Yohane 8
8
1Kyasia Yesu kaenda uroń lwa miri ya misenifu. 2Ili lya ndesi ngama kio kafika lingi kulya numba ya Iṛuva. Na vandu woose vakanshea. Nae kakaa rembo kavalosha. 3Vaaṛia va mitisine na Vafarisayo vakamwendee nka aaramwa eeaaikaa. Vakanseṛeesa io kari. 4Vakamwia: Llosha, nka uu aaramio̱ allya da eeaaikaa. 5Kyasia Mose ativavasie ifo mavavasoń kya vaka va mikae ii tivakabe na mawe. A iwe kunumbuaań are? 6Varera kuro kya inreya, amu vakooye kindo kya indiinga. Kyasia Yesu kakwinika katisiṛa ifo uteriń na nni. 7Neeli vandeitika imwuṛa, kakwinua kavaia: Ulya atawore ireko kari kanu ave wa mbele wa inkaba na iwe. 8Kakwinika lingi katisiṛa ifo uteriń na nni. 9Nawo ili vandeita kuro, vakasomuka umwi umwi kibookia vasuṛi kumande vasia-wo. Kasaa-wo Yesu muni na nka ulya aselele io karikari. 10Yesu kakwinua lingi kamwia: Vaṛiingi valya vafo valla kwi, yeyo? Nta umwi akuumisia? 11Nae kamwia: Nta umwi, Nndumi. Yesu kamwia: Nta nań nkuumisiaa ndi. Kwendień! Manya kutakitane lingi kikasha!
12Kyasia Yesu karera nawo lingi kanumbua: Niń nkee langa ya isanga. Ulya ashisoṛaa niń akiendaa llemiń kutu ndi, kake avaa na langa innde muu. 13Kyasia Vafarisayo vakamwia: Iwe kukee ikurambua ku muni. Ikurambua lyafo llya dede ndi. 14Yesu kaaṛua kavaia: Na kwakooya niń nakurambua shi muni, mirambuye yakwa yya dede, fulya niishi kundo nuukie nafo na kundo neendaa. Neeni mwishi kundo nuukie ana kundo neendaa ndi. 15Ini mukee yumisia mwilatiaa mikae ya vvili, niń nuumisiaa nndu nta ndi. 16Na kwakooya niń naumisia nndu, uumisio lwakwa llwa dede, amu niń nniń shi muni ndi, kake nakaa andu emwi na ulya ashirumie. 17Na akwaa ni ifo mavavasoń anu kitisiṛie sheeli: Ukureki lwa vandu vavili llwa dede. 18Niń nniń nkee ikurambua shi muni, na Vaava to ashirumie nae akee ishirambua. 19Kyasia vakamwia: A Vaava wafo akee kwi? Yesu kaaṛua: Mushiishi niń ndi ana nta Vaava wakwa mumwishi ndi. Kifo mushiishi niń mwimanyaa na Vaava wakwa. 20Firero fo afireria andu alya a isaṅiṛia misimbika ifo numba ya Iṛuva ili eeloshaa. Ana nta nndu akaṛia iwwara, fulya kyeeri kyamwi kitandefika.
21Kyasia kavaia lingi: Niń nkee yenda, neeni mushiṛuyaa. Na ifo marekoń anu mufiyaa. Kundo niń neendaa, nta ini mumakii ifika-fo ndi. 22Kyasia Vayuda vakanumbua: Manya kitakooye akundie ikuwaa naań, ili anumbua: Kundo niń neendaa, nta ini mumakii ifika-fo ndi? 23Nae kavaia: Ini mumilie kunu si, niń mmilie kulya ule. Ini mukee va isanga li, niń nkee wa isanga li ndi. 24Kiimba kya ikyo namuia: Mufiyaa marekoń anu. Kwakooya mutakusuraa sheeli nniń ye, mufiyaa marekoń anu. 25Kyasia vakamwia: Iwe ni iwe iń? Yesu kavaia: Nkuro kikai sheeli nndetembeṛe imuia, na alli namuia kuro da. 26Niiworee fiingi fa irera kyanu na fa yumisia kyanu. Kake ulya anshiruma wwa dede. Nań filya namiitia kwamwi mfo nkee ifirera fa iia isanga. 27Nawo nta kyawaaṛukia sheeli awasendia Nde ndi. 28Kyasia Yesu kanumbua: Mukammaa irosa Mwana wa nndu llyo mumanyaa sheeli nniń ye. Ana nta kindo nkee itana kikee kyakwa shi muni, kake nkilya Nde andeshilosha. 29Na ito ashirumie akee andu emwi nań, nta andeshitia shi muni ndi. Amu filya finsenye ye mfo ntanaa mikonu yoose.
