मत्ती 8
8
येशूका जोन बेटपा मु़चु़लाई सबेट्मिडिम
(मर्कूस १:४०-४५; लूका ५:१२-१६)
1येशू पोप्चङलामका धाली योम्डिम चङडा छो़म सेर्पा मु़चु़ गुमीनुङ लाम्दिम्डी। 2मेम्मा जोनका बेटपा कोले मु़चु़ उनीमाडा रोक्तामा उनी ङादोडा क्रचु़खुम बेत्तो आरे र्वाक्ताम-र्वाक्तामङा बु़डु़, “ङाचो़, गानी न बोनी माला गोलाई सेपा दु़म्बेन्मु#८:२ सबेन्मु। यहूदीमिमका आरेप्माम सोमोरीलाई मेसेपा मिम्मी। चाम्ङिनी।”
3गुमीका उनी ल्वा हम्मिडिमा मेराम मु़चु़लाई लु़प्मिडी। मेम्मा र्वाम्डी, “गो न बेउ, गाना सेपा दु़म्नानु़।” मेकोतिलोङा मेरामकु जोन हेम्ल्यासिड्डा। 4मेकोतिमा येशूका मेराम मु़चु़लाई र्वाम्डी, “ओरामकु दुथाममिम ल्वा गाना सु़नुङ वो मेसो़या वो। लावो डु़म्लाचो़काडा लक्सा, मा गुका रेम्नानु़। मेम्मा जोन बेटपा मु़चु़ सलो सासेन्मु बासी र्वाक्साका मोशाकु डु़म्लाका र्वाक्ताम होङङा बे। आरे बेसाका गाना सन्नाम बु र्वाक्पा खोत्लेका चमिनु़।”#८:४ जोनका बेटपा मु़चु़ सलो सासेन्मु बासिक्पाकु दुथाममिम ल्वा।#लेवी १४:१-३२
रोमी कप्तानका येशूडा बु़डु़म थो़र
(लूका ७:१-१०)
5येशू कफर्नहुम शहरडा रोम्डिलो कोले रोमी कप्तान रोक्तामा गुमीनुङ आरे र्वाक्ताम-र्वाक्तामङा बु़डु़, 6“ङाचो़, कोले आमा डु़ल्चो़ उ ल्वा-खेल सोक्पा सोमोरीका छो़म नो़पामा आमा नेमडा झार्ल्याक्पा बु।”
7येशूका मेरामलाई र्वाम्डी, “गो रोङुमा मेरामलाई सबेट्पु।”
8लावो कप्तानका र्वाक्ता, “ङाचो़, गानीलाई आमा नेमडा येन्मु घ्रेटपा गो मेबुङु। गानी जेनी कोङङा आमा डु़ल्चो़ स। 9हेङालोने गो वो आ डोक्पु मु़चु़कु ल्वाडा बुङु, मा आमा ल्वाडा सिपाहीमिम बुमी। कोलेलाई गो ‘लक्सा’ बेउ, मा मेराम ल। कोङमीलाई ‘रोका’ बेउ, मा मेराम रो। आमा डु़ल्चो़लाई ‘आरे बे’ बेउ, मा मेरामका बु़।”
10ओराम ल्वा थो़म्डिमा येशू ङाङाया दु़म्मिडी, मा उनी चङचङ बिक्तोङा बेपा मु़चु़मिमनुङ र्वाम्डी, “आच्छाङा गो गानीलाई र्वाङु, इस्राएलीमिम खोत्लेगोडा आरेप्माम डोक्पु थो़र गो ल्वाउतोम मिबु। 11गो गानीलाई र्वाङु, नेप्सुङ ओपाथो़ नुङ नेप्सुङ गाम्पाथो़म सु़म्दिसेर खोत्लेलामका वाङसामा मु़चु़मिम हापा रोमी। मेम्मा अब्राहाम, इसाहक, याकूबनुङ पाह्री-किब्दीडा ग्रुला पेप्डा मेर्मिम गन्मी।