogwak eti nena mende an nen nggino yorigin?” Kinok yorigi nanggige, kwe agwiya enogo nen yoga dogolir, “Ap Yohanes enogo alebuak nggino yorin o,” yiluk aruk wakige.
25Kodak enogo iyok taga raja Herodes oba lagagerek, yoga dogolir, “O yogondak yi paga arar, ap Yohanes pembaptis enogo alebuak mbalogo piring paga enagago woknirin o,” yiluk yorige.
26Etegerogo kodak enogo nggino yogi nanggige raja Herodes enogo iliti maduk agage o. Nenaluk nggedak mbalkunem, ap nggok ndak dombok kuro wagugwa yomanogo inilka paga, ar Herodes uwak mbalkigerek ma, iliti buru yega dogolir ar ogwe, kodak enogo nggino yorige enogo ndak-ndak ekige o. 27Ar raja Herodes enogo nen, ap ar aruam dogir taga mende yoga dogolir, ar Yohanes Pembaptis enogo aluwak mbalogo wolok eme yiluk yorigemo, ar tentara enogo, akuni kede warek dogitaga ma lagagerek, ar Yohanes pembaptis enogo alebuak mbalkige o. 28Nen ar Yohanes pembaptis alebuak enogo piring paga enagago ar kodak enogo wogorige o. Nen ar, kodak tadirik enogo nen, ar agwiya arar wogorige o.
29Etegero ekugwa ernogo, ir ar aworomi yomanogo inaruk kolalku lagugwarik, ar ebe warek waganogo wolok, akuni warek mende batagama arar bi lagugwa o.
Ar Yesus nen akuni lima ribu paga erom wogoragage wene
(Mat. 14:13-21; Luk. 9:10-17; Yoh. 6:1-14)
30Ar Yesus aworomi wene wolok lakbarige mende, ir iniok paga Ar Yesus uwagam arar wagu lagugwarik, ir erir lagu lagugwa mende inom, emerirar lagugwa mende inom, wene etoma mbililogo yori wagugwa. 31Mbililogo yogunem ar, akuni pakalogar, Ar oba bika wagwi lagwi ekwi paga erom naurak inom, tar walaurak inom, o telek dek arigi nanggige, Ar Yesus nen aworomi yoraga dogolir “Nir ninadik akuni dek ma, tar wala luok nen, watni o,” yiluk yoragage. 32Yoraga lagagerek, ir enogo to perahu paga unggwi lagugwarik, o akuni dekma nggwe arar lagugwa.
33Ar Yesus aworomi inom lagwi enogo, ir akuni obogar nen dagu lagugwarik, nen ir tuan abugur pagaru, ir lowam andarugwa ma inilka nggaruk togon ineloktema inalep arar ari lagugwa. 34#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mat. 9:36Ar Yesus ane waganggwi inom, to perahu paga nen i aik paga wundi wagu lagugwa, akuni pakalok dogogu nanggugwa Il darige o. Il daga lagagerek, akuni yi inakba yiluk, akla maduk agage o. Eti nenaluk, akuni yemenogo domba inanggembala dekma dogirtagwi ndak-ndak il darige o. Il dalok nen, ir ye wene nde wene emeriragage. 35Wene emekwi nggodek, o arar keyanggwi arigi nanggige, ar Aworomi nogo, Ar Yesus uwagam wagu lagugwarik, yogu dogolir, “Yoma, o waganekma akuni inai dekma arar o. 36Nen, o obok kukbaga arurak arir taga ma, akuni yoma inarom onggo o desa-desa inom nen kampung-kampung etoma onggo mbala lowak nen yoran o,” yiluk yorugwa.
37Yorugu nanggugwa, ar Yesus nen, “Kir nen ar ir inagarom wogorani o,” yiluk yoragi nanggige.
Ir nen, “Nir ninauang we dua ratus perak arar ma, ya paga roti ndak kunogo naurak yiluk yegen a?” yiluk yirugwa.
38Yogu nanggugwa, Ar Yesus nen, “Kir kinagarom mende werek? Bika lani nda.” Ir enogo inil birka lagugwarik, yogu dogolir, “roti lima, ikan dua, mban arar werek o,” yiluk yorugwa.
