Luka 23
23
1Isyamu lia likakwimboo lyoose likankurika kwa Pilato. 2Vakabooka indiinga veenumbuaa: Tallolia sheeli nndu uu akee ireta uruka lweru na iima vandu veeniingiaa Kaisari kyaalo. Kanumbua ye muni sheeli yye Kristo akee mangi. 3Pilato kamwuṛa: Iwe ni iwe mangi ya Vayuda? Nae kaaṛua kamwia: Ni iwe kwanumbua. 4Pilato kaia vakohani valya vanini na syamu ya vandu: Niń llolie ukasha kwa nndu uu ndi. 5Kake wo vakaengeṛia nnu irera na itikiatikia vakanumbua: Ye afuluta vandu eeloshaa kunu Yudaya koose kabookia Galilaya kumande kunu. 6Neeli Pilato andeita kuro, kauṛa akwaa nndu uu wwa Galiliya. 7Neeli andemanya sheeli akee ushiliń lwa Herode, kanrika kwa Herode. Amu nae eekee kulya Yerusalemu mikonu ilya.
8Neeli Herode andelolia Yesu kafura nnu, amu mmikonu miingi eefuriee nnu illolia, fulya eemiitaa mboni tamwi. Kaira ba kundo aloliaa myorusie yukie na kwamwi. 9Kamwuṛa mboni shiingi. Nae nta imwaṛua kindo. 10Na vakohani vanini na vaaria va mitisine vakasalala-fo vakandiinga na finya. 11Kyasia Herode na vaseṛo vamwi vakamweetia na inteenda. Kavvika miseto ya utoṛe, numa kawwiiṛa kwa Pilato. 12Kyasia nkonu ulya muni Herode na Pilato vakabooka iitana, amu lya mbele veesuyanii.
13Pilato kavaanga vakohani valya vanini na vandu va nrwe na vandu woose kavasandia. 14Kavaia: Mwanshendee nndu uu sheeli atevetaa vandu. Nań nanrera mwaandu wamwi mbele yanu. Nań nta nallolia kindo kyavvinga iki mwandiinga nakyo ndi. 15Na akwaa ni Herode nae nta alolia ndi, amu ammuwiiṛa kweru. Kyasia kiifo kindo atanie kyawara awalwa ndi. 16Kyasiań ninkabaa, numa mmwotoṛe. 17Amu kyeemmuwaraa ivaboṛomuya mfungwa umwi kyeeri kya kisuku. 18Vakaṛoṛongya woose andu emwi veenumbuaa: Uta-fo nndu uu! Kutiboṛomuye Baraba! 19Nae ni nndu eenrawaa ki-fingioń kiimba kya myaandu indesha muṛiń na ya iwaa. 20Kyasia Pilato karera nawo lya kavili, fulya eefuriee yotoṛa Yesu. 21Nawo vakaṛoṛongya veenumbuaa: Nkabie nsalabeń! Nkabie nsalabeń! 22Kavaia lya kararu: Naamu ki? Uu atanie fikasha ki? Nta kirero kimwi nallolia ky awwara afwe. Kyasiań ninkabaa, numa mmwotoṛe. 23Kake vakaṛoṛongya na ngyununga nini veekundaa akabio̱ nsalabeń da. Ngyununga tawo tikavinga. 24Llyo Pilato afukya, kilya vafurie kive. 25Kaboṛomua ulya anderawa kifingioń kiimba kya myaandu na iwaa, yye vandensaua. Na Yesu kavarambikia vantanie sheeli vakundie.
26Neeli vanrie vakawara nndu umwi, nSimon wa Kirene, ashe auka na nremiń. Vakanrika nsalaba aukurike io numa ya Yesu. 27Isyamu iingi lya vandu likansoṛa na vaka veekabakabaa mbafu tawo na illilia. 28Na Yesu kavaindukia kavaia: Muṛe vaka va Yerusalemu, manya mutashililie niń ndi! Iyeń kyanu mu veni na kya vana vanu! 29Amu lleń te kikaa kishe kyeeri vandu vanumbuaa: Ngoma iwo vakee fuumba na iwo vatandeira vana na mavele atandeongwa. 30Llyo vabookaa iia ngyuro: Tiwoyeń! Na ini fiduru tisikień! 31Amu kwakooya vatana kuro na nri nshu, a uu mwumu naare utanio̱o̱?
