Lukasi 12
12
1Mwitungo lyenilo vanhu vingi vivilingaga kusika fihumbi ikumi, sisyo vitovangizaja; na wavukizaja kuyomba na vahemba vakwe, Mwilindile hambele nʼitumbyo lya Vafarisayo, holyene lili lya vugulumi. 2Kwisi kuduhu kinhu chavisilwe hochene kufumbulwa ngʼo, na kuduhu cha mbisila hochene kumanikiwa 3ngʼo. Kunguno yeniyi genaya muliyomba mu giti gakudegelekwa mu mwanga na genaya mwayombaga mu itwi lya munhu mu masenge gakutaniziwa kwigulya na midaka. 4Alisi ndimuwila inwe, vanwani vane, muleke kuvogoha venavo valiguvulaga muvili, na haho vakakovolile kinhu kingi. 5Alisi nkumolecha inwe nani mumogohe; mumogohe mwenuyu homwene ali na vukovozi hanuma na kuvulaga kumutagila inwe mugati na hakuzimila. Ndimuwila inwe, mumogohe mwenuyu. 6Kinahe, tuzolwe tutano tukavile kugulwa ku senti ivili? Na kuduhu kamo kalilavilwa na Mulungu. Alisi nzwili zyose zya mitwe yinwe zyasolozivilwe. 7Muleke kogoha; inwe muli na mupango kukila tuzolwe twingi. 8Ndimuwila inwe, homwene alinzumilizya hambele na vanhu, Mwana wa Munhu akumuzumilizya hambele na vamalaika va Mulungu. 9Alisi homwene alinkana hambele na vanhu, akukanwa hambele na vamalaika va Mulungu. 10Na homwene akuyomba muhayo kwigulya na Mwana wa Munhu akutondolwa, alisi homwene alimufusa Roho Nsondo, mwenuyu 11kutondolwa ngʼo. Na ulu vakumufila inwe hambele na masinagogo na vanamhala na venekili vukovozi, muleke kwisusuma lumehoki ninga muhayo ki musuvilizye, 12kwisi Roho Nsondo akumuhembeka itungo lili genaya inwe muyombe.
13Alisi umo mugati na mbuto ya vanhu wamuwilaga, Muhembeki, umuwile mudugu wane angavulile isalo. 14Uyu wamuwilaga, Wee mugosya, nani wantulaga nene 15kuvi muyanguzi na mugavuzi kwigulya ninwe? Mwikomaje na mwilindilage hambele na vutuvu vose, kwisi vupanga wa munhu vukavile kufuma ku wingi wa nsavo zyakwe. 16Na wavawilaga mukolani, uhaya, Malale ga munhu musavi mbati gamezizye filiwa fingi. 17Na wiganikaga mu moyo gwakwe, Niteki, kwisi nkavile na hakuponela filiwa fyane? 18Na wayombaga, Nkuvezya giki: nkugabomola manhungugu gane na nkugazenga mahanya, na mwenumo nkufiponela filiwa 19fyane fyose na nsavo zyane, na nkuyiwila myuye yane, Myuye, uli na tusoga twingi ku myaka mingi, usuhe, 20ulye, unwe, usate. Alisi Mulungu wamuwilaga, Muhumbu veve, vuziku wenuvu vakuzikova myuye zyako, 21alisi genaya wasavaga gakuviho kumwa nani? Sisyo ali mwenuyu homwene aliwisavila mwenekili nsavo, na akavile musavi mugati na Mulungu.
22Na wavawilaga vahemba vakwe, Kunguno yeniyi ndimuwila inwe, muleke kwisusuma ku vupanga winwe 23cheniki mulye, na ku muvili cheniki muzwale. Kwisi vupanga vulikila chakulya, na muvili gulikila myenda. 24Mugalole mangʼhwangʼhwa; gakavile kulima ninga kwimbula, na gakavile na tusenge ninga ngʼo nhungugu, na Mulungu aligalisya, na inwe muligakila manoni munogwene. 25Na nani mugati ninwe alikovola kwiyongezya ninga katungo kado ku myaka yakwe nulu 26alisusuma? Ulu inwe mukakovolile kinhu kido, kuki 27mulisusuma kunguno ya genaya gangi? Mugalole mana; gakavile kupela vuzi ninga kutalazya, alisi ndimuwila inwe ati, ninga Salomo mu lukumo lwakwe lose akazwalile kitisi limo mugati nago. 28Ulu Mulungu aligazwika sisyo maswa ga mumalale, hogene galiho lelo alisi igolo gakutagilwa mu moto, haho akukila 29kuvazwika inwe va luhigi ludo? Na inwe muleke kukovelezya cheniki inwe mulye na cheniki muzwale na muleke kuhahala. 30Kwisi vapagani va liwelelo valigatamanilwa gose genaya; alisi Vava winwe alimanicha ati muligafunda genaya. 31Alisi hambele muvukove vutemi wakwe, na genaya gakongeziwa kuwinwe. 32Uleke kogoha veve idale ido, kwisi Vava winwe atogilwe kumupa inwe vutemi. 33Muziguzye nsavo zinwe na mupane, mwivezezaje mifuko hoyene kulalahala ngʼo, nsavo hozyene kudoha ngʼo mwilunde, kwenuko 34mwivi kwegela ngʼo na ifufuzi kuzilya ngʼo. Kwisi kwenuko nsavo zinwe ziliko, kwenuko kwene moyo ginwe gukuviko.