#लूक १३:२९ 12लावो माम्चु़नीकु किब्दीडा हुमु बासिक्पा इस्राएलीमिम ने तुकुम्चिमगोडा घ्रोला सो़म्सिमी। मेगोडा मु़चु़मिम उनी लि ख्रेत्तो ख्राम्मी।”#मत्ती २२:१३; २५:३०; लूक १३:२८-२९ 13मेकोतिमा येशूका मे रोमी कप्तानलाई र्वाम्डी, “लक्सा, गाना थो़रलु़न्नाम होङङा दु़म्नु़।” मेम्मा मेकोतिलोङा उ डु़ल्चो़ सस्ल्याड्डा।
नो़पा हापा मु़चु़मिमलाई येशूका सबेट्मिडिम
(मर्कूस १:२९-३४; लूका ४:३८-४१)
14मेकोतिमा येशू पत्रुसकु नेमडा रोम्डी, मा पत्रुसकु नाइमेकु माम डार्चु़मोका नो़पामा झार्ल्याक्पा ल्वाम्डी। 15गुमीका मेराम मेसेमकु ल्वा लु़प्मिडी, मा डार्चु़मोका गुलाई डिट्ल्याट्डु़। मेकोतिमा गु बक्तामा येशूकु चापे-डुपे बु़डु़।
16नेम्था दु़स्तालो मु़चु़मिमका मुनाङका हुपा हापा मु़चु़लाई येशूकाडा रेट्मिडी। मेम्मा गुमी जेम्डिमा मे मुनाङमिमलाई कोल्मिडी, मा नो़पा मु़चु़मिम खोत्लेलाई सबेट्मिडी। 17माम्चु़नीलाम-जेपा यशैयाका आरे र्वाक्ताम होङङा रेन्थिमु लागि गुमीका आरे बेम्डिम बाइडा:
“गुमीका इकी नो़सीमिम रम्डी,
मा सोमोरीमिम हेप्मिडी।”#यशै ५३:४
येशूकु सीसिपा दु़म्पा मु़चु़
(लूका ९:५७-६२)
18येशूका सेर्पा मु़चु़लाई उनी होनोलाम-आथो़लाम ल्वाम्डी। मेम्मा उनी सीसिपामिमलाई दिरिदिनकु होम्बुनो लक्सी बेम्डी। 19मेकोतिमा कोले डु़म्ला सीपा पातु़म्री उनीमाडा रोक्ता, मा गुमीनुङ र्वाक्ता, “सीपा, गानी बान्ते-बान्ते लनी, गो वो इनीमा चङचङ लङु।”
20येशूका मेरामलाई र्वाम्डी, “सेरुलीमिमकाम उनी बाखोप रोङगा बु। चक्पुमिमकाम वो उनी बाखोप पान्जी बु, लावो मिनीचो़काम#८:२० मिनीचो़ र्वाक्मा: खोत्ले मु़चु़काम लागि सेल्पा दु़म्मु माम्चु़नीका गुमीलाई थुट्मिडिम बु र्वाक्पा रेम्बोमु येशूका उनी त्वापलाई ङा र्वाम्डिम नङ (दानिएल ७:१३-१४)। ने ङेसिखोप वो मिबु।”
21उनी सीसिपामिमगोडाम कोलेका र्वाक्ता, “ङाचो़, ङादो गो नेम लक्साका आमा पापलाई क्लु़म्मु ग्वाङ्नी।”
22लावो येशूका मेरामलाई र्वाम्डी, “आमा चङचङ लाम्दिया, मेसिपा त्वारो़म मेल्वासाका सिपामिमका ङा सिपा रो़म क्लु़म्मिनु़।”
येशूका ब्लोजु़ हेप्मिडिम
(मर्कूस ४:३५-४१; लूका ८:२२-२५)
