Luuka 17
17
Yoottheka, nroromelo, ni muteko wootthuneya
1Yeesu aaweerela oohuseraawe: “Ti woohisembeya weera sikhumelele itthu soowaatthekiha atthu, mene Ii! Onoohaawa yoowo ongwera iye! 2Waari fataari weera yoole avonyeriwe mphareiyani atthukeleliweene nxilo vaxiko, ahinaaye owo omtthekiha mmoha a asikhaani ala. 3Mwiipasoope! Munninyu attheka, mmooperere, ni owo arukunxa murima, munlevelele. 4Owo ootthekelani imaara ithannapiili vanihukuni, ni oohokoleelani imaara ithannapiili eeraka: ‘Miyo koorukunxa murima,’ munlevelele.” 5Arummwa yaaweerela Apwiya: “Mwaandyeerere nroromelonahu.” 6Owo aawaakhula: “Nyuwo mwakhalano nroromelo ntoko enuku emoha ya emostarda*, munoowera weerela mwiri ola: ‘Wiiphele ni wiiphatteiye mphareiyani,’ ni ola onoowiiwelelani. 7Noone ha mukina a nyuwo akhalanneene murumeiyi alimaka, naari mukukhuli awehawehaka ikhondoolo. Vano, owo aaphiyaka akhumaka omatta, anaamweerele: Oweke ni okilaathi weera oce? 8Hoye! Anaamweerele ha: ‘Opake yoocaaka, oolikanyihe ni okirumeele miyo kicaaka ni kiwuraka. Kaamalihaka, weyotho oceeke ni owureke.’ 9Weeraka owo anaamutthapele murumeiyi niwoko na opaka yeeyo olamuleliwaawe? 10Hiihotho nyuwo, mwaamalihaka sootheene mulamuleliwaanyu, mweereke: ‘Nri arumeiyi oohittittimiheya, nookwanihera paahi yeeyo yaatthuneya weeriwa.’”
Olamihiwa wa anamakokho muloko
11Eettaka woorowa oYerusaleemu, Yeesu aavira mmwiinanoni wa oSamariya ni oGalileiya. 12Avolowaka mmuttettheni mmoha, anamakokho muloko yaamwaattamela Yoowo. Yaaheemela ottaiwene vakhaani 13ni yaakhuwela vancipale: “Yeesu, Muhusiha, munimorele ikharari.” 14Awoonaka, aaweerela: “Murowe mwiixoonihere wa asaserdoti*.” Erowaka hiihaale, awo yaalamihiwa. 15Mmoha a yaawo, oonakaru weera oolama, aahokolowa amuttottopelaka Muluku, akhuwelaka vancipale. 16Aamukokhorela ohoolowawe Yeesu ni aamutthapela. Vano, aari muSamariya. 17Yeesu aamukoha: “Khaalamihiwe ootheene muloko? Ari woowi akina athannaaxexe? 18Khaawo mukina aahokolongwe ni aamutthapenle Muluku, ahikhanle namarwa ola?” 19Vano aamweerela: “Mvenye ni murowe – nroromelonanyu nohoovuluxani.”
Orwa wa omwene wa Muluku
20Emaara emoha Yeesu akohakohiwaka ni aFarisi* mwaha wa ehuhu, heeni oneeraaya ophiye omwene wa Muluku, aawaakhula: “Omwene wa Muluku khoongwa moota woowooneya, 21hata atthu khaanrowa weera: ‘Ori va,’ naari ‘Ori iwe,’ niwoko omwene wa Muluku ori variyariwanyu.” 22Vano Owo aaweerela oohuseraawe: “Eniiphiye mahuku nyuwo muneeraanyu muhaaweleke woona nihuku nimoha na mahuku a Mwaana a mutthu, mene khamurwa moona. 23Atthu eniiweereleni: ‘Ori iwe,’ hoye hoye ‘ori va.’ Muhaakuve waatthara. 24Mwaana a mutthu, vanihukuninawe, anaakhale ntoko overinya ommwaleela erimu yootheene. 25Ohinaayetho, ontthuneya weera Owo ahaawe itthu sincipale ni akhoottiwe ni ekhapira ela. 26Ntoko yaakhumelenlaaya vamahukuni a Nowe, hiihotho eniikhumelele vamahukuni a Mwaana a mutthu. 27Muloko wa atthu weera ocaaka, owuraka, othelanaka ni othelaniwaka, mpaka nihuku Nowe aavolongwaawe munikulani ntokotoko. Vano saaphiya mirupi ni saawiiva ootheene. 28Yaaheereiyatho hiiho ehuhuweene yeele ya Looti. Muloko wa atthu weera ocaaka, owuraka, othumaka ni othumihaka, waalaka ni otekaka. 29Nihukutho Looti aavenyaawe oSodoma, waakhuruwa mooro ni enxofre* ya wiirimu, ni waawiiva ootheene. 30Eniikhumelele hiihotho nihuku Mwaana a mutthu aneeraawe iixoonihere. 31Nihuku nno, yoowo anaakhale vanipathoni, akhalanaka sooreelasawe mpaani, ahikhuruwe weera akuxe. Hiihotho, yoowo anaakhale omatta, ahihokoleele ottuli niwoko na etthu emoha. 32Mmuupuwelele mwaariye Looti. 33Yoole ontthuna othokorora okumaawe, anaayeleele, ni yoowo ongyeleela okumaawe, anaathokorore. 34Miyo kinooleelani: ohiyuweene yoowo, atthu eeli eniikone ebeetti emoha. Mmoha anaavenxiwe ni mukina anaahiiwe. 35Asithiyana eeli eniixile etrigu vamoha. Mmoha anaavenxiwe ni mukina anaahiiwe.” 37Awo yaamukoha: “Woowi Apwiya?” Owo aamwaakhula: “Weiwo oraayawo muttembo, eniithukumanewo mattawo.”
നിലവിൽ തിരഞ്ഞെടുത്തിരിക്കുന്നു:
Luuka 17: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
