Mateu 5
5
Yesu mwanangula mazu hapili
(Luka 6:20-23)
1Omu Yesu amwene aze mazavu, akandukile hapili, kaha omu atwamine, tumbaji twenyi vejile kuli ikiye.
2Kaha aputukile kuvanangula#5:2 MuchiHelase ngwavo, alokolwele mukanwa kenyi nakuvanangula. ngwenyi,
3 Vatokwa ava vásuvala mumuchima#5:3 MuchiHelase ngwavo, mushipilitu. kumeso aKalunga, mwomwo wangana wamwilu wapwa wavo.
4 Vatokwa ava váli nakulishona, mwomwo navakavavendejeka.
5 Vatokwa ava vavavwovu mumuchima, mwomwo navakaswana lifuchi lyahamavu.
6 Vatokwa ava veji kwivwilanga kwoloka lipwila nazala, mwomwo navakavekuchisa.
7 Vatokwa ava veji kutetelanga vakwavo, mwomwo navakiko nawa navakavatetela.
8 Vatokwa ava vatoma mumichima, mwomwo navakamona Kalunga.
9Vatokwa ava veji kuholesanga kole, mwomwo navakavavuluka ngwavo vana vaKalunga.
10 Vatokwa ava veji kuyanjishilanga hakwoloka, mwomwo wangana wamwilu unapu wavo.
11Mwatokwa chipwe tuhu navamitoleka nakumiyanjisa nakumivangijikila vyeka navyeka vyavipi hali Ami.
12Wahililenunga, pwenunga nachisambo, mwomwo muli nawana waulemu wakumisakwilila mwilu, mwomwo mukiko vayanjishile vaze vapolofweto vapwileko shimbu kanda enu.
Mungwa namusana wavaka-mavu
13Enu mumungwa wavaka-mavu, oloze nge mungwa unasamuka, navauyemesa cheka naka? Kaweshi kuwahisa chumako, shina kuumwanga nakuulyatangila kuli vatu.
14 Enu mumusana wavaka-kaye. Limbo-lyakembwe vátungila hapili kalyahasa kuswamanako.
15 Chipwe linongo nawa, kavaliwika nakulifwikila mumbángoko, oloze navalihaka hachitumbikilo chalyo mangana livamunyikilenga vosena muzuvo.
16Mwomumwe, kumunyika chenu chimunyikenga kumeso avatu, mangana vahase kumona vilinga vyenu vyamwenemwene mangana valise Senu átwama mwilu haupahu wenyi.
Kulishitu naJishimbi
17Kanda namushinganyeka ngwenu nguneza nakukumisa Jishimbi chipwe Mazu avapolofwetoko. Kangwejile nakuvikumisako, oloze mangana nguvitesemo.
18Mwomwo mwamuchano, nangumilweza ngwami, Palanga nomu nawakahita melu namavu, kakweshi kasona kamwe kakapululu, chipwe kamukila kasona kamwe nakakafuma kuJishimbiko, kuvanga vyosena vanavitesamo.
19Shikaho weshowo mwazomboka lushimbi lumwe lwakehelaho chikuma hajeji jikwavo nakunangula vatu valinge mwomumwe, navamuvuluka kupwa wakukuminamo chikuma muwangana wamwilu. Oloze weshowo mwajononokanga nakujinangulanga navamuvuluka kupwa wamulemu muwangana wamwilu.
20Shikaho nangumilweza ngwami, kwoloka chenu kuvanga chihambakane chavaka-kusoneka navaFwaliseu, mokomoko kamweshi kukengila muwangana wamwiluko.
Mwakulivwasanyina navakwenu
21Mwevwa lyehi muze vambile vaze vakushikulu ngwavo,
Kanda ukajiha mutuko,
kaha
Weshowo mwajiha mutu atela kumuhisa afwenga#5:21 Tala Levi 24:17..
22Oloze Ami nangumilweza ngwami, Weshowo mwapwa nautenu nandumbwenyi, vatela kumuzangamisa; weshowo mwamba ndumbwenyi ngwenyi, Ove umulumbi wamokomoko#5:22 MuchiHepeleu ngwavo, Laka, nge ngwavo, Ove umulumbi wamokomoko., vatela kumutwala kuzango yavaYuleya#5:22 MuchiHelase ngwavo, Sunendeline. Sunendeline lyapwile likiko liuka lyavakulwane javaYuleya vakulitulaho.; kaha weshowo mwamba ngwenyi, Uchileya, atela kuya muNgehena yakakahya#5:22 Nge ngwavo, muchijiva chakakahya. Tala Kuso 20:11-15..
23Shikaho nge uli nakuhana wana wove kulijiko lyakulumbila, kaha kuze hinawanuka ngwove, Ndumbwami ali nakunyengetela nayami hakala chuma,
24seza wana wove kulijiko lyakulumbila. Vangila kuya nakuliwana nandumbwove, numba wize nakuhana wana wove.
