Luuka 20
20
Yookoha mwaha wa ikuru sa Yeesu
1Nihuku nimoha, Yeesu axuttihaka muloko wa atthu Mpaani mwa Muluku ni alaleiyaka masu ooreeraxa, yaaphiya wa Yoowo ahooleli a asaserdoti* vamoha ni anamawera a nlamulo* ni asitokweene. 2Awo yaamukoha: “Munileele, ni ikuru heeni mumpakaanyu itthu iya? Taani yoovangheni ikuru iya?” 3Yeesu aawaakhula: “Miyotho kinimookohani etthu: Mukileele: 4Opatiso wa Yohaane waari wa wiirimu, hoye hoye wa atthu?” 5Awo yaakohana yaaworu, yeeraka: “Neera ‘wa wiirimu’ Owo onoonikoha: ‘Vano, niwoko heeni mwahaamuroromelaanyu yoowo?’ 6Menetho neera: ‘wa atthu,’ muloko wa atthu wootheene onuunivonye maluku, niwoko owo wooviriyeliwa weera Yohaane aari mprofeeti.’ 7Hiiho, yaamwaakhula: “Khanisuwenle waari wa woowi.” 8Vano Yeesu aaweerela: “Hata Miyotho nkinooleelani ni ikuru heeni kimpakelaaka itthu iya.”
Yoolikanyiha ya anamalima
9Owo aathalihera muloko wa atthu yoolikanyiha ela: “Mulopwana mmoha aaphatteya ematta ya iwuuva*. Aawooliha anamalima akina ematta ele, ni aapwaha wa mahuku mancipale. 10Mweehuhuni ya ohepha, aamurumiha murumeiyi mmoha wa anamalima weera emvaherere mpatta wa soowiima sa ematta ya iwuuva*. Anamalimatho yaammana ni yaamoomola woohikuxa etthu. 11Owo aamurumihatho murumeiyi mukina, mene yaammanatho ni yaamveiha moota woowuuliha muru, emoomolaka woohikuxa etthu. 12Aamurumiha anaararu, ni awo yaamvulaliha, enamoomola mmatta mwa iwuuva*. 13Vano muneene a ematta ya iwuuva* aahiixeerela: ‘Keereke hai? Nkimurumihe mwanaka oosiveleya. Apaale eniimuttittimihe.’ 14Emoonaka mwaana, anamalima yaavaanela yeeraka: ‘Ola ti ettuli ya mwaneene. Nrowe namwiive, ni emattaawe eniikhale yawihu.’ 15Hiiho yaamvonyera mukerekhere wa ematta ya iwuuva* ni yaamwiiva. Anaapakele eheeni mwaneene a ematta ya iwuuva*? 16Anaawe awiive anamalima ale, ni anaavahe akina ematta ya iwuuva*.” Wiiwaka yeeyo, muloko wa atthu waaheera: “Ela kheeneereye!” 17Yeesu aahaaweha nnenesene ni aahaakoha: “Vano, entaphulela eheeni yoolempwa ela: ‘Nluku anamateka yaakhoonttaaya, naathatuwa nluku noottittimiheyaxa.’ 18Ootheene eneera emorele vanlukuni nna, eniinyakatteye. Ni yoole aneera amoreliwe ni nluku nna, anaaswanyeye.” 19Anamawera a nlamulo* ni ahooleli a asaserdoti* yaasaasa mukhalelo weera yaamvare khuluwi, niwoko yaasuwela weera yaari wa yaale Yeesu uulummaawe yoolikanyiha ela. Wa soothesene, yaahoova muloko wa atthu.
