Luuka 13
13
Orukunxa murima, hoye hoye okhwa
1Ehuhuweene yeele, akina yaari vaavaale yaamuthalihera Yeesu moota heeni Pilatu aatakansenraawe ephome ya aGalileiya akina ni sooveleelasaya. 2Yeesu aawaakhula: “Munuupuwela weera aGalileiya awo yaari anamattheka waapwaha ootheene akina niwoko na ohaawa moota ola? 3Miyo kinooleelani weera hoye! Mwaahirukunxatho murima, nyuwo ootheene munooriheya. 4Munuupuwelatho weera atthu muloko ni athannaararu akhwiiye ehuhuweene yeele yaamorenle wa yaawo etoore* ya Silowami yaari ni milattu waapwaha ootheene akina a oYerusaleemu? 5Miyo kinooleelani weera hoye! Mwaahirukunxatho murima, nyuwo ootheene munooriheya.” 6Vano aahaathalihera yoolikanyiha ela: “Mulopwana mmoha aakhalano mwiri wa efiigu waaphatteiwe mmattamwawe ya iwuuva*. Aarowa waasaasa soowiima mwemmwe, vaheera khaaphwannyeru naari emoha. 7Tivawo aamweerenlaawe yoole aawehaweha ematta ya iwuuva*: ‘Sookwana iyaakha tthaaru miyo kaasaasaka soowiima muumu, ni nkimphwanya. Wuuhe! Niwoko na heeni nneeraahu nihiye owuwuraka etthaya ela siiyoweene?’ 8Namawehaweha ole aamwaakhula: ‘Apwiya, muhiye ola mpaka mwaahiyu, ni miyo nkithipe mukerekheremwaya ni kinoohela ethaadyira. 9Mwaahiyu wiima, onooreera. Waahiima, muuheke.’”
Muthiyana mmoha onlamihiwa eSaabadu
10eSaabadu emoha Yeesu eera axuttihaka muSinagogani* emoha, 11ni vale aakhala muthiyana mmoha aarino munepa waamvoreiha wa iyaakha muloko niithanatthaaru. Owo anneetta oowuurameene, nitho khaawera wiinuwa. 12Amoonaka, Yeesu aamwiitthana vahoolo ni aamweerela: “Muthiyana, nyuwo mohoopowa ni erettaanyu.” 13Vano aamwiiyaathera matataawe, ni woowaakuveya owo aahiinuwa ni aamuttottopela Muluku. 14Mutokweene a eSinagoga*, anyoonyiweene niwoko Yeesu aalamihalaawe nihuku na eSaabadu, aaheerela muloko wa atthu: “Aakhala mahuku mathannamosa vasimanani antthuneya ovara muteko. Ngwe mahukweene yaawo weera mulamihiwe, ohikhanle eSaabadu!” 15Apwiya yaamwaakhula: “Anamwiixeera! Ootheene a nyuwo munnataphula eSaabadu emombe, hoye hoye buuru a munikhoolani ni munnakuxa muronghaka ovaha maahi. 16Vano, khoontthuneya weera muthiyana ola, mwaana a Abrahaamu, aatthukiwe ni Satana wa iyaakha muloko niithanatthaaru, otaphuliwa eSaabadu mwa yeeyo aatthukeliwaawe?” 17Eerakaru hiiho, amwiittanaawe ootheene yaahuuliwa muru, mene muloko wa atthu wannahakalala niwoko na sootikhiniha sootheene Owo aapakaawe.
Soolikanyiha sa mmiso wa emostarda* ni sa eferementu
18Vano Yeesu aakoha: “Omwene wa Muluku onlikana ni eheeni? Kilikanxeke ni eheeni? 19Ori ntoko enuku ya emostarda* mutthu aakuxalaawe ni aanlaawe ottimbeniwawe. Ele yaahunnuwa ni yaathatuwa mwiri, ni apalame a wiirimu yaapaka ipuurusaya mphandinimwaya.” 20Owo aakohatho: “Kilikanxe ni eheeni omwene wa Muluku? 21Ori ntoko eferementu aakuxalaawe muthiyana ni aatakansalaawe ni ephepa yincipale mpaka onyaruwa yootheene.”
Mulako woophureya
22Vano Yeesu aarowa axuttihaka musidadeni ni mmittettheni, apwahereraka mpatta wa oYerusaleemu. 23Mukina aamukoha: “Apwiya, yaale eniivuluxiwe ari vakhaani?” Owo aamweerela: 24“Mwiilipihe vancipale ovolowa mulako woophureya, niwoko Miyo kinooleelani weera ancipale eniyeerere ovolowa, mene kheerwa ewera. 25Vano, mwaneene a vaate aavenyaka ni aawalaka mulako, nyuwo mmwikhale vaate mmanaka nsele mwaavekelaka: ‘Apwiya, munihulele nsele!’ Wa sootheene awo eniyaakhule: ‘Nkoosuwenleni, hata nkisuwenle munkhumaanyuwo.’ 26Vano nyuwo mmweere: ‘Naahooca ni naawura vamoha ni Nyuwo ni mwaaxuttiha mmisewenimwahu.’ 27Mene awo eniyaakhule: ‘Nkoosuwenleni, hata nkisuwenle munkhumaanyuwo. Mususeke wa Miyo, ootheene nyuwo mumpaka soonanara!’ 28Vale onuukhale wiinla, ni okhuuriha maino nyuwo muneeraanyu mmoone Abrahaamu, Isaaki ni Yakobe ni maprofeeti ootheene moomweneni wa Muluku, mureenetho nyuwo vaate. 29Atthu eniiwe ninkhuma nsuwa, ninkela nsuwa, ottuthuwani ni ohitto, ni eniikilaathi vameesa moomweneni wa Muluku. 30Mwa yeeyo, aakhala ookisera eniikhale oopacera, ni oopacera eniikhale ookisera.”
Yeesu onlalamika niwoko na oYerusaleemu
31Ehuhuweene yeele akina a aFarisi* yaamwaattamela Yeesu ni yaamweerela: “Mvenye va ni murowe elapo ekina, niwoko Herodi ontthuna owiivani.” 32Owo aawaakhula: “Mwamuleele khwatte owo: kinimoomola minepa soonanara ni kinoolamiha muloko wa atthu olelo ni omaalo, ni nihuku nanaararu kinookwanihera mutekwaaka. 33Ontthuneyatho opwaherera olelo, omaalo ni omurotto, niwoko vekhaikhai khoongwereya wuupuwela weera naari mprofeeti mmoha akhwe vanipuroni nikina, ohikhanle oYerusaleemu. 34Yerusaleemu, Yerusaleemu, weyo ongwiiva maprofeeti ni onaavonya maluku yaawo orumiheliwaawo: Imaara ihayi Miyo kaatthunaaka waathukumanya anamwaniinyu ntoko nttehi ninaathukumanyaaya axaanaaya mmapuphani, mene khoontthuna! 35Moone, empaawo yoohiiwa yoothaamiwa. Miyo kinooleela weera weyo khoorwa okoonatho mpaka ehuhu oneeraawo weere: ‘Ooreelihiwa ti Yoowo ongwa mwa Nsina na Apwiya.’”
നിലവിൽ തിരഞ്ഞെടുത്തിരിക്കുന്നു:
Luuka 13: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