30Neeli anderera kuri, veengi vakankusura. 31Kyasia Yesu kaia Vayuda valya veekusuriee: Mukakuwara na firero fakwa llyo muvaa vanalosho vakwa va dede. 32Neeni mumanyaa kilya kikee kya dede, na udede lo lumutauaa. 33Vakamwaṛua: Ise tikee kishuku kya Abraamu, nta tave masinga a nndu nta kyeeri kimwi ndi. Nki ili kwanumbua: Mutaulwaa? 34Yesu kavaaṛua: Nkue nkue namuia: Ulya woose akee itana mareko, ni isinga lya mareko. 35Ana nta isinga likaa kyeń kyeeri kyoose ndi. Nndu akaa kyeń kyeeri kyoose mMwana. 36Kyasia kwakooya uu akee Mwana amutauaa, llyo muvaa vataue va dede.
37Niishi da sheeli mukee kishuku kya Abraamu. Kake ini mukee iṛuya kya ishiwaa, fulya kirero kyakwa kitawore andu a ikaa kari kanu. 38Filya nndefilolia kwa Nde mfo nkee ifirera. Kyasia neeni taniń filya mwamiita kwa nde yanu. 39Nawo vakamwia: Nde yeru ni Abraamu! Yesu kavaia: Kikoo mwikee vana va Abraamu, mwitanaa mitanie ya Abraamu. 40Kake alli mukee iṛuya kya ishiwaa niń nkee nndu namuia kilya kikee kya dede ikyo nndekiita kyuka kwa Iṛuva. Nta Abraamu andetana kuro ndi. Ini mukee itana mitanie ya ulya akee nde yanu. 41Vakamwia: Ise teeriwa waaisiń ndi. Ise toore Vaava umwi, nae ni Iṛuva. 42Yesu kavaia: Kifo Iṛuva eekee Vaava wanu, mwishikundaa niń, amu niń nndeuka kwa Iṛuva nasha kunu. Nta niń nndesha kwa kiimba kyakwa shi muni ndi, kake yye ashirumie. 43A nki ili mutakee imanya mirerie yakwa? Mfulya kitaare ini mukee imakii yaranya firero fakwa. 44Ini mukee va nde yanu, nae nSatana. Na filya nde yanu alangie mfo musenywa ifitana. Ye eekee wwaa vandu kuuka mbele, ana nta akuwore na udede ndi, fulya ye atawore udede nrimiń wamwi. Karera wongo, areraa ikyo kikee kyamwi muni. Amu ye wwa wongo kava na ndee wa wongo. 45Kake niń ili nkee irera ikyo kikee kya dede, nta mukee ishikusura ndi. 46Ni ungau umwi wanu amakii ishivinga na kindo kya mareko nndetana? Kwakooya nkee irera kilya kikee kya dede, nkiki ili mutakee ishikusurań? 47Ulya amilie kwa Iṛuva aitaa firero fa Iṛuva. Kwa ikyo ini mwisile ndi, fulya ini mutamilie kwa Iṛuva.
48Vayuda valya vakaaṛua vakamwia: Ise tarera kisumani se sheeli iwe kukee Nsamaria, kuworwa mmumuyo nkasha? 49Yesu kaaṛua: Niń noorwa nta mmumuyo nkasha ndi, kake niń nkee iindia Nde yakwa, neeni mukashiruma. 50Nań nta nkee ikuṛuiya nduma wakwa shi muni ndi. Eefo ito akee ishiṛuiya na ifukya kyakwa na kyanu. 51Nkue nkue namuia: Nndu kankuwara na firero fakwa, akifwaa kutu ndi kumande miṛeṛe. 52Kyasia Vayuda vakamwia: Alli tammanya na baa sheeli kuworwa mmumuyo nkasha. Abraamu afwe na vaauya fisuku valya vakafwa. Nawe kukee inumbua: Nndu kawara kirero kyakwa akifwaa kutu kumande miṛeṛe ndi. 53A iwe kukee nnini kita nde yeru Abraamu, nae afwe? Na akwaa vvaauya fisuku nawo vafwe. A iwe kwakwaṛua sha i? 54Yesu kaaṛua: Kwakooya nakuṅinisa shi muni, unini lwakwa nkindo ndi. Amu ulya akee ishiṅinisa vVaava wakwa. Neeni mukanumbua: Yye Iṛuva wanu. 55Nta ini mumwishi ndi. Kake niń mmwishi. Na kwakooya nanumbua ntamwishi, vvaa wa wongo sheeni. Kake niń mmwishi na kirero kyamwi nkiwore. 56Nde yanu Abraamu andekaba nndoṛo eeshi akaa alolie nkonu wakwa. Kaulolia kafura. 57Vayuda vakamwia: Iwe kitaare kwammaa myaka makumi araanu, nawe kwanumbua kwallolia Abraamu? 58Yesu kavaia: Nkue nkue namuia: Ilyo kitaare Abraamu awa-fo, niń niifoo. 59Kyasia vakaimboo mawe vamweeṛe. Kake Yesu kakufisa kasomuka ifo numba ya Iṛuva.
നിലവിൽ തിരഞ്ഞെടുത്തിരിക്കുന്നു:
Yohane 8: RWK72
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
