Luka 13
13
Hono mulece kuwuleka wubi wenyu, mofwa
1Madaha gago, kwali kowali wanhu wanji wono wamulonjela Yesu ze wanhu wa ku Galilaya, wono Pilato yawawulaga mu cipango cono wawulagaga mitugo yawo ye makumbiko. 2Nayo Yesu yakawatya, “Alu mukuwona Wagalilaya wawo wali wabi muno kuciza Wagalilaya wose, vyono watamiswa nhavivyo? 3Nghumutyenyi, ng'o, ye; ninga na nyenye hono mulece kunena, molofwa wose nhavivyo. 4Hamba wanhu walya we likumi na munana wono wagwilwa no munala ku Silowami, wakawulagwa, mukuwona wawo wali wabi, wacizize wose wono wekaye ku Yelusalemi? 5Nghumutyenyi, ng'o, ye, ninga nanye hono mulece kunena, molofwa wose nhavivyo.”
I Cihwanicizo co Mukuyu wono siwulelaga
6Hanyuma Yesu yakawalonjela cihwanicizo cici. “Munhu yunji yali yena mukuyu muhadikwe mu mugunda wakwe; u munhu yuyo yakabita yakusaka kuhepa mikalo mu mukuyu wuwo, ninga yakawagana wukali si nalela hamba hadodo. 7Yakamutya u mulindiliza mugunda, langa ta, myaka yiyi midatu, nizaga ho hepe mikalo mu mukuyu wuwu, hamba kuyiwona ng'o, ale wutemangaje; so cici lo wukwidawalila muhangha bwete?” 8Nayo yakapitula yakamutya, “Muwaha, wuwulekaje kanyhi mwaka 'wu, niwuzuwile, niwukupile ne suji; 9nawo hono wulele mikalo hanyuma, viswanu; ninga hono wulece kulela, langa ho kowutemanga.”
Yesu yakumuponya mucekulu yunji mwizuwa lye Sabato
10Yesu yakawa yakwijiza mu nhang'anilo yinji yo wuhembelo, mwizuwa lye Sabato. 11Baho hali na mucekulu mono yali mutamwa myaka yikumi na munana, yali yena licisi lyavu lyono lyali limwinjiye, na ku soko yiyo, u muwili wakwe yali yekunyile, hamba siyasumaga kugoloka hamba nhavi. 12Yesu yaza kumuwona yakamucema, yakamutya, “Yaya, waponywa wutamwa wako.” 13Yakamuwicila miwoko yakwe; lo lulo lulo muwili wakwe wukagoloka, yakamulumbo Mulungu. 14Ninga u muwaha we nhang'anilo yo wuhembelo yakasimba, vyono Yesu yamuponya u mucekulu yuyo mwi'zuwa lye Sabato, na ho baho yakawa kuwalonjela wanhu wono wali wekonghoye baho, yakutya, “Ko vili vilo mutandatu vyo kwitumila mulimo, holeka mu vilo vivyo, mweze kuza kulagulwa, langa mwizuwa lye sabato ng'o.” 15Ninga Muwaha yakamupitula, yakatya, “Nye mo wakoci, ma, muli nyenye, moyuli yunji mono si katulusaga ng'ombe yakwe hamba ndogowe yakwe, no kuzing'wesa mwizuwa lye sabato? 16Alu yuyu, nayo mwana wa Abulahamu, mono Setani yali yamulemaze mu myaka yiyi yikumi na munana, wulenyi, si vyali viswanu kumuponya mu wutamwa wakwe wuwo mwizuwa lye Sabato?”
17Yaza kukondya kulonga zizi, walugu wakwe wakapuwa wose; ne wanhu wose wakasecelela, ku so zinghani ze lilumbo zose, zono zetumwa no mwene.