Omuliva Seesari musoko
20Emuthurumelaka Yeesu, awo yaahaarumiha anamahottela yiixeeraka okhala oororomeleya, weera emvare Yeesu ni masu onghimaawe. Yaapaka yeeyo weera emvaherere wa ikuru ni olamula wa guvernadori. 21Hiiho anamahottela yaamukoha: “Muhusiha, noosuwela weera Nyuwo munuuluma ni munxuttiha yeeyo eri ya nnene, khamunthalu, mene munnaxuttiha ephiro ya Muluku ntoko eraaya ekhaikhai. 22Ontthuneya omuliva musoko Seesari, hoye hoye naari?” 23Owo aasuwela soowiixeerasaya, ni aaweerela: 24“Mukoonihere edinaariyu* emoha. Ecaambulo ni yoolempwa ela ti yawani?” 25Awo yaamwaakhula: “Ya Seesari.” Owo aaweerela: “Ya Seesari, mumvahe Seesari, ni ya Muluku, mumvahe Muluku.” 26Vano yaahooceela omvara Yeesu ni maswaawe vamaithoni wa muloko. Etikhinaka ni yoowaakhulaawe, yaamaala.
Ekhaikhai ya ovenyerera
27aSaduki* akina, aneera weera khoowowo ovenyerera, yaamwaattamela Yeesu ni yookoha ela: 28“Muhusiha,” awo yaaheera, “Moisesi oonilepela weera, munna a mulopwana mmoha akhwa aahiyaka amwaarawe oohikhalano anamwane alopwana, mulopwana ole amutheleke naamukhweli weera akhalane anamwane alopwana wa munneiye. 29Vano yaakhala axunna athanneeli. Oopacera aathela anaakhwa, ahaahiyaka anamwane alopwana. 30Anaaveeli 31ni anaararu nitho akina yaathelana ni naamukhweli owo. Hiiho yaahookhwa mmoha-mmoha axunna athanneeli, ehaahiyaka anamwane alopwana. 32Woomalihera aahookhwatho naamukhweli. 33Moovenyererani, naamukhweli anaakhale mwaara awani, yeenre athanneeli yamuthelaka yoowo?” 34Yeesu aawaakhula: “Anamwane a ehuhuweene yeela annathela ni annatheliwa. 35Vano yaawo anooniwa ophwanela okhala mpatta wa ehuhu eneera ewe ni wa ovenyerera wa akhwiiye, kheerwa ethela, naari etheliwa. 36Awo khaangwera okhwatho niwoko ari ntoko andyelo. Ari anamwane a Muluku, ereene anamwane a ovenyerera. 37Yeele yaamukhumelenle Moisesi vaniphuwani nivarelaka enoonihera weera akhwiiye amvenyerera, niwoko Moisesi aawiitthana Apwiya ‘Muluku a Abrahaamu, Muluku a Isaaki ni Muluku a Yakobe.’ 38Owo khahiyono Muluku a akhwiiye, mene a akumi, niwoko ootheene annamukhalela Yoowo.” 39Akina a anamawera a nlamulo* yaamweerela: “Mohaakhula nnene, Muhusiha!” 40Khaawo yeerera omukoha sookoha sikina.
Kristu ti Apwiya a Davide
41Vano Yeesu aahaakoha: “Heeni atthu aneeraaya weera Kristu ti mwaana a Davide? 42Davide muneenaawe aahaakhulela nnene mulivuruni ya icipo: ‘Apwiya yaaweerela Apwiyaaka: Mukilaathi moonowaaka mulopwana 43mpaka Miyo kineeraaka kiwiikaathi amwiittanaanyu vathi wa inaawosanyu.’ 44Vano, Davide ongwiitthana ‘Apwiya.’ Ongwereya hai okhala mwanawe?” 45Wiiwaka muloko wa atthu wootheene, Yeesu aaweerela oohuseraawe: 46“Mwiipasoope ni anamawera a nlamulo*. Ti woottittimiheya wa yaawo weetta ni ikuwo sooreera ni wuulumihiwa mwaatthuni ni okilaathi mmapuroni oopacera muSinagogani* ni mmapuroni oottittimiheya a mufestani. 47Awo annakhuura impa sa asinaamukhweli, ni annavekelaxa yiixeeraka. Awo eniittaruxiwe moota wootepaxa.”
നിലവിൽ തിരഞ്ഞെടുത്തിരിക്കുന്നു:
Luuka 20: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
