Matayo 12
12
1Kyeeri kilya Yesu aira nremiń ta ngano nkonu wa Sabato. Vanalosho vamwi vakabwa nsoto vakabooka imushuamushua fyaa fa ngano vakalya. 2Neeli Vafarisayo vandelolya, vakamwia: Llate vanalosho vafo vakee itana findo fitasumani itana nkonu wa Sabato. 3Nae kavaia: Mwansoma se sha lia Davidi atana kyeeri aliwa nsoto ye na vaaroe vamwi? 4Sheeli andeaka neefo numba ya Iṛuva vakalya mikate ilya irawaa ifo numba ya Iṛuva iteesumanii iliwa yye ana vaaroe vamwi kita vakohani veni da? 5Ana nta mwansoma ifo mavavasoń se sheeli vakohani va numba ya Iṛuva veeumbuaa filya fitatanwaa nkonu wa Sabato, nawo nta itana kikasha? 6Kake namuia: Ia ayo uu akee nroo kita numba ya Iṛuva. 7Kake kifo mwimanyaa misendye ya kirero ki: ”Kilya kishisenyaa niń ni ililya vandu, ni iraswa ndi“, kyasia mwikusaṛyaa vandu iva vatawore ilomi kikasha ndi. 8Amu Mwana wa nndu ye yye Nndumi na wa nkonu wa Sabato.
9Kakwimboo ifo kaenda numbeń yawo ya iterevya. 10Lia eni kalolya nndu wa uko lutoṛokombye. Nawo vakamwuṛa veenumbuaa: Kisumani ikiṛa nndu nkonu wa Sabato? Amu vakooye mwaanya wa indiinga. 11Nae kavaia: Ni i umwi kari kanu awore yaanri lyamwi limwi likawa iriniń nkonu wa Sabato atalyutaa-fo alikiṛe? 12A nndu yye eelanya mburu se? Kyasia wifo muumu itanya nndu kisha nkonu wa Sabato. 13Lia eni kaia nndu ulya: Seṛeesa uko lwafo! Nae kaseṛeesa lukava usha sha lua lungi. 14Na Vafarisayo vakasomuka vakandeṛuya kyama kya iwwaa.
15Ili Yesu andemanya kuro, kakwimboo-fo. 16Vandu veengi vakansoṛa, nae kavakiṛa woose. Kavaia: Manya mutaongoye! 17Kyave kuro, amu kifike kilya kyeenrerwaa mmwauya fisuku Yesaya eenumbuaa: 18A uu ndundi wakwa nammusaua, yye nkunde wakwa ashisenye nrimiń. Nań nrwaa Mumuyo wakwa kwa ule yamwi. Nae aongoyaa vayavaṛumu kya uumisyo. 19Nae anaa ndi ana nta aṛoṛongyaa ndi. Ana nta ununga lwamwi lwitiwaa ifo shień ndi. 20Iraa lifotikye nta alifukyaa ndi. Na uruu lukee ifumbya musu nta alurunyaa ndi kumande annde uumisyo luvinge. 21Na irina lyamwi llyo vandu va masanga valiveṛeaa“.
