Yohaane 5
5
Olamihiwa wa mulopwana ooheetta
1Eviraka ehuhu ekina, Yeesu aarowa oYerusaleemu ofestani emoha ya aYuda. 2Vano naakhala oYerusaleemu, vakhiviru wa mulako wa ikhondoolo, ntthiya nniitthaniwa vaHeberi ‘Betzatha’ naarino milako mithanu. 3Weiwo yaakhovelela okhalawo atthu ancipale oovoreiwa ni oorakala: oohoona, ootuthunya ni ooheetta. 5Mmoha a yaale yaari weiwe aakhalawo aheettaka wa iyaakha miloko miraru niithannatthaaru. 6Amoonaka iixaatalenleene ni asuwelaka weera owo aakhala ooheetta wa ehuhu eromoliwe, Yeesu aamukoha: “Nyuwo muntthuna olamihiwa?” 7Mutthu ooheetta aamweerela: “Apwiya, nkinono mutthu ookikhavihera ovolowa vatthiyani maahi etekumaka. Miyo keereraka ovolowa, mukina omvolova miyo kihinaaye.” 8Yeesu aamweerela: “Muvenye, mukuxe nrepananyu ni mweette!” 9Woowaakuveya mulopwana aalama, aakuxa nrepanawe ni aapacera weetta. Nihuku yeereiyaaya yeeyo naari eSaabadu, 10tivawo aYuda yaamweerenlaaya mulopwana aalamihiwe: “Olelo eSaabadu! Khoontthuniheriwa okuxa nrepa.” 11Mene owo aawaakhula: “Mulopwana ookilamihale ookeerela: ‘Mukuxe nrepananyu ni mweette.’” 12Vano yaamukoha: “Mulopwana heeni ooweerenle weera okuxe nrepa ni weette?” 13Mulopwana aalamihiwe khaamusuwenle niwoko Yeesu aalakaseya eriyari ya atthu ancipale. 14Vahoolo vakhaani Yeesu aamuphwanya Mpaani mwa Muluku ni aamweerela: “Moone, nyuwo moolama. Muhihokoleele ottheka weera etthu yootepa ehookhumeleleni.” 15Mulopwana aarowa ni aahaathalihera aYuda weera ti Yeesu omulamihale.
Okumi niwoko na Mwaana a Muluku
16Vano aYuda yaapacera omuttharatthara Yeesu niwoko Owo aapaka etthu ele eSaabadu. 17Yeesu aaweerela: “Atithaka annavara muteko mpaka olelo ni Miyotho kinnavara muteko.” 18Niwoko nenenenno, aYuda yannatepa otthuna omwiiva, khoohiyono niwoko na ohiiwelela nlamulo na eSaabadu paahi, mene aaheeratho weera Muluku ti Atithawe muneenaawe navetho iilikanxaka ni Muluku. 19Yeesu aaweerela: “Miyo kinooleelani vekhaikai weera Mwaana khangwera opaka etthu muneenaawe. Paahi ongwera opaka yeeyo owoonenlaawe Atithawe epakaka niwoko yeeyo Atiithi ampakaaya, Mwaana onoopakatho. 20Atiithi animusivela Mwaana ni animoonihera sootheene ampakaaya. Aani, Awo eniimoonihere miteko soopwaha iya weera mutikhine. 21Vano, mooteene yoowo Atiithi anaavenyererihaaya akhwiiye ni anaavahaaya okumi, hiihotho Mwaana onaavaha okumi yaale Owo onaatthunaawe. 22Atiithi khaawo animuthorihaaya, mene aamwinnyerera Mwaana nthorihelo nootheene 23weera ootheene emuttittimihe Mwaana ntoko anaattittimihaaya Atiithi. Yoole ohinimuttittimiha Mwaana, khanaattittimihatho Atiithi yaamurumihale. 