25 Shinganyeka washi mwakukumishila chihande nayou unavulumuna shimbu uchili nakuya nenyi kuzango, kuchina mwakuhana kumavoko amuka-kusopesa, kaha muka-kusopesa mwakuhana kumavoko amuka-kulama kamenga, kaha hinavakumbila mukamenga. 26Mwamuchano nangukulweza ngwami, kaweshi kukalovokamoko palanga nomu naukafweta lumbongo#5:26 MuchiHelase ngwavo, kondulande, lumbongo lwalundende chikuma. lwakukumishilako.
Yesu mwavuluka vyakutuvulumwisa
27Mwevwa lyehi muze vambile ngwavo,
Kanda ukalinga ujilako.
28Oloze Ami nangumilweza ngwami, Weshowo mwatala pwevo nakumwivwila chipepa chauvumbi, nalingi lyehi nenyi ujila mumuchima wenyi.
29 Nge liso lyove lyachilyo lyeji kukuvulumwisanga, litombongonyemo nakulimbila. Mwomwo nachiwaha kunonge kachihanda kamwe kakumujimba wove kuhambakana kumbila mujimba wove wosena muNgehena#5:29 Nge ngwavo, muchijiva chakakahya. Tala Kuso 20:11-15..
30Kaha nge livoko lyove lyachilyo lyeji kukuvulumwisanga, livatulelyo, limbile. Mwomwo nachiwaha kunonge kachihanda kamwe kakumujimba wove, kuhambakana mujimba wove wosena kuya muNgehena.
Yesu mwavuluka kulukulula pwevo
31Vambile nawa ngwavo,
Weshowo mwalukulula pwevo lyenyi, amuhane mukanda wakujiha ulo.
32Oloze Ami nangumilweza ngwami, Weshowo mwalukulula pwevo lyenyi chakuzeneka mulonga waujila, mwamulingisa kupwa muka-ujila. Kaha weshowo mwambata pwevo válukulula, mwapwa muka-ujila.
Yesu mwavuluka kulishinga
33Cheka nawa mwevwa lyehi muze vavalwezele vaze vakushikulu ngwavo,
Kanda ulishingila hakwongako,
oloze
Tesamo kumeso aMWATA ngana omu unalishingi.
34Oloze Ami nangumilweza ngwami, Kanda ukalishingako#5:34 MuchiHelase ngwavo, Kanda mukalishingako., chipwe kulishinga lilu — mwomwo likiko litanda lyaKalunga lyawangana,
35chipwe kulishinga mavu — mwomwo akiko chitwamo chamahinji enyi, chipwe kulishinga Yelusalema — mwomwo yikiko nganda yaMwangana álitulaho.
36Kaha kanda ulishinga mutwe woveko, mwomwo kaweshi kuhasa kutomesa chipwe kwilavisa lukambu lumweko.
37Oloze omu namuhanjika, hakwitavila ambenu kaha ngwenu, Eyo, kaha nawa hakukana ambenu ngwenu, Chiku. Mwomwo mazu akuhakilako afuma kuli uze wamupi liyavolo.
Kuzanga vaka-kole
(Luka 6:27-36)
38Mwevwa lyehi muze vamba ngwavo,
Liso naliso ndwa#5:38 Nge ngwavo, nge mutu mwatuva liso lyamukwavo, ikiye nawa vamutuve liso lyenyi., lizo nalizo ndwa.
39 Oloze Ami nangumilweza ngwami, kanda mukemanyina mutu wamupi nakoleko, oloze weshowo mwakuveta mbanda kulikili lyachilyo, mwitavile nakulikili likwavo nawa.
40Kaha nge umwe mwakutwala kuzango, oloze hakuhona vyakumufweta mwakutambula chikovelo chove chamukachi, muhane nawa chikovelo chove chachisuku chahelu.
41Kaha weshowo mwakukanjikiza ngwenyi, uyenga nenyi kilomita yimwe, yako nenyi jivali.
42Ou mwakulomba muhane, kaha ou mwasaka kukongola kuli ove kanda umuminako.
43 Mwevwa lyehi muze vamba ngwavo,
Zanganga mukwenu nakuhunga muka-kole wove.
44Oloze nangumilweza ngwami, Zangenunga vaka-kole jenu nakulombela vaze veji kumiyanjisanga,
45mangana mupwenga mwavana vaSenu átwama mwilu. Mwomwo eji kututwilanga likumbi lyenyi hali vavapi naava vamwenemwene, kaha eji kutumanga vula hali vaka-kwoloka nahali vaka-kuhenga.
46Mwomwo nge namuzanga vaze vamizanga, namuwanyinaho ika? Kumana vaka-kutelesa kavalinga mwomumweko numba?
47Kaha nge namumeneka vandumbwenu kaha, munalingi muka mwakuhambakana vakwenu? Kumana keshi mukiko valinga navaka-mafuchiko numba?
48Shikaho kupukenu ngana omu akupuka Senu wamwilu.
നിലവിൽ തിരഞ്ഞെടുത്തിരിക്കുന്നു:
Mateu 5: LUE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bible Society of Zambia