32Na vaseṛo vavili vakakurikwa andu emwi nae veetaniee fikasha vawalwa andu emwi nae. 33Vakafika andu avaangwa Kiboṛoń! Nafo vakankabia-fo nsalabeń na fisoki filya fivili andu emwi nae. Vakakaba umwi taari ya uko usha lwa Yesu na ungi taari ya uko umbuyo. 34Na Yesu kanumbua: Wui Nde kuvatie, fulya vateeshi kilya vakee itana. Vakakwavia na miseto yamwi veeikabiaa wuuku. 35Na vandu vakasalala-wo veellaa. Na vandu va nrwe vakanseka vakanumbua: Ankiṛa vengi, kyasia akukiṛeń ye muni, kwakooya yye Kristo nsaue wa Iṛuva! 36Na vasikari valya nawo vakamweetia. Vakanserikia vakanniinga mura nsande na kindo kivavaa. 37Vakamwia: Kwakooya kukee mangi ya Vayuda, kukweleke ku muni! 38Na ifo nsalabeń kwa ule ya nrwe wamwi iifoo mitisine itisiṛie kigiriki na kirome na kiebrania: Uu yye mangi ya Vayuda.
39Na umwi wa fisoki filya feenkabio̱o̱-fo kamweetia kanumbua: Iwe kukee Kristo ndi? Kyasia kukweleke ku muni, kuteeleke neese! 40Kake ulya ungi kamwaṛua eennayaa: Kweṛee Iṛuva se? Nawe kukee uumisioń ilu ndi? 41Ise vavili tikee iliswa ukiva lu kisumani, fulya tikee itawa filya tantana fikasha. Kake ito antana fikasha ndi. 42Kaia Yesu: Wui Yesu kushikumbue, ili kushaa kukee na umangi lwafo. 43Na Yesu kamwia: Nakuia kya dede: Nkonu wa nnu da kuvaa nań kulya Paradiso.
44Llyo kyeeri kya saa isasaru. Llema ukasha urukefi loose ukakaa kumande saa kyeenda. 45Na saa ikareta langa yayo na isulia lia inini likee ifo numba ya Iṛuva likaranduka kari. 46Nae Yesu kaṛoṛongya na ununga unini eereraa: Wui Nde narambikia nrima wakwa maakoń afo. Ammaa irera kuro kanutuka. 47Ili nshili wa vasikari valya andelolia kilya kindeva, kaṅinisa Iṛuva kanumbua: Ndede nndu uu eekee nsumani. 48Na vandu woose veeifoo veellaa ili vandelolia kilya kindeva, nawo vakakukaba mbafu vakauya kyeń. 49Na woose vakwishi nae andu emwi na vaka valya variani nae kuuka Galilaya vakasalala kikwaasha veellaa mboni to.
50Lia eni kasha nndu umwi irina lyamwi ni Yosefu. Nae eekee nndu wa nrwe, ni nndu ntele na nsumani. 51Nae nta airikia fikwena fawo na mitanie yawo ndi. Na kundo aukie nkulya Arimatia mmuṛi wa Vayuda. Lingi eeveree umangi lwa Iṛuva. 52Nndu to kaenda kwa Pilato kantereva nnyiṅa wa Yesu. 53Kawolota-fo kawiṛina na nseto mweelwa fyu. Kandeuaṛa mbangeń ikee shiremi iweń kitaare yamaaṛwa nndu kutu. 54Na nkonu ulya ni nkonu wa ikwalia na nkonu wa Sabato ubookeń. 55Na vaka valya vandesha nae vauka Galilaya vakansoṛa numa. Vakalla mbanga ilya na nnyiṅa wamwi kasa waṛwaa-fo. 56Vakauya muṛiń vakandedeeṛia miri ya kisaamu na mafura a imwaamba. Na nkonu wa Sabato vakaimuya sheeli kikee kivavase.
നിലവിൽ തിരഞ്ഞെടുത്തിരിക്കുന്നു:
Luka 23: RWK72
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
