Yohaane 1
1
Nsu noothatuwa erutthu
1Ompacereroni naari Nsu, ni Nsu naari ni Muluku, ni Yooweene aari Muluku. 2Nno naari ni Muluku ompacereroni. 3Itthu sootheene saapattuxiwe ni Nsu nno. Kheewoworu etthu ekhanle nihipankaaya nenno. 4Okumi waari mwa Nenno, ni Nno naari waara wa atthu. 5Waara ommwaleela mpiphini ni epiphi kheewinne. 6Aari mulopwana aarummwe ni Muluku, nsinanawe Yohaane. 7Owo aahoowa ntoko namoona weera akhalele onamoona, ni hiiho atthu ootheene eroromele niwoko na yoowo. 8Owo muneenaawe khaahiyono waara, aarweenletho okhalela onamoona mwaha wa waara. 9Weera orwaaka mweelaponi Waara wa ekhaikhai, mwa Yoowo onaamwaleela atthu ootheene. 10Owo aari mweelaponi, elapo epattuxiwe ni Yoowo, elapotho khayaamusuwenle. 11Aarweenle yaawo yaari awawe, mene awawe khayaamwaakhenle. 12Wa soothesene, wa yaale yaamwaakhenle, yaale anroromela mwa Nsinanawe, ohaavaha owera othatuwa anamwane a Muluku; 13yaale ahiyariwe ni ekhapira ya omutthu, hata ni otthuna wa erutthu, naari ni otthuna wa mulopwana, mene ayariwe wa Muluku. 14Nsu noothatuwa erutthu ni naakhala variyariwahu. Nohoona ovuwawaya, aani ovuwa wa Mwaana mmoharu aawiiye wa Atiithi, oosareya mahala ni ekhaikhai. 15Yohaane onnakhalela onamoona Nsu. Owo onnakhuwela, eeraka: “Owo ti Yoole kaamuhimmaaka: ‘Yoole ongwa ottuliwaka ti Mutokweenaaka, niwoko miyo kihinaaye okhala, Owo aakhala.’” 16Ootheene hiyo nohaakhela wa soowaattasawe mahala mwa mahala. 17Vano, nlamulo nivahiwe ni Moisesi, mahala ni ekhakhai erwiiye ni Yeesu Kristu. 18Khaawo omoonne Muluku, ahikhanle Mwanawe mmoharu ori vamoha ni Atiithi mwa Yoowo aasuwelihale.
Yohaane mpatisa onkhootta okhala Kristu
19aYuda oYerusaleemu yaarumaaya asaserdoti* ni aLeevi weera emukohe aari taani, onamoona Yohaane aakhalenlaawe ti ola: 20Owo aahima ni khaakhoontte, aani aahima mwaatthuni: “Nkihiyono Kristu.” 21Yaamukoha: “Vano, taani nyuwo? Eliya?” Owo aaheera: “Nkihiyono.” “Mprofeeti?” Owo aawaakhula: “Hoye.” 22Ommaleloni yaamukoha: “Nyuwo taani? Munaakhule weera naaleele yaawo anirumme. Munghima eheeni sa muneenaanyu?” 23Yohaane aawaakhula ni masu a mprofeeti Yesaya: “Miyo nsu ninkhuwela munikareni: ngwookolele ephiro Apwiya.” 24aFarisi* akina yaarummwale 25yaamukohakoha: “Vano, heeni mumpatisaanyu muhikhanle Kristu, hata Eliya, hata mprofeeti?” 26Yohaane aawaakhula: “Miyo kimpatisa ni maahi; variyariwanyutho ookhala Mukina nyuwo muhimusuwenlaanyu. 27Owo ti Yoowo onrwa ottuliwaka, ni miyo nkimphwanela otaphula miraamba sa ikwakwaattasawe.” 28Itthu sootheene seiye seereiye oBetaniya okhopela wa oYordanu, weiwo Yohaane eeraawewo opatisa.