I Cihwanicizo ce mbeyu ndodo ya Haladali
(Mat 13:31-32; Mlk 4:30-32)
18Yesu yakawuza; Uwutemi wo Mulungu winha wule? Nowihwananiza na cici? 19Wihwanile ne mhece ya Haladali, yono munhu yunji yakayisola, yakayihadika mu mugunda wakwe, yikacindika, yikawiluka, wukawa mubici, ne zindeje za mucanyha zikazenga i manhuli gazo mu manhambi gayo.
I Cihwanicizo ce cisase
(Mat 13:33)
20Kanyhi yakawawuza, “Nowuling'aniza na cici U wutemi wo Mulungu? 21Wihwanile ne cisase cono yasola mucekulu yunji, yakacihanza hanza mu wusaje we 'debe limonga, sunga wose wukatumba.”
U Mulango mufinyu
(Mat 7:13-14, 21-23)
22Yesu yakajendelela no muhinzo wakwe yakubita ku Yelusalemi kuno yakukolela mu makaya na mu vitumbi, yakuganula. 23Munhu yunji yakamuwuza; “Ati Mwijizi, alu wono wakupona wacefu?” 24Yesu yakawatya, Muhidimbale kwinjila mu mulango mufinyu, hambi nha nghumulonjelenyi mbeka, vyono wenji wojela kwinjila, ninga si wosuma. 25Cipango cokuza, cono munya kaya kokwinuka, no kudinda mulango, nanye molokwanza kwima kunze, no kukong'onha ha mulango, mukutya, “Muwaha, wucidigulile mulango.” Nayo kolopitula yawe kumutyenyi, “Si nghumumanyenyi kono mulawile!” 26Nanye mokwanza kumulonjela, mukutya, “Ase yo sese mono calizaga no kung'wa hamonga nagwe, nagwe wejizaga mu vitumbi vyetu.” 27Nayo kolotya, “Nghumutyenyi, simanyile kono mulawile; muwuce hono mwande yangu, anye wose mono mwitumaga zo wubi.” 28Kuko kolowa cililo no kugwezula meno, baho mulaza wawona Abulahamu, Isaka na Yakobo ne wawizi wose, wali mu wutemi wo Mulungu, ninga anye mukutagwa kunze! 29Wanhu wolokuza wakulawa kucilima na kumwezi, kusumuka na kutakama, wokuza no kwikala ha zindigwa mu wutemi wo Mulungu. 30Na lanjenyi ta, kowali wa munyuma wono wolowa walongozi, na kowali walongozi wono wolowa wa munyuma.
U Wendo wa Yesu kuli Yelusalemi
(Mat 23:37-39)
31Mu cipango cico Wafalisayo na wanhu wanji wakamuziza Yesu, wakumutya, “Wuwuce baha wubite hanhu hanji: hambi Helode nha yakuhila kukuwulaga.” 32Yesu yakawatya “Bitenyi nye mukalilonjele licewe lilyo. Langa ta, izuwali ne mitondo, nghulavya macisi no kuponya watamwa, ne lizuwa lye kadatu nowa nayikondeleza i milimo yangu.” 33Hamba nhavivyo izuwali, ne mitondo ne cilawu, yinojeye njendelele no muhinzo; hambi nha si yinojeye muwizi yawulajilwe kunze ya Yelusalemi. 34“Yelusalemi! Gwe Yelusalemi! Kuwawulagaga wawizi, no kuwatowa na mabwe wono wakutumwa kuli'gwe! Kalinga nali kuhila kuwakongholela wanago hamonga, nha vyono nghuku yikunyanjilaga viziyoziyo vyayo mu mabawa gayo, ninga walemaga? 35Lanje ta i Nyumba yo Mulungu wako yolekwa. Heya, mbeka, nghumutyenyi, Si molombona ng'o sunga kolo mukutya, ‘Yo mumoti mono yakuziza mwitagwa lyo Muwaha.’ ”
നിലവിൽ തിരഞ്ഞെടുത്തിരിക്കുന്നു:
Luka 13: LLKWW
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Cigogo Bible © Bible Society of Tanzania, 2002.