39Yorugu nanggugwa, ar Yesus nen ir yoraga dogolir, ap inaworomi dombok irikngga paga etoma, mbilai pal-pal korek tarir lowak nen yiluk yorani o. 40Yoragi nanggige, ir ap wonggalek nogo ambetak inebe seratus paga ambilai pal-pal korektagwi, amberak lima puluh paga ambilai pal-pal korektagwi, erir lagugwa. 41Kotarir lagu nanggugwa, ar Yesus nogo nen, roti lima inom nen ikan dua inom, arar wagangga lagagerek, elokte mbogor paga iliktaga lagagerek, Nombae Allah wa, yiluk roti enogo ugurogo, akuni yemenogo tumburirawak nen yiluk, Ar aworomi enogo wogoragage. Wogoraga agagerek, ir akuni yemenogo obogar, ikan dua enogo waganogo tumburogo wogoragage o. 42Tumbur irarugwama, ir akuni yemenogo obogar inelabur ndonggorogon arar narugwa o. 43Inelabur agagemo, erom inom, ikan inom, amberak ndinogo birugwa mende, mburim tu dua belas paga ande kerok togon arar yagadogo birugwa. 44Ir roti narugwa enogo eti, ap dombok inebe eti lima ribu paga arar narugwa o.
Yesus i agum paga iyok bir lagage wene
(Mat. 14:22-33; Yoh. 6:16-21)
45Roti enogo nugu nanggugwa, Ar Yesus nen, ir akuni o etoma nen lakbak nen yiluk dogolir, Ar awurumi nogo to perahu paga unggwi lalok, inalep o Betsaida i aik alibagan nggwe etoma unda laurak yiluk, inalep undarige o. 46Undagu nggodek, akuni yemenogo inuma lakbarige. Nen ar Adigar tamban erik nen yiluk, kurtaga etoma dagarige. 47Yomanogo tamban eka kigik, o arar kukbaga agage o. Ir Ar Awurumi yemenogo, to perahu enogo paga i danau odo kirogon arar ari lagugwa. 48Ar Yesus nogo tuguluk il lakdarige mende, perahu nogo wiya nen agubak nombaliluk ogona kogona eka paga, to perahu nggorak mbalu inomanggen dik, inomanggen dek erir lagwi il darige. Lagwi agagemo, ar Yesus enogo, o kidik elagabi waga kigik, i agum paga iyok bir, ir to perahu paga dagik, inika nggaruk togon lok-lok laknen yiluk waga karugwa. 49Ir nen i agum paga iyok bir waga inil kugu lagugwarik, inakla paga nen, yi monggar arar wari taga, yiluk andugu lagugwarik, naik obogar inane lambedagi warkugwa. 50Tuguluk inil pik pak birkugu lagugwa, enogo Ar Yesus arar waga kwak biluk, inagur ambik lagugwa.
Inagur lagwi agagemo, Ar Yesus nen ibar-ibar yoraga dogolir, “Kinagurakma! An Yesus nebe arar wari taga ma, kinobade arugup o,” yiluk yoragage. 51Yoraga lagagerek, perahu paga inoba dagi lagage. Dagi lagagemo, o wiya enogo abodok arar dek agage. Etnogo eka kwak biluk, ir enogo iniliti anggin kuk togo inobade atuk, wene onggo yoru iniliti anggin dimbik togon ertagage o. 52Ar roti ugurogo wogoragage ernogo, inakla nen dikbegekdek ar ma, yabongga ekige enogo paga, ibiluk dikburak ndak dek mban ar ertagage o.
Akuni o Genesaret mende u warekma dek eginakige wene
(Mat. 14:34-36)
53Ir ernogo, i aik alibagan nggwe o Genesaret arar unda lagugwa. 54Arar unda lagugwarik, o Genesaret i aik paga etoma to kol yidilogo biluk, wundi lagunem, akuni yemenogo nen, Ar Yesus inoba waga yenggak karugwa. 55Wundi laga yenggak kugu lagugwarik, o wilayah etomala yonggo mbuagan lagu lagugwarik, Ar Yesus werek ir inaruk kolkugwama yemenogo, akuni u warek tikar paga ndal-ndal e urogo wogonarek, Ar Yesus uwagam wogorek kuwak ari wagu lagugwa. 56O kota nggok ma inom, desa bugudak ma inom, o kampung inom, unggir laga kigik, ir akuni u warek mende nogo, we iyom irep paktawok yiluk nggino yogu lagartek, patagwi kalok, Ar nen, u warek mende obok pano erogo barige o.
നിലവിൽ തിരഞ്ഞെടുത്തിരിക്കുന്നു:
MARKUS 6: WLW
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