24Miyo kinoororomelihani: Yoowo oniiwa maswaaka ni anaaroromela Yaawo aakirumihale, ookhalano okumi woohimala ni kharwa athorihiwa, mene oolapuwa mookhwaani aphiyaka mpaka mookumini. 25Miyo kinoororomelihani vekhaikhai weera enoophiya ehuhu, aani, yoophiya, akhwiiye eneeraaya yiiwe nsu na Mwaana a Muluku ni yaale aniiwa nsu, eniikhale ni okumi. 26Vano, mooteene yoowo Atiithi ankhalanaaya okumi mwa aneenaaya, hiihotho aamvaha Mwaana weera akhalenotho okumi mwa muneenaawe. 27Aamvahatho ikuru weera athorihe niwoko ori Mwaana a mutthu. 28Muhitikhine yeeyo, niwoko enoophiya ehuhu ootheene ari mmahiyeni eneeraaya yiiwe nsunawe ni eniivenye. 29Yaale yaapanke yooreera eniivenyerere wa okumi, ni yaale yaapanke yoonanara weera ethorihiwe. 30Miyo nkingwera opaka naari etthu muneenaakaru. Kinthoriha paahi ntoko kiniiwaaka ni nthorihelonaka ti na ekhaikhai niwoko nkinaasaasa wiisiveliha, mene waasiveliha Yaale yaakirumihale.
Onamoona mwaha wa Yeesu
31Kiikhalelaka onamoona Miyo muneenaaka, onamoonaaka khoohiyono wa ekhaikhai. 32Aakhala Akina ankikhalela onamoona ni koosuwela weera onamoonaaya mwaha wa Miyo ti wa ekhaikhai. 33Nyuwo mwaamurumihela atthu Yohaane ni owo aakhalela onamoona mwaha wa ekhaikhai. 34Nkinaakhulela onamoona wa atthu, mene kinghima yeeyo weera nyuwo muvuluxiwe. 35Yohaane aari onyaari waavarela ni waamwaleela waara, ni mweehuhuni ekina nyuwo mwaatthuna ohakalala niwoko na waarawawe. 36Miyo kookhalano onamoona woompwaha Yohaane. Mutekweene yoowo Atiithi akivanghaaya weera kikwanihere ni Miyo kineera kikwaniheraka, onkhalela onamoona weera Atiithi akirumihale. 37Atiithi akirumihale, Awo aneenaaya yaakikhalela onamoona. Nyuwo khamunatoko wiiwa nsunaya, hata woona ekhalelowaaya. 38Mpaka nsunaya khaninkhala mwa nyuwo niwoko khamunimuroromela Yoowo Atiithi amurumihalaaya. 39Nyuwo munsoma Yoolempwa* nnenesene niwoko munuupuwela weera mmwiphwanyemo okumi woohimala. Ti Yoolempwa* enkikhalela onamoona. 40Wa soothesene, nyuwo khamuntthuna orwa wa Miyo weera mphwanye okumi woohimala. 41Miyo nkinaakhulela ovuwa wa atthu, 42mene kohoosuwelani nyuwo. Koosuwela weera nyuwo khamunono osivela wa Muluku. 43Miyo kirwiiye mwa Nsina na Atithaka ni nyuwo khamukaakhulenle, mukinatho awa mwa nsinanaweru, nyuwo mmwimwaakhulele. 44Mmwiroromele hai mwaakhulelanaka mukina ni mukhwaawe ovuwa, mene khamunaasaasa ovuwa ongwa wa Muluku mmoharu. 45Muhuupuwele weera Miyo nkiwoothereni ohoolo wa Atiithi. Ti Moisesi munimuroromelaanyu ori namootheraanyu. 46Nyuwo mwaamuroromela Moisesi, saano mukiroromenleenetho Miyo niwoko owo aalepa mwaha wa Miyo. 47Woonaka weera khamunroromela yeeyo aalempaawe, mmwiroromele hai yeeyo kinghimaaka?”
നിലവിൽ തിരഞ്ഞെടുത്തിരിക്കുന്നു:
Yohaane 5: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