35Mikimbili zinwe zive zinyepilwe, na tala zinwe zive 36zivakile, na muvikole vanhu hovene valimulinda Guku wavo, ulu alifuma ku winga, kigele itungo lyenili aliza na aliluguzya vamulugulile. 37Velukilwa vakumba venavo hovene Guku, ulu aliza, alivasanga vali minso; loleyene ndimuwila inwe ati, akwinyepa na akuvikazya na akwegela kuvavonecha. 38Na ulu aliza ha zamu ya vuvili ninga ya vudatu na alivasanga sisyo, velukilwa venavo. 39Mumaniche yeniyi ati, ulu mwenekili numba wamanicha itungo lyenilo mwivi aliza, mbe akazumizye numba yakwe yidulwe. 40Inwe muve tayari, kwisi Mwana wa Munhu alize mwitungo lyenilo mukaliganikile.
41Petro wamuwilaga, Guku, ulituwila iswe mukolani 42gwenugu ninga vose? Na Guku wayombaga, Nani ali kasika lufungulo mujamu na muvalaganu, homwene Guku akumutula kwigulya na vakumba vakwe kuvapa chakulya chavo mwitungo lyacho. 43Welukilwa mukumba mwenuyo homwene Guku alimusanga alita sisyo. 44Loleyene, ndimuwila inwe, akumutula kwigulya na nsavo zyose zyakwe. 45Alisi ulu mukumba mwenuyo akuyomba mu moyo gwakwe, Guku wane alikendela kwiza, na alivukizya kuvatula vakumba, vagosya na 46vakima, na kulya na kunwa na kukolwa, Guku wa mukumba mwenuyo alize lusiku lwenulo akalwiganikile na itungo akalimanikizye, na akumutambagula na 47akumupa ifungu lyakwe hamohene na vʼivengwe. Na mukumba mwenuyo homwene wakimanikaja kikowa na gukuye, alisi akakivezizye ninga akitile hanuma na 48kikowa chakwe, akutulagulwa milanga mingi. Alisi homwene akakimanikizye na witaga genayo gasikaga ha matulagulwe, akutulagulwa milanga mido. Uyo homwene wapivagwa mingi, akutondwa mingi; na ha mwenuyo mingi gavikizivilwe vakugakova mingi muno ha mwenuyo.
49Nizaga kutaga moto mu liwelelo, na nakoveki hangi 50ulu mbe gwamalaga kuvaka! Kuliho kogiwa nogiwe 51nako, na ndihaha kusika kumaliziwe. Muliganika ati 52nizileho kuleta kuhola mu liwelelo? Ndimuwila inwe, byololo, sumbwa vulekane. Kwisi vukumbu na lelo vukuviho vulekane mugati na vanhu vatano mu numba 53yimo, vadatu kwigulya na vavili, na vavili kwigulya na vadatu, ise kwigulya na mwana, na mwana kwigulya na ise, nina kwigulya na mwanike, na mwanike kwigulya na nina, nina vukwi kwigulya na mkamwana, na mkamwana kwigulya na nina vukwi.
54Na wavawilaga mbuto ya vanhu, Ulu mulivona ilunde lilivuka mu mweli, itungo lili muliyomba, Mbula 55yikwiza, na yilikwila sisyo. Na ulu muyaga gwa dakama gulipepela, haho muliyomba, Ilungula likwiza, na yilikwila sisyo. 56Inwe vagulumi, genaya galiwigela mu liwelelo na mwilunde mulimanicha kugafumbula, alisi itungo lyenili, lumehoki mukamanikizye kulifumbula lyenili? 57Na kungunoki mukavile kugafumbula 58inwe venekili genaya gali magololoku? Ulu veve ulija na mukandi wako ku baraza, ugangadike kwikondela nawe mu nzila, kwigela ngʼo akutongeke ku muyanguzi, na muyanguzi akufumye kumwa mulugaluga, na mulugaluga akutagile mu jela. 59Ndikuwila, veve kukufumako ngʼo kusika walinaga senti ya mhelo yene.
നിലവിൽ തിരഞ്ഞെടുത്തിരിക്കുന്നു:
Lukasi 12: Nym51
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nyamwezi New Testament © Bible Society of Tanzania, 1951.