Yeesu eputtiputthi ya Muluku
29Oxaawaya Yohaane aamoona Yeesu amwaattamelaka ni aaheera: “Moone – Eputtiputthi ya Muluku emvenxa soottheka sa elapo ya vathi. 30Ola ti Yoole kaamuhimmaaka, keeraka: ‘Ottuliwaka onimoorwa Mulopwana Mmoha ookipwaha miyo, niwoko miyo kihinaaye okhala, Owo aakhala.’ 31Miyo muneenaaka nkaamusuwenle, mene niwoko na yeeyo miyo kirwiiyaaka opatiso ni maahi weera Owo awe ni ooniheriwe wa aYixrayeli.” 32Vano Yohaane aakhalela onamoona ola: “Miyo kohoona Munepa okhuruwaka wiirimu ntoko ekhunda enamweemelela Yoowo. 33Miyo nkaarwa omusuwela kahaaleeliwe ni Yoole okirumme opatiso ni maahi: ‘Yoole muneeraanyu mmoone omukhuruwelaka Munepa ni omweemelelaka – ti Yoowo ompatisa ni Munepa Wootteela.’ 34Miyo kohoona ni kinnakhalela onamoona weera Ola Mwaana a Muluku.”
Oohusera oopacera a Yeesu
35Oxaawaya Yohaane aaritho vaavaale vamoha ni eeli a oohuseraawe. 36Amoonakaru Yeesu aviraka, aaheera: “Mmoone – Ola Eputtiputthi ya Muluku!” 37Emwiiwakaru uulumaka yeeyo, oohusera ooweeli ale yaamutthara Yeesu. 38Arukunuwaka ni awoonaka Yeesu ooweeli emuttharaka, aahaakoha: “Muntthuna eheeni?” Awo yaamwaakhula: “Rabi (entaphulela ‘Muhusiha’), muphiyenre woowi?” 39Owo aawaakhula: “Murweeke ni munimoona.” Vano yaarowa oxekuwa, yaahoona Owo aaphiyenraawewo ni yaakhala vamoha ni Yoowo nihuku nootheene nne. 40Andreiya, munneiye Simeyoni Pedru, aari mmoha a eeli ale yiiwale seiye Yohaane aahimmaawe ni yaamutthanre Yeesu. 41Oopacera aamphwannyaawe aari Simeyoni, munneiye ni aamweerela: “Noomphwanya Mesiya (eyo tiiyo Kristu).” 42Vano aamurongha wa Yeesu. Yeesu aangweha yoowo ni aamweerela: “Nyuwo ti Simeyoni, mwaana a Yohaane. Mmwiitthaniwe Kefasi, entaphulela Pedru.”
Yeesu onimwiitthana Filipe ni Nataneyeli
43Oxaawaya Yeesu aahuupuwela orowa oGalileiya. Aamphwannyaawe Filipe, aamweerela: “Mukitthareke.” 44Filipe, aari oBetisayida, hiiho ntoko Andreiya ni Pedru. 45Owo aamphwanya Nataneyeli ni aamweerela: “Noomphwanya Yoole aamulempaawe Moisesi mmalamuloni, nitho mwa Yoowo maprofeeti yaamulempaaya: Yeesu muNasarete, Mwaana a Yoseefe.” 46Nataneyeli aamukoha: “Nasarete? Enoowereya orwawo etthu yooreera?” Filipe aamweerela: “Ngwe ni moone.” 47Amoonaka Nataneyeli akhuveelaka, Yeesu aaheera: “Mmoone – muYixrayeli a ekhakhai ni oohilokottheya.” 48Nataneyeli aamukoha: “Mukisuwenle woowi?” Yeesu aamwaakhula: “Miyo kiwoonneni mwaaraanyu nlelo vathi wa mwiri wa efiigu, Filipe ahinaaye owiitthanani.” 49Vano Nataneyeli aahima: “Muhusiha, nyuwo Mwaana a Muluku, Mwene a aYixrayeli.” 50Yeesu aamweerela: “Munroromela niwoko keenraaka kiwoonneni vathi wa mwiri wa efiigu. Nyuwo mmoone itthu sitokotoko soopwahaxa seiya.” 51Aapwahereratho: “Miyo kinooleelani ekhaikhai: Nyuwo munimoona wiirimu woohuleya ni andyelo a Muluku ewelaka ni emukhuruwelaka Mwaana a mutthu.”
നിലവിൽ തിരഞ്ഞെടുത്തിരിക്കുന്നു:
Yohaane 1: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
