NAANA 37
37
Yusufu nana'ona
1Yakubu kú Kanaa bùsun guu kɛ̀ a de vɛ̃̀ɛn. 2Yakubu boriinↄ yãn yɛ̀. Yusufu nɛ́ gↄ̃kparɛmɛ. À wɛ̃̀ gɛ̃ro awɛɛplaadee guu kɛ̀ èe sãanↄ dãa kↄ̃n a vĩ̀inↄ, à de nↄↄnↄ Bila kↄ̃n Zilipao nɛ́nↄ, ben à dà zaaa kɛ̀ aↄ̃ↄ kɛ̀ kↄmↄtↄ kɛ̀ a denɛ. 3Isaraili ye Yusufuzi dɛ a nɛ́ kpaaanↄla kɛ̀ à à ì a zikũ guu yãnzi, ben à utagyaba zↄ̃̀nɛ. 4Kɛ̀ à vĩ̀inↄ è ń dee ye Yusufuzi dɛńla, ben aↄ̃ zàn aↄ̃è we wà yã nnaa ooro.
5Yusufu nanaa ò, ben à tↄ̃kɛ̃̀ a vĩ̀inↄnɛ, ben aↄ̃ ɛ̀ara wà zàn dɛ zi pↄ́la. 6À bèńnɛ: À nanaa kɛ̀ má ò ma. 7Má è wée ése yiyii bura, ben ma ése bakaa fɛ̀ɛ à zɛ̀. A pↄ́nↄ lìgazi, ben aↄ̃ nàɛnɛ. 8Ben à vĩ̀inↄ bènɛ: Nɛ́ kí blewan yↄ́? Nɛ́ gbãaa blewan yↄ́? Ben aↄ̃ ɛ̀ara wà zàn dɛ yã pↄ́la nanaa kɛ̀ à ò pì yãnzi.
9Yusufu ɛ̀ara à nanaa ò dↄ, ben à tↄ̃kɛ̃̀ a vĩ̀inↄnɛ à bè: Ma ɛara ma nanaa ò dↄ. Má è ↄfãntɛ̃ kↄ̃n mↄvurao kↄ̃n sↄsↄnɛ mɛ̀n kuri awɛɛdoonↄↄ e naɛɛmɛ. 10À nanaa pì tↄ̃kɛ̃̀ a denɛ dↄ, ben à de pàtaa à bè: Nana kparee takan ń ò lɛɛ? Mapi kↄ̃n n dao kↄ̃n n vĩ̀inↄ, wé mↄ́ wà kúɛ n aɛn yↄ́? 11À vĩ̀inↄ nↄ̀sɛgↄ̃aanↄ kpào. À de sↄ̃ nanaa pì yã kũna a nↄ̀sɛ guu.
12À vĩ̀inↄ gàa ń de sãanↄ dã Sɛkɛmu. 13Ben Isaraili bè Yusufunɛ: N vĩ̀inↄ e sãa dãa Sɛkɛmu. Mɛ́ n zĩ ń kiia. À wèàla à bè: Ma yãa. 14Ben à bènɛ: Ǹ gá ǹ n vĩ̀inↄ gwa kↄ̃n sãanↄ, tó aↄ̃ↄ aafia. Ǹ ɛara ǹ sumɛ kↄ̃n aↄ̃ baaruo. Ben à à gbàrɛ, à bↄ̀ Ɛblↄnu guzurɛn à gàa Sɛkɛmu. 15Èe likↄ̃aa zↄ̃ↄ sɛ̃̀n, ben gↄ̃gbɛ̃ ke dààlɛ à à là: Bↄ́n nɛ́ɛ wɛtɛɛ? 16À wèàla à bè: Mɛ́ɛ ma vĩ̀inↄ wɛtɛɛmɛ. Tó ń ń sãdãkii dↄ̃, ǹ omɛ. 17Gↄ̃gbɛ̃ pì bè: Kɛ̀ aↄ̃ bↄ̀ gura kɛ̀, má mà aↄ̃ bè wèe gaa Dotãmɛ. Ben Yusufu pɛ̀ɛńzi à ń lé Dotã.