23येशू कुबी-बोक्साडला हुम्डी, मा उनी सीसिपामिम वो गुमीनुङङा लम्डी। 24मेम्मा कोचोत्ति दिरिदिनडा छो़म डोक्पु ब्लोजु़ फुड्डु़। मेम्मिमका कुकु बाबारिमका कुबी-बोक्सा कुगोयु़ र्वावा प्लु़म्डु़, लावो येशू ने अम्चेट्पा बाम्डी। 25उनी सीसिपामिम लम्डिमा आरे र्वाक्तो येशूलाई फम्डी, “ङाचो़, गुकुलाई सेल्किनी, गुकु ने कुगोयु़ प्लु़म्सिमुमा सिमु खाम्कु।”
26येशूका मेर्मिमलाई र्वाम्डी, “याक्के थो़रनुङमा मु़चु़नी, गानी हेङा ङिनिमिम?” मेकोतिमा येशू बम्डिमा ब्लोजु़ नुङ कुकु बाबारिमलाई भुर्मिडी, मा छो़म पपया दु़स्ता।
27सीसिपामिमका आरे र्वाक्तो ङाङाया दु़म्मिडी, “गुमी ने हेप्माम मु़चु़ डे? ब्लोजु़ नुङ कुकु बाबारिमका वो गुमीका र्वामिमिम होङङा बोमी रेछा!”
मुनाङका हुपा नले मु़चु़लाई येशूका सबेट्मिडिम
(मर्कूस ५:१-२०; लूका ८:२६-३९)
28गालील दिरिदिनकु होनो होम्बुम कोङमी खोम गदरिनीमिमकु इलाकाडा येशू रोम्फाम्डी। मेकोतिलो मेसिन्डा सु़लु़मलामका बिक्तोङा बेपा मुनाङका हुपा नले मु़चु़चिपका गुमीलाई क्रो़म्ची। मेर्चिप छो़म ङिमलु़पा बाच्चिमका मेराम लाम्दी लाम्दिमु सु़का वो मेचाम्थाल्मिवा। 29मेर्चिपका डोक्पु लो़लामका आरे र्वाक्तो येमु चो़म्ची, “माम्चु़नीकु तारापाचो़, गानी गुचुकुलाई हाम बोमु माल्चिकिनिमिम? हाम माम्चु़नीका मुलु़ बेम्डिम थारीडाम वो ङादोङा गानी गुचुकुलाई दु़खा ग्वाप्डा रोक्निम?”
30मेसिन्डाङा किचो़ होनोक्थो़ सेर्पा ब्वा जात्तोङा लेट्मिडी। 31मेम्मिमका मुनाङचिपका येशूनुङ आरे र्वाक्चिम-र्वाक्चिमङा बेच्ची, “गानी गुकुलाई ओ मु़चु़चिपलामका कोल्किनिमिमङा माला सेर्पा ब्वागोनो हुमु ग्वाक्किनी।”
32गुमीका मे मुनाङमिमलाई र्वाम्डी, “लक्नी।” मेम्मा मे मुनाङमिम मे मु़चु़चिपलामका लुम्डिमा ब्वामिमगोनो हुम्डी, मा मे सेर्पा ब्वा भ्र्वा धालु़ हिरिमाक्सी ओन्तो लम्डिमा दिरिदिनगोयु़म कुड्डा प्लु़म्सिम्डिमा सिम्डी। 33मेम्मा ब्वा रेपा मु़चु़मिम मेमबाडेम शहरथो़ स्वाम्डी, मा मेसिन्डा हाम दु़स्ताम मा मुनाङका हुपा मु़चु़चिप हाम दु़म्ची, मेर्मिम ल्वा खोत्लेनुङ सो़च्ची। 34शहरडाम खोत्ले मु़चु़ येशू क्रो़म्डा रोम्डी। मेम्मा मेर्मिमका येशूलाई ल्वाम्डिमा मेलामका लुक्निमा लक्नी बेम्डी।
നിലവിൽ തിരഞ്ഞെടുത്തിരിക്കുന്നു:
मत्ती 8: THUL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators, Inc. All rights reserved.