22Llyo aendewa nndu eeworwaa mmumuyo nkasha, akee na mfu miso na ateeshi irera. Nae kankiṛa. Na nndu ulya ateeshi irera karera na ilolya. 23Isyamu lyoose likaṛiika. Tikanumbua: A uu mmwana ulya wa Davidi se? 24Kake Vafarisayo ili vandeita kuro vakanumbua: Ito nta aumbutaa mimuyo mikasha kitaare niikai aelekyo mBelisebuli ito akee nnini wa mimuyo mikasha ndi. 25Ili Yesu andemanya makusaṛo awo kavaia: Umangi loose lukankuluya na ikabana weni luvaa nrabu. Na muṛi woose ana numba ikankuluya yo sheni na sheni isalalaa ndi. 26Na kwakooya Satana aumbuta Satana ungi, ankuraua na ikukurya ye muni. Kyasia umangi lwamwi lusalalaa are? 27Na kwakooya niń nuumbutaa mimuyo mikasha kwa finya ya Belisebuli, a vana vanu vaiumbutaa veelekyoo ni iń? Kwa ikyo iwo wwo vashemurambuaa. 28Kake kwakooya niń nkee yumbuta mimuyo mikasha kwa finya ya Mumuyo wa Iniva, kyasia umangi lwa Iṛuva lwammaa imufikya neeni te. Ana naare nndu amakii yaka numba ya nndu awore fiya na insoka fiya famwi kitaare afingaa mbele nndu ulya awore fiya? Llyo amakii insoka foose fikee numba yamwi. 30Nndu atakee andu emwi nań, ito nkituva kyakwa. Na nndu atakee isańiṛya andu emwi nań, ito anyanyataa. 31Kiimba kya ikyo namuia: Ireko lyoose na kirero kyoose kya kirumu nndu alilyoo, kake kya iruma Mumuyo Nsongori kyo alilyoo ndi. 32Nndu woose, areraa kirero kya iila Mwana wa nndu, ito alilyoo. Kake nndu, areraa kirero kya iila Mumuyo Nsongori, akooyaa ililyo nta isangeń ili lya alli ana nta isangeń lishaa numa ndi. 33Mukavveekya nri nnuru, to uvikaa nunda shinuru. Ana mukaweekya nri nkasha, nato uvikaa nunda shikasha. Amu nri urambulwaa nnunda tayo. 34Eeni uṛiti lwa shoka mumakii are irera finuru, neeni mukee vakasha? Amu ifo fiishule nrimiń wa nndu mfo kana kafireraa. 35Na nndu awore fisha nrimiń mfo feni aavyaa vandu vengi da. Na nndu afisye fikasha nrimiń mfo feni da aavyaa vandu vengi. 36Kake namuia: Kirero kyoose kya dua vandu vakireraa vakyuṛwaa nkonu ulya wa mwaandu. 37Amu na firero fafo kumakii ikooya ikia, ana na firero fafo kumakii ikooya ureti.
38Llyo kiindi kya vaaṛia va mitisine na Vafarisayo valya veeyoo vakaaṛua vakanumbua: Llosha, tifurie ilolya myorusye kwafo. 39Nae kaaṛua kavaia: Ufwari lu ukasha na waaisi lukee iṛuya myorusye. Nta luniingwaa myorusye ndi kita myorusye ilya ya mwauya kisuku ulya Yona. 40Amu sheeli Yona andekaa ndewuń ya ikunga lia inini kakaa-fo mikonu iraru kio na nsanyiń, mfo kuro na Mwana wa nndu akaa uteriń mikonu iraru kio na nsanyiń. 41Na vandu va Ninive vasalalaa nkonu wa uumisyo andu emwi na ufwari lo, nawo vavaumisyaa sheeli warekwa. Amu wo vakurra kiimba kya mikwanisye ya Yona. Na io ayo ito akee nnini kita Yona. 42Mangi nka ulya wa taari ya itate asalalaa nkonu ulya wa uumisyo andu emwi na vandu va ufwari lu, nae avaumisyaa sheeli warekwa. Amu ye ashe auka taari ta mmando wa isanga, amu ashearanya waṛia lwa Salomon. Na ia ayo ito akee nnini kita Salomon.
43Kwakooya mumuyo ulya nkasha wasomuka nnduń, uṛaaṛaa andu utayo mura wiṛuyaa andu a iimuya, nta ikooya. 44Numa unumbuaa: Nuuyaa numba yakwa kulya nndesomuka. Neeli ushaa, ulolyaa yoore muni ndi, kake nshaangate na yambikwa. 45Lia eni wendaa indeondua mimuyo ingi mikasha mfungare ikee mikasha kita ito muni. Nayo ikaaka na ikaa-fo. Na nndu to mikae yamwi ivaa mikasha kita ilya ya mbooko. Mfo kuro kiviaa na ufwari lu ukasha.
46Ili eekireraa na isyamu lia lya vandu, mae na vanawo vakasha. Vakasalala io wooṛo vakafura irera nae. 47Nndu umwi kamwia: A to yeyo wafo aselele io wooṛo na vananu, vafurie irera nawe. 48Nae kaaṛua eeiaa nndu ulya: A yeyo wakwa ni i? Na vaniru vva ki? 49Kasaaṛa uko andeorusa na alya vaseṛo vamwi vakai kanumbua: A wo yeyo wakwa na vaniru vakwa! 50Amu nndu woose atanaa kilya Nde yakwa wa iṛuvewu afurie, ito yye mwanama na mfwama na yeyo wakwa.
നിലവിൽ തിരഞ്ഞെടുത്തിരിക്കുന്നു:
Matayo 12: RWK72
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