18Kɛ̀ aↄ̃ à è kãaa, ai àgↄ̃ gá ká ń kiia, aↄ̃ lɛ́ kpàkↄ̃sↄ̃zi wà bè wà à dɛ. 19Aↄ̃ bèkↄ̃nɛ: À gwa, nana'ori e mↄↄ kãaa. 20À tó wà à dɛ wà à zu lↄ̀gↄ kɛ̀nↄ doke guu, wé be nↄ̀bↄ pãsĩ bé à à dɛ̀ à sò. Ɛ̃ndɛ̃ wé e lán à nanaanↄ é mì dɛ nà. 21Kɛ̀ Rubɛni yã pì mà, à yezi à à mì sí, ben à bè: Wàton à dɛro, 22àton aru bↄaro. À à zu lↄ̀gↄ kɛ̀kiin gbáan kɛ̀. Àton à dɛro. Rubɛni òńnɛ lɛ, kɛ̀ à yezi à à mì sí à à kpá a dea yãnzimɛ. 23Kɛ̀ Yusufu kà a vĩ̀inↄ kiia, aↄ̃ à uta bↄ̀, à utagyaba maaa pì. 24Ben aↄ̃ à sɛ̀ wà à zù lↄ̀gↄ pìn. Lↄ̀gↄ pì da korimɛ à í vĩro. 25Ben aↄ̃ vɛ̃̀ɛ wèe pↄ́ blee. Kɛ̀ aↄ̃ wɛ́ɛ sɛ̀, aↄ̃ Sumaila bori laatarinↄ è, aↄ̃ bↄ̀ Giliada bùsun aↄ̃ↄe gaa Igipiti. Aↄ̃ lakuminↄↄ dò pↄ́nↄ kↄ̃n lí'ↄ ɛ̃zɛ̃o kↄ̃n lí'ↄ gũ nnannaao sɛna. 26Ben Yuda bè a gbɛ̃nↄnɛ: Tó wa wa dãaro dɛ̀, ben wa à gɛ̀ ùtɛ, bↄ́ àren wé ee? 27À tó wà à yá Sumaila borii pìnↄa. Wàton à dɛro, wa dãaronloo? Wa aru dↄ̃nkↄ̃mɛ. Ben à gbɛ̃nↄ à yã mà. 28Kɛ̀ Midiã laatari pìnↄↄ e mↄↄ gɛ̃ zɛ́la, ben aↄ̃ Yusufu gà wà bↄ̀ lↄ̀gↄn, aↄ̃ à yà Sumaila borii pìnↄa kondogi baro, ben wà tào Igipiti.
29Kɛ̀ Rubɛni mↄ̀ lↄ̀gↄ pì kiia, èe Yusufu e gwe dↄro, ben à a pↄ́kãsãanↄ gà à kɛ̃̀kɛ̃, 30ben à gàa a dãaronↄ kiia à bè: Nɛ́ pì kú gwe dↄro. Mɛ́ gá má kↄ̃n beeeo? 31Aↄ̃ blèkofĩi kũ̀ wà dɛ̀, ben aↄ̃ Yusufu uta pì sɛ̀ wà màɛ à aru guu. 32Ben aↄ̃ à utagyaba pì sɛ̀ wà gàao ń denɛ aↄ̃ bè: Pↄ́ kɛ̀ wá èn yɛ̀. N nɛ́ utan yↄ́, ke à pↄ́nlo? 33À dↄ̃̀, ben à bè: Ma nɛ́ utamɛ, nↄ̀bↄ pãsĩ bé à à sò. Wãiyoo, wà ma nɛ́ Yusufu kã̀sãkãsãkↄ̃ɛmɛ. 34Ben à a utadaa gà à kɛ̃̀ à pↄ́kãsãa sɛ̀ à dà, ben à a nɛ́ pì sósobi kɛ̀ gìkɛna. 35À nɛ́gↄ̃gbɛ̃nↄ kↄ̃n à nɛ́nↄgbɛ̃nↄ mↄ̀ à làakari kpáɛnɛ ń píngi, mↄde à gì a làakari kpáɛzi à bè: Mɛ́gↄ̃ ma nɛ́ pì gɛ̀ ↄ́ↄ dↄↄmɛ ai mà gá táo à kiia gɛ̀wãan. Ben èe sósobi ↄ́ↄ dↄↄ a nɛ́ pì yã musu.
36Midiã pìnↄ sↄ̃ Yusufu yà Pↄtifaa Igipiti. Fili'auna ìba kemɛ, àmbe à dogarinↄ gbɛ̃nsi ũ.
നിലവിൽ തിരഞ്ഞെടുത്തിരിക്കുന്നു:
NAANA 37: BBB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bokobaru Bible with New Testament and OT Portions © Sim International, 2005.
